| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૫. પઠમસન્દિટ્ઠિકસુત્તં
5. Paṭhamasandiṭṭhikasuttaṃ
૪૭. અથ ખો મોળિયસીવકો 1 પરિબ્બાજકો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો મોળિયસીવકો પરિબ્બાજકો ભગવન્તં એતદવોચ – ‘‘‘સન્દિટ્ઠિકો ધમ્મો, સન્દિટ્ઠિકો ધમ્મો’તિ, ભન્તે, વુચ્ચતિ. કિત્તાવતા નુ ખો, ભન્તે, સન્દિટ્ઠિકો ધમ્મો હોતિ અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’’તિ?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘તેન હિ, સીવક, તઞ્ઞેવેત્થ પટિપુચ્છામિ. યથા તે ખમેય્ય તથા નં બ્યાકરેય્યાસિ. તં કિં મઞ્ઞસિ, સીવક, સન્તં વા અજ્ઝત્તં લોભં ‘અત્થિ મે અજ્ઝત્તં લોભો’તિ પજાનાસિ, અસન્તં વા અજ્ઝત્તં લોભં ‘નત્થિ મે અજ્ઝત્તં લોભો’તિ પજાનાસી’’તિ? ‘‘એવં, ભન્તે’’. ‘‘યં ખો ત્વં, સીવક, સન્તં વા અજ્ઝત્તં લોભં ‘અત્થિ મે અજ્ઝત્તં લોભો’તિ પજાનાસિ, અસન્તં વા અજ્ઝત્તં લોભં ‘નત્થિ મે અજ્ઝત્તં લોભો’તિ પજાનાસિ – એવમ્પિ ખો, સીવક, સન્દિટ્ઠિકો ધમ્મો હોતિ…પે॰….
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘તં કિં મઞ્ઞસિ, સીવક, સન્તં વા અજ્ઝત્તં દોસં…પે॰… સન્તં વા અજ્ઝત્તં મોહં…પે॰… સન્તં વા અજ્ઝત્તં લોભધમ્મં…પે॰… સન્તં વા અજ્ઝત્તં દોસધમ્મં…પે॰… સન્તં વા અજ્ઝત્તં મોહધમ્મં ‘અત્થિ મે અજ્ઝત્તં મોહધમ્મો’તિ પજાનાસિ, અસન્તં વા અજ્ઝત્તં મોહધમ્મં ‘નત્થિ મે અજ્ઝત્તં મોહધમ્મો’તિ પજાનાસી’’તિ? ‘‘એવં, ભન્તે’’. ‘‘યં ખો ત્વં, સીવક, સન્તં વા અજ્ઝત્તં મોહધમ્મં ‘અત્થિ મે અજ્ઝત્તં મોહધમ્મો’તિ પજાનાસિ, અસન્તં વા અજ્ઝત્તં મોહધમ્મં ‘નત્થિ મે અજ્ઝત્તં મોહધમ્મો’તિ પજાનાસિ – એવં ખો, સીવક, સન્દિટ્ઠિકો ધમ્મો હોતિ અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’’તિ.
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘અભિક્કન્તં, ભન્તે, અભિક્કન્તં, ભન્તે…પે॰… ઉપાસકં મં, ભન્તે, ભગવા ધારેતુ અજ્જતગ્ગે પાણુપેતં સરણં ગત’’ન્તિ. પઞ્ચમં.
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૫-૬. સન્દિટ્ઠિકસુત્તદ્વયવણ્ણના • 5-6. Sandiṭṭhikasuttadvayavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૩-૬. ઇણસુત્તાદિવણ્ણના • 3-6. Iṇasuttādivaṇṇanā
