| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
5. பட²மபவாரணாஸிக்கா²பத³வண்ணனா
5. Paṭhamapavāraṇāsikkhāpadavaṇṇanā
பு⁴த்தாவீ பவாரணங் நாம பஞ்சங்கி³கங். தேஸு ‘‘அஸனங் பஞ்ஞாயத்தீ’’தி ஏதேனேவ ‘‘பு⁴த்தாவீ’’தி ஏதஸ்ஸ ஸித்³த⁴த்தா விஸுங் அத்த²ஸித்³தி⁴ ந தி³ஸ்ஸதி. தி³ஸ்ஸதி சே, அங்கா³னங் ச²க்கத்தத³ஸ்ஸனந்தி (வஜிர॰ டீ॰ பாசித்திய 238-239) லிகி²தங். ‘‘போ⁴ஜனங் பஞ்ஞாயதீ’’தி அபி⁴ஹடங் ஸந்தா⁴ய வுத்தங்.
Bhuttāvī pavāraṇaṃ nāma pañcaṅgikaṃ. Tesu ‘‘asanaṃ paññāyattī’’ti eteneva ‘‘bhuttāvī’’ti etassa siddhattā visuṃ atthasiddhi na dissati. Dissati ce, aṅgānaṃ chakkattadassananti (vajira. ṭī. pācittiya 238-239) likhitaṃ. ‘‘Bhojanaṃ paññāyatī’’ti abhihaṭaṃ sandhāya vuttaṃ.
கொட்டெத்வா கதசுண்ணம்பீதி பி-காரேன குண்ட³கங் ஸம்பிண்டே³தி. ஸமபாகப⁴ஜ்ஜிதானங் பன ஆதபஸுக்கா²னங் வா குண்ட³கங் வா யே கேசி தண்டு³லா வாதி எத்தகமேவ வுத்தத்தா ஸமபாகப⁴ஜ்ஜிதானங் வீஹீனங், வீஹிபலாஸானங் வா தண்டு³லசுண்ணங் பவாரேதி. ததா² க²ரபாகப⁴ஜ்ஜிதானங் குண்ட³கம்பி பவாரேதி. ப⁴ஜ்ஜிதஸத்துயோ பிண்டெ³த்வா கதோ அபக்கஸத்துமோத³கோபி பவாரேதீதி லிகி²தங். ஸசே அவஸிட்ட²ங் நத்தி², ந பவாரேதி. கஸ்மா? அஸனஸங்கா²தஸ்ஸ விப்பகதபோ⁴ஜனஸ்ஸ அபா⁴வதோ.
Koṭṭetvākatacuṇṇampīti pi-kārena kuṇḍakaṃ sampiṇḍeti. Samapākabhajjitānaṃ pana ātapasukkhānaṃ vā kuṇḍakaṃ vā ye keci taṇḍulā vāti ettakameva vuttattā samapākabhajjitānaṃ vīhīnaṃ, vīhipalāsānaṃ vā taṇḍulacuṇṇaṃ pavāreti. Tathā kharapākabhajjitānaṃ kuṇḍakampi pavāreti. Bhajjitasattuyo piṇḍetvā kato apakkasattumodakopi pavāretīti likhitaṃ. Sace avasiṭṭhaṃ natthi, na pavāreti. Kasmā? Asanasaṅkhātassa vippakatabhojanassa abhāvato.
அகப்பியமங்ஸங் பன கிஞ்சாபி படிக்கி²பிதப்³ப³ட்டா²னே டி²தங், கா²தி³யமானங் பன மங்ஸபா⁴வங் ந ஜஹாதி, தஸ்மா பவாரேதி. போ⁴ஜனஸாலாய பு⁴ஞ்ஜந்தோ சே அத்தனோ அபாபுணனகொட்டா²ஸங் அபி⁴ஹடங் படிக்கி²பதி, ந பவாரேதி. காமங் படிக்கி²பதி, பத்தே பன ஆராமிகா ஆகிரந்தி, தங் பு⁴ஞ்ஜிதுங் ந வட்டதி. இத³ஞ்ஹி பு³த்³த⁴ப்படிகுட்டா²ய அனேஸனாய உப்பன்னேயேவ ஸங்க²ங் க³ச்ச²தி. யதா² ஹி ஸங்க⁴தோ லத்³த⁴ங் பிண்ட³ங் து³ஸ்ஸீலோ தே³தி, தஞ்சே படிக்கி²பதி, ந பவாரேதி, ஏவங்ஸம்பத³மித³ந்தி ச, விபா⁴கோ³ லஜ்ஜீ சே தே³தி, தங் ஸோ ந அஜ்ஜோ²ஹரிதுகாமதாய படிக்கி²பதி, பவாரேதீதி ச, ‘‘ஸமங்ஸரஸங் ஸமச்ச²ரஸ’’ந்தி ஆபஜ்ஜனதோ ‘‘மங்ஸரஸ’’ந்தி வுத்தே பன படிக்கி²பதோ ஹோதி, ‘‘மங்ஸஸ்ஸ ரஸங் மங்ஸரஸ’’ந்தி அயங் விக்³க³ஹோ நாதி⁴ப்பேதோதி ச வுத்தங். ப⁴த்தமிஸ்ஸகங் யாகு³ங் ஆஹரித்வா ‘‘யாகு³ங் க³ண்ஹதா²’’தி வத³தி, ந பவாரேதி. ‘‘ப⁴த்தங் க³ண்ஹதா²’’தி வுத்தே பவாரேதி. கஸ்மா? யேனாபுச்சி²தோ, தஸ்ஸ அத்தி²தாய. எத்த² பன ‘‘யாகு³மிஸ்ஸகங் க³ண்ஹதா²’’தி வத³தி, தத்ர சே யாகு³ ப³ஹுதரா வா ஹோதி, ஸமஸமா வா. ப⁴த்தங் மந்த³ங், ந பவாரேதி. யாகு³ சே மந்தா³, ப⁴த்தங் ப³ஹுதரங், பவாரேதி. இத³ஞ்ச ஸப்³ப³அட்ட²கதா²ஸு வுத்தத்தா ந ஸக்கா படிக்கி²பிதுங். காரணங் பனெத்த² து³த்³த³ஸங். ‘‘ப⁴த்தமிஸ்ஸகங் க³ண்ஹதா²’’தி வத³தி. தத்ர ப⁴த்தங் ப³ஹுதரங் வா ஸமகங் வா அப்பதரங் வா ஹோதி, பவாரேதி ஏவ. ப⁴த்தங் வா யாகு³ங் வா அனாமஸித்வா ‘‘மிஸ்ஸகங் க³ண்ஹதா²’’தி வத³தி. தத்ர சே ப⁴த்தங் ப³ஹுதரங், ஸமகங் வா ஹோதி, பவாரேதி. அப்பதரங் ந பவாரேதி. தங் ஸப்³ப³ங் வீமங்ஸிதப்³ப³ந்தி.
Akappiyamaṃsaṃ pana kiñcāpi paṭikkhipitabbaṭṭhāne ṭhitaṃ, khādiyamānaṃ pana maṃsabhāvaṃ na jahāti, tasmā pavāreti. Bhojanasālāya bhuñjanto ce attano apāpuṇanakoṭṭhāsaṃ abhihaṭaṃ paṭikkhipati, na pavāreti. Kāmaṃ paṭikkhipati, patte pana ārāmikā ākiranti, taṃ bhuñjituṃ na vaṭṭati. Idañhi buddhappaṭikuṭṭhāya anesanāya uppanneyeva saṅkhaṃ gacchati. Yathā hi saṅghato laddhaṃ piṇḍaṃ dussīlo deti, tañce paṭikkhipati, na pavāreti, evaṃsampadamidanti ca, vibhāgo lajjī ce deti, taṃ so na ajjhoharitukāmatāya paṭikkhipati, pavāretīti ca, ‘‘samaṃsarasaṃ samaccharasa’’nti āpajjanato ‘‘maṃsarasa’’nti vutte pana paṭikkhipato hoti, ‘‘maṃsassa rasaṃ maṃsarasa’’nti ayaṃ viggaho nādhippetoti ca vuttaṃ. Bhattamissakaṃ yāguṃ āharitvā ‘‘yāguṃ gaṇhathā’’ti vadati, na pavāreti. ‘‘Bhattaṃ gaṇhathā’’ti vutte pavāreti. Kasmā? Yenāpucchito, tassa atthitāya. Ettha pana ‘‘yāgumissakaṃ gaṇhathā’’ti vadati, tatra ce yāgu bahutarā vā hoti, samasamā vā. Bhattaṃ mandaṃ, na pavāreti. Yāgu ce mandā, bhattaṃ bahutaraṃ, pavāreti. Idañca sabbaaṭṭhakathāsu vuttattā na sakkā paṭikkhipituṃ. Kāraṇaṃ panettha duddasaṃ. ‘‘Bhattamissakaṃ gaṇhathā’’ti vadati. Tatra bhattaṃ bahutaraṃ vā samakaṃ vā appataraṃ vā hoti, pavāreti eva. Bhattaṃ vā yāguṃ vā anāmasitvā ‘‘missakaṃ gaṇhathā’’ti vadati. Tatra ce bhattaṃ bahutaraṃ, samakaṃ vā hoti, pavāreti. Appataraṃ na pavāreti. Taṃ sabbaṃ vīmaṃsitabbanti.
ப²லங் வா கந்த³மூலாதி³ வா பஞ்சஹி ஸமணகப்பேஹி கப்பியங் அகதந்தி எத்த² கப்பியங் அகாராபிதேஹி கத³லிப²லாதீ³ஹி ஸத்³தி⁴ங் அதிரித்தங் காராபெத்வாபி தங் கத³லிப²லாதி³ங் ட²பெத்வா அவஸேஸங் பு⁴ஞ்ஜிதுங் வட்டதி. அமிஸ்ஸகரஸத்தா புன தானி கப்பியங் காராபெத்வா அஞ்ஞஸ்மிங் பா⁴ஜனே ட²பெத்வா காரெத்வா பு⁴ஞ்ஜிதுங் வட்டதி. கஸ்மா? புப்³பே³ தேஸு வினயகம்மஸ்ஸ அனாருள்ஹத்தாதி வத³ந்தி.
Phalaṃvā kandamūlādi vā pañcahi samaṇakappehi kappiyaṃ akatanti ettha kappiyaṃ akārāpitehi kadaliphalādīhi saddhiṃ atirittaṃ kārāpetvāpi taṃ kadaliphalādiṃ ṭhapetvā avasesaṃ bhuñjituṃ vaṭṭati. Amissakarasattā puna tāni kappiyaṃ kārāpetvā aññasmiṃ bhājane ṭhapetvā kāretvā bhuñjituṃ vaṭṭati. Kasmā? Pubbe tesu vinayakammassa anāruḷhattāti vadanti.
பத்தே ரஜங் பதிதங் அப்படிக்³க³ஹிதமேவ ஹோதி. தஸ்மா படிக்³க³ஹெத்வாவ பி⁴க்கா² க³ண்ஹிதப்³பா³. ‘‘அபடிக்³க³ஹெத்வா க³ண்ஹதோ வினயது³க்கட’’ந்தி (பாசி॰ அட்ட²॰ 265) வுத்தத்தா ஏதமஞ்ஞேஸம்பி ந வட்டதீதி வத³ந்தி. ‘‘தங் பன புன படிக்³க³ஹெத்வா பு⁴ஞ்ஜந்தஸ்ஸ அனாபத்தீ’’தி எத்தா²பி ஏவமேவ. இமஸ்மிங் பன ‘‘அதிரித்தங் கதங் அனதிரித்தகதங் ஹோதீ’’தி எத்தா²பி ஏவமேவ. இமஸ்மிங் பன ‘‘அதிரித்தங் கதங், அனதிரித்தங் கதங் ஹோதீ’’திஆதீ³ஹி உபபரிக்கி²த்வா வினிச்ச²யோ வேதி³தப்³போ³தி தீ³பிதங். அலமேதங் ஸப்³ப³ந்தி இத³ம்பி தே அதி⁴கங், இதோ அஞ்ஞங் ந லச்ச²ஸீதி அத்தோ².
Patte rajaṃ patitaṃ appaṭiggahitameva hoti. Tasmā paṭiggahetvāva bhikkhā gaṇhitabbā. ‘‘Apaṭiggahetvā gaṇhato vinayadukkaṭa’’nti (pāci. aṭṭha. 265) vuttattā etamaññesampi na vaṭṭatīti vadanti. ‘‘Taṃ pana puna paṭiggahetvā bhuñjantassa anāpattī’’ti etthāpi evameva. Imasmiṃ pana ‘‘atirittaṃ kataṃ anatirittakataṃ hotī’’ti etthāpi evameva. Imasmiṃ pana ‘‘atirittaṃ kataṃ, anatirittaṃ kataṃ hotī’’tiādīhi upaparikkhitvā vinicchayo veditabboti dīpitaṃ. Alametaṃ sabbanti idampi te adhikaṃ, ito aññaṃ na lacchasīti attho.
ஆஹாரத்தா²யாதி விகாலே ஏவாதி ஏகே. ‘‘பட²மகதி²னஸதி³ஸானி. இத³ங் பன கிரியாகிரிய’’ந்தி பாடோ². காயகம்மங் அஜ்ஜோ²ஹரணதோ. வசீகம்மங் வாசாய ‘‘அதிரித்தங் கரோத², ப⁴ந்தே’’தி அகாராபனதோதி வேதி³தப்³ப³ங்.
Āhāratthāyāti vikāle evāti eke. ‘‘Paṭhamakathinasadisāni. Idaṃ pana kiriyākiriya’’nti pāṭho. Kāyakammaṃ ajjhoharaṇato. Vacīkammaṃ vācāya ‘‘atirittaṃ karotha, bhante’’ti akārāpanatoti veditabbaṃ.
பட²மபவாரணாஸிக்கா²பத³வண்ணனா நிட்டி²தா.
Paṭhamapavāraṇāsikkhāpadavaṇṇanā niṭṭhitā.
