| Library / Tipiṭaka / д̇ибидага • Tipiṭaka / баажид̇яаад̣̇ияож̇анаабаал̣и • Pācityādiyojanāpāḷi |
5. батамабавааран̣асигкаабад̣̇ам̣
5. Paṭhamapavāraṇasikkhāpadaṃ
236. бан̃жамз баваарид̇аад̇и зд̇т̇а вассам̣вуд̇т̇абавааран̣аа, бажжаяабавааран̣аа, бадигкзбабавааран̣аа, яаавад̣̇ад̇т̇абавааран̣аа жаад̇и жад̇уб̣б̣ид̇хаасу бавааран̣аасу яаавад̣̇ад̇т̇абавааран̣аа жа бадигкзбабавааран̣аа жаад̇и д̣̇вз бавааран̣аа ад̇хиббзд̇аад̇и д̣̇ассзнд̇о ааха ‘‘б̣раахман̣знаа’’д̇иаад̣̇и. б̣раахман̣зна баваарид̇аад̇и самб̣анд̇хо. саяанд̇и д̇ад̇ияанд̇анибаад̇о ‘‘баваарид̇аа’’д̇ибад̣̇зна самб̣анд̇хо. жасад̣̇д̣̇о ан̃н̃ад̇т̇а яож̇зд̇аб̣б̣о яаавад̣̇ад̇т̇абавааран̣ааяа жа бадигкзбабавааран̣ааяа жаад̇и. бадимукам̣ ад̇д̇ано г̇зхам̣ висанд̇и бависанд̇ийд̇и бадивиссагаад̇и вуд̇д̇з аасаннаг̇зхаваасигаа г̇ахзд̇аб̣б̣аад̇и ааха ‘‘сааманд̇агхараваасигз’’д̇и.
236. Pañcame pavāritāti ettha vassaṃvutthapavāraṇā, paccayapavāraṇā, paṭikkhepapavāraṇā, yāvadatthapavāraṇā cāti catubbidhāsu pavāraṇāsu yāvadatthapavāraṇā ca paṭikkhepapavāraṇā cāti dve pavāraṇā adhippetāti dassento āha ‘‘brāhmaṇenā’’tiādi. Brāhmaṇena pavāritāti sambandho. Sayanti tatiyantanipāto ‘‘pavāritā’’tipadena sambandho. Casaddo aññattha yojetabbo yāvadatthapavāraṇāya ca paṭikkhepapavāraṇāya cāti. Paṭimukhaṃ attano gehaṃ visanti pavisantīti paṭivissakāti vutte āsannagehavāsikā gahetabbāti āha ‘‘sāmantagharavāsike’’ti.
237. уд̣̇д̇хан̇г̇амо раво ораво, соязва сад̣̇д̣̇о оравасад̣̇д̣̇о, гаагаанам̣ оравасад̣̇д̣̇о гагоравасад̣̇д̣̇од̇и д̣̇ассзнд̇о ааха ‘‘гаагаана’’нд̇иаад̣̇и.
237. Uddhaṅgamo ravo oravo, soyeva saddo oravasaddo, kākānaṃ oravasaddo kakoravasaddoti dassento āha ‘‘kākāna’’ntiādi.
239. д̇аванд̇убажжаяасса ад̇ийд̇ад̇т̇абхаавам̣ д̣̇ассзд̇ум̣ вуд̇д̇ам̣ ‘‘д̇ад̇т̇а жаа’’д̇иаад̣̇и. д̇ад̇т̇аад̇и ‘‘бхуд̇д̇аваа’’д̇ибад̣̇з. яасмаа язна бхигкунаа аж̇жхохарид̇ам̣ ход̇и, д̇асмаа со ‘‘бхуд̇д̇аавий’’д̇и сан̇кяам̣ г̇ажчад̇ийд̇и яож̇анаа. сан̇каад̣̇ид̇ваад̇и д̣̇анд̇зхи жун̣н̣ам̣ гад̇ваа. д̇знаад̇и д̇зна хзд̇унаа. ассаад̇и ‘‘бхуд̇д̇аавий’’д̇ибад̣̇асса. баваарзд̇и бадигкибад̇ийд̇и баваарид̇о бхигкууд̇и д̣̇ассзнд̇о ааха ‘‘гад̇абавааран̣о’’д̇и. соби жаад̇и со бадигкзбо жа ход̇ийд̇и самб̣анд̇хо. ассаад̇и ‘‘баваарид̇о’’д̇ибад̣̇асса. д̇ад̇т̇аад̇и ‘‘асанам̣ бан̃н̃ааяад̇ий’’д̇иаад̣̇иважанз. яасмаа бхуд̇д̇аавийд̇иби сан̇кяам̣ г̇ажчад̇и, д̇асмаа на бассаамаад̇и яож̇анаа. ‘‘асанам̣ бан̃н̃ааяад̇ий’’д̇и бад̣̇абхааж̇анияаа ‘‘бхуд̇д̇аавий’’д̇и маад̇игаабад̣̇асса асам̣санд̣̇анабхаавам̣ д̣̇ассзд̇ум̣ вуд̇д̇ам̣ ‘‘асанам̣ бан̃н̃ааяад̇ийд̇и иминаа’’д̇иаад̣̇и. яан̃жаад̇и яан̃жа бхож̇анам̣. д̣̇ирад̇д̇аад̣̇ийд̇и зд̇т̇а аад̣̇исад̣̇д̣̇зна бан̃жаад̣̇иважанам̣ сан̇г̇ан̣хаад̇и. зд̇анд̇и ‘‘бхуд̇д̇аавий’’д̇ибад̣̇ам̣.
239. Tavantupaccayassa atītatthabhāvaṃ dassetuṃ vuttaṃ ‘‘tattha cā’’tiādi. Tatthāti ‘‘bhuttavā’’tipade. Yasmā yena bhikkhunā ajjhoharitaṃ hoti, tasmā so ‘‘bhuttāvī’’ti saṅkhyaṃ gacchatīti yojanā. Saṅkhāditvāti dantehi cuṇṇaṃ katvā. Tenāti tena hetunā. Assāti ‘‘bhuttāvī’’tipadassa. Pavāreti paṭikkhipatīti pavārito bhikkhūti dassento āha ‘‘katapavāraṇo’’ti. Sopi cāti so paṭikkhepo ca hotīti sambandho. Assāti ‘‘pavārito’’tipadassa. Tatthāti ‘‘asanaṃ paññāyatī’’tiādivacane. Yasmā bhuttāvītipi saṅkhyaṃ gacchati, tasmā na passāmāti yojanā. ‘‘Asanaṃ paññāyatī’’ti padabhājaniyā ‘‘bhuttāvī’’ti mātikāpadassa asaṃsandanabhāvaṃ dassetuṃ vuttaṃ ‘‘asanaṃ paññāyatīti iminā’’tiādi. Yañcāti yañca bhojanaṃ. Dirattādīti ettha ādisaddena pañcādivacanaṃ saṅgaṇhāti. Etanti ‘‘bhuttāvī’’tipadaṃ.
‘‘асанам̣ бан̃н̃ааяад̇ий’’д̇иаад̣̇ийсу винижчаяо звам̣ взд̣̇ид̇аб̣б̣од̇и самб̣анд̇хо. ‘‘бан̃н̃ааяад̇ий’’д̇и зд̇т̇а н̃аад̇хаад̇уяаа кааяанад̇т̇ам̣ д̣̇ассзд̇ум̣ вуд̇д̇ам̣ ‘‘д̣̇иссад̇ий’’д̇и. ‘‘хад̇т̇абаасз’’д̇ибад̣̇асса д̣̇ваад̣̇асахад̇т̇аббамаан̣о хад̇т̇абаасо наад̇хиббзд̇од̇и ааха ‘‘ад̣дхад̇зяяахад̇т̇аббамаан̣з’’д̇и. ваажааяа абхихаран̣ам̣ наад̇хиббзд̇ам̣. д̇знааха ‘‘гааязнаа’’д̇и. абхихарад̇ийд̇и абхимукам̣ харад̇и. д̇анд̇и бхож̇анам̣. зд̇анд̇и бан̃жан̇г̇абхаавам̣, ‘‘бан̃жахи…бз… бан̃н̃ааяад̇ий’’д̇и важанам̣ ваа.
‘‘Asanaṃ paññāyatī’’tiādīsu vinicchayo evaṃ veditabboti sambandho. ‘‘Paññāyatī’’ti ettha ñādhātuyā khāyanatthaṃ dassetuṃ vuttaṃ ‘‘dissatī’’ti. ‘‘Hatthapāse’’tipadassa dvādasahatthappamāṇo hatthapāso nādhippetoti āha ‘‘aḍḍhateyyahatthappamāṇe’’ti. Vācāya abhiharaṇaṃ nādhippetaṃ. Tenāha ‘‘kāyenā’’ti. Abhiharatīti abhimukhaṃ harati. Tanti bhojanaṃ. Etanti pañcaṅgabhāvaṃ, ‘‘pañcahi…pe… paññāyatī’’ti vacanaṃ vā.
д̇ад̇раад̇и ‘‘асанам̣ бан̃н̃ааяад̇ий’’д̇иаад̣̇иважанз. аснаад̇ийд̇и гийяаад̣̇иг̇ан̣ад̇д̇аа, д̇асса жа згагкарад̇хаад̇уд̇д̇аа сагааранагаараанам̣ сам̣яог̇о д̣̇адтаб̣б̣о. д̇анд̇и бхож̇анам̣. унд̣̇ад̇и басавад̇и бхун̃ж̇анд̇аанам̣ ааяуб̣алам̣ ж̇анзд̇ийд̇и од̣̇ано. яаваад̣̇аяо бууд̇им̣ гад̇ваа гад̇ад̇д̇аа гужчид̇зна масийяад̇и аамасийяад̇ийд̇и гумаасо. сажад̇и самавааяо худ̇ваа бхавад̇ийд̇и сад̇д̇у. б̣яан̃ж̇анад̇т̇ааяа маарзд̇аб̣б̣од̇и мажчо. маанийяад̇и бхун̃ж̇анд̇зхийд̇и мам̣сам̣. д̇ад̇т̇аад̇и од̣̇анаад̣̇ийсу бан̃жасу бхож̇анзсу. сааро ассад̇т̇и ан̃н̃зсам̣ д̇хан̃н̃аананд̇и саалий. вахад̇и бхун̃ж̇анд̇аанам̣ ж̇ийвид̇анд̇и вийхи. яавад̇и амиссид̇оби миссид̇о вияа бхавад̇ийд̇и яаво. г̇уд̇хад̇и баривзтад̇и милагкабхож̇анад̇д̇аад̇и г̇од̇хумо. собханасийсад̇д̇аа гаманийяабхаавам̣ г̇ажчад̇ийд̇и ган̇г̇у. маханд̇асийсад̇д̇аа, мад̇хурарасанаал̣ад̇д̇аа жа варийяад̇и бад̇т̇ийяад̇и ж̇анзхийд̇и вараго. горам̣ руд̇хирам̣ д̣̇уусад̇и бхун̃ж̇анд̇аананд̇и гуд̣̇руусаго. ниб̣б̣ад̇д̇о од̣̇ано наамаад̇и самб̣анд̇хо. д̇ад̇т̇аад̇и сад̇д̇асу д̇хан̃н̃зсу. саалийд̇ийд̇и зд̇т̇а ид̇исад̣̇д̣̇о наамабарияааяо. саалий наамаад̇и ад̇т̇о. зсзва наяо ‘‘вийхийд̇ий’’д̇иаад̣̇ийсуби.
Tatrāti ‘‘asanaṃ paññāyatī’’tiādivacane. Asnātīti kīyādigaṇattā, tassa ca ekakkharadhātuttā sakāranakārānaṃ saṃyogo daṭṭhabbo. Tanti bhojanaṃ. Undati pasavati bhuñjantānaṃ āyubalaṃ janetīti odano. Yavādayo pūtiṃ katvā katattā kucchitena masīyati āmasīyatīti kumāso. Sacati samavāyo hutvā bhavatīti sattu. Byañjanatthāya māretabboti maccho. Mānīyati bhuñjantehīti maṃsaṃ. Tatthāti odanādīsu pañcasu bhojanesu. Sāro assatthi aññesaṃ dhaññānanti sālī. Vahati bhuñjantānaṃ jīvitanti vīhi. Yavati amissitopi missito viya bhavatīti yavo. Gudhati pariveṭhati milakkhabhojanattāti godhumo. Sobhanasīsattā kamanīyabhāvaṃ gacchatīti kaṅgu. Mahantasīsattā, madhurarasanāḷattā ca varīyati patthīyati janehīti varako. Koraṃ rudhiraṃ dūsati bhuñjantānanti kudrūsako. Nibbatto odano nāmāti sambandho. Tatthāti sattasu dhaññesu. Sālītīti ettha itisaddo nāmapariyāyo. Sālī nāmāti attho. Eseva nayo ‘‘vīhītī’’tiādīsupi.
зд̇т̇аад̇и д̇ин̣ад̇хан̃н̃аж̇аад̇ийсу. нийвааро саалияаа ануломо, варагажораго варагасса ануломо. амб̣илабааяаасаад̣̇ийсууд̇и зд̇т̇а аад̣̇исад̣̇д̣̇зна кийрабхад̇д̇аад̣̇аяо сан̇г̇ан̣ханд̇и. од̇хийд̇и авад̇хи, марияаад̣̇од̇и ад̇т̇о. со хи авахийяад̇и жаж̇ийяад̇и асмаад̇и од̇хийд̇и вужжад̇и.
Etthāti tiṇadhaññajātīsu. Nīvāro sāliyā anulomo, varakacorako varakassa anulomo. Ambilapāyāsādīsūti ettha ādisaddena khīrabhattādayo saṅgaṇhanti. Odhīti avadhi, mariyādoti attho. So hi avahīyati cajīyati asmāti odhīti vuccati.
яоби бааяаасо ваа яааби амб̣илаяааг̇у ваа од̇хим̣ на д̣̇ассзд̇и, со бавааран̣ам̣ на ж̇анзд̇ийд̇и яож̇анаа. баязна кийрзна гад̇ад̇д̇аа бааяаасо. баад̇аб̣б̣асса, асид̇аб̣б̣асса жаад̇и д̣̇виннам̣ б̣яуббад̇д̇инимид̇д̇аанам̣ самбхавад̇о ваа бааяаасод̇и вужжад̇и. уд̣̇д̇ханад̇од̇и жуллид̇о. саа хи убари д̇хийяанд̇и табияанд̇и т̇ааляаад̣̇аяо зд̇т̇аад̇и уд̣̇д̇хананд̇и вужжад̇и. ааваж̇ж̇ид̇ваад̇и барин̣аамзд̇ваа. гханабхааванд̇и гат̇инабхаавам̣. зд̇т̇ааби ваагяз ‘‘яо со’’д̇и бад̣̇аани яож̇зд̇аб̣б̣аани. буб̣б̣зд̇и аб̣бхун̣хагаалз. ниманд̇анзд̇и ниманд̇анадтаанз. бхад̇д̇з аагирид̇ваа д̣̇знд̇ийд̇и самб̣анд̇хо. яаабанам̣ г̇ажчад̇и имааяаад̇и яааг̇у. гин̃жааби д̇анугаа ход̇и, д̇ат̇аабийд̇и яож̇анаа. уд̣̇агаад̣̇ийсууд̇иаад̣̇исад̣̇д̣̇зна гин̃ж̇игакийраад̣̇аяо сан̇г̇аяханд̇и. яааг̇усан̇г̇ахамзва г̇ажчад̇и, гасмаа? уд̣̇агаад̣̇ийнам̣ баггут̇ид̇ад̇д̇аад̇и ад̇хиббааяо. д̇асмим̣ ваад̇и сабхад̇д̇з, баггут̇ид̇ауд̣̇агаад̣̇игз ваа. ан̃н̃асмим̣ ваад̇и баггут̇ид̇ауд̣̇агаад̣̇ид̇о ан̃н̃асмим̣ уд̣̇агаад̣̇игз ваа. яад̇т̇а яасмим̣ уд̣̇агаад̣̇игз багкибанд̇и, д̇ам̣ бавааран̣ам̣ ж̇анзд̇ийд̇и яож̇анаа.
Yopi pāyāso vā yāpi ambilayāgu vā odhiṃ na dasseti, so pavāraṇaṃ na janetīti yojanā. Payena khīrena katattā pāyāso. Pātabbassa, asitabbassa cāti dvinnaṃ byuppattinimittānaṃ sambhavato vā pāyāsoti vuccati. Uddhanatoti cullito. Sā hi upari dhīyanti ṭhapiyanti thālyādayo etthāti uddhananti vuccati. Āvajjitvāti pariṇāmetvā. Ghanabhāvanti kathinabhāvaṃ. Etthāpi vākye ‘‘yo so’’ti padāni yojetabbāni. Pubbeti abbhuṇhakāle. Nimantaneti nimantanaṭṭhāne. Bhatte ākiritvā dentīti sambandho. Yāpanaṃ gacchati imāyāti yāgu. Kiñcāpi tanukā hoti, tathāpīti yojanā. Udakādīsūtiādisaddena kiñjikakhīrādayo saṅgayhanti. Yāgusaṅgahameva gacchati, kasmā? Udakādīnaṃ pakkuthitattāti adhippāyo. Tasmiṃ vāti sabhatte, pakkuthitaudakādike vā. Aññasmiṃ vāti pakkuthitaudakādito aññasmiṃ udakādike vā. Yattha yasmiṃ udakādike pakkhipanti, taṃ pavāraṇaṃ janetīti yojanā.
суд̣̇д̇харасагод̇и мажчамам̣сакан̣д̣анхааруухи амиссо суд̣̇д̇хо мажчаад̣̇ирасаго. расагаяааг̇ууд̇и расагабхууд̇аа д̣̇равабхууд̇аа яааг̇у. гханаяааг̇ууд̇и гат̇инаяааг̇у. зд̇т̇аад̇и гханаяааг̇уяам̣. бубпиад̇т̇ааяаад̇и бубпам̣ пуллам̣ имасса каж̇ж̇агассаад̇и бубпий, бубпино ад̇т̇о баяож̇анам̣ бубпиад̇т̇о, д̇ад̣̇ад̇т̇ааяа гад̇анд̇и самб̣анд̇хо. д̇з д̇ан̣д̣улзд̇и д̇з сзд̣̇ид̇ад̇ан̣д̣улз. ажун̣н̣ад̇д̇аа нзва сад̇д̇усан̇кяам̣, абаггад̇д̇аа на бхад̇д̇асан̇кяам̣ г̇ажчанд̇и. д̇зхийд̇и сзд̣̇ид̇ад̇ан̣д̣улзхи. д̇з д̇ан̣д̣улз бажанд̇и, гаронд̇ийд̇и самб̣анд̇хо.
Suddharasakoti macchamaṃsakhaṇḍanhārūhi amisso suddho macchādirasako. Rasakayāgūti rasakabhūtā dravabhūtā yāgu. Ghanayāgūti kathinayāgu. Etthāti ghanayāguyaṃ. Pupphiatthāyāti pupphaṃ phullaṃ imassa khajjakassāti pupphī, pupphino attho payojanaṃ pupphiattho, tadatthāya katanti sambandho. Te taṇḍuleti te seditataṇḍule. Acuṇṇattā neva sattusaṅkhyaṃ, apakkattā na bhattasaṅkhyaṃ gacchanti. Tehīti seditataṇḍulehi. Te taṇḍule pacanti, karontīti sambandho.
‘‘яавзхий’’д̇и б̣ахуважанзна сад̇д̇а д̇хан̃н̃ааниби г̇ахид̇аани. зса наяо сааливийхияавзхийд̇и зд̇т̇ааби. т̇усзд̇и д̇хан̃н̃ад̇ажз. балаабзд̇ваад̇и бадиггамаабзд̇ваа . д̇анд̇и жун̣н̣ам̣ г̇ажчад̇ийд̇и самб̣анд̇хо. карабаагабхаж̇ж̇ид̇аананд̇и каро бааго карабааго, карабаагзна бхаж̇ж̇ид̇аа карабаагабхаж̇ж̇ид̇аа, д̇зсам̣. на баваарзнд̇и асад̇д̇усан̇г̇ахад̇д̇аад̇и ад̇хиббааяо. гун̣д̣агамбийд̇и ган̣амби. баваарзд̇и сад̇д̇усан̇г̇ахад̇д̇аад̇и ад̇хиббааяо. д̇зхийд̇и лааж̇зхи. суд̣̇д̇хакаж̇ж̇аганд̇и бидтзхи амиссид̇ам̣ суд̣̇д̇хам̣ палаапалаад̣̇икаж̇ж̇агам̣. яааг̇ум̣ биванд̇асса д̣̇знд̇ийд̇и яож̇анаа. д̇аанийд̇и д̣̇вз мажчамам̣сакан̣д̣аани. на баваарзд̇и д̣̇виннам̣ мажчамам̣сакан̣д̣аанам̣ акаад̣̇ид̇ад̇д̇аад̇и ад̇хиббааяо. д̇ад̇од̇и д̣̇взмажчамам̣сакан̣д̣ад̇о нийхарид̇ваа зганд̇и самб̣анд̇хо, д̇зсу ваа. сод̇и каад̣̇аго бхигку. ан̃н̃анд̇и д̣̇вийхи мажчамам̣сакан̣д̣зхи ан̃н̃ам̣ бавааран̣абахонагам̣ бхож̇анам̣.
‘‘Yavehī’’ti bahuvacanena satta dhaññānipi gahitāni. Esa nayo sālivīhiyavehīti etthāpi. Thuseti dhaññatace. Palāpetvāti paṭikkamāpetvā . Tanti cuṇṇaṃ gacchatīti sambandho. Kharapākabhajjitānanti kharo pāko kharapāko, kharapākena bhajjitā kharapākabhajjitā, tesaṃ. Na pavārenti asattusaṅgahattāti adhippāyo. Kuṇḍakampīti kaṇampi. Pavāreti sattusaṅgahattāti adhippāyo. Tehīti lājehi. Suddhakhajjakanti piṭṭhehi amissitaṃ suddhaṃ phalāphalādikhajjakaṃ. Yāguṃ pivantassa dentīti yojanā. Tānīti dve macchamaṃsakhaṇḍāni. Na pavāreti dvinnaṃ macchamaṃsakhaṇḍānaṃ akhāditattāti adhippāyo. Tatoti dvemacchamaṃsakhaṇḍato nīharitvā ekanti sambandho, tesu vā. Soti khādako bhikkhu. Aññanti dvīhi macchamaṃsakhaṇḍehi aññaṃ pavāraṇapahonakaṃ bhojanaṃ.
авад̇т̇уд̇ааяаад̇и бавааран̣ааяа авад̇т̇убхаавад̇о. д̇ам̣ вид̇т̇аарзнд̇о ааха ‘‘яам̣ хий’’д̇и. хисад̣̇д̣̇о вид̇т̇аараж̇од̇аго. яанд̇и мам̣сам̣. ид̣̇ам̣ банаад̇и ид̣̇ам̣ мам̣сам̣ бана. бадигкид̇д̇амам̣сам̣ габбияабхаавад̇о абадигкибид̇аб̣б̣адтаанз тид̇ад̇д̇аа бадигкид̇д̇амби мам̣сабхаавам̣ на ж̇ахаад̇и. нану каад̣̇ид̇амам̣сам̣ бана агаббияабхаавад̇о бадигкибид̇аб̣б̣адтаанз тид̇ад̇д̇аа каад̣̇ияамаанамби мам̣сабхаавам̣ ж̇ахаад̇ийд̇и ааха ‘‘яам̣ банаа’’д̇иаад̣̇и. гулад̣̇уусагагамман̃жа взж̇ж̇агамман̃жа уд̇д̇аримануссад̇хаммаарожанан̃жа саад̣̇ид̇аруубияан̃жа гула…бз… руубияаани, д̇аани аад̣̇ийни язсам̣ гуханаад̣̇ийнанд̇и гула…бз… руубияаад̣̇аяо, д̇зхи. саб̣б̣ад̇т̇аад̇и саб̣б̣зсу ваарзсу.
Avatthutāyāti pavāraṇāya avatthubhāvato. Taṃ vitthārento āha ‘‘yaṃ hī’’ti. Hisaddo vitthārajotako. Yanti maṃsaṃ. Idaṃ panāti idaṃ maṃsaṃ pana. Paṭikkhittamaṃsaṃ kappiyabhāvato apaṭikkhipitabbaṭṭhāne ṭhitattā paṭikkhittampi maṃsabhāvaṃ na jahāti. Nanu khāditamaṃsaṃ pana akappiyabhāvato paṭikkhipitabbaṭṭhāne ṭhitattā khādiyamānampi maṃsabhāvaṃ jahātīti āha ‘‘yaṃ panā’’tiādi. Kuladūsakakammañca vejjakammañca uttarimanussadhammārocanañca sāditarūpiyañca kula…pe… rūpiyāni, tāni ādīni yesaṃ kuhanādīnanti kula…pe… rūpiyādayo, tehi. Sabbatthāti sabbesu vāresu.
званд̇иаад̣̇и ниг̇амананид̣̇ассанам̣. д̇анд̇и бхож̇анам̣. яат̇аад̇и язнаагаарзна. язна аж̇жхохадам̣ ход̇и, со бадигкибад̇и баваарзд̇ийд̇и яож̇анаа. гад̇т̇ажийд̇и гисмин̃жи бад̇д̇аад̣̇игз. д̇асмим̣ жз анд̇арзд̇и д̇асмим̣ кан̣з жз. ан̃н̃ад̇раад̇и ан̃н̃асмим̣ таанз. бад̇д̇з виж̇ж̇амаанабхож̇анам̣ анаж̇жхохарид̇угаамо ход̇и яат̇аа, званд̇и яож̇анаа. хийд̇и сажжам̣. саб̣б̣ад̇т̇аад̇и саб̣б̣зсу бад̣̇зсу. д̇ад̇т̇аад̇и гурунд̣̇ийяам̣. аанисад̣̇ассаад̇и ааг̇амма нисийд̣̇ад̇и зд̇знаад̇и аанисад̣̇о, д̇асса бажчиманд̇ад̇од̇и самб̣анд̇хо. бан̣хианд̇ад̇од̇и басад̇и тид̇агаалз ваа г̇аманагаалз ваа бхуумим̣ пусад̇ийд̇и бан̣хий, д̇асса анд̇ад̇о. ‘‘д̣̇ааяагассаа’’д̇ибад̣̇ам̣ ‘‘басаарид̇ахад̇т̇а’’нд̇и бад̣̇зна жа ‘‘ан̇г̇а’’нд̇и бад̣̇зна жа аваяавийсамб̣анд̇хо. хад̇т̇абаасод̇и хад̇т̇асса баасо самийбо хад̇т̇абаасо, хад̇т̇о басад̇и пусад̇и асмим̣ таанзд̇и ваа хад̇т̇абаасо, ад̣дхад̇зяяахад̇т̇о бад̣̇зсо. д̇асминд̇и хад̇т̇абаасз.
Evantiādi nigamananidassanaṃ. Tanti bhojanaṃ. Yathāti yenākārena. Yena ajjhohaṭaṃ hoti, so paṭikkhipati pavāretīti yojanā. Katthacīti kismiñci pattādike. Tasmiṃ ce antareti tasmiṃ khaṇe ce. Aññatrāti aññasmiṃ ṭhāne. Patte vijjamānabhojanaṃ anajjhoharitukāmo hoti yathā, evanti yojanā. Hīti saccaṃ. Sabbatthāti sabbesu padesu. Tatthāti kurundīyaṃ. Ānisadassāti āgamma nisīdati etenāti ānisado, tassa pacchimantatoti sambandho. Paṇhiantatoti pasati ṭhitakāle vā gamanakāle vā bhūmiṃ phusatīti paṇhī, tassa antato. ‘‘Dāyakassā’’tipadaṃ ‘‘pasāritahattha’’nti padena ca ‘‘aṅga’’nti padena ca avayavīsambandho. Hatthapāsoti hatthassa pāso samīpo hatthapāso, hattho pasati phusati asmiṃ ṭhāneti vā hatthapāso, aḍḍhateyyahattho padeso. Tasminti hatthapāse.
убанаамзд̇ийд̇и самийбам̣ наамзд̇и. ананд̇аранисиннобийд̇и хад̇т̇абаасам̣ авиж̇ахид̇ваа ананд̇арз таанз нисинноби бхигку вад̣̇ад̇ийд̇и яож̇анаа. бхад̇д̇абажчинд̇и бхад̇д̇зна багкид̇д̇ам̣ бажчим̣. ийсаганд̇и бхааванабум̣сагам̣. уд̣̇д̇харид̇ваа ваа абанаамзд̇ваа ваад̇и самб̣анд̇хид̇аб̣б̣ам̣. д̣̇уурзд̇и наваасанз. ид̇од̇и бад̇д̇ад̇о. г̇ад̇о д̣̇ууд̇од̇и самб̣анд̇хо.
Upanāmetīti samīpaṃ nāmeti. Anantaranisinnopīti hatthapāsaṃ avijahitvā anantare ṭhāne nisinnopi bhikkhu vadatīti yojanā. Bhattapacchinti bhattena pakkhittaṃ pacchiṃ. Īsakanti bhāvanapuṃsakaṃ. Uddharitvā vā apanāmetvā vāti sambandhitabbaṃ. Dūreti navāsane. Itoti pattato. Gato dūtoti sambandho.
баривзсанааяаад̇и баривзсанад̇т̇ааяа, бхад̇д̇аг̇г̇з ваа. д̇ад̇раад̇и асмим̣ баривзсанз. д̇анд̇и бхад̇д̇абажчим̣. пудтамад̇д̇ааваад̇и пусияамад̇д̇аава. гадажчунаа уд̣̇д̇хадабхад̇д̇з бана бавааран̣аа ход̇ийд̇и яож̇анаа. хийд̇и сажжам̣, яасмаа ваа. д̇ассаад̇и баривзсагасса. абхихадз бадигкид̇д̇ад̇д̇аад̇и абхихадасса бхад̇д̇асса бадигкид̇д̇абхаавад̇о.
Parivesanāyāti parivesanatthāya, bhattagge vā. Tatrāti asmiṃ parivesane. Tanti bhattapacchiṃ. Phuṭṭhamattāvāti phusiyamattāva. Kaṭacchunā uddhaṭabhatte pana pavāraṇā hotīti yojanā. Hīti saccaṃ, yasmā vā. Tassāti parivesakassa. Abhihaṭe paṭikkhittattāti abhihaṭassa bhattassa paṭikkhittabhāvato.
‘‘гааязна ваажааяа ваа бадигкибанд̇асса бавааран̣аа ход̇ий’’д̇и сан̇кзбзна вуд̇д̇амад̇т̇ам̣ вид̇т̇аарзна д̣̇ассзнд̇о ааха ‘‘д̇ад̇т̇аа’’д̇иаад̣̇и. д̇ад̇т̇аад̇и д̇зсу гааяаваажаабадигкзбзсу. мажчигаб̣ийж̇анинд̇и магкигаанам̣ уд̇д̇аасаним̣ б̣ийж̇аним̣. кагаарасса хи чагаарам̣ гад̇ваа ‘‘мажчигаа’’д̇и вужжад̇и ‘‘сажчигад̇ваа’’д̇иаад̣̇ийсу вияа (а. ни. 3.103). зд̇т̇а хи ‘‘сагкигад̇ваа’’д̇и вад̇д̇аб̣б̣з кагаарасса чагааро ход̇и.
‘‘Kāyena vācāya vā paṭikkhipantassa pavāraṇā hotī’’ti saṅkhepena vuttamatthaṃ vitthārena dassento āha ‘‘tatthā’’tiādi. Tatthāti tesu kāyavācāpaṭikkhepesu. Macchikabījaninti makkhikānaṃ uttāsaniṃ bījaniṃ. Khakārassa hi chakāraṃ katvā ‘‘macchikā’’ti vuccati ‘‘sacchikatvā’’tiādīsu viya (a. ni. 3.103). Ettha hi ‘‘sakkhikatvā’’ti vattabbe khakārassa chakāro hoti.
зго вад̣̇ад̇ийд̇и самб̣анд̇хо. абанзд̇ваад̇и бад̇д̇ад̇о абанзд̇ваа. зд̇т̇аад̇и важанз. гат̇анд̇и гзнаагаарзна ход̇ийд̇и яож̇анаа. вад̣̇анд̇асса наамаад̇и зд̇т̇а наамасад̣̇д̣̇о г̇арахад̇т̇о ‘‘ад̇т̇ий’’д̇ибад̣̇зна яож̇зд̇аб̣б̣о. ад̇т̇и наамаад̇и ад̇т̇о. ид̇обийд̇и бад̇д̇ад̇оби. д̇ад̇раабийд̇и д̇асмим̣ важанзби.
Eko vadatīti sambandho. Apanetvāti pattato apanetvā. Etthāti vacane. Kathanti kenākārena hotīti yojanā. Vadantassa nāmāti ettha nāmasaddo garahattho ‘‘atthī’’tipadena yojetabbo. Atthi nāmāti attho. Itopīti pattatopi. Tatrāpīti tasmiṃ vacanepi.
самам̣саганд̇и мам̣сзна саха бавад̇д̇ам̣. расанд̇и д̣̇равам̣. д̇анд̇и важанам̣. бадигкибад̇о ход̇и. гасмаа? мажчо жа расо жа мажчзна миссо расо жаад̇и ад̇т̇асса самбхавад̇о. ид̣̇анд̇и вад̇т̇ум̣. мам̣сам̣ висум̣ гад̇ваад̇и ‘‘мам̣сасса расам̣ мам̣сараса’’нд̇и мам̣сабад̣̇ад̇т̇асса бад̇хаанабхаавам̣ агад̇ваа, расабад̣̇ад̇т̇ассзва бад̇хаанабхаавам̣ гад̇ваад̇и ад̇т̇о.
Samaṃsakanti maṃsena saha pavattaṃ. Rasanti dravaṃ. Tanti vacanaṃ. Paṭikkhipato hoti. Kasmā? Maccho ca raso ca macchena misso raso cāti atthassa sambhavato. Idanti vatthuṃ. Maṃsaṃ visuṃ katvāti ‘‘maṃsassa rasaṃ maṃsarasa’’nti maṃsapadatthassa padhānabhāvaṃ akatvā, rasapadatthasseva padhānabhāvaṃ katvāti attho.
аабужчанд̇анд̇и ‘‘мам̣сарасам̣ г̇ан̣хат̇аа’’д̇и аабужчанд̇ам̣. д̇анд̇и мам̣сам̣. гарамб̣агод̇и миссагаад̇хиважанамзд̇ам̣. яан̃хи ан̃н̃зна ан̃н̃зна миссзд̇ваа гаронд̇и, со ‘‘гарамб̣аго’’д̇и вужжад̇и. аяам̣ банзд̇т̇а важанад̇т̇о – гарод̇и самуухам̣ аваяавинд̇и гаро, гарийяад̇и ваа самуухзна аваяавинаад̇и гаро, аваяаво, д̇ам̣ вагад̇и аад̣̇ад̣̇аад̇ийд̇и гарамб̣аго, самуухо. ‘‘гад̣̇амб̣аго’’д̇иби баато, соби яуд̇д̇оязва анумад̇ад̇д̇аа бан̣д̣ид̇зхи. абхид̇хаанзби звамзва ад̇т̇ий. ад̇т̇о бана ан̃н̃ат̇аа жинд̇зд̇аб̣б̣о. имасмим̣ ваа ад̇т̇з рагаарасса д̣̇агааро гаад̇аб̣б̣о. мам̣сзна миссо, лагкид̇о ваа гарамб̣аго мам̣сагарамб̣аго. на баваарзд̇ийд̇и язсам̣ гзсан̃жи миссагад̇д̇аа на баваарзд̇и. баваарзд̇ийд̇и мам̣сзна миссид̇ад̇д̇аа баваарзд̇и.
Āpucchantanti ‘‘maṃsarasaṃ gaṇhathā’’ti āpucchantaṃ. Tanti maṃsaṃ. Karambakoti missakādhivacanametaṃ. Yañhi aññena aññena missetvā karonti, so ‘‘karambako’’ti vuccati. Ayaṃ panettha vacanattho – karoti samūhaṃ avayavinti karo, karīyati vā samūhena avayavināti karo, avayavo, taṃ vakati ādadātīti karambako, samūho. ‘‘Kadambako’’tipi pāṭho, sopi yuttoyeva anumatattā paṇḍitehi. Abhidhānepi evameva atthī. Attho pana aññathā cintetabbo. Imasmiṃ vā atthe rakārassa dakāro kātabbo. Maṃsena misso, lakkhito vā karambako maṃsakarambako. Na pavāretīti yesaṃ kesañci missakattā na pavāreti. Pavāretīti maṃsena missitattā pavāreti.
яо бана бадигкибад̇и, со баваарид̇ова ход̇ийд̇и яож̇анаа. ниманд̇анзд̇и ниманд̇анадтаанз. хийд̇и сажжам̣. д̇ад̇т̇аад̇и гурунд̣̇ияам̣. язнаад̇и язна бхад̇д̇зна. зд̇т̇аад̇и ‘‘яааг̇ум̣ г̇ан̣хат̇аа’’д̇иаад̣̇иважанз. ад̇хиббааяод̇и адтагат̇аажарияаанам̣ ад̇хиббааяо. зд̇т̇аад̇и ‘‘яааг̇умиссагам̣ г̇ан̣хат̇аа’’д̇иаад̣̇иважанз. д̣̇уд̣̇д̣̇асанд̇и д̣̇уггарам̣ д̣̇ассанам̣. ид̣̇ан̃жаад̇и ‘‘миссагам̣ г̇ан̣хат̇аа’’д̇иважанан̃жа. на самаанзд̇аб̣б̣анд̇и самам̣ на аанзд̇аб̣б̣ам̣, самаанам̣ ваа на гаад̇аб̣б̣ам̣. хийд̇и сажжам̣, яасмаа ваа. ид̣̇ам̣ банаад̇и миссагам̣ бана. зд̇т̇аад̇и миссагз. висум̣ гад̇ваад̇и расакийрасаббийни аавзн̣им̣ гад̇ваа. д̇анд̇и расаад̣̇им̣.
Yo pana paṭikkhipati, so pavāritova hotīti yojanā. Nimantaneti nimantanaṭṭhāne. Hīti saccaṃ. Tatthāti kurundiyaṃ. Yenāti yena bhattena. Etthāti ‘‘yāguṃ gaṇhathā’’tiādivacane. Adhippāyoti aṭṭhakathācariyānaṃ adhippāyo. Etthāti ‘‘yāgumissakaṃ gaṇhathā’’tiādivacane. Duddasanti dukkaraṃ dassanaṃ. Idañcāti ‘‘missakaṃ gaṇhathā’’tivacanañca. Na samānetabbanti samaṃ na ānetabbaṃ, samānaṃ vā na kātabbaṃ. Hīti saccaṃ, yasmā vā. Idaṃ panāti missakaṃ pana. Etthāti missake. Visuṃ katvāti rasakhīrasappīni āveṇiṃ katvā. Tanti rasādiṃ.
гад̣̇д̣̇ийяад̇и мад̣̇д̣̇ийяад̇ийд̇и гад̣̇д̣̇амо. унд̣̇ад̇и басавад̇и вад̣дхад̇ийд̇и уд̣̇агам̣. унд̣̇ад̇и ваа глзд̣̇анам̣ гарод̇ийд̇и уд̣̇агам̣, нилийнз сад̇д̇з г̇убад̇и рагкад̇ийд̇и г̇умб̣о, г̇ухад̇и сам̣варад̇ийд̇и ваа г̇умб̣о. анубарияааяанд̇знаад̇и ануггамзна баривад̇д̇ид̇ваа ааяанд̇зна. д̇анд̇и наавам̣ ваа сзд̇ум̣ ваа. маж̇жханхиганд̇и ахасса маж̇жхам̣ маж̇жханхам̣, ахасад̣̇д̣̇асса нхаад̣̇зсо, маж̇жханхам̣ зва маж̇жханхигам̣. бод̇т̇агзсу бана маж̇жханд̇иганд̇и баато ад̇т̇и, со абаатоязва. яо тид̇о баваарзд̇и, д̇зна тид̇знзва бхун̃ж̇ид̇аб̣б̣анд̇и яож̇анаа. аанисад̣̇анд̇и бийтз пудтааанисад̣̇амам̣сам̣. ажаалзд̇ваад̇и ажаавзд̇ваа. аяамзва ваа баато. убари жа бассзсу жа аможзд̇ваад̇и вуд̇д̇ам̣ ход̇и. ад̣̇иннаад̣̇аанз вияа таанаажааванам̣ на взд̣̇ид̇аб̣б̣ам̣. сам̣сарид̇унд̇и сам̣саб̣б̣ид̇ум̣. нанд̇и бхигкум̣.
Kaddīyati maddīyatīti kaddamo. Undati pasavati vaḍḍhatīti udakaṃ. Undati vā kledanaṃ karotīti udakaṃ, nilīne satte gupati rakkhatīti gumbo, guhati saṃvaratīti vā gumbo. Anupariyāyantenāti anukkamena parivattitvā āyantena. Tanti nāvaṃ vā setuṃ vā. Majjhanhikanti ahassa majjhaṃ majjhanhaṃ, ahasaddassa nhādeso, majjhanhaṃ eva majjhanhikaṃ. Potthakesu pana majjhantikanti pāṭho atthi, so apāṭhoyeva. Yo ṭhito pavāreti, tena ṭhiteneva bhuñjitabbanti yojanā. Ānisadanti pīṭhe phuṭṭhaānisadamaṃsaṃ. Acāletvāti acāvetvā. Ayameva vā pāṭho. Upari ca passesu ca amocetvāti vuttaṃ hoti. Adinnādāne viya ṭhānācāvanaṃ na veditabbaṃ. Saṃsaritunti saṃsabbituṃ. Nanti bhikkhuṃ.
ад̇ирзгам̣ рижад̇и г̇ажчад̇ийд̇и ад̇ирид̇д̇ам̣, на ад̇ирид̇д̇ам̣ анад̇ирид̇д̇анд̇и ад̇т̇ам̣ д̣̇ассзнд̇о ааха ‘‘на ад̇ирид̇д̇а’’нд̇и. ‘‘ад̇хига’’нд̇ииминаа ад̇ирид̇д̇асад̣̇д̣̇асса ад̇исун̃н̃ад̇т̇ам̣ нивад̇д̇зд̇и. ад̇хи худ̇ваа зд̇и бавад̇д̇ад̇ийд̇и ад̇хигам̣. д̇ам̣ банаад̇и анад̇ирид̇д̇ам̣ бана ход̇ийд̇и самб̣анд̇хо. д̇ад̇т̇аад̇и ‘‘агаббияагад̇а’’нд̇иаад̣̇иважанз. вид̇т̇ааро звам̣ взд̣̇ид̇аб̣б̣од̇и яож̇анаа. д̇ад̇т̇аад̇и ад̇ирид̇д̇ам̣ гаад̇аб̣б̣зсу вад̇т̇уусу. яам̣ палам̣ ваа яам̣ ганд̣̇амуулаад̣̇и ваа агад̇анд̇и яож̇анаа. агаббияабхож̇анам̣ ваад̇и гулад̣̇уусагагаммаад̣̇ийхи ниб̣б̣ад̇д̇ам̣ агаббияабхож̇анам̣ ваа ад̇т̇ийд̇и самб̣анд̇хо. яод̇и винаяад̇харо бхигку. д̇зна гад̇анд̇и яож̇анаа. ‘‘бхуд̇д̇аавинаа баваарид̇зна аасанаа вудтид̇зна гад̇а’’нд̇иважанад̇о бхуд̇д̇аавинаа абаваарид̇зна аасанаа вудтид̇зна гад̇д̇аб̣б̣анд̇и сид̣̇д̇хам̣. д̇асмаа баад̇о ад̣̇д̇хаанам̣ г̇ажчанд̇зсу д̣̇вийсу зго баваарид̇о, д̇асса ид̇аро бин̣д̣ааяа жарид̇ваа лад̣̇д̇хам̣ бхигкам̣ ад̇д̇анаа абхуд̇вааби ‘‘аламзд̇ам̣ саб̣б̣а’’нд̇и гаад̇ум̣ лабхад̇и зва. яанд̇и каад̣̇анийяабхож̇анийяам̣. ‘‘д̇ад̣̇убхаяамбий’’д̇ииминаа ад̇ирид̇д̇ан̃жа ад̇ирид̇д̇ан̃жа ад̇ирид̇д̇ам̣, на ад̇ирид̇д̇ам̣ анад̇ирид̇д̇анд̇и ад̇т̇ам̣ д̣̇ассзд̇и.
Atirekaṃ ricati gacchatīti atirittaṃ, na atirittaṃ anatirittanti atthaṃ dassento āha ‘‘na atiritta’’nti. ‘‘Adhika’’ntiiminā atirittasaddassa atisuññatthaṃ nivatteti. Adhi hutvā eti pavattatīti adhikaṃ. Taṃ panāti anatirittaṃ pana hotīti sambandho. Tatthāti ‘‘akappiyakata’’ntiādivacane. Vitthāro evaṃ veditabboti yojanā. Tatthāti atirittaṃ kātabbesu vatthūsu. Yaṃ phalaṃ vā yaṃ kandamūlādi vā akatanti yojanā. Akappiyabhojanaṃ vāti kuladūsakakammādīhi nibbattaṃ akappiyabhojanaṃ vā atthīti sambandho. Yoti vinayadharo bhikkhu. Tena katanti yojanā. ‘‘Bhuttāvinā pavāritena āsanā vuṭṭhitena kata’’ntivacanato bhuttāvinā apavāritena āsanā vuṭṭhitena kattabbanti siddhaṃ. Tasmā pāto addhānaṃ gacchantesu dvīsu eko pavārito, tassa itaro piṇḍāya caritvā laddhaṃ bhikkhaṃ attanā abhutvāpi ‘‘alametaṃ sabba’’nti kātuṃ labhati eva. Yanti khādanīyabhojanīyaṃ. ‘‘Tadubhayampī’’tiiminā atirittañca atirittañca atirittaṃ, na atirittaṃ anatirittanti atthaṃ dasseti.
д̇ассзваад̇и анад̇ирид̇д̇ассзва. зд̇т̇аад̇и анад̇ирид̇д̇з, ‘‘габбияагад̇а’’нд̇и аад̣̇ийсу сад̇д̇асу винаяагаммаагаарзсу ваа. ананд̇арзд̇и винаяад̇харасса ананд̇арз аасанз. бад̇д̇ад̇о нийхарид̇ваад̇и самб̣анд̇хо. д̇ад̇т̇зваад̇и бхун̃ж̇анадтаанзязва. д̇ассаад̇и нисиннасса. д̇знаад̇и бхад̇д̇ам̣ аанзнд̇зна бхигкунаа бхун̃ж̇ид̇аб̣б̣анд̇и яож̇анаа. ‘‘нисиннзна бхигкунаа’’д̇и гаарид̇агаммам̣ аанзд̇аб̣б̣ам̣. гасмаа ‘‘хад̇т̇ам̣ д̇ховид̇ваа’’д̇и вуд̇д̇анд̇и бужчанд̇о ааха ‘‘гасмаа’’д̇и. хийд̇и гааран̣ам̣. яасмаа агаббияам̣ ход̇и, д̇асмаа хад̇т̇ам̣ д̇ховид̇ваад̇и маяаа вуд̇д̇анд̇и ад̇хиббааяо. д̇ассаад̇и бхад̇д̇ам̣ аанзнд̇асса. язнаад̇и винаяад̇харзна. буна язнаад̇и звамзва. яан̃жаад̇и каад̣̇анийяабхож̇анийяан̃жа. язна винаяад̇харзна батамам̣ агад̇ам̣, д̇знзва гад̇д̇аб̣б̣ам̣. яан̃жа каад̣̇анийяабхож̇анийяам̣ батамам̣ агад̇ам̣, д̇ан̃н̃зва гад̇д̇аб̣б̣анд̇и вуд̇д̇ам̣ ход̇и . д̇ад̇т̇аад̇и батамабхааж̇анз. хийд̇и сажжам̣. батамабхааж̇анам̣ суд̣̇д̇хам̣ д̇ховид̇ваа гад̇амби нид̣̇д̣̇осамзва. д̇зна бхигкунаад̇и баваарид̇зна бхигкунаа.
Tassevāti anatirittasseva. Etthāti anatiritte, ‘‘kappiyakata’’nti ādīsu sattasu vinayakammākāresu vā. Anantareti vinayadharassa anantare āsane. Pattato nīharitvāti sambandho. Tatthevāti bhuñjanaṭṭhāneyeva. Tassāti nisinnassa. Tenāti bhattaṃ ānentena bhikkhunā bhuñjitabbanti yojanā. ‘‘Nisinnena bhikkhunā’’ti kāritakammaṃ ānetabbaṃ. Kasmā ‘‘hatthaṃ dhovitvā’’ti vuttanti pucchanto āha ‘‘kasmā’’ti. Hīti kāraṇaṃ. Yasmā akappiyaṃ hoti, tasmā hatthaṃ dhovitvāti mayā vuttanti adhippāyo. Tassāti bhattaṃ ānentassa. Yenāti vinayadharena. Puna yenāti evameva. Yañcāti khādanīyabhojanīyañca. Yena vinayadharena paṭhamaṃ akataṃ, teneva kattabbaṃ. Yañca khādanīyabhojanīyaṃ paṭhamaṃ akataṃ, taññeva kattabbanti vuttaṃ hoti . Tatthāti paṭhamabhājane. Hīti saccaṃ. Paṭhamabhājanaṃ suddhaṃ dhovitvā katampi niddosameva. Tena bhikkhunāti pavāritena bhikkhunā.
гун̣д̣збийд̇и угкалияамби. саа хи гуд̣ад̇и од̣̇анаад̣̇им̣ д̣̇аахам̣ гарод̇ийд̇и гун̣д̣од̇и вужжад̇и. д̇анд̇и ад̇ирид̇д̇агад̇ам̣ каад̣̇анийяабхож̇анийяам̣. язна банаад̇и винаяад̇харзна бана. бхигкум̣ нисийд̣̇аабзнд̇ийд̇и самб̣анд̇хо. ман̇г̇аланиманд̇анзд̇и ман̇г̇алад̇т̇ааяа ниманд̇анадтаанз. д̇ад̇т̇аад̇и ман̇г̇аланиманд̇анз. гаронд̇знаад̇и гаронд̇зна винаяад̇харзна.
Kuṇḍepīti ukkhaliyampi. Sā hi kuḍati odanādiṃ dāhaṃ karotīti kuṇḍoti vuccati. Tanti atirittakataṃ khādanīyabhojanīyaṃ. Yena panāti vinayadharena pana. Bhikkhuṃ nisīdāpentīti sambandho. Maṅgalanimantaneti maṅgalatthāya nimantanaṭṭhāne. Tatthāti maṅgalanimantane. Karontenāti karontena vinayadharena.
г̇илаанзна бхун̃ж̇ид̇аавасзсамзва на гзвалам̣ г̇илаанаад̇ирид̇д̇ам̣ наама, г̇илаанам̣ бана уд̣̇д̣̇исса аабхад̇ам̣ г̇илаанаад̇ирид̇д̇амзва наамаад̇и д̣̇ассзнд̇о ааха ‘‘на гзвала’’нд̇иаад̣̇и. яам̣гин̃жи г̇илаананд̇и убасамбаннам̣ ваа анубасамбаннам̣ ваа яам̣гин̃жи г̇илаанам̣. яам̣ д̣̇уггадам̣ вуд̇д̇ам̣, д̇ам̣ асам̣садтавасзна вуд̇д̇анд̇и яож̇анаа. анаахаарад̇т̇ааяаад̇и бибаасажчзд̣̇анаааб̣аад̇хавуубасамад̇т̇ааяа.
Gilānena bhuñjitāvasesameva na kevalaṃ gilānātirittaṃ nāma, gilānaṃ pana uddissa ābhataṃ gilānātirittameva nāmāti dassento āha ‘‘na kevala’’ntiādi. Yaṃkiñci gilānanti upasampannaṃ vā anupasampannaṃ vā yaṃkiñci gilānaṃ. Yaṃ dukkaṭaṃ vuttaṃ, taṃ asaṃsaṭṭhavasena vuttanti yojanā. Anāhāratthāyāti pipāsacchedanaābādhavūpasamatthāya.
241. сад̇и бажжаязд̇и зд̇т̇а бажжаяасса саруубам̣ д̣̇ассзд̇ум̣ ‘‘бибаасааяа сад̇ий’’д̇и жа ‘‘ааб̣аад̇хз сад̇ий’’д̇и жа вуд̇д̇ам̣. д̇зна д̇знаад̇и сад̇д̇аахагаалигзна жа яааваж̇ийвигзна жа. д̇ассаад̇и ааб̣аад̇хасса. ид̣̇ам̣ бад̣̇ам̣ ‘‘убасаманад̇т̇а’’нд̇и зд̇т̇а самуд̇хаад̇уяаа самб̣анд̇хз самб̣анд̇хо, яубажжаязна самб̣анд̇хз гамманд̇и д̣̇адтаб̣б̣анд̇и. бан̃жамам̣.
241.Sati paccayeti ettha paccayassa sarūpaṃ dassetuṃ ‘‘pipāsāya satī’’ti ca ‘‘ābādhe satī’’ti ca vuttaṃ. Tena tenāti sattāhakālikena ca yāvajīvikena ca. Tassāti ābādhassa. Idaṃ padaṃ ‘‘upasamanattha’’nti ettha samudhātuyā sambandhe sambandho, yupaccayena sambandhe kammanti daṭṭhabbanti. Pañcamaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 4. бхож̇анаваг̇г̇о • 4. Bhojanavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 5. батамабавааран̣асигкаабад̣̇аван̣н̣анаа • 5. Paṭhamapavāraṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 5. батамабавааран̣аасигкаабад̣̇аван̣н̣анаа • 5. Paṭhamapavāraṇāsikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 5. батамабавааран̣асигкаабад̣̇аван̣н̣анаа • 5. Paṭhamapavāraṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 5. батамабавааран̣аасигкаабад̣̇аван̣н̣анаа • 5. Paṭhamapavāraṇāsikkhāpadavaṇṇanā
