| Library / Tipiṭaka / તિપિટક • Tipiṭaka / ભિક્ખુનીવિભઙ્ગ-અટ્ઠકથા • Bhikkhunīvibhaṅga-aṭṭhakathā |
૫. ચિત્તાગારવગ્ગો
5. Cittāgāravaggo
૧. પઠમસિક્ખાપદવણ્ણના
1. Paṭhamasikkhāpadavaṇṇanā
૯૭૮. ચિત્તાગારવગ્ગસ્સ પઠમસિક્ખાપદે – રાજાગારન્તિ રઞ્ઞો કીળનઘરં. ચિત્તાગારન્તિ કીળનચિત્તસાલં. આરામન્તિ કીળનઉપવનં. ઉય્યાનન્તિ કીળનુય્યાનં. પોક્ખરણીન્તિ કીળનપોક્ખરણિં. તસ્માયેવ પદભાજને ‘‘યત્થ કત્થચિ રઞ્ઞો કીળિતુ’’ન્તિઆદિ વુત્તં. દસ્સનાય ગચ્છતિ આપત્તિ દુક્કટસ્સાતિ એત્થ પદવારગણનાય દુક્કટં. યત્થ ઠિતા પસ્સતીતિ એત્થ પન સચે એકસ્મિંયેવ ઠાને ઠિતા પદં અનુદ્ધરમાના પઞ્ચપિ પસ્સતિ, એકમેવ પાચિત્તિયં. તં તં દિસાભાગં ઓલોકેત્વા પસ્સન્તિયા પન પાટેક્કા આપત્તિયો. ભિક્ખુસ્સ પન સબ્બત્થ દુક્કટં.
978. Cittāgāravaggassa paṭhamasikkhāpade – rājāgāranti rañño kīḷanagharaṃ. Cittāgāranti kīḷanacittasālaṃ. Ārāmanti kīḷanaupavanaṃ. Uyyānanti kīḷanuyyānaṃ. Pokkharaṇīnti kīḷanapokkharaṇiṃ. Tasmāyeva padabhājane ‘‘yattha katthaci rañño kīḷitu’’ntiādi vuttaṃ. Dassanāya gacchati āpatti dukkaṭassāti ettha padavāragaṇanāya dukkaṭaṃ. Yattha ṭhitā passatīti ettha pana sace ekasmiṃyeva ṭhāne ṭhitā padaṃ anuddharamānā pañcapi passati, ekameva pācittiyaṃ. Taṃ taṃ disābhāgaṃ oloketvā passantiyā pana pāṭekkā āpattiyo. Bhikkhussa pana sabbattha dukkaṭaṃ.
૯૮૧. આરામે ઠિતાતિ અજ્ઝારામે રાજાગારાદીનિ કરોન્તિ, તાનિ પસ્સન્તિયા અનાપત્તિ. ગચ્છન્તી વા આગચ્છન્તી વાતિ પિણ્ડપાતાદીનં અત્થાય ગચ્છન્તિયા મગ્ગો હોતિ, તાનિ પસ્સતિ, અનાપત્તિ. સતિ કરણીયે ગન્ત્વાતિ રઞ્ઞો સન્તિકં કેનચિ કરણીયેન ગન્ત્વા પસ્સતિ, અનાપત્તિ. આપદાસૂતિ કેનચિ ઉપદ્દુતા પવિસિત્વા પસ્સતિ, અનાપત્તિ. સેસં ઉત્તાનમેવ.
981.Ārāme ṭhitāti ajjhārāme rājāgārādīni karonti, tāni passantiyā anāpatti. Gacchantī vā āgacchantī vāti piṇḍapātādīnaṃ atthāya gacchantiyā maggo hoti, tāni passati, anāpatti. Sati karaṇīye gantvāti rañño santikaṃ kenaci karaṇīyena gantvā passati, anāpatti. Āpadāsūti kenaci upaddutā pavisitvā passati, anāpatti. Sesaṃ uttānameva.
એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, લોકવજ્જં, કાયકમ્મં, અકુસલચિત્તં, તિવેદનન્તિ.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
પઠમસિક્ખાપદં.
Paṭhamasikkhāpadaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ભિક્ખુનીવિભઙ્ગ • Bhikkhunīvibhaṅga / ૧. પઠમસિક્ખાપદં • 1. Paṭhamasikkhāpadaṃ
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૫. ચિત્તાગારવગ્ગવણ્ણના • 5. Cittāgāravaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૧. પઠમસિક્ખાપદવણ્ણના • 1. Paṭhamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. પઠમાદિસિક્ખાપદવણ્ણના • 1. Paṭhamādisikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૧. પઠમસિક્ખાપદ-અત્થયોજના • 1. Paṭhamasikkhāpada-atthayojanā
