| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. பாசித்தியகண்ட³ங்
4. Pācittiyakaṇḍaṃ
1. லஸுணவக்³கோ³
1. Lasuṇavaggo
1. பட²மஸிக்கா²பத³-அத்த²யோஜனா
1. Paṭhamasikkhāpada-atthayojanā
திங்ஸகானந்தரங் திங்ஸகானங் அனந்தரே காலே ச²ஸட்டி²ஸதஸங்க³ஹா ச²உத்தரஸட்டி²அதி⁴கஸதேஹி ஸிக்கா²பதே³ஹி ஸங்க³ஹிதா யே த⁴ம்மா ஸங்கீ³திகாரேஹி ஸங்கீ³தா, தா³னி இமஸ்மிங் காலே தேஸம்பி த⁴ம்மானங் அயங் வண்ணனா ஹோதீதி யோஜனா.
Tiṃsakānantaraṃ tiṃsakānaṃ anantare kāle chasaṭṭhisatasaṅgahā chauttarasaṭṭhiadhikasatehi sikkhāpadehi saṅgahitā ye dhammā saṅgītikārehi saṅgītā, dāni imasmiṃ kāle tesampi dhammānaṃ ayaṃ vaṇṇanā hotīti yojanā.
793. தத்தா²தி தேஸு ச²ஸட்டி²ஸதஸங்க³ஹேஸு ஸிக்கா²பதே³ஸு, பட²மஸிக்கா²பதே³தி ஸம்ப³ந்தோ⁴. ‘‘த்³வே தயோ’’தி எத்த² வாஸத்³தோ³ லுத்தனித்³தி³ட்டோ²தி ஆஹ ‘‘த்³வே வா தயோ வா’’தி. போ²டலகேதி கந்தே³, மிஞ்ஜே வா. ஏதந்தி ‘‘க³ண்டி³கே’’தி ஏதங் நாமங். ‘‘பமாண’’ந்திஇமினா மத்தஸத்³தோ³ பமாணத்தோ²வ, ந அப்பத்தோ², நாபி அவதா⁴ரணத்தோ²தி த³ஸ்ஸேதி. லஸுணந்தி ஸேதவண்ணமூலங் மஹாகந்த³ங். மஹாகந்தோ³ ஹி ப்³யஞ்ஜனஸம்பாகாதீ³ஸு ஆமக³ந்தா⁴னங் அபி⁴ப⁴வனத்தா லஸீயதி கந்தீயதீதி லஸுணந்தி வுச்சதி.
793.Tatthāti tesu chasaṭṭhisatasaṅgahesu sikkhāpadesu, paṭhamasikkhāpadeti sambandho. ‘‘Dve tayo’’ti ettha vāsaddo luttaniddiṭṭhoti āha ‘‘dve vā tayo vā’’ti. Phoṭalaketi kande, miñje vā. Etanti ‘‘gaṇḍike’’ti etaṃ nāmaṃ. ‘‘Pamāṇa’’ntiiminā mattasaddo pamāṇatthova, na appattho, nāpi avadhāraṇatthoti dasseti. Lasuṇanti setavaṇṇamūlaṃ mahākandaṃ. Mahākando hi byañjanasampākādīsu āmagandhānaṃ abhibhavanattā lasīyati kantīyatīti lasuṇanti vuccati.
ஸுவண்ணஹங்ஸயோனிந்தி ஸுவண்ணமயேன பத்தேன யுத்தங் ஹங்ஸயோனிங். ஜாதிஸ்ஸரோதி ஜாதிங் ப⁴வங் ஸரதி ஜானாதீதி ஜாதிஸ்ஸரோ. அதா²தி ஜாதிஸ்ஸரஸ்ஸ நிப்ப²ன்னத்தா. நிப்ப²ன்னத்தோ² ஹி அத²ஸத்³தோ³. புப்³ப³ஸினேஹேனாதி புப்³பே³ மனுஸ்ஸப⁴வே பா⁴விதேன ஸினேஹேன. தாஸந்தி பஜாபதியா ச திஸ்ஸன்னங் தீ⁴தரானஞ்ச. தங் பனாதி பத்தங் பன.
Suvaṇṇahaṃsayoninti suvaṇṇamayena pattena yuttaṃ haṃsayoniṃ. Jātissaroti jātiṃ bhavaṃ sarati jānātīti jātissaro. Athāti jātissarassa nipphannattā. Nipphannattho hi athasaddo. Pubbasinehenāti pubbe manussabhave bhāvitena sinehena. Tāsanti pajāpatiyā ca tissannaṃ dhītarānañca. Taṃ panāti pattaṃ pana.
795. மக³தே⁴ஸூதி மக³த⁴ரட்டே² டி²தேஸு ஜனபதே³ஸு. ஹீதி ஸச்சங், யஸ்மா வா. இதா⁴தி ‘‘லஸுணங் கா²தெ³ய்யா’’திபதே³. தம்பீதி மாக³த⁴கம்பி. க³ண்டி³கலஸுணமேவாதி க³ண்டோ³ போ²டோ ஏதஸ்ஸத்தீ²தி க³ண்டி³கங். க³ண்ட³ஸத்³தோ³ ஹி போ²டபரியாயோ, ப³ஹுத்தே² இகபச்சயோ. ப³ஹுக³ண்டி³கலஸுணந்தி ஹி வுத்தங் ஹோதி. க³ண்ட³ஸத்³தோ³ ஹி போ²டே ச கபோலே சாதி த்³வீஸு அத்தே²ஸு வத்ததி, இத⁴ பன போ²டே வத்ததீதி த³ட்ட²ப்³ப³ங். பொத்த²கேஸு பன ஒட்ட²ஜேன சதுத்த²க்க²ரேன பாடோ² அத்தி², ஸோ வீமங்ஸித்வா க³ஹேதப்³போ³. ப³ஹூஸு ஹி புப்³ப³பொத்த²கேஸு கண்ட²ஜோ ததியக்க²ரோ ச ஒட்ட²ஜோ சதுத்த²க்க²ரோ சாதி த்³வே அக்க²ரா அஞ்ஞமஞ்ஞங் பரிவத்தித்வா திட்ட²ந்தி. ந ஏகத்³விதிமிஞ்ஜகந்தி ஏகமிஞ்ஜோ பலண்டு³கோ ந ஹோதி, த்³விமிஞ்ஜோ ப⁴ஞ்ஜனகோ ந ஹோதி, திமிஞ்ஜோ ஹரிதகோ ந ஹோதீதி அத்தோ². குருந்தி³யங் பன வுத்தந்தி ஸம்ப³ந்தோ⁴. ஸங்கா²தி³த்வாதி த³ந்தேஹி சுண்ணவிசுண்ணங் கத்வா.
795.Magadhesūti magadharaṭṭhe ṭhitesu janapadesu. Hīti saccaṃ, yasmā vā. Idhāti ‘‘lasuṇaṃ khādeyyā’’tipade. Tampīti māgadhakampi. Gaṇḍikalasuṇamevāti gaṇḍo phoṭo etassatthīti gaṇḍikaṃ. Gaṇḍasaddo hi phoṭapariyāyo, bahutthe ikapaccayo. Bahugaṇḍikalasuṇanti hi vuttaṃ hoti. Gaṇḍasaddo hi phoṭe ca kapole cāti dvīsu atthesu vattati, idha pana phoṭe vattatīti daṭṭhabbaṃ. Potthakesu pana oṭṭhajena catutthakkharena pāṭho atthi, so vīmaṃsitvā gahetabbo. Bahūsu hi pubbapotthakesu kaṇṭhajo tatiyakkharo ca oṭṭhajo catutthakkharo cāti dve akkharā aññamaññaṃ parivattitvā tiṭṭhanti. Na ekadvitimiñjakanti ekamiñjo palaṇḍuko na hoti, dvimiñjo bhañjanako na hoti, timiñjo haritako na hotīti attho. Kurundiyaṃ pana vuttanti sambandho. Saṅkhāditvāti dantehi cuṇṇavicuṇṇaṃ katvā.
797. பலண்டு³கோதி ஸுகந்த³கோ ஏகோ லஸுணவிஸேஸோ. ப⁴ஞ்ஜனகாதீ³னி லோகஸங்கேதோபதே³ஸதோ த³ட்ட²ப்³பா³னி. ஹீதி ஸச்சங். தஸ்ஸாதி சாபலஸுணஸ்ஸ. ஸபா⁴வேனேவாதி ஸூபஸம்பாகாதி³ங் வினா அத்தனோ ஸபா⁴வதோ ஏவ. தந்தி மாக³த⁴கங், பக்கி²பிதுந்தி ஸம்ப³ந்தோ⁴. ஹீதி ஸச்சங். யத்த² கத்த²சீதி யேஸு கேஸுசீதி. பட²மங்.
797.Palaṇḍukoti sukandako eko lasuṇaviseso. Bhañjanakādīni lokasaṅketopadesato daṭṭhabbāni. Hīti saccaṃ. Tassāti cāpalasuṇassa. Sabhāvenevāti sūpasampākādiṃ vinā attano sabhāvato eva. Tanti māgadhakaṃ, pakkhipitunti sambandho. Hīti saccaṃ. Yattha katthacīti yesu kesucīti. Paṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 1. பட²மஸிக்கா²பத³ங் • 1. Paṭhamasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 1. பட²மலஸுணஸிக்கா²பத³வண்ணனா • 1. Paṭhamalasuṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மலஸுணஸிக்கா²பத³வண்ணனா • 1. Paṭhamalasuṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
