| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೫. ಪಠಮಸನ್ದಿಟ್ಠಿಕಸುತ್ತಂ
5. Paṭhamasandiṭṭhikasuttaṃ
೪೭. ಅಥ ಖೋ ಮೋಳಿಯಸೀವಕೋ 1 ಪರಿಬ್ಬಾಜಕೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ। ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಮೋಳಿಯಸೀವಕೋ ಪರಿಬ್ಬಾಜಕೋ ಭಗವನ್ತಂ ಏತದವೋಚ – ‘‘‘ಸನ್ದಿಟ್ಠಿಕೋ ಧಮ್ಮೋ, ಸನ್ದಿಟ್ಠಿಕೋ ಧಮ್ಮೋ’ತಿ, ಭನ್ತೇ, ವುಚ್ಚತಿ। ಕಿತ್ತಾವತಾ ನು ಖೋ, ಭನ್ತೇ, ಸನ್ದಿಟ್ಠಿಕೋ ಧಮ್ಮೋ ಹೋತಿ ಅಕಾಲಿಕೋ ಏಹಿಪಸ್ಸಿಕೋ ಓಪನೇಯ್ಯಿಕೋ ಪಚ್ಚತ್ತಂ ವೇದಿತಬ್ಬೋ ವಿಞ್ಞೂಹೀ’’ತಿ?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘ತೇನ ಹಿ, ಸೀವಕ, ತಞ್ಞೇವೇತ್ಥ ಪಟಿಪುಚ್ಛಾಮಿ। ಯಥಾ ತೇ ಖಮೇಯ್ಯ ತಥಾ ನಂ ಬ್ಯಾಕರೇಯ್ಯಾಸಿ। ತಂ ಕಿಂ ಮಞ್ಞಸಿ, ಸೀವಕ, ಸನ್ತಂ ವಾ ಅಜ್ಝತ್ತಂ ಲೋಭಂ ‘ಅತ್ಥಿ ಮೇ ಅಜ್ಝತ್ತಂ ಲೋಭೋ’ತಿ ಪಜಾನಾಸಿ, ಅಸನ್ತಂ ವಾ ಅಜ್ಝತ್ತಂ ಲೋಭಂ ‘ನತ್ಥಿ ಮೇ ಅಜ್ಝತ್ತಂ ಲೋಭೋ’ತಿ ಪಜಾನಾಸೀ’’ತಿ? ‘‘ಏವಂ, ಭನ್ತೇ’’। ‘‘ಯಂ ಖೋ ತ್ವಂ, ಸೀವಕ, ಸನ್ತಂ ವಾ ಅಜ್ಝತ್ತಂ ಲೋಭಂ ‘ಅತ್ಥಿ ಮೇ ಅಜ್ಝತ್ತಂ ಲೋಭೋ’ತಿ ಪಜಾನಾಸಿ, ಅಸನ್ತಂ ವಾ ಅಜ್ಝತ್ತಂ ಲೋಭಂ ‘ನತ್ಥಿ ಮೇ ಅಜ್ಝತ್ತಂ ಲೋಭೋ’ತಿ ಪಜಾನಾಸಿ – ಏವಮ್ಪಿ ಖೋ, ಸೀವಕ, ಸನ್ದಿಟ್ಠಿಕೋ ಧಮ್ಮೋ ಹೋತಿ…ಪೇ॰…।
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘ತಂ ಕಿಂ ಮಞ್ಞಸಿ, ಸೀವಕ, ಸನ್ತಂ ವಾ ಅಜ್ಝತ್ತಂ ದೋಸಂ…ಪೇ॰… ಸನ್ತಂ ವಾ ಅಜ್ಝತ್ತಂ ಮೋಹಂ…ಪೇ॰… ಸನ್ತಂ ವಾ ಅಜ್ಝತ್ತಂ ಲೋಭಧಮ್ಮಂ…ಪೇ॰… ಸನ್ತಂ ವಾ ಅಜ್ಝತ್ತಂ ದೋಸಧಮ್ಮಂ…ಪೇ॰… ಸನ್ತಂ ವಾ ಅಜ್ಝತ್ತಂ ಮೋಹಧಮ್ಮಂ ‘ಅತ್ಥಿ ಮೇ ಅಜ್ಝತ್ತಂ ಮೋಹಧಮ್ಮೋ’ತಿ ಪಜಾನಾಸಿ, ಅಸನ್ತಂ ವಾ ಅಜ್ಝತ್ತಂ ಮೋಹಧಮ್ಮಂ ‘ನತ್ಥಿ ಮೇ ಅಜ್ಝತ್ತಂ ಮೋಹಧಮ್ಮೋ’ತಿ ಪಜಾನಾಸೀ’’ತಿ? ‘‘ಏವಂ, ಭನ್ತೇ’’। ‘‘ಯಂ ಖೋ ತ್ವಂ, ಸೀವಕ, ಸನ್ತಂ ವಾ ಅಜ್ಝತ್ತಂ ಮೋಹಧಮ್ಮಂ ‘ಅತ್ಥಿ ಮೇ ಅಜ್ಝತ್ತಂ ಮೋಹಧಮ್ಮೋ’ತಿ ಪಜಾನಾಸಿ, ಅಸನ್ತಂ ವಾ ಅಜ್ಝತ್ತಂ ಮೋಹಧಮ್ಮಂ ‘ನತ್ಥಿ ಮೇ ಅಜ್ಝತ್ತಂ ಮೋಹಧಮ್ಮೋ’ತಿ ಪಜಾನಾಸಿ – ಏವಂ ಖೋ, ಸೀವಕ, ಸನ್ದಿಟ್ಠಿಕೋ ಧಮ್ಮೋ ಹೋತಿ ಅಕಾಲಿಕೋ ಏಹಿಪಸ್ಸಿಕೋ ಓಪನೇಯ್ಯಿಕೋ ಪಚ್ಚತ್ತಂ ವೇದಿತಬ್ಬೋ ವಿಞ್ಞೂಹೀ’’ತಿ।
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘ಅಭಿಕ್ಕನ್ತಂ, ಭನ್ತೇ, ಅಭಿಕ್ಕನ್ತಂ, ಭನ್ತೇ…ಪೇ॰… ಉಪಾಸಕಂ ಮಂ, ಭನ್ತೇ, ಭಗವಾ ಧಾರೇತು ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ। ಪಞ್ಚಮಂ।
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೫-೬. ಸನ್ದಿಟ್ಠಿಕಸುತ್ತದ್ವಯವಣ್ಣನಾ • 5-6. Sandiṭṭhikasuttadvayavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩-೬. ಇಣಸುತ್ತಾದಿವಣ್ಣನಾ • 3-6. Iṇasuttādivaṇṇanā
