| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
பாடிதே³ஸனீயகதா²வண்ணனா
Pāṭidesanīyakathāvaṇṇanā
2432. ஏவங் பாசித்தியவினிச்ச²யங் த³ஸ்ஸெத்வா இதா³னி பாடிதே³ஸனீயங் த³ஸ்ஸேதுமாஹ ‘‘அகி³லானா’’திஆதி³. யா பன பி⁴க்கு²னீ அகி³லானா ஸயங் அத்தனா விஞ்ஞத்தியா லத்³த⁴ங் ஸப்பிங் ஸசே ‘‘பு⁴ஞ்ஜிஸ்ஸாமீ’’தி க³ண்ஹதி, தஸ்ஸா ஏவங் க³ஹணே து³க்கடங் பரிதீ³பிதந்தி யோஜனா. தத்த² யஸ்ஸா வினா ஸப்பினா பா²ஸு ஹோதி, ஸா அகி³லானா நாம. ஸப்பிந்தி புப்³பே³ வுத்தவினிச்ச²யங் பாளிஆக³தங் கோ³ஸப்பிஆதி³கமேவ.
2432. Evaṃ pācittiyavinicchayaṃ dassetvā idāni pāṭidesanīyaṃ dassetumāha ‘‘agilānā’’tiādi. Yā pana bhikkhunī agilānā sayaṃ attanā viññattiyā laddhaṃ sappiṃ sace ‘‘bhuñjissāmī’’ti gaṇhati, tassā evaṃ gahaṇe dukkaṭaṃ paridīpitanti yojanā. Tattha yassā vinā sappinā phāsu hoti, sā agilānā nāma. Sappinti pubbe vuttavinicchayaṃ pāḷiāgataṃ gosappiādikameva.
2433. திபாடிதே³ஸனீயந்தி அகி³லானா அகி³லானஸஞ்ஞா, வேமதிகா, கி³லானஸஞ்ஞாதி தீஸு விகப்பேஸு தீணி பாடிதே³ஸனீயானி. கி³லானா த்³விகது³க்கடந்தி கி³லானாய த்³விகது³க்கடங். கி³லானா அகி³லானஸஞ்ஞா, வேமதிகா வாதி த்³வீஸு விகப்பேஸு த்³வே து³க்கடானி.
2433.Tipāṭidesanīyanti agilānā agilānasaññā, vematikā, gilānasaññāti tīsu vikappesu tīṇi pāṭidesanīyāni. Gilānā dvikadukkaṭanti gilānāya dvikadukkaṭaṃ. Gilānā agilānasaññā, vematikā vāti dvīsu vikappesu dve dukkaṭāni.
2434-5. கி³லானா ஹுத்வா ஸப்பிங் விஞ்ஞாபெத்வா பச்சா² வூபஸந்தகே³லஞ்ஞா ஹுத்வா ஸேவந்தியா பரிபு⁴ஞ்ஜந்தியாபி ச கி³லானாய அவஸேஸங் பரிபு⁴ஞ்ஜந்தியா வா ஞாதகாதி³தோ ஞாதகபவாரிதட்டா²னதோ விஞ்ஞத்தங் பு⁴ஞ்ஜந்தியா வா அஞ்ஞஸ்ஸத்தா²ய விஞ்ஞத்தங் பரிபு⁴ஞ்ஜந்தியா வா அத்தனோ த⁴னேன க³ஹிதங் பு⁴ஞ்ஜந்தியா வா உம்மத்திகாய வா அனாபத்தீதி யோஜனா.
2434-5. Gilānā hutvā sappiṃ viññāpetvā pacchā vūpasantagelaññā hutvā sevantiyā paribhuñjantiyāpi ca gilānāya avasesaṃ paribhuñjantiyā vā ñātakādito ñātakapavāritaṭṭhānato viññattaṃ bhuñjantiyā vā aññassatthāya viññattaṃ paribhuñjantiyā vā attano dhanena gahitaṃ bhuñjantiyā vā ummattikāya vā anāpattīti yojanā.
பட²மங்.
Paṭhamaṃ.
2436. ஸேஸேஸு து³தியாதீ³ஸூதி ‘‘யா பன பி⁴க்கு²னீ அகி³லானா தேலங்…பே॰… மது⁴ங்…பே॰… பா²ணிதங்…பே॰… மச்ச²ங்…பே॰… மங்ஸங்…பே॰… கீ²ரங்…பே॰… த³தி⁴ங் விஞ்ஞாபெத்வா பு⁴ஞ்ஜெய்ய, படிதே³ஸேதப்³ப³ங் தாய பி⁴க்கு²னியா கா³ரய்ஹங் அய்யே த⁴ம்மங் ஆபஜ்ஜிங் அஸப்பாயங் பாடிதே³ஸனீயங், தங் படிதே³ஸேமீ’’தி (பாசி॰ 1236) ஏவங் து³தியாதீ³ஸு ஸத்தஸு பாடிதே³ஸனீயேஸு. நத்தி² காசி விஸேஸதாதி தேலாதி³பதா³னி வினா அஞ்ஞோ கோசி விஸேஸோ நத்தீ²தி அத்தோ².
2436.Sesesu dutiyādīsūti ‘‘yā pana bhikkhunī agilānā telaṃ…pe… madhuṃ…pe… phāṇitaṃ…pe… macchaṃ…pe… maṃsaṃ…pe… khīraṃ…pe… dadhiṃ viññāpetvā bhuñjeyya, paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 1236) evaṃ dutiyādīsu sattasu pāṭidesanīyesu. Natthi kāci visesatāti telādipadāni vinā añño koci viseso natthīti attho.
2437. பாளியங் அனாக³தேஸு ஸப்³பே³ஸு ஸப்பிஆதீ³ஸு அட்ட²ஸு அஞ்ஞதரங் விஞ்ஞாபெத்வா பு⁴ஞ்ஜந்தியாபி து³க்கடந்தி யோஜனா.
2437. Pāḷiyaṃ anāgatesu sabbesu sappiādīsu aṭṭhasu aññataraṃ viññāpetvā bhuñjantiyāpi dukkaṭanti yojanā.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
பாடிதே³ஸனீயகதா²வண்ணனா நிட்டி²தா.
Pāṭidesanīyakathāvaṇṇanā niṭṭhitā.
