| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૮. પઠમપરિહાનિસુત્તં
8. Paṭhamaparihānisuttaṃ
૨૮. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તત્ર ખો ભગવા ભિક્ખૂ આમન્તેસિ – ‘‘સત્તિમે, ભિક્ખવે, ધમ્મા સેખસ્સ ભિક્ખુનો પરિહાનાય સંવત્તન્તિ. કતમે સત્ત? કમ્મારામતા, ભસ્સારામતા, નિદ્દારામતા, સઙ્ગણિકારામતા, ઇન્દ્રિયેસુ અગુત્તદ્વારતા, ભોજને અમત્તઞ્ઞુતા, સન્તિ ખો પન સઙ્ઘે સઙ્ઘકરણીયાનિ; તત્ર સેખો ભિક્ખુ 1 ઇતિ પટિસઞ્ચિક્ખતિ – ‘સન્તિ ખો પન સઙ્ઘે થેરા 2 રત્તઞ્ઞૂ ચિરપબ્બજિતા ભારવાહિનો, તે 3 તેન પઞ્ઞાયિસ્સન્તી’તિ અત્તના તેસુ યોગં 4 આપજ્જતિ. ઇમે ખો, ભિક્ખવે, સત્ત ધમ્મા સેખસ્સ ભિક્ખુનો પરિહાનાય સંવત્તન્તિ.
28. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘sattime, bhikkhave, dhammā sekhassa bhikkhuno parihānāya saṃvattanti. Katame satta? Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, santi kho pana saṅghe saṅghakaraṇīyāni; tatra sekho bhikkhu 5 iti paṭisañcikkhati – ‘santi kho pana saṅghe therā 6 rattaññū cirapabbajitā bhāravāhino, te 7 tena paññāyissantī’ti attanā tesu yogaṃ 8 āpajjati. Ime kho, bhikkhave, satta dhammā sekhassa bhikkhuno parihānāya saṃvattanti.
‘‘સત્તિમે, ભિક્ખવે, ધમ્મા સેખસ્સ ભિક્ખુનો અપરિહાનાય સંવત્તન્તિ. કતમે સત્ત? ન કમ્મારામતા, ન ભસ્સારામતા, ન નિદ્દારામતા, ન સઙ્ગણિકારામતા, ઇન્દ્રિયેસુ ગુત્તદ્વારતા, ભોજને મત્તઞ્ઞુતા, સન્તિ ખો પન સઙ્ઘે સઙ્ઘકરણીયાનિ; તત્ર સેખો ભિક્ખુ ઇતિ પટિસઞ્ચિક્ખતિ – ‘સન્તિ ખો પન સઙ્ઘે થેરા રત્તઞ્ઞૂ ચિરપબ્બજિતા ભારવાહિનો, તે તેન પઞ્ઞાયિસ્સન્તી’તિ અત્તના ન તેસુ યોગં આપજ્જતિ. ઇમે ખો, ભિક્ખવે, સત્ત ધમ્મા સેખસ્સ ભિક્ખુનો અપરિહાનાય સંવત્તન્તી’’તિ. અટ્ઠમં.
‘‘Sattime, bhikkhave, dhammā sekhassa bhikkhuno aparihānāya saṃvattanti. Katame satta? Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati – ‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā na tesu yogaṃ āpajjati. Ime kho, bhikkhave, satta dhammā sekhassa bhikkhuno aparihānāya saṃvattantī’’ti. Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૮. પઠમપરિહાનિસુત્તવણ્ણના • 8. Paṭhamaparihānisuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૭-૧૧. સઞ્ઞાસુત્તાદિવણ્ણના • 7-11. Saññāsuttādivaṇṇanā
