| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. பத²வீகம்மவிபாகோதிகதா²வண்ணனா
7. Pathavīkammavipākotikathāvaṇṇanā
492. இதா³னி பத²வீ கம்மவிபாகோதிகதா² நாம ஹோதி. தத்த² யஸ்மா ‘‘அத்தி² இஸ்ஸரியஸங்வத்தனியங் கம்மங், ஆதி⁴பச்சஸங்வத்தனியங் கம்ம’’ந்தி எத்த² இஸ்ஸரானங் பா⁴வோ இஸ்ஸரியங் நாம , அதி⁴பதீனஞ்ச பா⁴வோ ஆதி⁴பச்சங் நாம, பத²விஸ்ஸரியஆதி⁴பச்சஸங்வத்தனிகஞ்ச கம்மங் அத்தீ²தி வுத்தங். தஸ்மா யேஸங் ‘‘பத²வீ கம்மவிபாகோ’’தி லத்³தி⁴, ஸெய்யதா²பி அந்த⁴கானங்; தே ஸந்தா⁴ய பத²வீதி புச்சா² ஸகவாதி³ஸ்ஸ, படிஞ்ஞா இதரஸ்ஸ. ஸுக²வேத³னீயாதிஆதி³ கம்மவிபாகஸபா⁴வத³ஸ்ஸனவஸேன வுத்தங். ‘‘ப²ஸ்ஸோ ஹோதீ’’திஆதி³னா நயேன நித்³தி³ட்டே²ஸு விபாகேஸு ப²ஸ்ஸோ ஸுக²வேத³னீயாதி³பே⁴தோ³ ஹோதி. ஸோ ச ஸஞ்ஞாத³யோ ச ஸுக²வேத³னாதீ³ஹி ஸம்பயுத்தா, வேத³னாத³யோ ஸஞ்ஞாதீ³ஹி, ஸப்³பே³பி ஸாரம்மணா, அத்தி² ச நேஸங் புரேசாரிகஆவட்டனாதி³ஸங்கா²தங் ஆவஜ்ஜனங், கம்மபச்சயபூ⁴தா சேதனா, யோ தத்த² இட்ட²விபாகோ, தஸ்ஸ பத்த²னா, பணிதா⁴னவஸேன பவத்தா மூலதண்ஹா, கிங் தே ஏவரூபா பத²வீதி புச்ச²தி. இதரோ படிக்கி²பதி. படிலோமபுச்சா²தீ³னி உத்தானத்தா²னேவ.
492. Idāni pathavī kammavipākotikathā nāma hoti. Tattha yasmā ‘‘atthi issariyasaṃvattaniyaṃ kammaṃ, ādhipaccasaṃvattaniyaṃ kamma’’nti ettha issarānaṃ bhāvo issariyaṃ nāma , adhipatīnañca bhāvo ādhipaccaṃ nāma, pathavissariyaādhipaccasaṃvattanikañca kammaṃ atthīti vuttaṃ. Tasmā yesaṃ ‘‘pathavī kammavipāko’’ti laddhi, seyyathāpi andhakānaṃ; te sandhāya pathavīti pucchā sakavādissa, paṭiññā itarassa. Sukhavedanīyātiādi kammavipākasabhāvadassanavasena vuttaṃ. ‘‘Phasso hotī’’tiādinā nayena niddiṭṭhesu vipākesu phasso sukhavedanīyādibhedo hoti. So ca saññādayo ca sukhavedanādīhi sampayuttā, vedanādayo saññādīhi, sabbepi sārammaṇā, atthi ca nesaṃ purecārikaāvaṭṭanādisaṅkhātaṃ āvajjanaṃ, kammapaccayabhūtā cetanā, yo tattha iṭṭhavipāko, tassa patthanā, paṇidhānavasena pavattā mūlataṇhā, kiṃ te evarūpā pathavīti pucchati. Itaro paṭikkhipati. Paṭilomapucchādīni uttānatthāneva.
493. கம்மவிபாகோ பரேஸங் ஸாதா⁴ரணோதி பஞ்ஹே ப²ஸ்ஸாத³யோ ஸந்தா⁴ய படிக்கி²பதி, கம்மஸமுட்டா²னங் ரூபஞ்ச பத²வீஆதீ³னங்யேவ ச ஸாதா⁴ரணபா⁴வங் ஸந்தா⁴ய படிஜானாதி. அஸாதா⁴ரணமஞ்ஞேஸந்தி ஸுத்தங் பரஸமயதோ ஆஹரித்வா த³ஸ்ஸிதங். ஸப்³பே³ ஸத்தா பத²விங் பரிபு⁴ஞ்ஜந்தீதி பஞ்ஹே பத²விங் அனிஸ்ஸிதே ஸந்தா⁴ய படிக்கி²பதி, நிஸ்ஸிதே ஸந்தா⁴ய படிஜானாதி. பத²விங் அபரிபு⁴ஞ்ஜித்வா பரினிப்³பா³யந்தீதி பஞ்ஹே ஆருப்பே பரினிப்³பா³யந்தானங் வஸேன படிஜானாதி. கம்மவிபாகங் அகே²பெத்வாதி இத³ங் பரஸமயவஸேன வுத்தங். கம்மவிபாகஞ்ஹி கே²பெத்வாவ பரினிப்³பா³யந்தீதி தேஸங் லத்³தி⁴. ஸகஸமயே பன கதோகாஸஸ்ஸ கம்மஸ்ஸ உப்பன்னங் விபாகங் அகே²பெத்வா பரினிப்³பா³னங் நத்தி². தேஸஞ்ச லத்³தி⁴யா பத²வீ ஸாதா⁴ரணவிபாகத்தா உப்பன்னவிபாகோயேவ ஹோதி. தங் விபாகபா⁴வேன டி²தங் அகே²பெத்வா பரினிப்³பா³னங் ந யுஜ்ஜதீதி சோதே³துங் வட்டதி. இதரோ லத்³தி⁴வஸேன படிக்கி²பதி. சக்கவத்திஸத்தஸ்ஸ கம்மவிபாகந்தி பஞ்ஹே அஸாதா⁴ரணங் ப²ஸ்ஸாதி³ங் ஸந்தா⁴ய படிக்கி²பதி, ஸாதா⁴ரணங் ஸந்தா⁴ய படிஜானாதி. பத²வீஸமுத்³த³ஸூரியசந்தி³மாத³யோ ஹி ஸப்³பே³ஸங் ஸாதா⁴ரணகம்மவிபாகோதி தேஸங் லத்³தி⁴.
493. Kammavipāko paresaṃ sādhāraṇoti pañhe phassādayo sandhāya paṭikkhipati, kammasamuṭṭhānaṃ rūpañca pathavīādīnaṃyeva ca sādhāraṇabhāvaṃ sandhāya paṭijānāti. Asādhāraṇamaññesanti suttaṃ parasamayato āharitvā dassitaṃ. Sabbe sattā pathaviṃ paribhuñjantīti pañhe pathaviṃ anissite sandhāya paṭikkhipati, nissite sandhāya paṭijānāti. Pathaviṃ aparibhuñjitvā parinibbāyantīti pañhe āruppe parinibbāyantānaṃ vasena paṭijānāti. Kammavipākaṃ akhepetvāti idaṃ parasamayavasena vuttaṃ. Kammavipākañhi khepetvāva parinibbāyantīti tesaṃ laddhi. Sakasamaye pana katokāsassa kammassa uppannaṃ vipākaṃ akhepetvā parinibbānaṃ natthi. Tesañca laddhiyā pathavī sādhāraṇavipākattā uppannavipākoyeva hoti. Taṃ vipākabhāvena ṭhitaṃ akhepetvā parinibbānaṃ na yujjatīti codetuṃ vaṭṭati. Itaro laddhivasena paṭikkhipati. Cakkavattisattassa kammavipākanti pañhe asādhāraṇaṃ phassādiṃ sandhāya paṭikkhipati, sādhāraṇaṃ sandhāya paṭijānāti. Pathavīsamuddasūriyacandimādayo hi sabbesaṃ sādhāraṇakammavipākoti tesaṃ laddhi.
494. இஸ்ஸரியஸங்வத்தனியந்தி எத்த² இஸ்ஸரியங் நாம ப³ஹுத⁴னதா. ஆதி⁴பச்சங் நாம ஸேஸஜனே அத்தனோ வஸே வத்தெத்வா தேஹி க³ருகாதப்³ப³ட்டே²ன அதி⁴பதிபா⁴வோ. தத்த² கம்மங் படிலாப⁴வஸேன தங்ஸங்வத்தனிகங் நாம ஹோதி, ந ஜனகவஸேன. தஸ்மா விபாகபா⁴வே அஸாத⁴கமேதந்தி.
494. Issariyasaṃvattaniyanti ettha issariyaṃ nāma bahudhanatā. Ādhipaccaṃ nāma sesajane attano vase vattetvā tehi garukātabbaṭṭhena adhipatibhāvo. Tattha kammaṃ paṭilābhavasena taṃsaṃvattanikaṃ nāma hoti, na janakavasena. Tasmā vipākabhāve asādhakametanti.
பத²வீ கம்மவிபாகோதிகதா²வண்ணனா.
Pathavī kammavipākotikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (69) 7. பத²வீ கம்மவிபாகோதிகதா² • (69) 7. Pathavī kammavipākotikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. பத²வீகம்மவிபாகோதிகதா²வண்ணனா • 7. Pathavīkammavipākotikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. பத²வீகம்மவிபாகோதிகதா²வண்ணனா • 7. Pathavīkammavipākotikathāvaṇṇanā
