| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁. ပဌမသုတ္တန္တနိဒ္ဒေသော
1. Paṭhamasuttantaniddeso
ကထံ ဒုက္ခံ တထဋ္ဌေန သစ္စံ? စတ္တာရော ဒုက္ခသ္သ ဒုက္ခဋ္ဌာ တထာ အဝိတထာ အနညထာ။ ဒုက္ခသ္သ ပီဠနဋ္ဌော, သင္ခတဋ္ဌော, သန္တာပဋ္ဌော, ဝိပရိဏာမဋ္ဌော – ဣမေ စတ္တာရော ဒုက္ခသ္သ ဒုက္ခဋ္ဌာ တထာ အဝိတထာ အနညထာ။ ဧဝံ ဒုက္ခံ တထဋ္ဌေန သစ္စံ။
Kathaṃ dukkhaṃ tathaṭṭhena saccaṃ? Cattāro dukkhassa dukkhaṭṭhā tathā avitathā anaññathā. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho – ime cattāro dukkhassa dukkhaṭṭhā tathā avitathā anaññathā. Evaṃ dukkhaṃ tathaṭṭhena saccaṃ.
ကထံ သမုဒယော တထဋ္ဌေန သစ္စံ? စတ္တာရော သမုဒယသ္သ သမုဒယဋ္ဌာ တထာ အဝိတထာ အနညထာ။ သမုဒယသ္သ အာယူဟနဋ္ဌော, နိဒာနဋ္ဌော, သံယောဂဋ္ဌော ပလိဗောဓဋ္ဌော – ဣမေ စတ္တာရော သမုဒယသ္သ သမုဒယဋ္ဌာ တထာ အဝိတထာ အနညထာ။ ဧဝံ သမုဒယော တထဋ္ဌေန သစ္စံ။
Kathaṃ samudayo tathaṭṭhena saccaṃ? Cattāro samudayassa samudayaṭṭhā tathā avitathā anaññathā. Samudayassa āyūhanaṭṭho, nidānaṭṭho, saṃyogaṭṭho palibodhaṭṭho – ime cattāro samudayassa samudayaṭṭhā tathā avitathā anaññathā. Evaṃ samudayo tathaṭṭhena saccaṃ.
ကထံ နိရောဓော တထဋ္ဌေန သစ္စံ? စတ္တာရော နိရောဓသ္သ နိရောဓဋ္ဌာ တထာ အဝိတထာ အနညထာ။ နိရောဓသ္သ နိသ္သရဏဋ္ဌော, ဝိဝေကဋ္ဌော, အသင္ခတဋ္ဌော, အမတဋ္ဌော – ဣမေ စတ္တာရော နိရောဓသ္သ နိရောဓဋ္ဌာ တထာ အဝိတထာ အနညထာ။ ဧဝံ နိရောဓော တထဋ္ဌေန သစ္စံ။
Kathaṃ nirodho tathaṭṭhena saccaṃ? Cattāro nirodhassa nirodhaṭṭhā tathā avitathā anaññathā. Nirodhassa nissaraṇaṭṭho, vivekaṭṭho, asaṅkhataṭṭho, amataṭṭho – ime cattāro nirodhassa nirodhaṭṭhā tathā avitathā anaññathā. Evaṃ nirodho tathaṭṭhena saccaṃ.
ကထံ မဂ္ဂော တထဋ္ဌေန သစ္စံ? စတ္တာရော မဂ္ဂသ္သ မဂ္ဂဋ္ဌာ တထာ အဝိတထာ အနညထာ။ မဂ္ဂသ္သ နိယ္ယာနဋ္ဌော, ဟေတုဋ္ဌော, ဒသ္သနဋ္ဌော, အာဓိပတေယ္ယဋ္ဌော – ဣမေ စတ္တာရော မဂ္ဂသ္သ မဂ္ဂဋ္ဌာ တထာ အဝိတထာ အနညထာ။ ဧဝံ မဂ္ဂော တထဋ္ဌေန သစ္စံ။
Kathaṃ maggo tathaṭṭhena saccaṃ? Cattāro maggassa maggaṭṭhā tathā avitathā anaññathā. Maggassa niyyānaṭṭho, hetuṭṭho, dassanaṭṭho, ādhipateyyaṭṭho – ime cattāro maggassa maggaṭṭhā tathā avitathā anaññathā. Evaṃ maggo tathaṭṭhena saccaṃ.
၉. ကတိဟာကာရေဟိ စတ္တာရိ သစ္စာနိ ဧကပ္ပဋိဝေဓာနိ? စတူဟာကာရေဟိ စတ္တာရိ သစ္စာနိ ဧကပ္ပဋိဝေဓာနိ။ တထဋ္ဌေန, အနတ္တဋ္ဌေန, သစ္စဋ္ဌေန, ပဋိဝေဓဋ္ဌေန – ဣမေဟိ စတူဟာကာရေဟိ စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
9. Katihākārehi cattāri saccāni ekappaṭivedhāni? Catūhākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena – imehi catūhākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ တထဋ္ဌေန စတ္တာရိ သစ္စာနိ ဧကပ္ပဋိဝေဓာနိ? စတူဟာကာရေဟိ တထဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ဒုက္ခဋ္ဌော တထဋ္ဌော, သမုဒယသ္သ သမုဒယဋ္ဌော တထဋ္ဌော, နိရောဓသ္သ နိရောဓဋ္ဌော တထဋ္ဌော, မဂ္ဂသ္သ မဂ္ဂဋ္ဌော တထဋ္ဌော – ဣမေဟိ စတူဟာကာရေဟိ တထဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ tathaṭṭhena cattāri saccāni ekappaṭivedhāni? Catūhākārehi tathaṭṭhena cattāri saccāni ekappaṭivedhāni. Dukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho – imehi catūhākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ အနတ္တဋ္ဌေန စတ္တာရိ သစ္စာနိ ဧကပ္ပဋိဝေဓာနိ? စတူဟာကာရေဟိ အနတ္တဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ဒုက္ခဋ္ဌော အနတ္တဋ္ဌော, သမုဒယသ္သ သမုဒယဋ္ဌော အနတ္တဋ္ဌော, နိရောဓသ္သ နိရောဓဋ္ဌော အနတ္တဋ္ဌော, မဂ္ဂသ္သ မဂ္ဂဋ္ဌော အနတ္တဋ္ဌော – ဣမေဟိ စတူဟာကာရေဟိ အနတ္တဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ anattaṭṭhena cattāri saccāni ekappaṭivedhāni? Catūhākārehi anattaṭṭhena cattāri saccāni ekappaṭivedhāni. Dukkhassa dukkhaṭṭho anattaṭṭho, samudayassa samudayaṭṭho anattaṭṭho, nirodhassa nirodhaṭṭho anattaṭṭho, maggassa maggaṭṭho anattaṭṭho – imehi catūhākārehi anattaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ သစ္စဋ္ဌေန စတ္တာရိ သစ္စာနိ ဧကပ္ပဋိဝေဓာနိ? စတူဟာကာရေဟိ သစ္စဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ဒုက္ခဋ္ဌော သစ္စဋ္ဌော, သမုဒယသ္သ သမုဒယဋ္ဌော သစ္စဋ္ဌော, နိရောဓသ္သ နိရောဓဋ္ဌော သစ္စဋ္ဌော, မဂ္ဂသ္သ မဂ္ဂဋ္ဌော သစ္စဋ္ဌော – ဣမေဟိ စတူဟာကာရေဟိ သစ္စဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ saccaṭṭhena cattāri saccāni ekappaṭivedhāni? Catūhākārehi saccaṭṭhena cattāri saccāni ekappaṭivedhāni. Dukkhassa dukkhaṭṭho saccaṭṭho, samudayassa samudayaṭṭho saccaṭṭho, nirodhassa nirodhaṭṭho saccaṭṭho, maggassa maggaṭṭho saccaṭṭho – imehi catūhākārehi saccaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ ပဋိဝေဓဋ္ဌေန စတ္တာရိ သစ္စာနိ ဧကပ္ပဋိဝေဓာနိ? စတူဟာကာရေဟိ ပဋိဝေဓဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ဒုက္ခဋ္ဌော ပဋိဝေဓဋ္ဌော, သမုဒယသ္သ သမုဒယဋ္ဌော ပဋိဝေဓဋ္ဌော နိရောဓသ္သ နိရောဓဋ္ဌော ပဋိဝေဓဋ္ဌော, မဂ္ဂသ္သ မဂ္ဂဋ္ဌော ပဋိဝေဓဋ္ဌော – ဣမေဟိ စတူဟာကာရေဟိ ပဋိဝေဓဋ္ဌေန စတ္တာရိ သစ္စာနိ ဧကသင္ဂဟိတာနိ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ paṭivedhaṭṭhena cattāri saccāni ekappaṭivedhāni? Catūhākārehi paṭivedhaṭṭhena cattāri saccāni ekappaṭivedhāni. Dukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho – imehi catūhākārehi paṭivedhaṭṭhena cattāri saccāni ekasaṅgahitāni yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
၁၀. ကတိဟာကာရေဟိ စတ္တာရိ သစ္စာနိ ဧကပ္ပဋိဝေဓာနိ? ယံ အနိစ္စံ တံ ဒုက္ခံ, ယံ ဒုက္ခံ တံ အနိစ္စံ, ယံ အနိစ္စဉ္စ ဒုက္ခဉ္စ တံ အနတ္တာ။ ယံ အနိစ္စဉ္စ ဒုက္ခဉ္စ အနတ္တာ စ တံ တထံ။ ယံ အနိစ္စံ စ ဒုက္ခဉ္စ အနတ္တာ စ တထဉ္စ တံ သစ္စံ။ ယံ အနိစ္စဉ္စ ဒုက္ခဉ္စ အနတ္တာ စ တထဉ္စ သစ္စဉ္စ တံ ဧကသင္ဂဟိတံ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
10. Katihākārehi cattāri saccāni ekappaṭivedhāni? Yaṃ aniccaṃ taṃ dukkhaṃ, yaṃ dukkhaṃ taṃ aniccaṃ, yaṃ aniccañca dukkhañca taṃ anattā. Yaṃ aniccañca dukkhañca anattā ca taṃ tathaṃ. Yaṃ aniccaṃ ca dukkhañca anattā ca tathañca taṃ saccaṃ. Yaṃ aniccañca dukkhañca anattā ca tathañca saccañca taṃ ekasaṅgahitaṃ. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကတိဟာကာရေဟိ စတ္တာရိ သစ္စာနိ ဧကပ္ပဋိဝေဓာနိ? နဝဟာကာရေဟိ စတ္တာရိ သစ္စာနိ ဧကပ္ပဋိဝေဓာနိ။ တထဋ္ဌေန, အနတ္တဋ္ဌေန, သစ္စဋ္ဌေန, ပဋိဝေဓဋ္ဌေန, အဘိညဋ္ဌေန, ပရိညဋ္ဌေန, ပဟာနဋ္ဌေန, ဘာဝနဋ္ဌေန, သစ္ဆိကိရိယဋ္ဌေန – ဣမေဟိ နဝဟာကာရေဟိ စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Katihākārehi cattāri saccāni ekappaṭivedhāni? Navahākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena, abhiññaṭṭhena, pariññaṭṭhena, pahānaṭṭhena, bhāvanaṭṭhena, sacchikiriyaṭṭhena – imehi navahākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ တထဋ္ဌေန စတ္တာရိ သစ္စာနိ ဧကပ္ပဋိဝေဓာနိ? နဝဟာကာရေဟိ တထဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ဒုက္ခဋ္ဌော တထဋ္ဌော, သမုဒယသ္သ သမုဒယဋ္ဌော တထဋ္ဌော, နိရောဓသ္သ နိရောဓဋ္ဌော တထဋ္ဌော, မဂ္ဂသ္သ မဂ္ဂဋ္ဌော တထဋ္ဌော, အဘိညာယ အဘိညဋ္ဌော တထဋ္ဌော, ပရိညာယ ပရိညဋ္ဌော တထဋ္ဌော, ပဟာနသ္သ ပဟာနဋ္ဌော တထဋ္ဌော, ဘာဝနာယ ဘာဝနဋ္ဌော တထဋ္ဌော, သစ္ဆိကိရိယာယ သစ္ဆိကိရိယဋ္ဌော တထဋ္ဌော – ဣမေဟိ နဝဟာကာရေဟိ တထဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ tathaṭṭhena cattāri saccāni ekappaṭivedhāni? Navahākārehi tathaṭṭhena cattāri saccāni ekappaṭivedhāni. Dukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho, abhiññāya abhiññaṭṭho tathaṭṭho, pariññāya pariññaṭṭho tathaṭṭho, pahānassa pahānaṭṭho tathaṭṭho, bhāvanāya bhāvanaṭṭho tathaṭṭho, sacchikiriyāya sacchikiriyaṭṭho tathaṭṭho – imehi navahākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ အနတ္တဋ္ဌေန။ သစ္စဋ္ဌေန။ ပဋိဝေဓဋ္ဌေန စတ္တာရိ သစ္စာနိ ဧကပ္ပဋိဝေဓာနိ? နဝဟာကာရေဟိ ပဋိဝေဓဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ဒုက္ခဋ္ဌော ပဋိဝေဓဋ္ဌော, သမုဒယသ္သ သမုဒယဋ္ဌော ပဋိဝေဓဋ္ဌော, နိရောဓသ္သ နိရောဓဋ္ဌော ပဋိဝေဓဋ္ဌော, မဂ္ဂသ္သ မဂ္ဂဋ္ဌော ပဋိဝေဓဋ္ဌော, အဘိညာယ အဘိညဋ္ဌော ပဋိဝေဓဋ္ဌော, ပရိညာယ ပရိညဋ္ဌော ပဋိဝေဓဋ္ဌော, ပဟာနသ္သ ပဟာနဋ္ဌော ပဋိဝေဓဋ္ဌော, ဘာဝနာယ ဘာဝနဋ္ဌော ပဋိဝေဓဋ္ဌော, သစ္ဆိကိရိယာယ သစ္ဆိကိရိယဋ္ဌော ပဋိဝေဓဋ္ဌော – ဣမေဟိ နဝဟာကာရေဟိ ပဋိဝေဓဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ anattaṭṭhena… saccaṭṭhena… paṭivedhaṭṭhena cattāri saccāni ekappaṭivedhāni? Navahākārehi paṭivedhaṭṭhena cattāri saccāni ekappaṭivedhāni. Dukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho, nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho, abhiññāya abhiññaṭṭho paṭivedhaṭṭho, pariññāya pariññaṭṭho paṭivedhaṭṭho, pahānassa pahānaṭṭho paṭivedhaṭṭho, bhāvanāya bhāvanaṭṭho paṭivedhaṭṭho, sacchikiriyāya sacchikiriyaṭṭho paṭivedhaṭṭho – imehi navahākārehi paṭivedhaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
၁၁. ကတိဟာကာရေဟိ စတ္တာရိ သစ္စာနိ ဧကပ္ပဋိဝေဓာနိ? ဒ္ဝာဒသဟိ အာကာရေဟိ စတ္တာရိ သစ္စာနိ ဧကပ္ပဋိဝေဓာနိ။ တထဋ္ဌေန, အနတ္တဋ္ဌေန, သစ္စဋ္ဌေန, ပဋိဝေဓဋ္ဌေန, အဘိဇာနနဋ္ဌေန, ပရိဇာနနဋ္ဌေန, ဓမ္မဋ္ဌေန, တထဋ္ဌေန, ဉာတဋ္ဌေန, သစ္ဆိကိရိယဋ္ဌေန, ဖသ္သနဋ္ဌေန, အဘိသမယဋ္ဌေန – ဣမေဟိ ဒ္ဝာဒသဟိ အာကာရေဟိ စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
11. Katihākārehi cattāri saccāni ekappaṭivedhāni? Dvādasahi ākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, tathaṭṭhena, ñātaṭṭhena, sacchikiriyaṭṭhena, phassanaṭṭhena, abhisamayaṭṭhena – imehi dvādasahi ākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ တထဋ္ဌေန စတ္တာရိ သစ္စာနိ ဧကပ္ပဋိဝေဓာနိ? သောဠသဟိ အာကာရေဟိ တထဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ပီဠနဋ္ဌော, သင္ခတဋ္ဌော, သန္တာပဋ္ဌော, ဝိပရိဏာမဋ္ဌော, တထဋ္ဌော; သမုဒယသ္သ အာယူဟနဋ္ဌော, နိဒာနဋ္ဌော, သံယောဂဋ္ဌော, ပလိဗောဓဋ္ဌော တထဋ္ဌော; နိရောဓသ္သ နိသ္သရဏဋ္ဌော, ဝိဝေကဋ္ဌော, အသင္ခတဋ္ဌော, အမတဋ္ဌော တထဋ္ဌော; မဂ္ဂသ္သ နိယ္ယာနဋ္ဌော, ဟေတုဋ္ဌော, ဒသ္သနဋ္ဌော, အာဓိပတေယ္ယဋ္ဌော တထဋ္ဌော – ဣမေဟိ သောဠသဟိ အာကာရေဟိ တထဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ tathaṭṭhena cattāri saccāni ekappaṭivedhāni? Soḷasahi ākārehi tathaṭṭhena cattāri saccāni ekappaṭivedhāni. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, tathaṭṭho; samudayassa āyūhanaṭṭho, nidānaṭṭho, saṃyogaṭṭho, palibodhaṭṭho tathaṭṭho; nirodhassa nissaraṇaṭṭho, vivekaṭṭho, asaṅkhataṭṭho, amataṭṭho tathaṭṭho; maggassa niyyānaṭṭho, hetuṭṭho, dassanaṭṭho, ādhipateyyaṭṭho tathaṭṭho – imehi soḷasahi ākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
ကထံ အနတ္တဋ္ဌေန။ပေ.။ သစ္စဋ္ဌေန။ ပဋိဝေဓဋ္ဌေန။ အဘိဇာနနဋ္ဌေန။ ပရိဇာနနဋ္ဌေန။ ဓမ္မဋ္ဌေန။ တထဋ္ဌေန။ ဉာတဋ္ဌေန။ သစ္ဆိကိရိယဋ္ဌေန။ ဖသ္သနဋ္ဌေန။ အဘိသမယဋ္ဌေန စတ္တာရိ သစ္စာနိ ဧကပ္ပဋိဝေဓာနိ? သောဠသဟိ အာကာရေဟိ အဘိသမယဋ္ဌေန စတ္တာရိ သစ္စာနိ ဧကပ္ပဋိဝေဓာနိ။ ဒုက္ခသ္သ ပီဠနဋ္ဌော, သင္ခတဋ္ဌော, သန္တာပဋ္ဌော, ဝိပရိဏာမဋ္ဌော, အဘိသမယဋ္ဌော; သမုဒယသ္သ အာယူဟနဋ္ဌော, နိဒာနဋ္ဌော, သံယောဂဋ္ဌော, ပလိဗောဓဋ္ဌော, အဘိသမယဋ္ဌော; နိရောဓသ္သ နိသ္သရဏဋ္ဌော , ဝိဝေကဋ္ဌော, အသင္ခတဋ္ဌော, အမတဋ္ဌော, အဘိသမယဋ္ဌော; မဂ္ဂသ္သ နိယ္ယာနဋ္ဌော, ဟေတုဋ္ဌော, ဒသ္သနဋ္ဌော, အာဓိပတေယ္ယဋ္ဌော, အဘိသမယဋ္ဌော – ဣမေဟိ သောဠသဟိ အာကာရေဟိ အဘိသမယဋ္ဌေန စတ္တာရိ သစ္စာနိ ဧကသင္ဂဟိတာနိ။ ယံ ဧကသင္ဂဟိတံ တံ ဧကတ္တံ။ ဧကတ္တံ ဧကေန ဉာဏေန ပဋိဝိဇ္ဈတီတိ – စတ္တာရိ သစ္စာနိ ဧကပ္ပဋိဝေဓာနိ။
Kathaṃ anattaṭṭhena…pe… saccaṭṭhena… paṭivedhaṭṭhena… abhijānanaṭṭhena… parijānanaṭṭhena… dhammaṭṭhena… tathaṭṭhena… ñātaṭṭhena… sacchikiriyaṭṭhena… phassanaṭṭhena… abhisamayaṭṭhena cattāri saccāni ekappaṭivedhāni? Soḷasahi ākārehi abhisamayaṭṭhena cattāri saccāni ekappaṭivedhāni. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, abhisamayaṭṭho; samudayassa āyūhanaṭṭho, nidānaṭṭho, saṃyogaṭṭho, palibodhaṭṭho, abhisamayaṭṭho; nirodhassa nissaraṇaṭṭho , vivekaṭṭho, asaṅkhataṭṭho, amataṭṭho, abhisamayaṭṭho; maggassa niyyānaṭṭho, hetuṭṭho, dassanaṭṭho, ādhipateyyaṭṭho, abhisamayaṭṭho – imehi soḷasahi ākārehi abhisamayaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
၁၂. သစ္စာနံ ကတိ လက္ခဏာနိ? သစ္စာနံ ဒ္ဝေ လက္ခဏာနိ။ သင္ခတလက္ခဏဉ္စ, အသင္ခတလက္ခဏဉ္စ – သစ္စာနံ ဣမာနိ ဒ္ဝေ လက္ခဏာနိ။
12. Saccānaṃ kati lakkhaṇāni? Saccānaṃ dve lakkhaṇāni. Saṅkhatalakkhaṇañca, asaṅkhatalakkhaṇañca – saccānaṃ imāni dve lakkhaṇāni.
သစ္စာနံ ကတိ လက္ခဏာနိ? သစ္စာနံ ဆ လက္ခဏာနိ။ သင္ခတာနံ သစ္စာနံ ဥပ္ပာဒော ပညာယတိ, ဝယော ပညာယတိ, ဌိတာနံ အညထတ္တံ ပညာယတိ အသင္ခတသ္သ သစ္စသ္သ န ဥပ္ပာဒော ပညာယတိ , န ဝယော ပညာယတိ, န ဌိတသ္သ အညထတ္တံ ပညာယတိ – သစ္စာနံ ဣမာနိ ဆ လက္ခဏာနိ။
Saccānaṃ kati lakkhaṇāni? Saccānaṃ cha lakkhaṇāni. Saṅkhatānaṃ saccānaṃ uppādo paññāyati, vayo paññāyati, ṭhitānaṃ aññathattaṃ paññāyati asaṅkhatassa saccassa na uppādo paññāyati , na vayo paññāyati, na ṭhitassa aññathattaṃ paññāyati – saccānaṃ imāni cha lakkhaṇāni.
သစ္စာနံ ကတိ လက္ခဏာနိ? သစ္စာနံ ဒ္ဝာဒသ လက္ခဏာနိ။ ဒုက္ခသစ္စသ္သ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ; သမုဒယသစ္စသ္သ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ; မဂ္ဂသစ္စသ္သ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ; နိရောဓသစ္စသ္သ န ဥပ္ပာဒော ပညာယတိ, န ဝယော ပညာယတိ, န ဌိတသ္သ အညထတ္တံ ပညာယတိ – သစ္စာနံ ဣမာနိ ဒ္ဝာဒသ လက္ခဏာနိ။
Saccānaṃ kati lakkhaṇāni? Saccānaṃ dvādasa lakkhaṇāni. Dukkhasaccassa uppādo paññāyati, vayo paññāyati, ṭhitassa aññathattaṃ paññāyati; samudayasaccassa uppādo paññāyati, vayo paññāyati, ṭhitassa aññathattaṃ paññāyati; maggasaccassa uppādo paññāyati, vayo paññāyati, ṭhitassa aññathattaṃ paññāyati; nirodhasaccassa na uppādo paññāyati, na vayo paññāyati, na ṭhitassa aññathattaṃ paññāyati – saccānaṃ imāni dvādasa lakkhaṇāni.
စတုန္နံ သစ္စာနံ ကတိ ကုသလာ, ကတိ အကုသလာ, ကတိ အဗ္ယာကတာ? သမုဒယသစ္စံ အကုသလံ, မဂ္ဂသစ္စံ ကုသလံ , နိရောဓသစ္စံ အဗ္ယာကတံ။ ဒုက္ခသစ္စံ သိယာ ကုသလံ, သိယာ အကုသလံ, သိယာ အဗ္ယာကတံ။
Catunnaṃ saccānaṃ kati kusalā, kati akusalā, kati abyākatā? Samudayasaccaṃ akusalaṃ, maggasaccaṃ kusalaṃ , nirodhasaccaṃ abyākataṃ. Dukkhasaccaṃ siyā kusalaṃ, siyā akusalaṃ, siyā abyākataṃ.
သိယာ တီဏိ သစ္စာနိ ဧကသစ္စေန သင္ဂဟိတာနိ, ဧကသစ္စံ တီဟိ သစ္စေဟိ သင္ဂဟိတံ? ဝတ္ထုဝသေန ပရိယာယေန သိယာတိ။ ကထဉ္စ သိယာ? ယံ ဒုက္ခသစ္စံ အကုသလံ, သမုဒယသစ္စံ အကုသလံ – ဧဝံ အကုသလဋ္ဌေန ဒ္ဝေ သစ္စာနိ ဧကသစ္စေန သင္ဂဟိတာနိ, ဧကသစ္စံ ဒ္ဝီဟိ သစ္စေဟိ သင္ဂဟိတံ။ ယံ ဒုက္ခသစ္စံ ကုသလံ, မဂ္ဂသစ္စံ ကုသလံ – ဧဝံ ကုသလဋ္ဌေန ဒ္ဝေ သစ္စာနိ ဧကသစ္စေန သင္ဂဟိတာနိ , ဧကသစ္စံ ဒ္ဝီဟိ သစ္စေဟိ သင္ဂဟိတံ။ ယံ ဒုက္ခသစ္စံ အဗ္ယာကတံ, နိရောဓသစ္စံ အဗ္ယာကတံ – ဧဝံ အဗ္ယာကတဋ္ဌေန ဒ္ဝေ သစ္စာနိ ဧကသစ္စေန သင္ဂဟိတာနိ, ဧကသစ္စံ ဒ္ဝီဟိ သစ္စေဟိ သင္ဂဟိတံ။ ဧဝံ သိယာ တီဏိ သစ္စာနိ ဧကသစ္စေန သင္ဂဟိတာနိ, ဧကသစ္စံ တီဟိ သစ္စေဟိ သင္ဂဟိတံ ဝတ္ထုဝသေန ပရိယာယေနာတိ။
Siyā tīṇi saccāni ekasaccena saṅgahitāni, ekasaccaṃ tīhi saccehi saṅgahitaṃ? Vatthuvasena pariyāyena siyāti. Kathañca siyā? Yaṃ dukkhasaccaṃ akusalaṃ, samudayasaccaṃ akusalaṃ – evaṃ akusalaṭṭhena dve saccāni ekasaccena saṅgahitāni, ekasaccaṃ dvīhi saccehi saṅgahitaṃ. Yaṃ dukkhasaccaṃ kusalaṃ, maggasaccaṃ kusalaṃ – evaṃ kusalaṭṭhena dve saccāni ekasaccena saṅgahitāni , ekasaccaṃ dvīhi saccehi saṅgahitaṃ. Yaṃ dukkhasaccaṃ abyākataṃ, nirodhasaccaṃ abyākataṃ – evaṃ abyākataṭṭhena dve saccāni ekasaccena saṅgahitāni, ekasaccaṃ dvīhi saccehi saṅgahitaṃ. Evaṃ siyā tīṇi saccāni ekasaccena saṅgahitāni, ekasaccaṃ tīhi saccehi saṅgahitaṃ vatthuvasena pariyāyenāti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁. ပဌမသုတ္တန္တနိဒ္ဒေသဝဏ္ဏနာ • 1. Paṭhamasuttantaniddesavaṇṇanā
