| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੬. ਪਠਮਸਿਕ੍ਖਾਸੁਤ੍ਤવਣ੍ਣਨਾ
6. Paṭhamasikkhāsuttavaṇṇanā
੮੭. ਛਟ੍ਠੇ ਸਮਤ੍ਤਕਾਰੀਤਿ ਅਨੂਨੇਨ ਪਰਿਪੂਰੇਨ ਆਕਾਰੇਨ ਸਮਨ੍ਨਾਗਤੋ। ਸਿਕ੍ਖਾਪਦਾਨਂ ਖੁਦ੍ਦਾਨੁਖੁਦ੍ਦਕਤ੍ਤਂ ਅਪੇਕ੍ਖਾਸਿਦ੍ਧਨ੍ਤਿ ਆਹ ‘‘ਤਤ੍ਰਾਪਿ ਸਙ੍ਘਾਦਿਸੇਸਂ ਖੁਦ੍ਦਕ’’ਨ੍ਤਿਆਦਿ। ਅਙ੍ਗੁਤ੍ਤਰਮਹਾਨਿਕਾਯવਲ਼ਞ੍ਜਨਕਆਚਰਿਯਾਤਿ ਅਙ੍ਗੁਤ੍ਤਰਨਿਕਾਯਂ ਪਰਿਹਰਨ੍ਤਾ ਆਚਰਿਯਾ, ਅਙ੍ਗੁਤ੍ਤਰਭਾਣਕਾਤਿ વੁਤ੍ਤਂ ਹੋਤਿ। ਲੋਕવਜ੍ਜਂ ਨਾਪਜ੍ਜਤਿ ਲੋਕવਜ੍ਜਸਿਕ੍ਖਾਪਦਾਨਂ વੀਤਿਕ੍ਕਮਸਾਧਕਸ੍ਸ ਕਿਲੇਸਗਹਨਸ੍ਸ ਸਬ੍ਬਸੋ ਪਹੀਨਤ੍ਤਾ। ਪਣ੍ਣਤ੍ਤਿવਜ੍ਜਮੇવ ਆਪਜ੍ਜਤਿ ਪਣ੍ਣਤ੍ਤਿવੀਤਿਕ੍ਕਮਂ વਾ ਅਜਾਨਤੋਪਿ ਆਪਤ੍ਤਿਸਮ੍ਭવਤੋ। ਚਿਤ੍ਤੇਨ ਆਪਜ੍ਜਨ੍ਤੋ ਰੂਪਿਯਪ੍ਪਟਿਗ੍ਗਹਣਂ ਆਪਜ੍ਜਤੀਤਿ ਉਪਨਿਕ੍ਖਿਤ੍ਤਸਾਦਿਯੇਨ ਆਪਜ੍ਜਤਿ।
87. Chaṭṭhe samattakārīti anūnena paripūrena ākārena samannāgato. Sikkhāpadānaṃ khuddānukhuddakattaṃ apekkhāsiddhanti āha ‘‘tatrāpi saṅghādisesaṃ khuddaka’’ntiādi. Aṅguttaramahānikāyavaḷañjanakaācariyāti aṅguttaranikāyaṃ pariharantā ācariyā, aṅguttarabhāṇakāti vuttaṃ hoti. Lokavajjaṃ nāpajjati lokavajjasikkhāpadānaṃ vītikkamasādhakassa kilesagahanassa sabbaso pahīnattā. Paṇṇattivajjameva āpajjati paṇṇattivītikkamaṃ vā ajānatopi āpattisambhavato. Cittena āpajjanto rūpiyappaṭiggahaṇaṃ āpajjatīti upanikkhittasādiyena āpajjati.
ਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨਿ ਆਦਿਬ੍ਰਹ੍ਮਚਰਿਯਾਨਿ, ਤਾਨਿ ਏવ ਆਦਿਬ੍ਰਹ੍ਮਚਰਿਯਕਾਨਿ ਯਥਾ ‘‘વਿਨਯੋ ਏવ વੇਨਯਿਕੋ’’ਤਿ ਆਹ ‘‘ਮਗ੍ਗਬ੍ਰਹ੍ਮਚਰਿਯਸ੍ਸਾ’’ਤਿਆਦਿ। ਚਤ੍ਤਾਰਿ ਮਹਾਸੀਲਸਿਕ੍ਖਾਪਦਾਨੀਤਿ ਚਤ੍ਤਾਰਿ ਪਾਰਾਜਿਕਾਨਿ ਸਨ੍ਧਾਯ વਦਤਿ। ਪਟਿਪਕ੍ਖਧਮ੍ਮਾਨਂ ਅਨવਸੇਸਤੋ ਸવਨਤੋ ਪਗ੍ਘਰਣਤੋ ਸੋਤੋ, ਅਰਿਯਮਗ੍ਗੋਤਿ ਆਹ ‘‘ਸੋਤਸਙ੍ਖਾਤੇਨ ਮਗ੍ਗੇਨਾ’’ਤਿ। વਿਨਿਪਾਤੇਤਿ વਿਰੂਪਂ ਸਦੁਕ੍ਖਂ ਸਉਪਾਯਾਸਂ ਨਿਪਾਤੇਤੀਤਿ વਿਨਿਪਾਤੋ, ਅਪਾਯਦੁਕ੍ਖੇ ਖਿਪਨਕੋ। ਧਮ੍ਮੋਤਿ ਸਭਾવੋ। ਨਾਸ੍ਸ વਿਨਿਪਾਤੋ ਧਮ੍ਮੋਤਿ ਅવਿਨਿਪਾਤਧਮ੍ਮੋ, ਨ ਅਤ੍ਤਾਨਂ ਅਪਾਯੇਸੁ વਿਨਿਪਾਤਨਸਭਾવੋਤਿ વੁਤ੍ਤਂ ਹੋਤਿ। ਕਸ੍ਮਾ? ਯੇ ਧਮ੍ਮਾ ਅਪਾਯਗਮਨੀਯਾ, ਤੇਸਂ ਪਹੀਨਤ੍ਤਾ। ਤੇਨਾਹ ‘‘ਅવਿਨਿਪਾਤਧਮ੍ਮੋਤਿ ਚਤੂਸੁ ਅਪਾਯੇਸੁ ਅਪਤਨਸਭਾવੋ’’ਤਿ। ਤਤ੍ਥ ਅਪਤਨਸਭਾવੋਤਿ ਅਨੁਪ੍ਪਜ੍ਜਨਸਭਾવੋ। ਸੋਤਾਪਤ੍ਤਿਮਗ੍ਗਨਿਯਾਮੇਨ ਨਿਯਤੋਤਿ ਉਪਰਿਮਗ੍ਗਾਧਿਗਮਸ੍ਸ ਅવਸ੍ਸਂਭਾવੀਭਾવਤੋ ਨਿਯਤੋ। ਤੇਨੇવਾਹ ‘‘ਸਮ੍ਬੋਧਿਪਰਾਯਣੋ’’ਤਿ। ਹੇਟ੍ਠਿਮਨ੍ਤਤੋ ਸਤ੍ਤਮਭવਤੋ ਉਪਰਿ ਅਨੁਪ੍ਪਜ੍ਜਨਧਮ੍ਮਤਾਯ વਾ ਨਿਯਤੋ। ਸਮ੍ਬੁਜ੍ਝਤੀਤਿ ਸਮ੍ਬੋਧਿ, ਅਰਿਯਮਗ੍ਗੋ। ਸੋ ਪਨ ਪਠਮਮਗ੍ਗਸ੍ਸ ਅਧਿਗਤਤ੍ਤਾ ਅવਸਿਟ੍ਠੋ ਚ ਅਧਿਗਨ੍ਤਬ੍ਬਭਾવੇਨ ਇਚ੍ਛਿਤਬ੍ਬੋਤਿ ਉਪਰਿਮਗ੍ਗਤ੍ਤਯਸਙ੍ਖਾਤਾ ਸਮ੍ਬੋਧਿ ਪਰਂ ਅਯਨਂ ਪਰਾ ਗਤਿ ਅਸ੍ਸਾਤਿ ਸਮ੍ਬੋਧਿਪਰਾਯਣੋ। ਤੇਨਾਹ ‘‘ਉਪਰਿਮਗ੍ਗਤ੍ਤਯਸਮ੍ਬੋਧਿਪਰਾਯਣੋ’’ਤਿ।
Brahmacariyassa ādibhūtāni ādibrahmacariyāni, tāni eva ādibrahmacariyakāni yathā ‘‘vinayo eva venayiko’’ti āha ‘‘maggabrahmacariyassā’’tiādi. Cattāri mahāsīlasikkhāpadānīti cattāri pārājikāni sandhāya vadati. Paṭipakkhadhammānaṃ anavasesato savanato paggharaṇato soto, ariyamaggoti āha ‘‘sotasaṅkhātena maggenā’’ti. Vinipāteti virūpaṃ sadukkhaṃ saupāyāsaṃ nipātetīti vinipāto, apāyadukkhe khipanako. Dhammoti sabhāvo. Nāssa vinipāto dhammoti avinipātadhammo, na attānaṃ apāyesu vinipātanasabhāvoti vuttaṃ hoti. Kasmā? Ye dhammā apāyagamanīyā, tesaṃ pahīnattā. Tenāha ‘‘avinipātadhammoti catūsu apāyesu apatanasabhāvo’’ti. Tattha apatanasabhāvoti anuppajjanasabhāvo. Sotāpattimagganiyāmenaniyatoti uparimaggādhigamassa avassaṃbhāvībhāvato niyato. Tenevāha ‘‘sambodhiparāyaṇo’’ti. Heṭṭhimantato sattamabhavato upari anuppajjanadhammatāya vā niyato. Sambujjhatīti sambodhi, ariyamaggo. So pana paṭhamamaggassa adhigatattā avasiṭṭho ca adhigantabbabhāvena icchitabboti uparimaggattayasaṅkhātā sambodhi paraṃ ayanaṃ parā gati assāti sambodhiparāyaṇo. Tenāha ‘‘uparimaggattayasambodhiparāyaṇo’’ti.
ਤਨੁਭਾવਾਤਿ ਪਰਿਯੁਟ੍ਠਾਨਮਨ੍ਦਤਾਯ ਚ ਕਦਾਚਿ ਕਰਹਚਿ ਉਪ੍ਪਤ੍ਤਿਯਾ ਚ ਤਨੁਭਾવੇਨ। ਤਨੁਤ੍ਤਞ੍ਹਿ ਦ੍વੀਹਿ ਕਾਰਣੇਹਿ વੇਦਿਤਬ੍ਬਂ ਅਧਿਚ੍ਚੁਪ੍ਪਤ੍ਤਿਯਾ ਚ ਪਰਿਯੁਟ੍ਠਾਨਮਨ੍ਦਤਾਯ ਚ। ਸਕਦਾਗਾਮਿਸ੍ਸ ਹਿ વਟ੍ਟਾਨੁਸਾਰਿਮਹਾਜਨਸ੍ਸ વਿਯ ਕਿਲੇਸਾ ਅਭਿਣ੍ਹਂ ਨ ਉਪ੍ਪਜ੍ਜਨ੍ਤਿ, ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ વਿਰਲ਼ਾਕਾਰਾ ਹੁਤ੍વਾ વਿਰਲ਼વਾਪਿਤੇ ਖੇਤ੍ਤੇ ਅਙ੍ਕੁਰਾ વਿਯ। ਉਪ੍ਪਜ੍ਜਮਾਨਾਪਿ ਚ વਟ੍ਟਾਨੁਸਾਰਿਮਹਾਜਨਸ੍ਸੇવ ਮਦ੍ਦਨ੍ਤਾ ਫਰਨ੍ਤਾ ਛਾਦੇਨ੍ਤਾ ਅਨ੍ਧਕਾਰਂ ਕਰੋਨ੍ਤਾ ਨ ਉਪ੍ਪਜ੍ਜਨ੍ਤਿ, ਮਨ੍ਦਮਨ੍ਦਾ ਉਪ੍ਪਜ੍ਜਨ੍ਤਿ ਤਨੁਕਾਕਾਰਾ ਹੁਤ੍વਾ ਅਬ੍ਭਪਟਲਮਿવ ਮਕ੍ਖਿਕਾਪਤ੍ਤਮਿવ ਚ। ਤਤ੍ਥ ਕੇਚਿ ਥੇਰਾ ਭਣਨ੍ਤਿ ‘‘ਸਕਦਾਗਾਮਿਸ੍ਸ ਕਿਲੇਸਾ ਕਿਞ੍ਚਾਪਿ ਚਿਰੇਨ ਉਪ੍ਪਜ੍ਜਨ੍ਤਿ, ਬਹਲਾવ ਉਪ੍ਪਜ੍ਜਨ੍ਤਿ। ਤਥਾ ਹਿਸ੍ਸ ਪੁਤ੍ਤਾ ਚ ਧੀਤਰੋ ਚ ਦਿਸ੍ਸਨ੍ਤੀ’’ਤਿ। ਏਤਂ ਪਨ ਅਪ੍ਪਮਾਣਂ। ਪੁਤ੍ਤਧੀਤਰੋ ਹਿ ਅਙ੍ਗਪਚ੍ਚਙ੍ਗਪਰਾਮਸਨਮਤ੍ਤੇਨਪਿ ਹੋਨ੍ਤੀਤਿ। ਦ੍વੀਹਿਯੇવ ਕਾਰਣੇਹਿਸ੍ਸ ਕਿਲੇਸਾਨਂ ਤਨੁਤ੍ਤਂ વੇਦਿਤਬ੍ਬਂ ਅਧਿਚ੍ਚੁਪ੍ਪਤ੍ਤਿਯਾ ਚ ਪਰਿਯੁਟ੍ਠਾਨਮਨ੍ਦਤਾਯ ਚਾਤਿ।
Tanubhāvāti pariyuṭṭhānamandatāya ca kadāci karahaci uppattiyā ca tanubhāvena. Tanuttañhi dvīhi kāraṇehi veditabbaṃ adhiccuppattiyā ca pariyuṭṭhānamandatāya ca. Sakadāgāmissa hi vaṭṭānusārimahājanassa viya kilesā abhiṇhaṃ na uppajjanti, kadāci karahaci uppajjanti viraḷākārā hutvā viraḷavāpite khette aṅkurā viya. Uppajjamānāpi ca vaṭṭānusārimahājanasseva maddantā pharantā chādentā andhakāraṃ karontā na uppajjanti, mandamandā uppajjanti tanukākārā hutvā abbhapaṭalamiva makkhikāpattamiva ca. Tattha keci therā bhaṇanti ‘‘sakadāgāmissa kilesā kiñcāpi cirena uppajjanti, bahalāva uppajjanti. Tathā hissa puttā ca dhītaro ca dissantī’’ti. Etaṃ pana appamāṇaṃ. Puttadhītaro hi aṅgapaccaṅgaparāmasanamattenapi hontīti. Dvīhiyeva kāraṇehissa kilesānaṃ tanuttaṃ veditabbaṃ adhiccuppattiyā ca pariyuṭṭhānamandatāya cāti.
ਹੇਟ੍ਠਾਭਾਗਿਯਾਨਨ੍ਤਿ ਏਤ੍ਥ ਹੇਟ੍ਠਾਤਿ ਮਹਗ੍ਗਤਭੂਮਿਤੋ ਹੇਟ੍ਠਾ, ਕਾਮਭੂਮਿਯਨ੍ਤਿ ਅਤ੍ਥੋ। ਤੇਸਂ ਪਚ੍ਚਯਭਾવੇਨ ਹੇਟ੍ਠਾਭਾਗਸ੍ਸ ਹਿਤਾਤਿ ਹੇਟ੍ਠਾਭਾਗਿਯਾ, ਤੇਸਂ ਹੇਟ੍ਠਾਭਾਗਿਯਾਨਂ, ਹੇਟ੍ਠਾਭਾਗਸ੍ਸ ਕਾਮਭવਸ੍ਸ ਪਚ੍ਚਯਭਾવੇਨ ਗਹਿਤਾਨਨ੍ਤਿ ਅਤ੍ਥੋ। ਸਂਯੋਜੇਨ੍ਤਿ ਬਨ੍ਧਨ੍ਤਿ ਖਨ੍ਧਗਤਿਭવਾਦੀਹਿ ਖਨ੍ਧਗਤਿਭવਾਦਯੋ, ਕਮ੍ਮਂ વਾ ਫਲੇਨਾਤਿ ਸਂਯੋਜਨਾਨੀਤਿ ਆਹ ‘‘ਸਂਯੋਜਨਾਨਨ੍ਤਿ ਬਨ੍ਧਨਾਨ’’ਨ੍ਤਿ। ਅਸਮੁਚ੍ਛਿਨ੍ਨਰਾਗਾਦਿਕਸ੍ਸ ਹਿ ਏਤਰਹਿ ਖਨ੍ਧਾਦੀਨਂ ਆਯਤਿਂ ਖਨ੍ਧਾਦੀਹਿ ਸਮ੍ਬਨ੍ਧੋ, ਸਮੁਚ੍ਛਿਨ੍ਨਰਾਗਾਦਿਕਸ੍ਸ ਪਨ ਤਂ ਨਤ੍ਥਿ, ਕਤਾਨਮ੍ਪਿ ਕਮ੍ਮਾਨਂ ਅਸਮਤ੍ਥਭਾવਾਪਤ੍ਤਿਤੋ ਰਾਗਾਦੀਨਂ ਅਨ੍વਯਤੋ ਬ੍ਯਤਿਰੇਕਤੋ ਚ ਸਂਯੋਜਨਟ੍ਠੋ ਸਿਦ੍ਧੋ। ਪਰਿਕ੍ਖਯੇਨਾਤਿ ਸਮੁਚ੍ਛੇਦੇਨ।
Heṭṭhābhāgiyānanti ettha heṭṭhāti mahaggatabhūmito heṭṭhā, kāmabhūmiyanti attho. Tesaṃ paccayabhāvena heṭṭhābhāgassa hitāti heṭṭhābhāgiyā, tesaṃ heṭṭhābhāgiyānaṃ, heṭṭhābhāgassa kāmabhavassa paccayabhāvena gahitānanti attho. Saṃyojenti bandhanti khandhagatibhavādīhi khandhagatibhavādayo, kammaṃ vā phalenāti saṃyojanānīti āha ‘‘saṃyojanānanti bandhanāna’’nti. Asamucchinnarāgādikassa hi etarahi khandhādīnaṃ āyatiṃ khandhādīhi sambandho, samucchinnarāgādikassa pana taṃ natthi, katānampi kammānaṃ asamatthabhāvāpattito rāgādīnaṃ anvayato byatirekato ca saṃyojanaṭṭho siddho. Parikkhayenāti samucchedena.
ਓਪਪਾਤਿਕੋਤਿ ਉਪਪਾਤਿਕਯੋਨਿਕੋ ਉਪਪਤਨੇ ਸਾਧੁਕਾਰੀ। ਸੇਸਯੋਨਿਪਟਿਕ੍ਖੇਪવਚਨਮੇਤਂ। ਤੇਨ ਗਬ੍ਭવਾਸਦੁਕ੍ਖਾਭਾવਮਾਹ। ਤਤ੍ਥ ਪਰਿਨਿਬ੍ਬਾਯੀਤਿ ਇਮਿਨਾ ਸੇਸਦੁਕ੍ਖਾਭਾવਂ। ਤਤ੍ਥ ਪਰਿਨਿਬ੍ਬਾਯਿਤਾ ਚਸ੍ਸ ਕਾਮਲੋਕੇ ਖਨ੍ਧਬੀਜਸ੍ਸ ਅਪੁਨਾਗਮਨવਸੇਨੇવਾਤਿ ਦਸ੍ਸੇਤੁਂ ‘‘ਅਨਾવਤ੍ਤਿਧਮ੍ਮੋ’’ਤਿ વੁਤ੍ਤਂ। ਉਪਰਿਯੇવਾਤਿ ਬ੍ਰਹ੍ਮਲੋਕੇਯੇવ। ਅਨਾવਤ੍ਤਿਧਮ੍ਮੋਤਿ ਤਤੋ ਬ੍ਰਹ੍ਮਲੋਕਾ ਪੁਨਪ੍ਪੁਨਂ ਪਟਿਸਨ੍ਧਿવਸੇਨ ਨ ਆવਤ੍ਤਨਧਮ੍ਮੋ। ਤੇਨਾਹ ‘‘ਯੋਨਿਗਤਿવਸੇਨ ਅਨਾਗਮਨਧਮ੍ਮੋ’’ਤਿ।
Opapātikoti upapātikayoniko upapatane sādhukārī. Sesayonipaṭikkhepavacanametaṃ. Tena gabbhavāsadukkhābhāvamāha. Tattha parinibbāyīti iminā sesadukkhābhāvaṃ. Tattha parinibbāyitā cassa kāmaloke khandhabījassa apunāgamanavasenevāti dassetuṃ ‘‘anāvattidhammo’’ti vuttaṃ. Upariyevāti brahmalokeyeva. Anāvattidhammoti tato brahmalokā punappunaṃ paṭisandhivasena na āvattanadhammo. Tenāha ‘‘yonigativasena anāgamanadhammo’’ti.
ਪਦੇਸਂ ਪਦੇਸਕਾਰੀ ਆਰਾਧੇਤੀਤਿ ਸੀਲਕ੍ਖਨ੍ਧਾਦੀਨਂ ਪਾਰਿਪੂਰਿਯਾ ਏਕਦੇਸਭੂਤਂ ਹੇਟ੍ਠਿਮਮਗ੍ਗਤ੍ਤਯਂ ਪਦੇਸੋ, ਤਂ ਕਰੋਨ੍ਤੋ ਪਦੇਸਂ ਏਕਦੇਸਭੂਤਂ ਹੇਟ੍ਠਿਮਂ ਫਲਤ੍ਤਯਮੇવ ਆਰਾਧੇਤਿ, ਨਿਪ੍ਫਾਦੇਤੀਤਿ ਅਤ੍ਥੋ। ਤੇਨਾਹ ‘‘ਪਦੇਸਕਾਰੀ ਪੁਗ੍ਗਲੋ ਨਾਮ ਸੋਤਾਪਨ੍ਨੋ’’ਤਿਆਦਿ। ਪਰਿਪੂਰਂ ਪਰਿਪੂਰਕਾਰੀਤਿ ਸੀਲਕ੍ਖਨ੍ਧਾਦੀਹਿ ਸਦ੍ਧਿਨ੍ਦ੍ਰਿਯਾਦੀਹਿ ਚ ਪਰਿਤੋ ਪੂਰਣੇਨ ਪਰਿਪੂਰਸਙ੍ਖਾਤਂ ਅਰਹਤ੍ਤਮਗ੍ਗਂ ਕਰੋਨ੍ਤੋ ਨਿਬ੍ਬਤ੍ਤੇਨ੍ਤੋ ਪਰਿਪੂਰਂ ਅਰਹਤ੍ਤਫਲਂ ਆਰਾਧੇਤਿ, ਨਿਪ੍ਫਾਦੇਤੀਤਿ ਅਤ੍ਥੋ। ਤੇਨਾਹ ‘‘ਪਰਿਪੂਰਕਾਰੀ ਨਾਮ ਅਰਹਾ’’ਤਿਆਦਿ।
Padesaṃpadesakārī ārādhetīti sīlakkhandhādīnaṃ pāripūriyā ekadesabhūtaṃ heṭṭhimamaggattayaṃ padeso, taṃ karonto padesaṃ ekadesabhūtaṃ heṭṭhimaṃ phalattayameva ārādheti, nipphādetīti attho. Tenāha ‘‘padesakārī puggalo nāma sotāpanno’’tiādi. Paripūraṃ paripūrakārīti sīlakkhandhādīhi saddhindriyādīhi ca parito pūraṇena paripūrasaṅkhātaṃ arahattamaggaṃ karonto nibbattento paripūraṃ arahattaphalaṃ ārādheti, nipphādetīti attho. Tenāha ‘‘paripūrakārī nāma arahā’’tiādi.
ਪਠਮਸਿਕ੍ਖਾਸੁਤ੍ਤવਣ੍ਣਨਾ ਨਿਟ੍ਠਿਤਾ।
Paṭhamasikkhāsuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੬. ਪਠਮਸਿਕ੍ਖਾਸੁਤ੍ਤਂ • 6. Paṭhamasikkhāsuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੬. ਪਠਮਸਿਕ੍ਖਾਸੁਤ੍ਤવਣ੍ਣਨਾ • 6. Paṭhamasikkhāsuttavaṇṇanā
