| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. ပဌမပရိဟာနိသုတ္တံ
8. Paṭhamaparihānisuttaṃ
၂၈. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တတ္ရ ခော ဘဂဝာ ဘိက္ခူ အာမန္တေသိ – ‘‘သတ္တိမေ, ဘိက္ခဝေ, ဓမ္မာ သေခသ္သ ဘိက္ခုနော ပရိဟာနာယ သံဝတ္တန္တိ။ ကတမေ သတ္တ? ကမ္မာရာမတာ, ဘသ္သာရာမတာ, နိဒ္ဒာရာမတာ, သင္ဂဏိကာရာမတာ, ဣန္ဒ္ရိယေသု အဂုတ္တဒ္ဝာရတာ, ဘောဇနေ အမတ္တညုတာ, သန္တိ ခော ပန သင္ဃေ သင္ဃကရဏီယာနိ; တတ္ရ သေခော ဘိက္ခု 1 ဣတိ ပဋိသဉ္စိက္ခတိ – ‘သန္တိ ခော ပန သင္ဃေ ထေရာ 2 ရတ္တညူ စိရပဗ္ဗဇိတာ ဘာရဝာဟိနော, တေ 3 တေန ပညာယိသ္သန္တီ’တိ အတ္တနာ တေသု ယောဂံ 4 အာပဇ္ဇတိ။ ဣမေ ခော, ဘိက္ခဝေ, သတ္တ ဓမ္မာ သေခသ္သ ဘိက္ခုနော ပရိဟာနာယ သံဝတ္တန္တိ။
28. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘sattime, bhikkhave, dhammā sekhassa bhikkhuno parihānāya saṃvattanti. Katame satta? Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, santi kho pana saṅghe saṅghakaraṇīyāni; tatra sekho bhikkhu 5 iti paṭisañcikkhati – ‘santi kho pana saṅghe therā 6 rattaññū cirapabbajitā bhāravāhino, te 7 tena paññāyissantī’ti attanā tesu yogaṃ 8 āpajjati. Ime kho, bhikkhave, satta dhammā sekhassa bhikkhuno parihānāya saṃvattanti.
‘‘သတ္တိမေ, ဘိက္ခဝေ, ဓမ္မာ သေခသ္သ ဘိက္ခုနော အပရိဟာနာယ သံဝတ္တန္တိ။ ကတမေ သတ္တ? န ကမ္မာရာမတာ, န ဘသ္သာရာမတာ, န နိဒ္ဒာရာမတာ, န သင္ဂဏိကာရာမတာ, ဣန္ဒ္ရိယေသု ဂုတ္တဒ္ဝာရတာ, ဘောဇနေ မတ္တညုတာ, သန္တိ ခော ပန သင္ဃေ သင္ဃကရဏီယာနိ; တတ္ရ သေခော ဘိက္ခု ဣတိ ပဋိသဉ္စိက္ခတိ – ‘သန္တိ ခော ပန သင္ဃေ ထေရာ ရတ္တညူ စိရပဗ္ဗဇိတာ ဘာရဝာဟိနော, တေ တေန ပညာယိသ္သန္တီ’တိ အတ္တနာ န တေသု ယောဂံ အာပဇ္ဇတိ။ ဣမေ ခော, ဘိက္ခဝေ, သတ္တ ဓမ္မာ သေခသ္သ ဘိက္ခုနော အပရိဟာနာယ သံဝတ္တန္တီ’’တိ။ အဋ္ဌမံ။
‘‘Sattime, bhikkhave, dhammā sekhassa bhikkhuno aparihānāya saṃvattanti. Katame satta? Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati – ‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā na tesu yogaṃ āpajjati. Ime kho, bhikkhave, satta dhammā sekhassa bhikkhuno aparihānāya saṃvattantī’’ti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ပဌမပရိဟာနိသုတ္တဝဏ္ဏနာ • 8. Paṭhamaparihānisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၁၁. သညာသုတ္တာဒိဝဏ္ဏနာ • 7-11. Saññāsuttādivaṇṇanā
