| Library / Tipiṭaka / तिपिटक • Tipiṭaka / परिवार-अट्ठकथा • Parivāra-aṭṭhakathā |
पठमपाराजिकसमुट्ठानवण्णना
Paṭhamapārājikasamuṭṭhānavaṇṇanā
२५८. इदानि तानि दस्सेतुं ‘‘मेथुनं सुक्कसंसग्गो’’तिआदि वुत्तं। तत्थ मेथुनन्ति इदं ताव पठमपाराजिकं नाम एकं समुट्ठानसीसं, सेसानि तेन सदिसानि। तत्थ सुक्कसंसग्गोति सुक्कविस्सट्ठि चेव कायसंसग्गो च। अनियता पठमिकाति पठमं अनियतसिक्खापदं। पुब्बूपपरिपाचिताति ‘‘जानं पुब्बूपगतं भिक्खु’’न्ति सिक्खापदञ्च भिक्खुनिपरिपाचितपिण्डपातसिक्खापदञ्च। रहो भिक्खुनिया सहाति भिक्खुनिया सद्धिं रहो निसज्जसिक्खापदञ्च।
258. Idāni tāni dassetuṃ ‘‘methunaṃ sukkasaṃsaggo’’tiādi vuttaṃ. Tattha methunanti idaṃ tāva paṭhamapārājikaṃ nāma ekaṃ samuṭṭhānasīsaṃ, sesāni tena sadisāni. Tattha sukkasaṃsaggoti sukkavissaṭṭhi ceva kāyasaṃsaggo ca. Aniyatā paṭhamikāti paṭhamaṃ aniyatasikkhāpadaṃ. Pubbūpaparipācitāti ‘‘jānaṃ pubbūpagataṃ bhikkhu’’nti sikkhāpadañca bhikkhuniparipācitapiṇḍapātasikkhāpadañca. Raho bhikkhuniyā sahāti bhikkhuniyā saddhiṃ raho nisajjasikkhāpadañca.
सभोजने रहो द्वे चाति सभोजने कुले अनुपखज्जनिसज्जसिक्खापदञ्च द्वे रहोनिसज्जसिक्खापदानि च। अङ्गुलि उदके हसन्ति अङ्गुलिपतोदकञ्च उदके हसधम्मसिक्खापदञ्च। पहारे उग्गिरे चेवाति पहारदानसिक्खापदञ्च तलसत्तिकउग्गिरणसिक्खापदञ्च। तेपञ्ञासा च सेखियाति परिमण्डलनिवासनादीनि खुद्दकवण्णनावसाने वुत्तानि तेपञ्ञास सेखियसिक्खापदानि च।
Sabhojane raho dve cāti sabhojane kule anupakhajjanisajjasikkhāpadañca dve rahonisajjasikkhāpadāni ca. Aṅguli udake hasanti aṅgulipatodakañca udake hasadhammasikkhāpadañca. Pahāre uggire cevāti pahāradānasikkhāpadañca talasattikauggiraṇasikkhāpadañca. Tepaññāsā ca sekhiyāti parimaṇḍalanivāsanādīni khuddakavaṇṇanāvasāne vuttāni tepaññāsa sekhiyasikkhāpadāni ca.
अधक्खगामावस्सुताति भिक्खुनीनं अधक्खकसिक्खापदञ्च गामन्तरगमनं अवस्सुता अवस्सुतस्स हत्थतो खादनीयभोजनीयग्गहणसिक्खापदञ्च। तलमट्ठञ्च सुद्धिकाति तलघातकं जतुमट्ठं उदकसुद्धिकादियनञ्च। वस्संवुट्ठा च ओवादन्ति वस्संवुट्ठा छप्पञ्चयोजनानि सिक्खापदञ्च ओवादाय अगमनसिक्खापदञ्च। नानुबन्धे पवत्तिनिन्ति या पन भिक्खुनी वुट्ठापितं पवत्तिनिं द्वे वस्सानि नानुबन्धेय्याति वुत्तसिक्खापदं।
Adhakkhagāmāvassutāti bhikkhunīnaṃ adhakkhakasikkhāpadañca gāmantaragamanaṃ avassutā avassutassa hatthato khādanīyabhojanīyaggahaṇasikkhāpadañca. Talamaṭṭhañca suddhikāti talaghātakaṃ jatumaṭṭhaṃ udakasuddhikādiyanañca. Vassaṃvuṭṭhā ca ovādanti vassaṃvuṭṭhā chappañcayojanāni sikkhāpadañca ovādāya agamanasikkhāpadañca. Nānubandhe pavattininti yā pana bhikkhunī vuṭṭhāpitaṃ pavattiniṃ dve vassāni nānubandheyyāti vuttasikkhāpadaṃ.
इमे सिक्खाति इमा सिक्खायो; लिङ्गविपरियायो कतो। कायमानसिका कताति कायचित्तसमुट्ठाना कता।
Imesikkhāti imā sikkhāyo; liṅgavipariyāyo kato. Kāyamānasikā katāti kāyacittasamuṭṭhānā katā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १. पठमपाराजिकसमुट्ठानं • 1. Paṭhamapārājikasamuṭṭhānaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / पठमपाराजिकसमुट्ठानवण्णना • Paṭhamapārājikasamuṭṭhānavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / पठमपाराजिकसमुट्ठानवण्णना • Paṭhamapārājikasamuṭṭhānavaṇṇanā
