| Library / Tipiṭaka / д̇ибидага • Tipiṭaka / винаяавинижчаяа-дийгаа • Vinayavinicchaya-ṭīkā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
винаяабидагз
Vinayapiṭake
винаяавинижчаяа-дийгаа (д̣̇уд̇ияо бхааг̇о)
Vinayavinicchaya-ṭīkā (dutiyo bhāgo)
баадид̣̇зсанийяагат̇ааван̣н̣анаа
Pāṭidesanīyakathāvaṇṇanā
1830-1. звам̣ наад̇исан̇кзбавид̇т̇ааранаязна д̣̇взнавуд̇и баажид̇д̇ияаани д̣̇ассзд̇ваа д̇ад̣̇ананд̇арам̣ нид̣̇д̣̇идтз баадид̣̇зсанийяз д̣̇ассзд̇умааха ‘‘яо жанд̇арагхара’’нд̇иаад̣̇и. д̇ад̇т̇а анд̇арагхаранд̇и рат̇игаад̣̇имааха. яат̇ааха ‘‘анд̇арагхарам̣ наама рат̇игаа б̣яуухам̣ син̇гхаадагам̣ гхара’’нд̇и.
1830-1. Evaṃ nātisaṅkhepavitthāranayena dvenavuti pācittiyāni dassetvā tadanantaraṃ niddiṭṭhe pāṭidesanīye dassetumāha ‘‘yo cantaraghara’’ntiādi. Tattha antaragharanti rathikādimāha. Yathāha ‘‘antaragharaṃ nāma rathikā byūhaṃ siṅghāṭakaṃ ghara’’nti.
яо бана бхигку анд̇арагхарам̣ бавидтааяа ан̃н̃аад̇игааяа бхигкунияаа хад̇т̇ад̇о яам̣ гин̃жи каад̣̇анам̣, бхож̇анамби ваа сахад̇т̇аа бадиг̇г̇ан̣хзяяа, д̇асса бхигкуно г̇ахан̣з д̣̇уггадам̣, бхог̇з аж̇жхохаарз баадид̣̇зсанийяам̣ сияаад̇и яож̇анаа.
Yo pana bhikkhu antaragharaṃ paviṭṭhāya aññātikāya bhikkhuniyā hatthato yaṃ kiñci khādanaṃ, bhojanampi vā sahatthā paṭiggaṇheyya, tassa bhikkhuno gahaṇe dukkaṭaṃ, bhoge ajjhohāre pāṭidesanīyaṃ siyāti yojanā.
ид̇о бадтааяа жад̇ассо г̇аат̇аа уббадибаадияаа бод̇т̇агзсу ликид̇аа, д̇аасам̣ аяам̣ бадибаади – ‘‘зд̇т̇анд̇арагхара’’нд̇и д̇ад̇ияаа, ‘‘д̇асмаа бхигкунияаа’’д̇и жад̇уд̇т̇ий, ‘‘рат̇игаад̣̇ийсуу’’д̇и бан̃жамий , ‘‘рат̇игааяаби ваа’’д̇и чадтий. бадибаади банааяам̣ маад̇игадтагат̇аггамзна взд̣̇ид̇аб̣б̣аа. имааяа бадибаадияаа д̇аасам̣ ад̇т̇аван̣н̣анаа ход̇и –
Ito paṭṭhāya catasso gāthā uppaṭipāṭiyā potthakesu likhitā, tāsaṃ ayaṃ paṭipāṭi – ‘‘etthantaraghara’’nti tatiyā, ‘‘tasmā bhikkhuniyā’’ti catutthī, ‘‘rathikādīsū’’ti pañcamī , ‘‘rathikāyapi vā’’ti chaṭṭhī. Paṭipāṭi panāyaṃ mātikaṭṭhakathakkamena veditabbā. Imāya paṭipāṭiyā tāsaṃ atthavaṇṇanā hoti –
1832-3. буримаг̇аат̇аад̣̇ваязна бад̣̇абхааж̇анааг̇ад̇асааман̃н̃авинижчаяам̣ д̣̇ассзд̇ваа ид̣̇аани адтагат̇ааг̇ад̇ам̣ висзсам̣ д̣̇ассзд̇умааха ‘‘зд̇т̇аа’’д̇иаад̣̇и. д̇ад̇т̇а зд̇т̇аад̇и имасмим̣ батамабаадид̣̇зсанийяасигкаабад̣̇з. д̇ассаад̇и ан̃н̃аад̇игабхигкунияаа. ваагяад̇од̇и ‘‘анд̇арагхарам̣ бавидтааяаа’’д̇и важанад̇о. хи-сад̣̇д̣̇о хзд̇умхи. яасмаа бхигкусса тид̇адтаанам̣ наббамаан̣анд̇и адтагат̇ааяа (баажи. адта. 553) ван̣н̣ид̇ам̣, д̇асмаа аараамаад̣̇ийсу тад̇ваа д̣̇знд̇ияаа бхигкунияаа хад̇т̇ад̇о вийт̇иаад̣̇ийсу тад̇ваа яо бадиг̇г̇ан̣хзяяа жз, звам̣ бадиг̇г̇ан̣хад̇о д̇асса бхигкуно на д̣̇осод̇и яож̇анаа. барибхог̇асса бадиг̇г̇ахан̣амуулагад̇д̇аа на д̣̇осо. ‘‘бадиг̇г̇ан̣хад̇о’’д̇и иминаа барибхог̇з баадид̣̇зсанийяаабхааво жа д̣̇ийбид̇о ход̇и.
1832-3. Purimagāthādvayena padabhājanāgatasāmaññavinicchayaṃ dassetvā idāni aṭṭhakathāgataṃ visesaṃ dassetumāha ‘‘etthā’’tiādi. Tattha etthāti imasmiṃ paṭhamapāṭidesanīyasikkhāpade. Tassāti aññātikabhikkhuniyā. Vākyatoti ‘‘antaragharaṃ paviṭṭhāyā’’ti vacanato. Hi-saddo hetumhi. Yasmā bhikkhussa ṭhitaṭṭhānaṃ nappamāṇanti aṭṭhakathāya (pāci. aṭṭha. 553) vaṇṇitaṃ, tasmā ārāmādīsu ṭhatvā dentiyā bhikkhuniyā hatthato vīthiādīsu ṭhatvā yo paṭiggaṇheyya ce, evaṃ paṭiggaṇhato tassa bhikkhuno na dosoti yojanā. Paribhogassa paṭiggahaṇamūlakattā na doso. ‘‘Paṭiggaṇhato’’ti iminā paribhoge pāṭidesanīyābhāvo ca dīpito hoti.
1834. сажз бхигкуний рат̇игаад̣̇ийсу тад̇ваа бхож̇анам̣ д̣̇зд̇и, бхигку анд̇араараамз тад̇ваа бадиг̇г̇ан̣хаад̇и жз, д̇асса аабад̇д̇ийд̇и яож̇анаа. г̇аат̇ааб̣анд̇хавасзна ‘‘бхигкуни бхож̇ана’’нд̇и рассад̇д̇ам̣. аабад̇д̇ийд̇и жа бадиг̇г̇ахан̣абарибхог̇зсу д̣̇уггадабаадид̣̇зсанийяаабад̇д̇ияо санд̇хааяа вуд̇д̇ам̣.
1834. Sace bhikkhunī rathikādīsu ṭhatvā bhojanaṃ deti, bhikkhu antarārāme ṭhatvā paṭiggaṇhāti ce, tassa āpattīti yojanā. Gāthābandhavasena ‘‘bhikkhuni bhojana’’nti rassattaṃ. Āpattīti ca paṭiggahaṇaparibhogesu dukkaṭapāṭidesanīyāpattiyo sandhāya vuttaṃ.
1835. рат̇игаад̣̇ийсу тад̇ваа бхигкуний бхож̇анам̣ д̣̇зд̇и жз, д̇ам̣ рат̇игааяаби ваа…бз… аяам̣ наяод̇и яож̇анаа. д̇ад̇т̇а рат̇игаад̇и ражчаа. б̣яууханд̇и аниб̣б̣иж̇жхид̇ваа тид̇аа г̇ад̇абажжааг̇ад̇аражчаа. санд̇хи наама гхарасанд̇хи. син̇гхаадаганд̇и жад̇уггон̣ам̣ ваа д̇игон̣ам̣ ваа маг̇г̇асамод̇хаанадтаанам̣. аяам̣ наяод̇и ‘‘аабад̇д̇ий’’д̇и ананд̇араг̇аат̇ааяа вуд̇д̇анаяо.
1835. Rathikādīsu ṭhatvā bhikkhunī bhojanaṃ deti ce, taṃ rathikāyapi vā…pe… ayaṃ nayoti yojanā. Tattha rathikāti racchā. Byūhanti anibbijjhitvā ṭhitā gatapaccāgataracchā. Sandhi nāma gharasandhi. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Ayaṃ nayoti ‘‘āpattī’’ti anantaragāthāya vuttanayo.
1837. аамисзна асамбхиннарасам̣ санд̇хааяа ид̣̇ам̣ д̣̇уггадам̣ бхаасид̇ам̣. аамисзна самбхиннз згарасз яаамагаалигаад̣̇имхи бадиг̇г̇ахзд̇ваа аж̇жхохаарз баадид̣̇зсанийяаабад̇д̇и сияаад̇и яож̇анаа.
1837. Āmisena asambhinnarasaṃ sandhāya idaṃ dukkaṭaṃ bhāsitaṃ. Āmisena sambhinne ekarase yāmakālikādimhi paṭiggahetvā ajjhohāre pāṭidesanīyāpatti siyāti yojanā.
1838. згад̇оубасамбаннахад̇т̇ад̇од̇и бхигкунийнам̣ санд̇игз убасамбаннааяа хад̇т̇ад̇о. яат̇ааха ‘‘згад̇оубасамбаннааяаад̇и бхигкунийнам̣ санд̇игз убасамбаннааяаа’’д̇и (баажи. адта. 553). бхигкуунам̣ санд̇игз убасамбаннааяа бана яат̇аавад̇т̇угамзваад̇и.
1838.Ekatoupasampannahatthatoti bhikkhunīnaṃ santike upasampannāya hatthato. Yathāha ‘‘ekatoupasampannāyāti bhikkhunīnaṃ santike upasampannāyā’’ti (pāci. aṭṭha. 553). Bhikkhūnaṃ santike upasampannāya pana yathāvatthukamevāti.
1839. ан̃н̃аад̇игааяа н̃аад̇игасан̃н̃исса, д̇ат̇зва вимад̇исса жа д̣̇уггаданд̇и яож̇анаа.
1839. Aññātikāya ñātikasaññissa, tatheva vimatissa ca dukkaṭanti yojanā.
1840. ан̃н̃аад̇игааяа д̣̇аабзнд̇ияаа бхуумияаа нигкибид̇ваа д̣̇ад̣̇амаанааяа ваа анд̇араараамаад̣̇ийсу тад̇ваа д̣̇знд̇ияаа бадиг̇г̇ан̣хад̇о бхигкусса анаабад̇д̇ийд̇и яож̇анаа. анд̇араараамаад̣̇ийсууд̇и зд̇т̇а аад̣̇и-сад̣̇д̣̇зна бхигкунубассаяад̇ид̇т̇ияасзяяаабадиггаманаад̣̇им̣ сан̇г̇ан̣хаад̇и. бадиггаманам̣ наама бхож̇анасаалаа.
1840. Aññātikāya dāpentiyā bhūmiyā nikkhipitvā dadamānāya vā antarārāmādīsu ṭhatvā dentiyā paṭiggaṇhato bhikkhussa anāpattīti yojanā. Antarārāmādīsūti ettha ādi-saddena bhikkhunupassayatitthiyaseyyāpaṭikkamanādiṃ saṅgaṇhāti. Paṭikkamanaṃ nāma bhojanasālā.
1841. г̇аамад̇о б̣ахи нийхарид̇ваа д̣̇зд̇ийд̇и яож̇анаа.
1841. Gāmato bahi nīharitvā detīti yojanā.
1842. хад̇т̇ад̇од̇и зд̇т̇а ‘‘г̇ахан̣з’’д̇и сзсо. д̇ат̇аад̇и анаабад̇д̇и. самудтаанам̣ ид̣̇ам̣ сигкаабад̣̇ам̣ зл̣агаломзна самам̣ мад̇анд̇и яож̇анаа.
1842.Hatthatoti ettha ‘‘gahaṇe’’ti seso. Tathāti anāpatti. Samuṭṭhānaṃ idaṃ sikkhāpadaṃ eḷakalomena samaṃ matanti yojanā.
батамабаадид̣̇зсанийяагат̇ааван̣н̣анаа.
Paṭhamapāṭidesanīyakathāvaṇṇanā.
1843-4. авуд̇д̇зд̇и вагкамаананаязна авуд̇д̇з. згзнаби жа бхигкунаад̇и самб̣анд̇хо. абасаггаад̇и абаг̇ажча. аад̣̇и-ад̇т̇аваажинаа ид̇и-сад̣̇д̣̇зна ‘‘абасагга д̇аава, бхаг̇ини, яаава бхигкуу бхун̃ж̇анд̇ий’’д̇и ваагяасзсо сан̇г̇ахид̇од̇и д̣̇адтаб̣б̣о. иминаа абасаад̣̇анаагааро санд̣̇ассид̇о. ‘‘згзнаби жа бхигкунаа’’д̇и иминаа авагам̣со д̣̇ассид̇о. уггам̣со бана ‘‘д̇зхи бхигкуухи саа бхигкуний абасаад̣̇зд̇аб̣б̣аа’’д̇и баал̣ид̇оби д̣̇адтаб̣б̣о. ‘‘аамиса’’нд̇и сааман̃н̃аважанзби бан̃жаннам̣ бхож̇анаанам̣ ан̃н̃ад̇арассзва г̇ахан̣ам̣. яат̇ааха ‘‘бан̃жаннам̣ бхож̇анаанам̣ ан̃н̃ад̇арзнаа’’д̇и. бхог̇зд̇и жа згад̇оубасамбаннанд̇и жа вуд̇д̇ад̇т̇амзва.
1843-4.Avutteti vakkhamānanayena avutte. Ekenapi ca bhikkhunāti sambandho. Apasakkāti apagaccha. Ādi-atthavācinā iti-saddena ‘‘apasakka tāva, bhagini, yāva bhikkhū bhuñjantī’’ti vākyaseso saṅgahitoti daṭṭhabbo. Iminā apasādanākāro sandassito. ‘‘Ekenapi ca bhikkhunā’’ti iminā avakaṃso dassito. Ukkaṃso pana ‘‘tehi bhikkhūhi sā bhikkhunī apasādetabbā’’ti pāḷitopi daṭṭhabbo. ‘‘Āmisa’’nti sāmaññavacanepi pañcannaṃ bhojanānaṃ aññatarasseva gahaṇaṃ. Yathāha ‘‘pañcannaṃ bhojanānaṃ aññatarenā’’ti. Bhogeti ca ekatoupasampannanti ca vuttatthameva.
1845. д̇ат̇зваад̇и д̣̇уггадам̣. д̇ад̇т̇аад̇и анубасамбаннааяа.
1845.Tathevāti dukkaṭaṃ. Tatthāti anupasampannāya.
1846. ад̇д̇ано бхад̇д̇з д̣̇иннзби иминаа сигкаабад̣̇зна анаабад̇д̇и, буримасигкаабад̣̇зна бана аабад̇д̇исамбхаваа ‘‘на д̣̇зд̇ий’’д̇и вуд̇д̇ам̣. яат̇ааха ‘‘ад̇д̇ано бхад̇д̇ам̣ д̣̇аабзд̇и, на д̣̇зд̇ийд̇и зд̇т̇а сажзби ад̇д̇ано бхад̇д̇ам̣ д̣̇зд̇и, иминаа сигкаабад̣̇зна анаабад̇д̇иязва, буримасигкаабад̣̇зна аабад̇д̇ий’’д̇и (баажи. адта. 558). д̇ат̇аад̇и анаабад̇д̇и. убхаяасигкаабад̣̇зхиби анаабад̇д̇им̣ д̣̇ассзд̇умааха ‘‘бад̣̇зд̇и жз’’д̇и. яат̇ааха ‘‘ан̃н̃зсам̣ бхад̇д̇ам̣ д̣̇зд̇и, на д̣̇аабзд̇ийд̇и зд̇т̇а бана сажзби д̣̇аабзяяа, иминаа сигкаабад̣̇зна аабад̇д̇и бхавзяяа, д̣̇знд̇ияаа бана нзва иминаа, на буримзна аабад̇д̇ий’’д̇и.
1846. Attano bhatte dinnepi iminā sikkhāpadena anāpatti, purimasikkhāpadena pana āpattisambhavā ‘‘na detī’’ti vuttaṃ. Yathāha ‘‘attano bhattaṃ dāpeti, na detīti ettha sacepi attano bhattaṃ deti, iminā sikkhāpadena anāpattiyeva, purimasikkhāpadena āpattī’’ti (pāci. aṭṭha. 558). Tathāti anāpatti. Ubhayasikkhāpadehipi anāpattiṃ dassetumāha ‘‘padeti ce’’ti. Yathāha ‘‘aññesaṃ bhattaṃ deti, na dāpetīti ettha pana sacepi dāpeyya, iminā sikkhāpadena āpatti bhaveyya, dentiyā pana neva iminā, na purimena āpattī’’ti.
1847. бхигкуний яам̣ на д̣̇иннам̣, д̇ам̣ д̣̇аабзд̇и, яад̇т̇а ваа на д̣̇иннам̣, д̇ад̇т̇а д̣̇аабзд̇и, д̇амби саб̣б̣зсам̣ мид̇д̇аамид̇д̇аанам̣ самам̣ д̣̇аабзд̇и, д̇ад̇т̇ааби анаабад̇д̇и.
1847. Bhikkhunī yaṃ na dinnaṃ, taṃ dāpeti, yattha vā na dinnaṃ, tattha dāpeti, tampi sabbesaṃ mittāmittānaṃ samaṃ dāpeti, tatthāpi anāpatti.
1848. сигкамаанаа ваа сааман̣зригаа ваа ‘‘ид̇ха суубам̣ д̣̇зт̇а, од̣̇анам̣ д̣̇зт̇аа’’д̇и восаасанд̇ий вид̇хаанам̣ гаронд̇ий тид̇аа, д̇ам̣ анабасаад̣̇знд̇асса анаабад̇д̇и. бан̃жзва бхож̇анаани винаа ан̃н̃ам̣ восаасанд̇им̣ бхигкуним̣ анабасаад̣̇знд̇асса анаабад̇д̇и. анабасаад̣̇знд̇асса уммад̇д̇агаад̣̇иноби анаабад̇д̇ийд̇и яож̇анаа.
1848. Sikkhamānā vā sāmaṇerikā vā ‘‘idha sūpaṃ detha, odanaṃ dethā’’ti vosāsantī vidhānaṃ karontī ṭhitā, taṃ anapasādentassa anāpatti. Pañceva bhojanāni vinā aññaṃ vosāsantiṃ bhikkhuniṃ anapasādentassa anāpatti. Anapasādentassa ummattakādinopi anāpattīti yojanā.
1849. самудтаананд̇и зд̇т̇а ‘‘имассаа’’д̇и сзсо. бхож̇анам̣ гирияам̣, восаасанд̇ияаа анивааран̣ам̣ агирияанд̇и звамид̣̇ам̣ грияаагрияам̣.
1849.Samuṭṭhānanti ettha ‘‘imassā’’ti seso. Bhojanaṃ kiriyaṃ, vosāsantiyā anivāraṇaṃ akiriyanti evamidaṃ kriyākriyaṃ.
д̣̇уд̇ияабаадид̣̇зсанийяагат̇ааван̣н̣анаа.
Dutiyapāṭidesanīyakathāvaṇṇanā.
1850-1. сзгканд̇и саммад̇зд̇и ‘‘сзгкасаммад̇ам̣ наама гулам̣ яам̣ гулам̣ сад̣̇д̇хааяа вад̣дхад̇и, бхог̇зна хааяад̇и, зваруубасса гуласса н̃ад̇д̇ид̣̇уд̇иязна гаммзна сзгкасаммуд̇и д̣̇иннаа ход̇ий’’д̇и (баажи. 567) вуд̇д̇ам̣ ид̣̇ам̣ гулам̣ сзгкасаммад̇ам̣ наама. д̇знааха ‘‘лад̣̇д̇хасаммуд̇игз гулз’’д̇и. лад̣̇д̇хаа саммуд̇и язнаад̇и виг̇г̇ахо. гхаруубажаарам̣ огганд̇з ниманд̇ид̇оби аниманд̇ид̇ова ход̇ийд̇и ааха ‘‘гхаруубажаароггаманаа буб̣б̣зваа’’д̇и. яат̇ааха ‘‘аниманд̇ид̇о наама аж̇ж̇ад̇анааяа ваа сваад̇анааяа ваа аниманд̇ид̇о, гхаруубажаарам̣ оггаманд̇з ниманд̇зд̇и, зсо аниманд̇ид̇о наамаа’’д̇и (баажи. 567).
1850-1.Sekkhanti sammateti ‘‘sekkhasammataṃ nāma kulaṃ yaṃ kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammuti dinnā hotī’’ti (pāci. 567) vuttaṃ idaṃ kulaṃ sekkhasammataṃ nāma. Tenāha ‘‘laddhasammutike kule’’ti. Laddhā sammuti yenāti viggaho. Gharūpacāraṃ okkante nimantitopi animantitova hotīti āha ‘‘gharūpacārokkamanā pubbevā’’ti. Yathāha ‘‘animantito nāma ajjatanāya vā svātanāya vā animantito, gharūpacāraṃ okkamante nimanteti, eso animantito nāmā’’ti (pāci. 567).
‘‘аг̇илаано наама яо саггод̇и бин̣д̣ааяа жарид̇у’’нд̇и вуд̇д̇ад̇д̇аа бхигкааяа жарид̇ум̣ самад̇т̇о аг̇илаано наама. г̇ахзд̇ваад̇и сахад̇т̇аа бадиг̇г̇ахзд̇ваа. ‘‘аамиса’’нд̇и иминаа самб̣анд̇хо. яат̇ааха ‘‘каад̣̇анийяам̣ ваа бхож̇анийяам̣ ваа сахад̇т̇аа бадиг̇г̇ахзд̇ваа’’д̇и (баажи. 567). г̇ахан̣зд̇и зд̇т̇а ‘‘аахаарад̇т̇ааяаа’’д̇и сзсо.
‘‘Agilāno nāma yo sakkoti piṇḍāya caritu’’nti vuttattā bhikkhāya carituṃ samattho agilāno nāma. Gahetvāti sahatthā paṭiggahetvā. ‘‘Āmisa’’nti iminā sambandho. Yathāha ‘‘khādanīyaṃ vā bhojanīyaṃ vā sahatthā paṭiggahetvā’’ti (pāci. 567). Gahaṇeti ettha ‘‘āhāratthāyā’’ti seso.
1853. д̇ад̇т̇аад̇и асзгкасаммад̇з гулз. д̇ат̇зва барид̣̇ийбид̇анд̇и д̣̇уггадам̣ барид̣̇ийбид̇ам̣.
1853.Tatthāti asekkhasammate kule. Tatheva paridīpitanti dukkaṭaṃ paridīpitaṃ.
1854. ниманд̇ид̇асса ваад̇и зд̇т̇а ваа-сад̣̇д̣̇зна ниманд̇ид̇асса авасзсам̣ г̇ан̣хаад̇и. яат̇ааха ‘‘ниманд̇ид̇асса ваа г̇илаанасса ваа сзсагам̣ бхун̃ж̇ад̇ий’’д̇и. ан̃н̃зсам̣ бхигкаа д̇ад̇т̇а д̣̇ийяад̇ийд̇и яож̇анаа. д̇ад̇т̇аад̇и д̇асмим̣ сзгкасаммад̇з гулз.
1854.Nimantitassa vāti ettha vā-saddena nimantitassa avasesaṃ gaṇhāti. Yathāha ‘‘nimantitassa vā gilānassa vā sesakaṃ bhuñjatī’’ti. Aññesaṃ bhikkhā tattha dīyatīti yojanā. Tatthāti tasmiṃ sekkhasammate kule.
1855. яад̇т̇а гад̇т̇ажийд̇и аасанасаалаад̣̇ийсу яад̇т̇а гад̇т̇ажи. нижжабхад̇д̇аад̣̇игз ваабийд̇и зд̇т̇а аад̣̇и-сад̣̇д̣̇зна салаагабхад̇д̇абагкигаубосат̇игабаадибад̣̇игабхад̇д̇аанам̣ г̇ахан̣ам̣.
1855.Yatthakatthacīti āsanasālādīsu yattha katthaci. Niccabhattādike vāpīti ettha ādi-saddena salākabhattapakkhikauposathikapāṭipadikabhattānaṃ gahaṇaṃ.
1856. д̣̇ваарзд̇и зд̇т̇а ‘‘табзд̇ваа’’д̇и сзсо. самбад̇д̇зд̇и зд̇т̇а ‘‘бажчаа’’д̇и сзсо. яат̇ааха ‘‘сажзби анааг̇ад̇з бхигкумхи батамам̣язва нийхарид̇ваа д̣̇ваарз табзд̇ваа бажчаа самбад̇д̇асса д̣̇знд̇и, ваддад̇ий’’д̇и (баажи. адта. 569).
1856.Dvāreti ettha ‘‘ṭhapetvā’’ti seso. Sampatteti ettha ‘‘pacchā’’ti seso. Yathāha ‘‘sacepi anāgate bhikkhumhi paṭhamaṃyeva nīharitvā dvāre ṭhapetvā pacchā sampattassa denti, vaṭṭatī’’ti (pāci. aṭṭha. 569).
1857. махаабажжарияаа(бааажи. адта. 569) г̇ад̇авинижчаяам̣ д̣̇ассзд̇умааха ‘‘бхигку’’нд̇иаад̣̇и. самудтаанзл̣агуубаманд̇и самудтаанад̇о зл̣агаломасигкаабад̣̇асад̣̇исанд̇и ад̇т̇о.
1857.Mahāpaccariyā(paāci. aṭṭha. 569) gatavinicchayaṃ dassetumāha ‘‘bhikkhu’’ntiādi. Samuṭṭhāneḷakūpamanti samuṭṭhānato eḷakalomasikkhāpadasadisanti attho.
д̇ад̇ияабаадид̣̇зсанийяагат̇ааван̣н̣анаа.
Tatiyapāṭidesanīyakathāvaṇṇanā.
1858-9. ‘‘бан̃жаннам̣ бадисам̣вид̣̇ид̇ам̣, зд̇ам̣ аббадисам̣вид̣̇ид̇ам̣ наамаа’’д̇и важанад̇о жа ид̇хааби ‘‘сахад̇хаммиган̃аабид̇а’’нд̇и вагкамаанад̇д̇аа жа аг̇ахадта-сад̣̇д̣̇зна бариб̣б̣ааж̇агаанам̣ г̇ахан̣ам̣. вуд̇д̇амзва наяам̣ вохааранд̇арзна д̣̇ассзд̇умааха ‘‘ид̇т̇ияаа бурисзна ваа’’д̇и. ‘‘яаани ко бана д̇аани ааран̃н̃агаани сзнаасанааний’’д̇и (баажи. 573) важанад̇о аарааманд̇и ааран̃н̃агаараамамааха. сажз звамаарожид̇ам̣ бадисам̣вид̣̇ид̇анд̇и хи вуд̇д̇ам̣ бад̣̇абхааж̇анзд̇и (баажи. 573) яож̇анаа. бадисам̣вид̣̇ид̇анд̇и баг̇зва нивзд̣̇ид̇ам̣.
1858-9. ‘‘Pañcannaṃ paṭisaṃviditaṃ, etaṃ appaṭisaṃviditaṃ nāmā’’ti vacanato ca idhāpi ‘‘sahadhammikañāpita’’nti vakkhamānattā ca agahaṭṭha-saddena paribbājakānaṃ gahaṇaṃ. Vuttameva nayaṃ vohārantarena dassetumāha ‘‘itthiyā purisena vā’’ti. ‘‘Yāni kho pana tāni āraññakāni senāsanānī’’ti (pāci. 573) vacanato ārāmanti āraññakārāmamāha. Sace evamārocitaṃ paṭisaṃviditanti hi vuttaṃ padabhājaneti (pāci. 573) yojanā. Paṭisaṃviditanti pageva niveditaṃ.
1860. бажчаа яат̇аарожид̇ам̣ д̇амзва ваа д̇асса жа бариваарам̣ гад̇ваа ан̃н̃ам̣ б̣ахум̣ ваа аахарийяад̇у, д̇амби бадисам̣взд̣̇ид̇ам̣ наамаад̇и яож̇анаа.
1860. Pacchā yathārocitaṃ tameva vā tassa ca parivāraṃ katvā aññaṃ bahuṃ vā āharīyatu, tampi paṭisaṃveditaṃ nāmāti yojanā.
1861. яааг̇уяаа вид̣̇ид̇ам̣ гад̇ваад̇и зд̇т̇а ‘‘д̇ам̣ табзд̇ваа’’д̇и ид̣̇ам̣ саамад̇т̇ияаа лаб̣бхад̇и. ид̣̇амби вид̣̇ид̇ам̣ гурунд̣̇ияам̣ ваддад̇ийд̇и вуд̇д̇анд̇и яож̇анаа.
1861.Yāguyā viditaṃ katvāti ettha ‘‘taṃ ṭhapetvā’’ti idaṃ sāmatthiyā labbhati. Idampi viditaṃ kurundiyaṃ vaṭṭatīti vuttanti yojanā.
1862. банаад̇и аби-сад̣̇д̣̇ад̇т̇о. ан̃н̃ааниби гулаанийд̇и яож̇анаа. зд̇т̇а ‘‘асугам̣ наама гулам̣ бадисам̣взд̣̇ид̇ам̣ гад̇ваа каад̣̇анийяаад̣̇ийни г̇ахзд̇ваа г̇ажчад̇ийд̇и суд̇ваа’’д̇и (баажи. адта. 573) адтагат̇аасзсо. д̇знаад̇и гад̇абадисам̣взд̣̇ид̇зна. д̇амби жа саб̣б̣ам̣ ваддад̇ийд̇и яож̇анаа.
1862.Panāti api-saddattho. Aññānipi kulānīti yojanā. Ettha ‘‘asukaṃ nāma kulaṃ paṭisaṃveditaṃ katvā khādanīyādīni gahetvā gacchatīti sutvā’’ti (pāci. aṭṭha. 573) aṭṭhakathāseso. Tenāti katapaṭisaṃveditena. Tampi ca sabbaṃ vaṭṭatīti yojanā.
1863. звам̣ яам̣ анаарожид̇анд̇и ‘‘аараамам̣ ваа убажаарам̣ ваа бависид̇ваа’’д̇иаад̣̇инаа наязна яам̣ батамам̣ анивзд̣̇ид̇ам̣. ‘‘зва’’нд̇и ид̣̇ам̣ ‘‘яам̣ аараамаманаабхад̇а’’нд̇и иминааби яож̇зд̇аб̣б̣ам̣. званд̇и ‘‘д̇асса бариваарам̣ гад̇ваа’’д̇иаад̣̇инаа багаарзна. ‘‘д̇ам̣ асам̣вид̣̇ид̇ам̣ наамаа’’д̇и ид̣̇ам̣ ‘‘сахад̇хаммиган̃аабид̇а’’нд̇и иминааби яож̇зд̇аб̣б̣ам̣. яат̇ааха ‘‘бан̃жаннам̣ бадисам̣вид̣̇ид̇ам̣, зд̇ам̣ аббадисам̣вид̣̇ид̇ам̣ наамаа’’д̇и (баажи. 573). адтагат̇ааяан̃жа ‘‘бан̃жаннам̣ бадисам̣вид̣̇ид̇анд̇и бан̃жасу сахад̇хаммигзсу яам̣ гин̃жи бзсзд̇ваа ‘каад̣̇анийяам̣ ваа бхож̇анийяам̣ ваа аахариссаамаа’д̇и бадисам̣вид̣̇ид̇ам̣ гад̇амби аббадисам̣вид̣̇ид̇амзваад̇и ад̇т̇о’’д̇и (баажи. адта. 573) вуд̇д̇ам̣.
1863.Evaṃ yaṃ anārocitanti ‘‘ārāmaṃ vā upacāraṃ vā pavisitvā’’tiādinā nayena yaṃ paṭhamaṃ aniveditaṃ. ‘‘Eva’’nti idaṃ ‘‘yaṃ ārāmamanābhata’’nti imināpi yojetabbaṃ. Evanti ‘‘tassa parivāraṃ katvā’’tiādinā pakārena. ‘‘Taṃ asaṃviditaṃ nāmā’’ti idaṃ ‘‘sahadhammikañāpita’’nti imināpi yojetabbaṃ. Yathāha ‘‘pañcannaṃ paṭisaṃviditaṃ, etaṃ appaṭisaṃviditaṃ nāmā’’ti (pāci. 573). Aṭṭhakathāyañca ‘‘pañcannaṃ paṭisaṃviditanti pañcasu sahadhammikesu yaṃ kiñci pesetvā ‘khādanīyaṃ vā bhojanīyaṃ vā āharissāmā’ti paṭisaṃviditaṃ katampi appaṭisaṃviditamevāti attho’’ti (pāci. aṭṭha. 573) vuttaṃ.
1864. гаараабзд̇ваад̇и зд̇т̇а ‘‘бадисам̣вид̣̇ид̇а’’нд̇и сзсо.
1864.Kārāpetvāti ettha ‘‘paṭisaṃvidita’’nti seso.
1865. бхигкунаа ваа г̇анд̇ваа анд̇араамаг̇г̇з г̇ахзд̇аб̣б̣анд̇и яож̇анаа. звамагад̇ваад̇и ‘‘б̣ахиаараамам̣ бзсзд̇ваа’’д̇иаад̣̇инаа вуд̇д̇авид̇хаанам̣ агад̇ваа. убажаарад̇од̇и зд̇т̇а бхуммад̇т̇з д̇о-бажжаяо взд̣̇ид̇аб̣б̣о.
1865. Bhikkhunā vā gantvā antarāmagge gahetabbanti yojanā. Evamakatvāti ‘‘bahiārāmaṃ pesetvā’’tiādinā vuttavidhānaṃ akatvā. Upacāratoti ettha bhummatthe to-paccayo veditabbo.
1868. ‘‘бадисам̣вид̣̇ид̇з’’д̇иаад̣̇ийнам̣ бад̣̇аанам̣ ‘‘анаабад̇д̇з ваа’’д̇и иминаа самб̣анд̇хо. бадисам̣вид̣̇ид̇зд̇и зд̇т̇а ‘‘г̇илаанассаа’’д̇и сзсо. бадисам̣вид̣̇ид̇з анаабад̇д̇и, г̇илаанассааби анаабад̇д̇и, аббадисам̣вид̣̇ид̇зби д̇асса бадисам̣вид̣̇ид̇асса авасзсагз ваа г̇илаанасса авасзсагз ваа анаабад̇д̇и зваад̇и самб̣анд̇хо . яат̇ааха анаабад̇д̇иваарз ‘‘бадисам̣вид̣̇ид̇асса ваа г̇илаанасса ваа сзсагам̣ бхун̃ж̇ад̇ий’’д̇и (баажи. 575). б̣ахаараамз бадиг̇г̇ахзд̇ваа анд̇оязва бхун̃ж̇ад̇о асса анаабад̇д̇ийд̇и яож̇анаа. г̇ахзд̇ваа ваад̇и зд̇т̇а ваа-сад̣̇д̣̇о ‘‘д̇ассаа’’д̇иаад̣̇ийсуби яож̇зд̇аб̣б̣о.
1868.‘‘Paṭisaṃvidite’’tiādīnaṃ padānaṃ ‘‘anāpatte vā’’ti iminā sambandho. Paṭisaṃviditeti ettha ‘‘gilānassā’’ti seso. Paṭisaṃvidite anāpatti, gilānassāpi anāpatti, appaṭisaṃviditepi tassa paṭisaṃviditassa avasesake vā gilānassa avasesake vā anāpatti evāti sambandho . Yathāha anāpattivāre ‘‘paṭisaṃviditassa vā gilānassa vā sesakaṃ bhuñjatī’’ti (pāci. 575). Bahārāme paṭiggahetvā antoyeva bhuñjato assa anāpattīti yojanā. Gahetvā vāti ettha vā-saddo ‘‘tassā’’tiādīsupi yojetabbo.
1869. д̇ад̇т̇аад̇и д̇асмим̣ ааран̃н̃агаараамз. каад̣̇ад̇о анаабад̇д̇и зваад̇и яож̇анаа, д̇ад̇т̇а ‘‘ан̃н̃зна габбияам̣ гад̇ваа д̣̇иннааний’’д̇и сзсо.
1869.Tatthāti tasmiṃ āraññakārāme. Khādato anāpatti evāti yojanā, tattha ‘‘aññena kappiyaṃ katvā dinnānī’’ti seso.
жад̇уд̇т̇абаадид̣̇зсанийяагат̇ааван̣н̣анаа.
Catutthapāṭidesanīyakathāvaṇṇanā.
ид̇и винаяад̇т̇асаарасанд̣̇ийбанияаа винаяавинижчаяаван̣н̣анааяа
Iti vinayatthasārasandīpaniyā vinayavinicchayavaṇṇanāya
баадид̣̇зсанийяагат̇ааван̣н̣анаа нидтид̇аа.
Pāṭidesanīyakathāvaṇṇanā niṭṭhitā.
