| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. நித்³தே³ஸவண்ணனா
2. Niddesavaṇṇanā
1. பட²மனயோ ஸங்க³ஹாஸங்க³ஹபத³வண்ணனா
1. Paṭhamanayo saṅgahāsaṅgahapadavaṇṇanā
1. க²ந்த⁴பத³வண்ணனா
1. Khandhapadavaṇṇanā
6. இதா³னி பஞ்சக்க²ந்தா⁴தி³வஸேன நிக்கி²த்தமாதிகங் ‘ஸங்க³ஹோ அஸங்க³ஹோ’திஆதீ³ஹி நயமாதிகாபதே³ஹி ஸத்³தி⁴ங் யோஜெத்வா த³ஸ்ஸேதுங் ரூபக்க²ந்தோ⁴ கதிஹி க²ந்தே⁴ஹீதிஆதி³னா நயேன நித்³தே³ஸவாரோ ஆரத்³தோ⁴. தத்த² யஸ்மா ‘‘ஸங்க³ஹோ அஸங்க³ஹோதிஆதி³காய நயமாதிகாய ‘‘தீஹி ஸங்க³ஹோ, தீஹி அஸங்க³ஹோ’’தி நயமுக²மாதிகா ட²பிதா, தஸ்மா ரூபக்க²ந்தா⁴தீ³னங் ஸங்க³ஹங் த³ஸ்ஸேதுங் கதிஹி க²ந்தே⁴ஹி கதிஹாயதனேஹி கதிஹி தா⁴தூஹீதி தீணி க²ந்தா⁴யதனதா⁴துபதா³னேவ உத்³த⁴டானி. ‘சத்தாரி ஸச்சானீ’திஆதீ³ஸு ஏகம்பி ந பராமட்ட²ங். யஸ்மா ச ‘‘ஸபா⁴கோ³ விஸபா⁴கோ³’’தி ஏவங் லக்க²ணமாதிகா ட²பிதா, தஸ்மா இமஸ்ஸ பஞ்ஹஸ்ஸ விஸ்ஸஜ்ஜனே ரூபக்க²ந்தோ⁴ ஏகேன க²ந்தே⁴னாதிஆதி³ வுத்தங். ஸபா⁴கா³ ஹி தஸ்ஸ ஏதே க²ந்தா⁴த³யோதி. தத்த² ஏகேன க²ந்தே⁴னாதி ரூபக்க²ந்தே⁴னேவ. யஞ்ஹி கிஞ்சி ரூபங் ரூபக்க²ந்த⁴ஸபா⁴க³த்தா ரூபக்க²ந்தொ⁴த்வேவ ஸங்க³ஹங் க³ச்ச²தீதி ரூபக்க²ந்தே⁴னேவ க³ணிதங், தங் ரூபக்க²ந்தே⁴னேவ பரிச்சி²ன்னங். ஏகாத³ஸஹாயதனேஹீதி மனாயதனவஜ்ஜேஹி. ஸப்³போ³பி ஹி ரூபக்க²ந்தோ⁴ த³ஸாயதனானி த⁴ம்மாயதனேகதே³ஸோ ச ஹோதி, தஸ்மா ஏகாத³ஸஹாயதனேஹி க³ணிதோ , பரிச்சி²ன்னோ. ஏகாத³ஸஹி தா⁴தூஹீதி ஸத்தவிஞ்ஞாணதா⁴துவஜ்ஜாஹி ஏகாத³ஸஹி ஏதாஸு ஹி அபரியாபன்னங் ரூபங் நாம நத்தி².
6. Idāni pañcakkhandhādivasena nikkhittamātikaṃ ‘saṅgaho asaṅgaho’tiādīhi nayamātikāpadehi saddhiṃ yojetvā dassetuṃ rūpakkhandho katihi khandhehītiādinā nayena niddesavāro āraddho. Tattha yasmā ‘‘saṅgaho asaṅgahotiādikāya nayamātikāya ‘‘tīhi saṅgaho, tīhi asaṅgaho’’ti nayamukhamātikā ṭhapitā, tasmā rūpakkhandhādīnaṃ saṅgahaṃ dassetuṃ katihi khandhehi katihāyatanehi katihi dhātūhīti tīṇi khandhāyatanadhātupadāneva uddhaṭāni. ‘Cattāri saccānī’tiādīsu ekampi na parāmaṭṭhaṃ. Yasmā ca ‘‘sabhāgo visabhāgo’’ti evaṃ lakkhaṇamātikā ṭhapitā, tasmā imassa pañhassa vissajjane rūpakkhandho ekena khandhenātiādi vuttaṃ. Sabhāgā hi tassa ete khandhādayoti. Tattha ekena khandhenāti rūpakkhandheneva. Yañhi kiñci rūpaṃ rūpakkhandhasabhāgattā rūpakkhandhotveva saṅgahaṃ gacchatīti rūpakkhandheneva gaṇitaṃ, taṃ rūpakkhandheneva paricchinnaṃ. Ekādasahāyatanehīti manāyatanavajjehi. Sabbopi hi rūpakkhandho dasāyatanāni dhammāyatanekadeso ca hoti, tasmā ekādasahāyatanehi gaṇito , paricchinno. Ekādasahi dhātūhīti sattaviññāṇadhātuvajjāhi ekādasahi etāsu hi apariyāpannaṃ rūpaṃ nāma natthi.
அஸங்க³ஹனயனித்³தே³ஸே கதிஹி அஸங்க³ஹிதோதி ஸங்கே²பேனேவ புச்சா² கதா. விஸ்ஸஜ்ஜனே பனஸ்ஸ யஸ்மா ரூபக்க²ந்த⁴ஸ்ஸ விஸபா⁴கா³ சத்தாரோ அரூபக்க²ந்தா⁴, ஏகங் மனாயதனங், ஸத்த விஞ்ஞாணதா⁴துயோ; தஸ்மா சதூஹி க²ந்தே⁴ஹீதிஆதி³ வுத்தங். இமினா நயேன ஸப்³ப³பதே³ஸு ஸங்க³ஹாஸங்க³ஹோ வேதி³தப்³போ³. இமஸ்மிங் பன க²ந்த⁴னித்³தே³ஸே – ‘‘ரூபக்க²ந்தோ⁴ கதிஹி க²ந்தே⁴ஹீ’’திஆதி³ம்ஹி தாவ ஏகமூலகே ஸங்க³ஹனயே ஸரூபேனேவ த³ஸ்ஸிதா பஞ்ச புச்சா², பஞ்ச விஸ்ஸஜ்ஜனானி. அஸங்க³ஹனயே ஸங்கே²பேன த³ஸ்ஸிதா பஞ்ச புச்சா², பஞ்ச விஸ்ஸஜ்ஜனானி. இமினா உபாயேன து³கமூலகாதீ³ஸுபி புச்சா²விஸ்ஸஜ்ஜனானி வேதி³தப்³பா³னி. ரூபக்க²ந்த⁴மூலகாயேவ செத்த² து³கதிகசதுக்கா த³ஸ்ஸிதா. பஞ்சகே பன ‘‘ரூபக்க²ந்தோ⁴ ச…பே॰… விஞ்ஞாணக்க²ந்தோ⁴ சா’’தி ஏவங் பே⁴த³தோ ச, ‘‘பஞ்சக்க²ந்தா⁴ கதிஹி க²ந்தே⁴ஹீ’’தி ஏவங் அபே⁴த³தோ சாதி த்³விதா⁴ புச்சா²விஸ்ஸஜ்ஜனானி கதானி. ஏவங் பாளினயோ வேதி³தப்³போ³தி.
Asaṅgahanayaniddese katihi asaṅgahitoti saṅkhepeneva pucchā katā. Vissajjane panassa yasmā rūpakkhandhassa visabhāgā cattāro arūpakkhandhā, ekaṃ manāyatanaṃ, satta viññāṇadhātuyo; tasmā catūhi khandhehītiādi vuttaṃ. Iminā nayena sabbapadesu saṅgahāsaṅgaho veditabbo. Imasmiṃ pana khandhaniddese – ‘‘rūpakkhandho katihi khandhehī’’tiādimhi tāva ekamūlake saṅgahanaye sarūpeneva dassitā pañca pucchā, pañca vissajjanāni. Asaṅgahanaye saṅkhepena dassitā pañca pucchā, pañca vissajjanāni. Iminā upāyena dukamūlakādīsupi pucchāvissajjanāni veditabbāni. Rūpakkhandhamūlakāyeva cettha dukatikacatukkā dassitā. Pañcake pana ‘‘rūpakkhandho ca…pe… viññāṇakkhandho cā’’ti evaṃ bhedato ca, ‘‘pañcakkhandhā katihi khandhehī’’ti evaṃ abhedato cāti dvidhā pucchāvissajjanāni katāni. Evaṃ pāḷinayo veditabboti.
2. ஆயதனபதா³தி³வண்ணனா
2. Āyatanapadādivaṇṇanā
22. ஆயதனபத³னித்³தே³ஸாதீ³ஸு ஆயதனபத³னித்³தே³ஸே தாவ சக்கா²யதனங் ஏகேன க²ந்தே⁴னாதி ஏகேன ரூபக்க²ந்தே⁴னேவ, ஏகேன சக்கா²யதனேனேவ ஏகாய சக்கு²தா⁴துயாவ ஸங்க³ஹிதந்தி வேதி³தப்³ப³ங். ஸோதாயதனாதீ³ஸுபி இமினாவ நயேன ஸங்க³ஹாஸங்க³ஹோ வேதி³தப்³போ³. அஸங்க²தங் க²ந்த⁴தோ ட²பெத்வாதி எத்த² பன யஸ்மா அஸங்க²தங் த⁴ம்மாயதனங் நாம நிப்³பா³னங், தஞ்ச க²ந்த⁴ஸங்க³ஹங் ந க³ச்ச²தி; தஸ்மா ‘க²ந்த⁴தோ ட²பெத்வா’தி வுத்தங். சதூஹி க²ந்தே⁴ஹீதி ரூபவேத³னாஸஞ்ஞாஸங்கா²ரக்க²ந்தே⁴ஹி. நிப்³பா³னவஜ்ஜஞ்ஹி த⁴ம்மாயதனங் ஏதேஹி ஸங்க³ஹிதங். விஞ்ஞாணக்க²ந்தே⁴ன பன ட²பெத்வா த⁴ம்மாயதனத⁴ம்மதா⁴துயோ ஸேஸாயதனதா⁴தூஹி ச தங் ந ஸங்க³ய்ஹதி. தேன வுத்தங் – ‘‘ஏகேன க²ந்தே⁴ன, ஏகாத³ஸஹாயதனேஹி, ஸத்தரஸஹி தா⁴தூஹி அஸங்க³ஹித’’ந்தி. யதா² ச தே ஹெட்டா² ரூபக்க²ந்த⁴மூலகா, ஏவமிதா⁴பி சக்கா²யதனமூலகாவ நயா வேதி³தப்³பா³. து³கமத்தமேவ பன பாளியங் த³ஸ்ஸெத்வா ‘‘த்³வாத³ஸாயதனானீ’’தி அபே⁴த³தோவ புச்சா²விஸ்ஸஜ்ஜனங் கதங். தா⁴துனித்³தே³ஸேபி ஏஸேவ நயோ.
22. Āyatanapadaniddesādīsu āyatanapadaniddese tāva cakkhāyatanaṃ ekena khandhenāti ekena rūpakkhandheneva, ekena cakkhāyataneneva ekāya cakkhudhātuyāva saṅgahitanti veditabbaṃ. Sotāyatanādīsupi imināva nayena saṅgahāsaṅgaho veditabbo. Asaṅkhataṃ khandhato ṭhapetvāti ettha pana yasmā asaṅkhataṃ dhammāyatanaṃ nāma nibbānaṃ, tañca khandhasaṅgahaṃ na gacchati; tasmā ‘khandhato ṭhapetvā’ti vuttaṃ. Catūhi khandhehīti rūpavedanāsaññāsaṅkhārakkhandhehi. Nibbānavajjañhi dhammāyatanaṃ etehi saṅgahitaṃ. Viññāṇakkhandhena pana ṭhapetvā dhammāyatanadhammadhātuyo sesāyatanadhātūhi ca taṃ na saṅgayhati. Tena vuttaṃ – ‘‘ekena khandhena, ekādasahāyatanehi, sattarasahi dhātūhi asaṅgahita’’nti. Yathā ca te heṭṭhā rūpakkhandhamūlakā, evamidhāpi cakkhāyatanamūlakāva nayā veditabbā. Dukamattameva pana pāḷiyaṃ dassetvā ‘‘dvādasāyatanānī’’ti abhedatova pucchāvissajjanaṃ kataṃ. Dhātuniddesepi eseva nayo.
40. ஸச்சனித்³தே³ஸே – ஸப்³பே³பி து³கதிகசதுக்கா பாளியங் த³ஸ்ஸிதா. யஸ்மா ச து³கதிகேஸு ஸமுத³யஸச்சஸதி³ஸமேவ மக்³க³ஸச்சேபி விஸ்ஸஜ்ஜனங், தஸ்மா தங் ஸமுத³யானந்தரங் வுத்தங்.
40. Saccaniddese – sabbepi dukatikacatukkā pāḷiyaṃ dassitā. Yasmā ca dukatikesu samudayasaccasadisameva maggasaccepi vissajjanaṃ, tasmā taṃ samudayānantaraṃ vuttaṃ.
50. இந்த்³ரியனித்³தே³ஸே – ஜீவிதிந்த்³ரியங் த்³வீஹி க²ந்தே⁴ஹீதி ரூபஜீவிதிந்த்³ரியங் ரூபக்க²ந்தே⁴ன, அரூபஜீவிதிந்த்³ரியங் ஸங்கா²ரக்க²ந்தே⁴ன ஸங்க³ஹிதங். ஸேஸங் வுத்தனயானுஸாரேனேவ வேதி³தப்³ப³ங். பாளிவவத்தா²னங் பனெத்த² ஆயதனதா⁴துனித்³தே³ஸஸதி³ஸமேவ.
50. Indriyaniddese – jīvitindriyaṃ dvīhi khandhehīti rūpajīvitindriyaṃ rūpakkhandhena, arūpajīvitindriyaṃ saṅkhārakkhandhena saṅgahitaṃ. Sesaṃ vuttanayānusāreneva veditabbaṃ. Pāḷivavatthānaṃ panettha āyatanadhātuniddesasadisameva.
6. படிச்சஸமுப்பாத³வண்ணனா
6. Paṭiccasamuppādavaṇṇanā
61. படிச்சஸமுப்பாத³னித்³தே³ஸே – ‘‘அவிஜ்ஜா கதிஹி க²ந்தே⁴ஹீ’’தி புச்ச²ங் அனாரபி⁴த்வா அவிஜ்ஜா ஏகேன க²ந்தே⁴னாதி ஏவங் விஸ்ஸஜ்ஜனமேவ த³ஸ்ஸிதங். தத்த² ஸங்கா²ரபச்சயா விஞ்ஞாணந்தி படிஸந்தி⁴யங் பவத்தே ச ஸப்³ப³ம்பி விபாகவிஞ்ஞாணங். தேனேவாஹ – ‘‘ஸத்தஹி தா⁴தூஹி ஸங்க³ஹித’’ந்தி. நாமரூபம்பி படிஸந்தி⁴பவத்திவஸேனேவ வேதி³தப்³ப³ங். தேனேவெத்த² ஸத்³தா³யதனம்பி ஸங்க³ஹெத்வா ஏகாத³ஸஹாயதனேஹி ஸங்க³ஹோ த³ஸ்ஸிதோ. ப²ஸ்ஸாதீ³ஸு க²ந்த⁴பே⁴தோ³ வேதி³தப்³போ³. அஞ்ஞேனேவ ஹி ஏகேன க²ந்தே⁴ன ப²ஸ்ஸோ ஸங்க³ஹிதோ, அஞ்ஞேன வேத³னா, தண்ஹாஉபாதா³னகம்மப⁴வா பன ஸங்கா²ரக்க²ந்தே⁴னேவ ஸங்க³ஹிதா. ப⁴வபத³ஞ்செத்த² கம்மப⁴வாதீ³னங் வஸேன ஏகாத³ஸதா⁴ விப⁴த்தங். தத்த² கம்மப⁴வோ ப²ஸ்ஸாதீ³ஹி ஸதி³ஸவிஸஜ்ஜனத்தா தேஹி ஸத்³தி⁴ங் ஏகதோ த³ஸ்ஸிதோ. உபபத்திப⁴வகாமப⁴வஸஞ்ஞாப⁴வபஞ்சவோகாரப⁴வா அஞ்ஞமஞ்ஞஸதி³ஸவிஸ்ஸஜ்ஜனத்தா ஏகதோ த³ஸ்ஸிதா. யஸ்மா சேதே உபாதி³ன்னகத⁴ம்மாவ தஸ்மா ‘‘ஏகாத³ஸஹாயதனேஹி ஸத்தரஸஹி தா⁴தூஹீ’’தி வுத்தங். ஸத்³தா³யதனஞ்ஹி அனுபாதி³ன்னங், தங் எத்த² ந க³ஹிதங்.
61. Paṭiccasamuppādaniddese – ‘‘avijjā katihi khandhehī’’ti pucchaṃ anārabhitvā avijjā ekena khandhenāti evaṃ vissajjanameva dassitaṃ. Tattha saṅkhārapaccayā viññāṇanti paṭisandhiyaṃ pavatte ca sabbampi vipākaviññāṇaṃ. Tenevāha – ‘‘sattahi dhātūhi saṅgahita’’nti. Nāmarūpampi paṭisandhipavattivaseneva veditabbaṃ. Tenevettha saddāyatanampi saṅgahetvā ekādasahāyatanehi saṅgaho dassito. Phassādīsu khandhabhedo veditabbo. Aññeneva hi ekena khandhena phasso saṅgahito, aññena vedanā, taṇhāupādānakammabhavā pana saṅkhārakkhandheneva saṅgahitā. Bhavapadañcettha kammabhavādīnaṃ vasena ekādasadhā vibhattaṃ. Tattha kammabhavo phassādīhi sadisavisajjanattā tehi saddhiṃ ekato dassito. Upapattibhavakāmabhavasaññābhavapañcavokārabhavā aññamaññasadisavissajjanattā ekato dassitā. Yasmā cete upādinnakadhammāva tasmā ‘‘ekādasahāyatanehi sattarasahi dhātūhī’’ti vuttaṃ. Saddāyatanañhi anupādinnaṃ, taṃ ettha na gahitaṃ.
68. ரூபப⁴வனித்³தே³ஸே – பஞ்சஹாயதனேஹீதி சக்கு²ஸோதமனரூபத⁴ம்மாயதனேஹி. அட்ட²ஹி தா⁴தூஹீதி சக்கு²ஸோதசக்கு²விஞ்ஞாணஸோதவிஞ்ஞாணரூபத⁴ம்மமனோதா⁴துமனோவிஞ்ஞாணதா⁴தூஹி. அரூபப⁴வாத³யோபி தயோ ஸதி³ஸவிஸ்ஸஜ்ஜனத்தாவ ஏகதோ த³ஸ்ஸிதா. ததா² அஸஞ்ஞாப⁴வஏகவோகாரப⁴வா. தத்த² த்³வீஹாயதனேஹீதி ரூபாயதனத⁴ம்மாயதனேஹி. தா⁴தூஸுபி ஏஸேவ நயோ. ஏகதலவாஸிகானஞ்ஹி ஸேஸப்³ரஹ்மானங் சக்கு²ஸப்³பா⁴வதோ தஸ்ஸாரம்மணத்தா தத்த² ரூபாயதனங் உத்³த⁴டங்.
68. Rūpabhavaniddese – pañcahāyatanehīti cakkhusotamanarūpadhammāyatanehi. Aṭṭhahi dhātūhīti cakkhusotacakkhuviññāṇasotaviññāṇarūpadhammamanodhātumanoviññāṇadhātūhi. Arūpabhavādayopi tayo sadisavissajjanattāva ekato dassitā. Tathā asaññābhavaekavokārabhavā. Tattha dvīhāyatanehīti rūpāyatanadhammāyatanehi. Dhātūsupi eseva nayo. Ekatalavāsikānañhi sesabrahmānaṃ cakkhusabbhāvato tassārammaṇattā tattha rūpāyatanaṃ uddhaṭaṃ.
71. ஜாதி த்³வீஹி க²ந்தே⁴ஹீதி ரூபஜாதி ரூபக்க²ந்தே⁴ன, அரூபஜாதி ஸங்கா²ரக்க²ந்தே⁴ன. ஜராமரணேஸுபி ஏஸேவ நயோ. ஸோகாதீ³ஸுபி ஏகேன க²ந்தே⁴னாதி ஸோகது³க்க²தோ³மனஸ்ஸானி வேத³னாக்க²ந்தே⁴ன, பரிதே³வோ ரூபக்க²ந்தே⁴ன, உபாயாஸாத³யோ ஸங்கா²ரக்க²ந்தே⁴னாதி ஏவங் க²ந்த⁴விஸேஸோ வேதி³தப்³போ³.
71. Jāti dvīhi khandhehīti rūpajāti rūpakkhandhena, arūpajāti saṅkhārakkhandhena. Jarāmaraṇesupi eseva nayo. Sokādīsupi ekena khandhenāti sokadukkhadomanassāni vedanākkhandhena, paridevo rūpakkhandhena, upāyāsādayo saṅkhārakkhandhenāti evaṃ khandhaviseso veditabbo.
73. இத்³தி⁴பாதோ³ த்³வீஹீதி ஸங்கா²ரவிஞ்ஞாணக்க²ந்தே⁴ஹி, மனாயதனத⁴ம்மாயதனேஹி, த⁴ம்மதா⁴துமனோவிஞ்ஞாணதா⁴தூஹி ச. ஜா²னங் த்³வீஹீதி வேத³னாக்க²ந்த⁴ஸங்கா²ரக்க²ந்தே⁴ஹி. அப்பமஞ்ஞாத³யோ ஸதி³ஸவிஸ்ஸஜ்ஜனத்தா ஏகதோ நித்³தி³ட்டா². சித்தங் பன சேதனானந்தரங் நிக்கி²த்தம்பி அஸதி³ஸவிஸ்ஸஜ்ஜனத்தா பச்சா² க³ஹிதங். தத்த² அப்பமஞ்ஞாதீ³ஸு ஏகேன க²ந்தே⁴னாதி வேத³னா வேத³னாக்க²ந்தே⁴ன, ஸஞ்ஞா ஸஞ்ஞாக்க²ந்தே⁴ன, ஸேஸா ஸங்கா²ரக்க²ந்தே⁴ன ஸங்க³ஹிதாதி ஏவங் க²ந்த⁴விஸேஸோ வேதி³தப்³போ³.
73. Iddhipādo dvīhīti saṅkhāraviññāṇakkhandhehi, manāyatanadhammāyatanehi, dhammadhātumanoviññāṇadhātūhi ca. Jhānaṃ dvīhīti vedanākkhandhasaṅkhārakkhandhehi. Appamaññādayo sadisavissajjanattā ekato niddiṭṭhā. Cittaṃ pana cetanānantaraṃ nikkhittampi asadisavissajjanattā pacchā gahitaṃ. Tattha appamaññādīsu ekena khandhenāti vedanā vedanākkhandhena, saññā saññākkhandhena, sesā saṅkhārakkhandhena saṅgahitāti evaṃ khandhaviseso veditabbo.
7. திகபத³வண்ணனா
7. Tikapadavaṇṇanā
77. ஏவங் அப்³ப⁴ந்தரமாதிகாய ஸங்க³ஹங் த³ஸ்ஸெத்வா இதா³னி பா³ஹிரமாதிகாய ஸங்க³ஹங் த³ஸ்ஸேதுங் குஸலா த⁴ம்மாதிஆதி³ ஆரத்³த⁴ங். தத்த² வேத³னாத்திகே தீஹி தா⁴தூஹீதி காயவிஞ்ஞாணமனோவிஞ்ஞாணத⁴ம்மதா⁴தூஹி. ஸத்தஹி தா⁴தூஹீதி சக்கு²ஸோதகா⁴னஜிவ்ஹாவிஞ்ஞாணதா⁴தூஹி சேவ மனோதா⁴துத⁴ம்மதா⁴துமனோவிஞ்ஞாணதா⁴தூஹி ச. விபாகத்திகே அட்ட²ஹி தா⁴தூஹீதி காயவிஞ்ஞாணதா⁴துயா ஸத்³தி⁴ங் தாஹியேவ. விபாகத⁴ம்மத⁴ம்மா பன ஸங்கிலிட்ட²ஸங்கிலேஸிகேஹி ஸத்³தி⁴ங் ஸதி³ஸவிஸ்ஸஜ்ஜனத்தா ஏகதோ க³ஹிதா. யதா² சேதே, ஏவங் ஸப்³ப³திகது³கபதே³ஸு யங் யங் பத³ங் யேன யேன பதே³ன ஸத்³தி⁴ங் ஸதி³ஸவிஸ்ஸஜ்ஜனங் ஹோதி, தங் தங் உப்படிபாடியாபி தேன தேன ஸத்³தி⁴ங் க³ஹெத்வா விஸ்ஸஜ்ஜிதங். தத்த² வுத்தானுஸாரேனேவ ஸங்க³ஹாஸங்க³ஹனயோ வேதி³தப்³போ³தி.
77. Evaṃ abbhantaramātikāya saṅgahaṃ dassetvā idāni bāhiramātikāya saṅgahaṃ dassetuṃ kusalā dhammātiādi āraddhaṃ. Tattha vedanāttike tīhi dhātūhīti kāyaviññāṇamanoviññāṇadhammadhātūhi. Sattahi dhātūhīti cakkhusotaghānajivhāviññāṇadhātūhi ceva manodhātudhammadhātumanoviññāṇadhātūhi ca. Vipākattike aṭṭhahi dhātūhīti kāyaviññāṇadhātuyā saddhiṃ tāhiyeva. Vipākadhammadhammā pana saṃkiliṭṭhasaṃkilesikehi saddhiṃ sadisavissajjanattā ekato gahitā. Yathā cete, evaṃ sabbatikadukapadesu yaṃ yaṃ padaṃ yena yena padena saddhiṃ sadisavissajjanaṃ hoti, taṃ taṃ uppaṭipāṭiyāpi tena tena saddhiṃ gahetvā vissajjitaṃ. Tattha vuttānusāreneva saṅgahāsaṅgahanayo veditabboti.
ஸங்க³ஹாஸங்க³ஹபத³வண்ணனா.
Saṅgahāsaṅgahapadavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 1. ஸங்க³ஹாஸங்க³ஹபத³னித்³தே³ஸோ • 1. Saṅgahāsaṅgahapadaniddeso
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. பட²மனயோ ஸங்க³ஹாஸங்க³ஹபத³வண்ணனா • 1. Paṭhamanayo saṅgahāsaṅgahapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. பட²மனயோ ஸங்க³ஹாஸங்க³ஹபத³வண்ணனா • 1. Paṭhamanayo saṅgahāsaṅgahapadavaṇṇanā
