१. पठमसङ्घादिसेससिक्खापदवण्णना

1. Paṭhamasaṅghādisesasikkhāpadavaṇṇanā

६७९. सङ्घादिसेसकण्डस्स पठमसिक्खापदे द्वीसु जनेसूति अड्डकारकेसु द्वीसु जनेसु। यो कोचीति तेसुयेव द्वीसु यो कोचि, अञ्‍ञो वा तेहि आणत्तो। दुतियस्स आरोचेतीति एत्थापि द्वीसु जनेसु यस्स कस्सचि दुतियस्स कथं यो कोचि आरोचेतीति एवमत्थो गहेतब्बोति आह ‘‘दुतियस्स आरोचेतीति एत्थापि एसेव नयो’’ति। गतिगतन्ति चिरकालपवत्तं।

679. Saṅghādisesakaṇḍassa paṭhamasikkhāpade dvīsu janesūti aḍḍakārakesu dvīsu janesu. Yo kocīti tesuyeva dvīsu yo koci, añño vā tehi āṇatto. Dutiyassa ārocetīti etthāpi dvīsu janesu yassa kassaci dutiyassa kathaṃ yo koci ārocetīti evamattho gahetabboti āha ‘‘dutiyassa ārocetīti etthāpi eseva nayo’’ti. Gatigatanti cirakālapavattaṃ.

आपत्तीति आपज्‍जनं। सह वत्थुज्झाचाराति वत्थुवीतिक्‍कमेन सह। सहयोगे करणवचनप्पसङ्गे इदं निस्सक्‍कवचनं। यन्ति यं धम्मं। निस्सारेतीति आपन्‍नं भिक्खुनिसङ्घम्हा निस्सारेति। हेतुम्हि चायं कत्तुवोहारो। निस्सारणहेतुभूतो हि धम्मो निस्सारणीयोति वुत्तो। गीवायेव होति, न पाराजिकं अनाणत्तिया गहितत्ता। यथा दासदासीवापीआदीनि सम्पटिच्छितुं न वट्टति, एवं तेसं अत्थाय अड्डकरणम्पि न वट्टतीति आह ‘‘अयं अकप्पियअड्डो नाम, न वट्टती’’ति।

Āpattīti āpajjanaṃ. Saha vatthujjhācārāti vatthuvītikkamena saha. Sahayoge karaṇavacanappasaṅge idaṃ nissakkavacanaṃ. Yanti yaṃ dhammaṃ. Nissāretīti āpannaṃ bhikkhunisaṅghamhā nissāreti. Hetumhi cāyaṃ kattuvohāro. Nissāraṇahetubhūto hi dhammo nissāraṇīyoti vutto. Gīvāyeva hoti, na pārājikaṃ anāṇattiyā gahitattā. Yathā dāsadāsīvāpīādīni sampaṭicchituṃ na vaṭṭati, evaṃ tesaṃ atthāya aḍḍakaraṇampi na vaṭṭatīti āha ‘‘ayaṃ akappiyaaḍḍo nāma, na vaṭṭatī’’ti.

एत्थ च सचे अधिकरणट्ठानं गन्त्वा ‘‘अम्हाकं एसो दासो, दासी, वापी, खेत्तं, आरामो, आरामवत्थु, गावो, अजा, कुक्‍कुटा’’तिआदिना वोहरति, अकप्पियं। ‘‘अयं अम्हाकं आरामिको, अयं वापी इत्थन्‍नामेन सङ्घस्स भण्डधोवनत्थाय दिन्‍ना, इतो खेत्ततो आरामतो उप्पज्‍जनकचतुपच्‍चया इतो गावितो महिंसितो अजातो उप्पज्‍जनकगोरसा इत्थन्‍नामेन सङ्घस्स दिन्‍नाति पुच्छिते वा अपुच्छिते वा वत्तुं वट्टती’’ति वदन्ति। सेसमेत्थ उत्तानमेव। अनाकड्ढिताय अड्डकरणं, अड्डपरियोसानन्ति इमानि पनेत्थ द्वे अङ्गानि।

Ettha ca sace adhikaraṇaṭṭhānaṃ gantvā ‘‘amhākaṃ eso dāso, dāsī, vāpī, khettaṃ, ārāmo, ārāmavatthu, gāvo, ajā, kukkuṭā’’tiādinā voharati, akappiyaṃ. ‘‘Ayaṃ amhākaṃ ārāmiko, ayaṃ vāpī itthannāmena saṅghassa bhaṇḍadhovanatthāya dinnā, ito khettato ārāmato uppajjanakacatupaccayā ito gāvito mahiṃsito ajāto uppajjanakagorasā itthannāmena saṅghassa dinnāti pucchite vā apucchite vā vattuṃ vaṭṭatī’’ti vadanti. Sesamettha uttānameva. Anākaḍḍhitāya aḍḍakaraṇaṃ, aḍḍapariyosānanti imāni panettha dve aṅgāni.

पठमसङ्घादिसेससिक्खापदवण्णना निट्ठिता।

Paṭhamasaṅghādisesasikkhāpadavaṇṇanā niṭṭhitā.

Next: २. दुतियसङ्घादिसेससिक्खापदवण्णना • 2. Dutiyasaṅghādisesasikkhāpadavaṇṇanā

Related texts:

तिपिटक (मूल) • Tipiṭaka (Mūla) / विनयपिटक • Vinayapiṭaka / भिक्खुनीविभङ्ग • Bhikkhunīvibhaṅga / १. पठमसङ्घादिसेससिक्खापदं • 1. Paṭhamasaṅghādisesasikkhāpadaṃ

अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / भिक्खुनीविभङ्ग-अट्ठकथा • Bhikkhunīvibhaṅga-aṭṭhakathā / १. पठमसङ्घादिसेससिक्खापदवण्णना • 1. Paṭhamasaṅghādisesasikkhāpadavaṇṇanā

टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / १. पठमसङ्घादिसेससिक्खापदवण्णना • 1. Paṭhamasaṅghādisesasikkhāpadavaṇṇanā

टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १. पठमसङ्घादिसेससिक्खापद-अत्थयोजना • 1. Paṭhamasaṅghādisesasikkhāpada-atthayojanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact