| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
பாசித்தியகண்ட³ங்
Pācittiyakaṇḍaṃ
1. பட²மவக்³க³வண்ணனா
1. Paṭhamavaggavaṇṇanā
பட²மே ஹரிதபத்தவண்ணோ ஹரிதகோ. சாபலஸுணங் அமிஞ்ஜகோ. அங்குரமத்தமேவ ஹி தஸ்ஸ ஹோதி. பலண்டு³காத³யோ ஸபா⁴வேனேவ வட்டந்தி. ஸூபஸம்பாகாதீ³ வினாபி அந்தமஸோ யாகு³ப⁴த்தேபி பக்கி²பிதுங் வட்டதீதி லிகி²தங், ‘‘பி⁴க்கு²னியாபி கி³லானாய புரேப⁴த்தமேவ லஸுணங் கப்பதி, ந அகி³லானாயா’’தி அப⁴யகி³ரீனங் உக்³க³ஹோதி.
Paṭhame haritapattavaṇṇo haritako. Cāpalasuṇaṃ amiñjako. Aṅkuramattameva hi tassa hoti. Palaṇḍukādayo sabhāveneva vaṭṭanti. Sūpasampākādī vināpi antamaso yāgubhattepi pakkhipituṃ vaṭṭatīti likhitaṃ, ‘‘bhikkhuniyāpi gilānāya purebhattameva lasuṇaṃ kappati, na agilānāyā’’ti abhayagirīnaṃ uggahoti.
து³தியே ஆபா³த⁴பச்சயா பி⁴க்கு²னிஸங்க⁴ங் ஆபுச்சி²த்வா ஸங்ஹராபேதுங் வட்டதி, பி⁴க்கு²ஸ்ஸ எத்த² ச லஸுணே ச து³க்கடங்.
Dutiye ābādhapaccayā bhikkhunisaṅghaṃ āpucchitvā saṃharāpetuṃ vaṭṭati, bhikkhussa ettha ca lasuṇe ca dukkaṭaṃ.
ஸத்தமே ‘‘ஸமுட்டா²னாதீ³னி அத்³தா⁴னமக்³க³ஸிக்கா²பத³ஸதி³ஸானீ’’தி பாடோ².
Sattame ‘‘samuṭṭhānādīni addhānamaggasikkhāpadasadisānī’’ti pāṭho.
நவமே குட்டோ நாம க⁴ரகுட்டோ. பாகாரோ நாம பரிக்கே²பபாகாரோ.
Navame kuṭṭo nāma gharakuṭṭo. Pākāro nāma parikkhepapākāro.
ச²ட்³டி³தகெ²த்தேதி புராணகெ²த்தே. ஸங்க⁴ஸந்தகே பி⁴க்கு²ஸ்ஸ ச²ட்³டே³துங் வட்டதி ஸங்க⁴பரியாபன்னத்தா. பி⁴க்கு²னீனம்பி ஸங்க⁴ஸந்தகே பி⁴க்கு²ஸங்க⁴ஸந்தகே வுத்தனயேனேவ வட்டதி. ஏவங் ஸந்தேபி ஸாருப்பவஸேன காதப்³ப³ந்தி லிகி²தங்.
Chaḍḍitakhetteti purāṇakhette. Saṅghasantake bhikkhussa chaḍḍetuṃ vaṭṭati saṅghapariyāpannattā. Bhikkhunīnampi saṅghasantake bhikkhusaṅghasantake vuttanayeneva vaṭṭati. Evaṃ santepi sāruppavasena kātabbanti likhitaṃ.
த³ஸமே ‘‘ஸயங் தானி வத்தூ²னி கரொந்தியா’’திஆதி³ இத⁴ ஸிக்கா²பதே³ நத்தி². கஸ்மா? ஏளகலோமஸமுட்டா²னத்தா. யதி³ ஏவங் கஸ்மா வுத்தந்தி சே? ஸுத்தானுலோமமஹாபதே³ஸதோ. யதி³ நச்சாதீ³னி பஸ்ஸிதுங் வா ஸுணிதுங் வா ந லப⁴தி, பகே³வ அத்தனா காதுந்தி நயதோ லப்³ப⁴மானத்தா வுத்தங். இதரதா² மஹாபதே³ஸா நிரத்த²கா ஸியுங். ‘‘ஏவங் அஞ்ஞத்த²பி நயோ நேதப்³போ³. ஸமுட்டா²னம்பி இத⁴ வுத்தமேவ அக்³க³ஹெத்வா ச²ஸமுட்டா²னவஸேன க³ஹேதப்³ப³’’ந்தி ஆசரியா. இத⁴ வுத்தங் ஸமுட்டா²னங் நாம மூலபூ⁴தஸ்ஸ அந்தரா வுத்தாபத்தியா, தஸ்மா ஏளகலோமஸமுட்டா²னமேவாதி அபரே. ஆராமே ட²த்வாதி ந கேவலங் ட²த்வா, ததோ க³ந்த்வா பன ஸப்³பி³ரியாபதே²ஹிபி லப⁴தி. ஆராமே டி²தாதி பன ஆராமபரியாபன்னாதி அத்தோ². இதரதா² நிஸின்னாபி ந லபெ⁴ய்யாதி.
Dasame ‘‘sayaṃ tāni vatthūni karontiyā’’tiādi idha sikkhāpade natthi. Kasmā? Eḷakalomasamuṭṭhānattā. Yadi evaṃ kasmā vuttanti ce? Suttānulomamahāpadesato. Yadi naccādīni passituṃ vā suṇituṃ vā na labhati, pageva attanā kātunti nayato labbhamānattā vuttaṃ. Itarathā mahāpadesā niratthakā siyuṃ. ‘‘Evaṃ aññatthapi nayo netabbo. Samuṭṭhānampi idha vuttameva aggahetvā chasamuṭṭhānavasena gahetabba’’nti ācariyā. Idha vuttaṃ samuṭṭhānaṃ nāma mūlabhūtassa antarā vuttāpattiyā, tasmā eḷakalomasamuṭṭhānamevāti apare. Ārāme ṭhatvāti na kevalaṃ ṭhatvā, tato gantvā pana sabbiriyāpathehipi labhati. Ārāme ṭhitāti pana ārāmapariyāpannāti attho. Itarathā nisinnāpi na labheyyāti.
பட²மவக்³க³வண்ணனா நிட்டி²தா.
Paṭhamavaggavaṇṇanā niṭṭhitā.
