| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. ဂဟပတိဝဂ္ဂော
3. Gahapativaggo
၁. ပဌမဥဂ္ဂသုတ္တဝဏ္ဏနာ
1. Paṭhamauggasuttavaṇṇanā
၂၁. တတိယသ္သ ပဌမေ ပညတ္တေ အာသနေ နိသီဒီတိ တသ္သ ကိရ ဃရေ ပဉ္စန္နံ ဘိက္ခုသတာနံ ပဉ္စ အာသနသတာနိ နိစ္စံ ပညတ္တာနေဝ ဟောန္တိ, တေသု အညတရသ္မိံ အာသနေ နိသီဒိ။ တံ သုဏာဟီတိ တေ သုဏာဟိ, တံ ဝာ အဋ္ဌဝိဓံ အစ္ဆရိယဓမ္မံ သုဏာဟိ။ စိတ္တံ ပသီဒီတိ ‘‘ဗုဒ္ဓော နု ခော န ဗုဒ္ဓော နု ခော’’တိ ဝိတက္ကမတ္တမ္ပိ န ဥပ္ပဇ္ဇိ, အယမေဝ ဗုဒ္ဓောတိ စိတ္တုပ္ပာဒော ပသန္နော အနာဝိလော အဟောသိ။ သကာနိ ဝာ ဉာတိကုလာနီတိ အတ္တနော ယာပနမတ္တံ ဓနံ ဂဟေတ္ဝာ ဉာတိဃရာနိ ဂစ္ဆတု။ ကသ္သ ဝော ဒမ္မီတိ ကတရပုရိသသ္သ တုမ္ဟေ ဒဒာမိ, အာရောစေထ မေ အတ္တနော အဓိပ္ပာယံ။ အပ္ပဋိဝိဘတ္တာတိ ‘‘ဧတ္တကံ ဒသ္သာမိ ဧတ္တကံ န ဒသ္သာမိ, ဣဒံ ဒသ္သာမိ ဣဒံ န ဒသ္သာမီ’’တိ စိတ္တံ ဥပ္ပာဒေန္တေန ဟိ ပဋိဝိဘတ္တာ နာမ ဟောတိ, မယ္ဟံ ပန န ဧဝံ။ အထ ခော သင္ဃိကာ ဝိယ ဂဏသန္တကာ ဝိယ စ သီလဝန္တေဟိ သဒ္ဓိံ သာဓာရဏာယေဝ။ သက္ကစ္စံယေဝ ပယိရုပာသာမီတိ သဟတ္ထာ ဥပဋ္ဌဟာမိ, စိတ္တီကာရေန ဥပသင္ကမာမိ။
21. Tatiyassa paṭhame paññatte āsane nisīdīti tassa kira ghare pañcannaṃ bhikkhusatānaṃ pañca āsanasatāni niccaṃ paññattāneva honti, tesu aññatarasmiṃ āsane nisīdi. Taṃ suṇāhīti te suṇāhi, taṃ vā aṭṭhavidhaṃ acchariyadhammaṃ suṇāhi. Cittaṃ pasīdīti ‘‘buddho nu kho na buddho nu kho’’ti vitakkamattampi na uppajji, ayameva buddhoti cittuppādo pasanno anāvilo ahosi. Sakāni vā ñātikulānīti attano yāpanamattaṃ dhanaṃ gahetvā ñātigharāni gacchatu. Kassa vo dammīti katarapurisassa tumhe dadāmi, ārocetha me attano adhippāyaṃ. Appaṭivibhattāti ‘‘ettakaṃ dassāmi ettakaṃ na dassāmi, idaṃ dassāmi idaṃ na dassāmī’’ti cittaṃ uppādentena hi paṭivibhattā nāma hoti, mayhaṃ pana na evaṃ. Atha kho saṅghikā viya gaṇasantakā viya ca sīlavantehi saddhiṃ sādhāraṇāyeva. Sakkaccaṃyeva payirupāsāmīti sahatthā upaṭṭhahāmi, cittīkārena upasaṅkamāmi.
အနစ္ဆရိယံ ခော ပန မံ, ဘန္တေတိ, ဘန္တေ, ယံ မံ ဒေဝတာ ဥပသင္ကမိတ္ဝာ ဧဝံ အာရောစေန္တိ, ဣဒံ န အစ္ဆရိယံ။ ယံ ပနာဟံ တတောနိဒာနံ စိတ္တသ္သ ဥဏ္ဏတိံ နာဘိဇာနာမိ, တံ ဧဝ အစ္ဆရိယန္တိ ဝဒတိ။ သာဓု သာဓု, ဘိက္ခူတိ ဧတ္ထ ကိဉ္စာပိ ဘိက္ခုံ အာမန္တေတိ, ဥပာသကသ္သေဝ ပန ဝေယ္ယာကရဏသမ္ပဟံသနေ ဧသ သာဓုကာရောတိ ဝေဒိတဗ္ဗော။
Anacchariyaṃ kho pana maṃ, bhanteti, bhante, yaṃ maṃ devatā upasaṅkamitvā evaṃ ārocenti, idaṃ na acchariyaṃ. Yaṃ panāhaṃ tatonidānaṃ cittassa uṇṇatiṃ nābhijānāmi, taṃ eva acchariyanti vadati. Sādhu sādhu, bhikkhūti ettha kiñcāpi bhikkhuṃ āmanteti, upāsakasseva pana veyyākaraṇasampahaṃsane esa sādhukāroti veditabbo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ပဌမဥဂ္ဂသုတ္တံ • 1. Paṭhamauggasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၇. ပဌမဥဂ္ဂသုတ္တာဒိဝဏ္ဏနာ • 1-7. Paṭhamauggasuttādivaṇṇanā
