| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
4. பட²மஸேனாஸனஸிக்கா²பத³வண்ணனா
4. Paṭhamasenāsanasikkhāpadavaṇṇanā
110. ‘‘ஏவஞ்சித³ங் ப⁴க³வதா பி⁴க்கூ²னங் ஸிக்கா²பத³ங் பஞ்ஞத்தங் ஹோதீ’’தி வசனதோ, பரிவாரே ‘‘ஏகா பஞ்ஞத்தி, ஏகா அனுபஞ்ஞத்தீ’’தி (பரி॰ 226) வசனதோ ச இத⁴ அத்தி² அனுபஞ்ஞத்தீதி ஸித்³த⁴ங். கிஞ்சாபி ஸித்³த⁴ங், ‘‘ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாதா²’’திஆதி³னா பன பஞ்ஞத்திட்டா²னங் ந பஞ்ஞாயதி, கேவலங் ‘‘அனுஜானாமி, பி⁴க்க²வே, அட்ட²மாஸே…பே॰… நிக்கி²பிது’’ந்தி எத்தகமேவ வுத்தங், தங் கஸ்மாதி சே? பட²மபஞ்ஞத்தியங் வுத்தனயேனேவ வத்தப்³ப³தோ அவிஸேஸத்தா ந வுத்தங். யதி³ ஏவங் கா எத்த² அனுபஞ்ஞத்தீதி? அஜ்ஜோ²காஸேதி. அயமனுபஞ்ஞத்தி பஞ்ஞத்தியம்பி அத்தீ²தி சே? அத்தி², தங் பன ஓகாஸமத்ததீ³பனங், து³தியங் சாதுவஸ்ஸிகமாஸஸங்கா²தகாலதீ³பனங். யஸ்மா உப⁴யம்பி ஏகங் காலோகாஸங் ஏகதோ கத்வா ‘‘அஜ்ஜோ²காஸே’’தி வுத்தந்தி தீ³பெந்தோ ப⁴க³வா ‘‘அனுஜானாமி, பி⁴க்க²வே…பே॰… நிக்கி²பிது’’ந்தி ஆஹாதி வேதி³தப்³ப³ங். தேனேவ மாதிகாட்ட²கதா²யங் (கங்கா²॰ அட்ட²॰ பட²மஸேனாஸனஸிக்கா²பத³வண்ணனா) வுத்தங் ‘‘யத்த² ச யதா³ ச ஸந்த²ரிதுங் ந வட்டதி, தங் ஸப்³ப³மித⁴ அஜ்ஜோ²காஸஸங்க்²யமேவ க³தந்தி வேதி³தப்³ப³’’ந்தி. ஹேமந்தகாலஸ்ஸ அனாபத்திஸமயத்தா இத³ங் ஸிக்கா²பத³ங் நிதா³னானபெக்க²ந்தி ஸித்³த⁴ங், ததா² ஹி அஜ்ஜோ²காஸபத³ஸாமத்தி²யேன அயங் விஸேஸோ – வஸ்ஸானகாலே ஓவஸ்ஸகட்டா²னே அஜ்ஜோ²காஸே, மண்ட³பாதி³ம்ஹி ச ந வட்டதி. ஹேமந்தகாலே பகதிஅஜ்ஜோ²காஸே ந வட்டதி, ஸப்³ப³மித⁴ ஓவஸ்ஸகேபி மண்ட³பாதி³ம்ஹி வட்டதி, தஞ்ச கோ² யத்த² ஹிமவஸ்ஸேன ஸேனாஸனங் ந தேமேதி, கி³ம்ஹகாலே பகதிஅஜ்ஜோ²காஸேபி வட்டதி, தஞ்ச கோ² அகாலமேகா⁴த³ஸ்ஸனேயேவாதி அயங் விஸேஸோ ‘‘அட்ட² மாஸே’’தி ச ‘‘அவஸ்ஸிகஸங்கேதே’’தி ச ஏதேஸங் த்³வின்னங் பதா³னங் ஸாமத்தி²யதோபி ஸித்³தோ⁴.
110. ‘‘Evañcidaṃ bhagavatā bhikkhūnaṃ sikkhāpadaṃ paññattaṃ hotī’’ti vacanato, parivāre ‘‘ekā paññatti, ekā anupaññattī’’ti (pari. 226) vacanato ca idha atthi anupaññattīti siddhaṃ. Kiñcāpi siddhaṃ, ‘‘evañca pana, bhikkhave, imaṃ sikkhāpadaṃ uddiseyyāthā’’tiādinā pana paññattiṭṭhānaṃ na paññāyati, kevalaṃ ‘‘anujānāmi, bhikkhave, aṭṭhamāse…pe… nikkhipitu’’nti ettakameva vuttaṃ, taṃ kasmāti ce? Paṭhamapaññattiyaṃ vuttanayeneva vattabbato avisesattā na vuttaṃ. Yadi evaṃ kā ettha anupaññattīti? Ajjhokāseti. Ayamanupaññatti paññattiyampi atthīti ce? Atthi, taṃ pana okāsamattadīpanaṃ, dutiyaṃ cātuvassikamāsasaṅkhātakāladīpanaṃ. Yasmā ubhayampi ekaṃ kālokāsaṃ ekato katvā ‘‘ajjhokāse’’ti vuttanti dīpento bhagavā ‘‘anujānāmi, bhikkhave…pe… nikkhipitu’’nti āhāti veditabbaṃ. Teneva mātikāṭṭhakathāyaṃ (kaṅkhā. aṭṭha. paṭhamasenāsanasikkhāpadavaṇṇanā) vuttaṃ ‘‘yattha ca yadā ca santharituṃ na vaṭṭati, taṃ sabbamidha ajjhokāsasaṅkhyameva gatanti veditabba’’nti. Hemantakālassa anāpattisamayattā idaṃ sikkhāpadaṃ nidānānapekkhanti siddhaṃ, tathā hi ajjhokāsapadasāmatthiyena ayaṃ viseso – vassānakāle ovassakaṭṭhāne ajjhokāse, maṇḍapādimhi ca na vaṭṭati. Hemantakāle pakatiajjhokāse na vaṭṭati, sabbamidha ovassakepi maṇḍapādimhi vaṭṭati, tañca kho yattha himavassena senāsanaṃ na temeti, gimhakāle pakatiajjhokāsepi vaṭṭati, tañca kho akālameghādassaneyevāti ayaṃ viseso ‘‘aṭṭha māse’’ti ca ‘‘avassikasaṅkete’’ti ca etesaṃ dvinnaṃ padānaṃ sāmatthiyatopi siddho.
கிஞ்ச பி⁴ய்யோ – அட்ட²கதா²யங் ஸந்த³ஸ்ஸிதவிஸேஸோவ. சம்மாதி³னா ஓனத்³த⁴கோ வா நவவாயிமோ வா ந ஸீக⁴ங் வினஸ்ஸதி. காயானுக³திகத்தாதி காயே யத்த², தத்த² க³தத்தா. ஸங்கி⁴கமஞ்சாதி³ம்ஹி காயங் பு²ஸாபெத்வா விஹரிதுங் ந வட்டதீதி த⁴ம்மஸிரித்தே²ரோ. ‘‘ஸங்கி⁴கங் பன ‘அஜ்ஜோ²காஸபரிபோ⁴கே³ன பரிபு⁴ஞ்ஜத², ப⁴ந்தே, யதா²ஸுக²’ந்தி தா³யகா தெ³ந்தி ஸேனாஸனங், ஏவரூபே அனாபத்தீ’’தி அந்த⁴கட்ட²கதா²யங் வசனதோ, இத⁴ ச படிக்கே²பாபா⁴வதோ வட்டதி. ‘‘அஞ்ஞஞ்ச ஏவரூபந்தி அபரே’’தி வுத்தங். ‘‘பாத³ட்டா²னாபி⁴முகா²தி நிஸீத³ந்தஸ்ஸ பாத³பதனட்டா²னாபி⁴முகா²’’தி லிகி²தங். ஸம்மஜ்ஜந்தஸ்ஸ பாத³ட்டா²னாபி⁴முக²ந்தி ஆசரியஸ்ஸ தக்கோ.
Kiñca bhiyyo – aṭṭhakathāyaṃ sandassitavisesova. Cammādinā onaddhako vā navavāyimo vā na sīghaṃ vinassati. Kāyānugatikattāti kāye yattha, tattha gatattā. Saṅghikamañcādimhi kāyaṃ phusāpetvā viharituṃ na vaṭṭatīti dhammasiritthero. ‘‘Saṅghikaṃ pana ‘ajjhokāsaparibhogena paribhuñjatha, bhante, yathāsukha’nti dāyakā denti senāsanaṃ, evarūpe anāpattī’’ti andhakaṭṭhakathāyaṃ vacanato, idha ca paṭikkhepābhāvato vaṭṭati. ‘‘Aññañca evarūpanti apare’’ti vuttaṃ. ‘‘Pādaṭṭhānābhimukhāti nisīdantassa pādapatanaṭṭhānābhimukhā’’ti likhitaṃ. Sammajjantassa pādaṭṭhānābhimukhanti ācariyassa takko.
111. ‘‘பாது³த்³தா⁴ரேனாதி ப³ஹிஉபசாரே டி²தத்தா’’தி லிகி²தங். க³ச்ச²ந்தி, து³க்கடங் த⁴ம்மகதி²கஸ்ஸ விய. கஸ்மா ந பாசித்தியங்? பச்சா² ஆக³தேஹி வுட்³ட⁴தரேஹி உட்டா²பெத்வா க³ஹேதப்³ப³தோ. த⁴ம்மகதி²கஸ்ஸ பன அனுட்ட²பேதப்³ப³த்தா. ‘‘அனாணத்தியா பஞ்ஞத்தியம்பி தஸ்ஸ பா⁴ரோ’’தி வுத்தங்.
111.‘‘Pāduddhārenāti bahiupacāre ṭhitattā’’ti likhitaṃ. Gacchanti, dukkaṭaṃ dhammakathikassa viya. Kasmā na pācittiyaṃ? Pacchā āgatehi vuḍḍhatarehi uṭṭhāpetvā gahetabbato. Dhammakathikassa pana anuṭṭhapetabbattā. ‘‘Anāṇattiyā paññattiyampi tassa bhāro’’ti vuttaṃ.
112. பரிஹரணேயேவாதி எத்த² க³ஹெத்வா விசாரணேதி த⁴ம்மஸிரித்தே²ரோ. அத்தனோ ஸந்தககரணேதி உபதிஸ்ஸத்தே²ரோ. பீ³ஜனீபத்தகங் சதுரஸ்ஸபீ³ஜனீ.
112.Pariharaṇeyevāti ettha gahetvā vicāraṇeti dhammasiritthero. Attano santakakaraṇeti upatissatthero. Bījanīpattakaṃ caturassabījanī.
113. ‘‘யோ பி⁴க்கு² வா ஸாமணேரோ வா…பே॰… லஜ்ஜீ ஹோதீ’தி வுத்தத்தா அலஜ்ஜிங் ஆபுச்சி²த்வா க³ந்துங் ந வட்டதீ’’தி வத³ந்தி. பாடே² ‘‘கேனசி பலிபு³த்³த⁴ங் ஹோதீ’’தி ச அட்ட²கதா²யங் ‘‘பலிபு³த்³த⁴’’ந்தி ச ஸேனாஸனங்யேவ ஸந்தா⁴ய வுத்தங், தஸ்மா ததா²பி அத்தீ²தி க³ஹேதப்³ப³ங். ‘‘அனாபுச்ச²ங் வா’’தி பாடோ².
113. ‘‘Yo bhikkhu vā sāmaṇero vā…pe… lajjī hotī’ti vuttattā alajjiṃ āpucchitvā gantuṃ na vaṭṭatī’’ti vadanti. Pāṭhe ‘‘kenaci palibuddhaṃ hotī’’ti ca aṭṭhakathāyaṃ ‘‘palibuddha’’nti ca senāsanaṃyeva sandhāya vuttaṃ, tasmā tathāpi atthīti gahetabbaṃ. ‘‘Anāpucchaṃ vā’’ti pāṭho.
பட²மஸேனாஸனஸிக்கா²பத³வண்ணனா நிட்டி²தா.
Paṭhamasenāsanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. பட²மஸேனாஸனஸிக்கா²பத³வண்ணனா • 4. Paṭhamasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. பட²மஸேனாஸனஸிக்கா²பத³ங் • 4. Paṭhamasenāsanasikkhāpadaṃ
