| Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
20. бадиг̇г̇ахан̣авинижчаяагат̇аа
20. Paṭiggahaṇavinicchayakathā
104. звам̣ габбияабхуумивинижчаяам̣ гат̇зд̇ваа ид̣̇аани бадиг̇г̇ахан̣авинижчаяам̣ гат̇зд̇ум̣ ‘‘каад̣̇анийяаад̣̇ибадиг̇г̇аахо’’д̇иаад̣̇имааха. д̇ад̇т̇а каад̣̇ияад̇зд̇и каад̣̇анийяам̣, табзд̇ваа бан̃жа бхож̇анаани саб̣б̣асса аж̇жхохарид̇аб̣б̣ассзд̇ам̣ ад̇хиважанам̣. аад̣̇исад̣̇д̣̇зна бхож̇анийяам̣ сан̇г̇ан̣хаад̇и. бадиг̇г̇ахан̣ам̣ самбадижчанам̣ бадиг̇г̇аахо, каад̣̇анийяаад̣̇ийнам̣ бадиг̇г̇аахо каад̣̇анийяаад̣̇ибадиг̇г̇аахо. д̇знааха ‘‘аж̇жхохарид̇аб̣б̣асса яасса гассажи каад̣̇анийяасса ваа бхож̇анийяасса ваа бадиг̇г̇ахан̣а’’нд̇и. бан̃жасу ан̇г̇зсу ужжааран̣амад̇д̇анд̇и угкибанамад̇д̇ам̣, иминаа бадиг̇г̇ахид̇аб̣б̣абхаарасса бамаан̣ам̣ д̣̇ассзд̇и. д̇знзва д̇аад̣̇исзна бурисзна анугкибанийяавад̇т̇усмим̣ бадиг̇г̇ахан̣ам̣ на рухад̇ийд̇и д̣̇ийбзд̇и. ‘‘хад̇т̇абаасо’’д̇и иминаа аасаннабхаавам̣. д̇знзва жа д̣̇уурз тад̇ваа абхихаранд̇асса бадиг̇г̇ахан̣ам̣ на рухад̇ийд̇и д̣̇ийбзд̇и. абхихаарод̇и барин̣аамид̇абхааво, д̇зна жа д̇ад̇радтагаад̣̇ийсу на рухад̇ийд̇и д̣̇ийбзд̇и. ‘‘д̣̇зво ваа’’д̇иаад̣̇инаа д̣̇ааяагад̇о баяог̇ад̇д̇аяам̣ д̣̇ассзд̇и. ‘‘д̇ан̃жз’’д̇иаад̣̇инаа бадиг̇г̇аахагад̇о баяог̇ад̣̇ваяам̣ д̣̇ассзд̇и.
104. Evaṃ kappiyabhūmivinicchayaṃ kathetvā idāni paṭiggahaṇavinicchayaṃ kathetuṃ ‘‘khādanīyādipaṭiggāho’’tiādimāha. Tattha khādiyateti khādanīyaṃ, ṭhapetvā pañca bhojanāni sabbassa ajjhoharitabbassetaṃ adhivacanaṃ. Ādisaddena bhojanīyaṃ saṅgaṇhāti. Paṭiggahaṇaṃ sampaṭicchanaṃ paṭiggāho, khādanīyādīnaṃ paṭiggāho khādanīyādipaṭiggāho. Tenāha ‘‘ajjhoharitabbassa yassa kassaci khādanīyassa vā bhojanīyassa vā paṭiggahaṇa’’nti. Pañcasu aṅgesu uccāraṇamattanti ukkhipanamattaṃ, iminā paṭiggahitabbabhārassa pamāṇaṃ dasseti. Teneva tādisena purisena anukkhipanīyavatthusmiṃ paṭiggahaṇaṃ na ruhatīti dīpeti. ‘‘Hatthapāso’’ti iminā āsannabhāvaṃ. Teneva ca dūre ṭhatvā abhiharantassa paṭiggahaṇaṃ na ruhatīti dīpeti. Abhihāroti pariṇāmitabhāvo, tena ca tatraṭṭhakādīsu na ruhatīti dīpeti. ‘‘Devo vā’’tiādinā dāyakato payogattayaṃ dasseti. ‘‘Tañce’’tiādinā paṭiggāhakato payogadvayaṃ dasseti.
ид̣̇аани д̇зсу бан̃жасу ан̇г̇зсу хад̇т̇абаасасса д̣̇урааж̇аанад̇ааяа д̇ам̣ д̣̇ассзд̇умааха ‘‘д̇ад̇т̇и’’жжаад̣̇и. д̇ад̇т̇а ад̣дхад̇зяяахад̇т̇о хад̇т̇абаасо наамаад̇и яож̇анаа. ‘‘д̇асса ориманд̇знаа’’д̇и иминаа аагаасз уж̇ум̣ тад̇ваа барзна угкид̇д̇ам̣ г̇ан̣ханд̇ассааби аасаннан̇г̇абхууд̇абаад̣̇ад̇алад̇о бадтааяа хад̇т̇абаасо барижчинд̣̇ид̇аб̣б̣о, на сийсад̇о бадтааяаад̇и д̣̇ассзд̇и. д̇ад̇т̇а ‘‘ориманд̇знаа’’д̇и имасса хздтиманд̇знаад̇и ад̇т̇о г̇ахзд̇аб̣б̣о.
Idāni tesu pañcasu aṅgesu hatthapāsassa durājānatāya taṃ dassetumāha ‘‘tatthi’’ccādi. Tattha aḍḍhateyyahattho hatthapāso nāmāti yojanā. ‘‘Tassa orimantenā’’ti iminā ākāse ujuṃ ṭhatvā parena ukkhittaṃ gaṇhantassāpi āsannaṅgabhūtapādatalato paṭṭhāya hatthapāso paricchinditabbo, na sīsato paṭṭhāyāti dasseti. Tattha ‘‘orimantenā’’ti imassa heṭṭhimantenāti attho gahetabbo.
зд̇т̇а жа бавааран̣асигкаабад̣̇адтагат̇ааяам̣ (баажи. адта. 238-239) ‘‘сажз бана бхигку нисинно ход̇и, аасаннасса бажчиманд̇ад̇о бадтааяаа’’д̇иаад̣̇инаа бадиг̇г̇аахагаанам̣ аасаннан̇г̇асса баариманд̇ад̇о бадтааяа барижчзд̣̇асса д̣̇ассид̇ад̇д̇аа ид̇хааби аагаасз тид̇асса бадиг̇г̇аахагасса аасаннан̇г̇абхууд̇абаад̣̇ад̇аласса баариманд̇абхууд̇ад̇о бан̣хибарияанд̇асса хздтимад̇алад̇о бадтааяа, д̣̇ааяагасса бана ориманд̇абхууд̇ад̇о баад̣̇ан̇г̇уласса хздтимабарияанд̇ад̇о бадтааяа хад̇т̇абаасо барижчинд̣̇ид̇аб̣б̣од̇и д̣̇адтаб̣б̣ам̣. иминаава наязна бхуумияам̣ нибаж̇ж̇ид̇ваа уссийсагз нисиннасса хад̇т̇ад̇о бадиг̇г̇ан̣ханд̇ассааби аасаннасийсан̇г̇асса баариманд̇абхууд̇ад̇о г̇ийванд̇ад̇о бадтааязва хад̇т̇абаасо минид̇аб̣б̣о, на баад̣̇ад̇алад̇о бадтааяа. звам̣ нибаж̇ж̇ид̇ваа д̣̇аанзби яат̇аануруубам̣ взд̣̇ид̇аб̣б̣ам̣. ‘‘яам̣ аасаннад̇арам̣ ан̇г̇а’’нд̇и (баажи. адта. 238-239) хи вуд̇д̇ам̣. агаллагод̇и г̇илаано сахад̇т̇аа барибхун̃ж̇ид̇ум̣ асаггонд̇о мукзна бадиг̇г̇ан̣хаад̇и. вимад̇ивинод̣̇анияам̣ (ви. ви. дий. баажид̇д̇ияа 2.265) бана ‘‘агаллагод̇и г̇илаано г̇ахзд̇ум̣ ваа’’д̇и зд̇д̇агамзва вуд̇д̇ам̣, зд̇зна агаллагод̇и г̇илаано ваа ат̇а ваа г̇ахзд̇ум̣ агаллаго асамад̇т̇од̇и ад̇т̇о д̣̇ассид̇о. д̇знааха ‘‘сажзби над̇т̇угаран̣ияам̣ д̣̇ийяамаанам̣ наасаабудзна агаллаго ваа мукзна бадиг̇г̇ан̣хаад̇ий’’д̇и.
Ettha ca pavāraṇasikkhāpadaṭṭhakathāyaṃ (pāci. aṭṭha. 238-239) ‘‘sace pana bhikkhu nisinno hoti, āsannassa pacchimantato paṭṭhāyā’’tiādinā paṭiggāhakānaṃ āsannaṅgassa pārimantato paṭṭhāya paricchedassa dassitattā idhāpi ākāse ṭhitassa paṭiggāhakassa āsannaṅgabhūtapādatalassa pārimantabhūtato paṇhipariyantassa heṭṭhimatalato paṭṭhāya, dāyakassa pana orimantabhūtato pādaṅgulassa heṭṭhimapariyantato paṭṭhāya hatthapāso paricchinditabboti daṭṭhabbaṃ. Imināva nayena bhūmiyaṃ nipajjitvā ussīsake nisinnassa hatthato paṭiggaṇhantassāpi āsannasīsaṅgassa pārimantabhūtato gīvantato paṭṭhāyeva hatthapāso minitabbo, na pādatalato paṭṭhāya. Evaṃ nipajjitvā dānepi yathānurūpaṃ veditabbaṃ. ‘‘Yaṃ āsannataraṃ aṅga’’nti (pāci. aṭṭha. 238-239) hi vuttaṃ. Akallakoti gilāno sahatthā paribhuñjituṃ asakkonto mukhena paṭiggaṇhāti. Vimativinodaniyaṃ (vi. vi. ṭī. pācittiya 2.265) pana ‘‘akallakoti gilāno gahetuṃ vā’’ti ettakameva vuttaṃ, etena akallakoti gilāno vā atha vā gahetuṃ akallako asamatthoti attho dassito. Tenāha ‘‘sacepi natthukaraṇiyaṃ dīyamānaṃ nāsāpuṭena akallako vā mukhena paṭiggaṇhātī’’ti.
105. згад̣̇зсзнаабийд̇и ан̇г̇улияаа пудтамад̇д̇зна.
105.Ekadesenāpīti aṅguliyā phuṭṭhamattena.
д̇ан̃жз бадиг̇г̇ан̣хаад̇и, саб̣б̣ам̣ бадиг̇г̇ахид̇амзваад̇и взн̣угодияам̣ б̣анд̇хид̇ваа табид̇ад̇д̇аа. сажз бхуумияам̣ тид̇амзва гхадам̣ д̣̇ааяагзна хад̇т̇абаасз тад̇ваа ‘‘гхадам̣ д̣̇ассаамий’’д̇и д̣̇иннам̣ взн̣угодияаа г̇ахан̣авасзна бадиг̇г̇ан̣хаад̇и, убхаяагодиб̣ад̣̇д̇хам̣ саб̣б̣амби бадиг̇г̇ахид̇амзва ход̇и. бхигкусса хад̇т̇з абийл̣зд̇ваа багад̇ияаа бийл̣ияамаанам̣ ужчурасам̣ санд̇хааяа ‘‘г̇ан̣хат̇аа’’д̇и вуд̇д̇ад̇д̇аа ‘‘абхихааро на бан̃н̃ааяад̇ий’’д̇и вуд̇д̇ам̣, хад̇т̇абаасз тид̇асса бана бхигкусса ад̇т̇ааяа бийл̣ияамаанам̣ ужчуд̇о баг̇гхаранд̇ам̣ расам̣ г̇ан̣хид̇ум̣ ваддад̇и. д̣̇он̣игааяа саяам̣ баг̇гхаранд̇ам̣ ужчурасам̣ маж̇жхз ааварид̇ваа виссаж̇ж̇ид̇амби г̇ан̣хид̇ум̣ ваддад̇и. бадиг̇г̇ахан̣асан̃н̃ааяаад̇и ‘‘ман̃жаад̣̇инаа бадиг̇г̇ахзссаамий’’д̇и уббаад̣̇ид̇асан̃н̃ааяа, иминаа ‘‘бадиг̇г̇ан̣хаамий’’д̇и ваажааяа вад̇д̇аб̣б̣агижжам̣ над̇т̇ийд̇и д̣̇ассзд̇и.
Tañce paṭiggaṇhāti, sabbaṃ paṭiggahitamevāti veṇukoṭiyaṃ bandhitvā ṭhapitattā. Sace bhūmiyaṃ ṭhitameva ghaṭaṃ dāyakena hatthapāse ṭhatvā ‘‘ghaṭaṃ dassāmī’’ti dinnaṃ veṇukoṭiyā gahaṇavasena paṭiggaṇhāti, ubhayakoṭibaddhaṃ sabbampi paṭiggahitameva hoti. Bhikkhussa hatthe apīḷetvā pakatiyā pīḷiyamānaṃ ucchurasaṃ sandhāya ‘‘gaṇhathā’’ti vuttattā ‘‘abhihāro na paññāyatī’’ti vuttaṃ, hatthapāse ṭhitassa pana bhikkhussa atthāya pīḷiyamānaṃ ucchuto paggharantaṃ rasaṃ gaṇhituṃ vaṭṭati. Doṇikāya sayaṃ paggharantaṃ ucchurasaṃ majjhe āvaritvā vissajjitampi gaṇhituṃ vaṭṭati. Paṭiggahaṇasaññāyāti ‘‘mañcādinā paṭiggahessāmī’’ti uppāditasaññāya, iminā ‘‘paṭiggaṇhāmī’’ti vācāya vattabbakiccaṃ natthīti dasseti.
яад̇т̇а гад̇т̇ажи адтагат̇аасу, бад̣̇зсзсу ваа. асам̣хааримз палагзд̇и т̇аамамаж̇жхимзна асам̣хаарияз. ‘‘д̇инд̇ин̣игаад̣̇ибан̣н̣зсууд̇и важанад̇о саакаасу бадиг̇г̇ахан̣ам̣ рухад̇ийд̇и д̣̇адтаб̣б̣а’’нд̇и саарад̇т̇ад̣̇ийбанияам̣ (саарад̇т̇а. дий. баажид̇д̇ияа 3.265) вуд̇д̇ам̣. бораан̣адийгааяамби д̇ат̇зва вуд̇д̇ам̣, д̇ад̣̇зд̇ам̣ вижаарзд̇аб̣б̣ам̣. адтагат̇ааяан̃хи ‘‘бхуумияам̣ ад̇т̇ад̇зсу сукумзсу д̇инд̇ин̣игаад̣̇ибан̣н̣зсу бадиг̇г̇ахан̣ам̣ на рухад̇ий’’д̇и вуд̇д̇ам̣. д̇ам̣ д̇инд̇ин̣игаад̣̇ибан̣н̣аанам̣ сукумад̇д̇аа д̇ад̇т̇а табид̇ааамисасса асан̣таханад̇о бхуумияам̣ табид̇асад̣̇исад̇д̇аа ‘‘на рухад̇ий’’д̇и вуд̇д̇ам̣, д̇инд̇ин̣игаад̣̇исаакаасу табид̇зби звамзва сияаа, д̇асмаа ‘‘саакаасу бадиг̇г̇ахан̣ам̣ рухад̇ий’’д̇и важанам̣ аяуд̇д̇ам̣ вияа д̣̇иссад̇и. адтагат̇ааяам̣ ‘‘на рухад̇ий’’д̇и гирияаабад̣̇асса ‘‘гасмаа’’д̇и хзд̇убариязсанз сад̇и на ан̃н̃ам̣ бариязсид̇аб̣б̣ам̣, ‘‘сукумзсуу’’д̇и вуд̇д̇ам̣ висзсанабад̣̇ам̣язва хзд̇уманд̇ависзсанам̣ бхавад̇и, д̇асмаа д̇инд̇ин̣игабан̣н̣аад̣̇ийсу бадиг̇г̇ахан̣ам̣ на рухад̇и, гасмаа? д̇зсам̣ сукумад̇д̇аа. ан̃н̃зсу бана бад̣̇уминийбан̣н̣аад̣̇ийсу рухад̇и, гасмаа? д̇зсам̣ ол̣ааригад̇д̇аад̇и хзд̇упаласамб̣анд̇хо ижчид̇аб̣б̣од̇и д̣̇иссад̇и , д̇асмаа ‘‘д̇ад̣̇зд̇ам̣ вижаарзд̇аб̣б̣а’’нд̇и вуд̇д̇ам̣. д̇ат̇аа хи вуд̇д̇ам̣ адтагат̇ааяам̣ ‘‘на хи д̇аани санд̇хаарзд̇ум̣ самад̇т̇аанийд̇и маханд̇зсу бана бад̣̇уминийбан̣н̣аад̣̇ийсу рухад̇ий’’д̇и.
Yatthakatthaci aṭṭhakathāsu, padesesu vā. Asaṃhārime phalaketi thāmamajjhimena asaṃhāriye. ‘‘Tintiṇikādipaṇṇesūti vacanato sākhāsu paṭiggahaṇaṃ ruhatīti daṭṭhabba’’nti sāratthadīpaniyaṃ (sārattha. ṭī. pācittiya 3.265) vuttaṃ. Porāṇaṭīkāyampi tatheva vuttaṃ, tadetaṃ vicāretabbaṃ. Aṭṭhakathāyañhi ‘‘bhūmiyaṃ atthatesu sukhumesu tintiṇikādipaṇṇesu paṭiggahaṇaṃ na ruhatī’’ti vuttaṃ. Taṃ tintiṇikādipaṇṇānaṃ sukhumattā tattha ṭhapitaāmisassa asaṇṭhahanato bhūmiyaṃ ṭhapitasadisattā ‘‘na ruhatī’’ti vuttaṃ, tintiṇikādisākhāsu ṭhapitepi evameva siyā, tasmā ‘‘sākhāsu paṭiggahaṇaṃ ruhatī’’ti vacanaṃ ayuttaṃ viya dissati. Aṭṭhakathāyaṃ ‘‘na ruhatī’’ti kiriyāpadassa ‘‘kasmā’’ti hetupariyesane sati na aññaṃ pariyesitabbaṃ, ‘‘sukhumesū’’ti vuttaṃ visesanapadaṃyeva hetumantavisesanaṃ bhavati, tasmā tintiṇikapaṇṇādīsu paṭiggahaṇaṃ na ruhati, kasmā? Tesaṃ sukhumattā. Aññesu pana paduminīpaṇṇādīsu ruhati, kasmā? Tesaṃ oḷārikattāti hetuphalasambandho icchitabboti dissati , tasmā ‘‘tadetaṃ vicāretabba’’nti vuttaṃ. Tathā hi vuttaṃ aṭṭhakathāyaṃ ‘‘na hi tāni sandhāretuṃ samatthānīti mahantesu pana paduminīpaṇṇādīsu ruhatī’’ti.
106. бун̃чид̇ваа бадиг̇г̇ахзд̇ваад̇и бун̃чид̇зби раж̇анажун̣н̣аасан̇гааяа сад̇и бадиг̇г̇ахан̣ад̇т̇ааяа вуд̇д̇ам̣, наасад̇и. д̇ам̣ банаад̇и бад̇ид̇араж̇ам̣ аббадиг̇г̇ахзд̇ваа убари г̇ахид̇абин̣д̣абаад̇ам̣. анаабад̇д̇ийд̇и д̣̇уруубажин̣н̣аад̣̇ид̣̇осо над̇т̇и. буб̣б̣аабхог̇асса ануруубавасзна ‘‘анубасамбаннасса д̣̇ад̇ваа…бз… ваддад̇ий’’д̇и вуд̇д̇ам̣. яасмаа бана д̇ам̣ ‘‘ан̃н̃асса д̣̇ассаамий’’д̇и жид̇д̇уббаад̣̇амад̇д̇зна барасанд̇агам̣ на ход̇и, д̇асмаа д̇асса ад̣̇ад̇вааби бадиг̇г̇ахзд̇ваа барибхун̃ж̇ид̇ум̣ ваддад̇и. ‘‘анубасамбаннасса д̣̇ассаамий’’д̇иаад̣̇иби винаяад̣̇уггадасса барихаарааяа вуд̇д̇ам̣, д̇ат̇аа агад̇ваа г̇ахид̇зби бадиг̇г̇ахзд̇ваа барибхун̃ж̇ад̇о анаабад̇д̇иязва. бхигкусса д̣̇зд̇ийд̇и ан̃н̃асса бхигкусса д̣̇зд̇и. ган̃ж̇иганд̇и кийрарасаад̣̇им̣ яам̣ гин̃жи д̣̇равам̣ санд̇хааяа вуд̇д̇ам̣. хад̇т̇ад̇о можзд̇ваа буна г̇ан̣хаад̇и, уг̇г̇ахид̇агам̣ ход̇ийд̇и ааха ‘‘хад̇т̇ад̇о аможзнд̇знзваа’’д̇и. аалул̣знд̇аананд̇и аалол̣знд̇аанам̣, аяамзва ваа баато. аахарид̇ваа бхуумияам̣ табид̇ад̇д̇аа абхихааро над̇т̇ийд̇и ааха ‘‘бад̇д̇о бадиг̇г̇ахзд̇аб̣б̣о’’д̇и.
106.Puñchitvā paṭiggahetvāti puñchitepi rajanacuṇṇāsaṅkāya sati paṭiggahaṇatthāya vuttaṃ, nāsati. Taṃ panāti patitarajaṃ appaṭiggahetvā upari gahitapiṇḍapātaṃ. Anāpattīti durūpaciṇṇādidoso natthi. Pubbābhogassa anurūpavasena ‘‘anupasampannassa datvā…pe… vaṭṭatī’’ti vuttaṃ. Yasmā pana taṃ ‘‘aññassa dassāmī’’ti cittuppādamattena parasantakaṃ na hoti, tasmā tassa adatvāpi paṭiggahetvā paribhuñjituṃ vaṭṭati. ‘‘Anupasampannassa dassāmī’’tiādipi vinayadukkaṭassa parihārāya vuttaṃ, tathā akatvā gahitepi paṭiggahetvā paribhuñjato anāpattiyeva. Bhikkhussa detīti aññassa bhikkhussa deti. Kañjikanti khīrarasādiṃ yaṃ kiñci dravaṃ sandhāya vuttaṃ. Hatthato mocetvā puna gaṇhāti, uggahitakaṃ hotīti āha ‘‘hatthato amocentenevā’’ti. Āluḷentānanti āloḷentānaṃ, ayameva vā pāṭho. Āharitvā bhūmiyaṃ ṭhapitattā abhihāro natthīti āha ‘‘patto paṭiggahetabbo’’ti.
107. батамад̇арам̣ ул̣ун̇гад̇о т̇зваа бад̇д̇з бад̇анд̇ийд̇и зд̇т̇а ‘‘яат̇аа батамад̇арам̣ бад̇ид̇ат̇звз д̣̇осо над̇т̇и, д̇ат̇аа аагирид̇ваа абанзнд̇аанам̣ бажчаа бад̇ид̇ат̇звзби абхихадад̇д̇аа нзвад̇т̇и д̣̇осо’’д̇и вад̣̇анд̇и. жаругзнаад̇и куд̣̇д̣̇агабхааж̇анзна. ‘‘абхихадад̇д̇аад̇и д̣̇ийяамаанагкан̣ам̣ санд̇хааяа вуд̇д̇ам̣. д̣̇ад̇ваа абанаяанагаалз бана чааригаа ваа б̣инд̣̇ууни ваа бад̇анд̇и, буна бадиг̇г̇ахзд̇аб̣б̣ам̣ абхихаарасса виг̇ад̇ад̇д̇аа’’д̇и вад̣̇анд̇и, д̇ам̣ яат̇аа на бад̇ад̇и, д̇ат̇аа абанзссаамийд̇и бадихаранд̇з яуж̇ж̇ад̇и, багад̇исан̃н̃ааяа абанзнд̇з абхихааро на чиж̇ж̇ад̇и, субад̇ид̇ам̣. бадиг̇г̇ахид̇амзва хи д̇ам̣ ход̇и. мукаваддияааби г̇ахзд̇ум̣ ваддад̇ийд̇и абхихарияамаанасса бад̇д̇асса мукаваддияаа убарибхааг̇з хад̇т̇ам̣ басаарзд̇ваа пусид̇ум̣ ваддад̇и. баад̣̇зна бзллзд̇ваад̇и баад̣̇зна ‘‘бадиг̇г̇ахзссаамий’’д̇и сан̃н̃ааяа аггамид̇ваа. гзжийд̇и абхаяаг̇ириваасино. важанамад̇д̇амзваад̇и бадиб̣ад̣̇д̇хам̣ бадиб̣ад̣̇д̇хабадиб̣ад̣̇д̇ханд̇и сад̣̇д̣̇амад̇д̇амзва наанам̣, гааяабадиб̣ад̣̇д̇хамзва ход̇и, д̇асмаа д̇зсам̣ важанам̣ на г̇ахзд̇аб̣б̣анд̇и ад̇хиббааяо. зса наяод̇и ‘‘бадиб̣ад̣̇д̇хабадиб̣ад̣̇д̇хамби гааяабадиб̣ад̣̇д̇хамзваа’’д̇и аяам̣ наяо. д̇ат̇аа жа д̇ад̇т̇а гааяабадиб̣ад̣̇д̇хз д̇аббадиб̣ад̣̇д̇хз жа т̇уллажжаяамзва вуд̇д̇ам̣.
107.Paṭhamataraṃ uḷuṅkato thevā patte patantīti ettha ‘‘yathā paṭhamataraṃ patitatheve doso natthi, tathā ākiritvā apanentānaṃ pacchā patitathevepi abhihaṭattā nevatthi doso’’ti vadanti. Carukenāti khuddakabhājanena. ‘‘Abhihaṭattāti dīyamānakkhaṇaṃ sandhāya vuttaṃ. Datvā apanayanakāle pana chārikā vā bindūni vā patanti, puna paṭiggahetabbaṃ abhihārassa vigatattā’’ti vadanti, taṃ yathā na patati, tathā apanessāmīti paṭiharante yujjati, pakatisaññāya apanente abhihāro na chijjati, supatitaṃ. Paṭiggahitameva hi taṃ hoti. Mukhavaṭṭiyāpi gahetuṃ vaṭṭatīti abhihariyamānassa pattassa mukhavaṭṭiyā uparibhāge hatthaṃ pasāretvā phusituṃ vaṭṭati. Pādena pelletvāti pādena ‘‘paṭiggahessāmī’’ti saññāya akkamitvā. Kecīti abhayagirivāsino. Vacanamattamevāti paṭibaddhaṃ paṭibaddhapaṭibaddhanti saddamattameva nānaṃ, kāyapaṭibaddhameva hoti, tasmā tesaṃ vacanaṃ na gahetabbanti adhippāyo. Esa nayoti ‘‘paṭibaddhapaṭibaddhampi kāyapaṭibaddhamevā’’ti ayaṃ nayo. Tathā ca tattha kāyapaṭibaddhe tappaṭibaddhe ca thullaccayameva vuttaṃ.
д̇зна аахараабзд̇унд̇и яасса бхигкуно санд̇игам̣ г̇ад̇ам̣, д̇ам̣ ‘‘ид̇ха нам̣ аанзхий’’д̇и аан̣аабзд̇ваа д̇зна аахараабзд̇ум̣ ид̇арасса ваддад̇ийд̇и ад̇т̇о. д̇асмаад̇и яасмаа мууладтассзва барибхог̇о анун̃н̃аад̇о, д̇асмаа. д̇ам̣ д̣̇ивасам̣ хад̇т̇зна г̇ахзд̇ваа д̣̇уд̇ияад̣̇ивасз бадиг̇г̇ахзд̇ваа барибхун̃ж̇анд̇асса уг̇г̇ахид̇агабадиг̇г̇ахид̇ам̣ ход̇ийд̇и ааха ‘‘анаамасид̇ваа’’д̇и. аббадиг̇г̇ахид̇ад̇д̇аа ‘‘саннид̇хибажжаяаа анаабад̇д̇ий’’д̇и вуд̇д̇ам̣. аббадиг̇г̇ахзд̇ваа барибхун̃ж̇анд̇асса ад̣̇иннамукад̣̇ваараабад̇д̇и ход̇ийд̇и ааха ‘‘бадиг̇г̇ахзд̇ваа бана барибхун̃ж̇ид̇аб̣б̣а’’нд̇и. ‘‘на д̇ад̇о баранд̇и д̇ад̣̇ахзва саамам̣ аббадиг̇г̇ахид̇ам̣ санд̇хааяа вуд̇д̇ам̣, д̇ад̣̇ахзва бадиг̇г̇ахид̇ам̣ бана бунад̣̇ивасаад̣̇ийсу аббадиг̇г̇ахзд̇вааби барибхун̃ж̇ид̇ум̣ ваддад̇ий’’д̇и вад̣̇анд̇и.
Tena āharāpetunti yassa bhikkhuno santikaṃ gataṃ, taṃ ‘‘idha naṃ ānehī’’ti āṇāpetvā tena āharāpetuṃ itarassa vaṭṭatīti attho. Tasmāti yasmā mūlaṭṭhasseva paribhogo anuññāto, tasmā. Taṃ divasaṃ hatthena gahetvā dutiyadivase paṭiggahetvā paribhuñjantassa uggahitakapaṭiggahitaṃ hotīti āha ‘‘anāmasitvā’’ti. Appaṭiggahitattā ‘‘sannidhipaccayā anāpattī’’ti vuttaṃ. Appaṭiggahetvā paribhuñjantassa adinnamukhadvārāpatti hotīti āha ‘‘paṭiggahetvā pana paribhuñjitabba’’nti. ‘‘Na tato paranti tadaheva sāmaṃ appaṭiggahitaṃ sandhāya vuttaṃ, tadaheva paṭiggahitaṃ pana punadivasādīsu appaṭiggahetvāpi paribhuñjituṃ vaṭṭatī’’ti vadanti.
108. кийяанд̇ийд̇и каяам̣ г̇ажчанд̇и, д̇зсам̣ жун̣н̣зхи т̇уллажжаяааббадиг̇г̇ахан̣аабад̇д̇ияо на хонд̇ийд̇и ад̇хиббааяо. сад̇т̇агзнаад̇и бадиг̇г̇ахид̇асад̇т̇агзна. навасамудтид̇анд̇и зд̇знзва ужчуаад̣̇ийсу абхинавалаг̇г̇ад̇д̇аа аб̣б̣охааригам̣ на ход̇ийд̇и д̣̇ассзд̇и. зсзва наяод̇и саннид̇хид̣̇осаад̣̇им̣ санд̇хааяа вад̣̇ад̇и. д̇знааха ‘‘на хий’’д̇иаад̣̇и. гасмаа банзд̇т̇а уг̇г̇ахид̇абажжаяаа, саннид̇хибажжаяаа ваа д̣̇осо на сияаад̇и ааха ‘‘на хи д̇ам̣ барибхог̇ад̇т̇ааяа барихаранд̇ий’’д̇и. иминаа жа б̣аахирабарибхог̇ад̇т̇ам̣ саамам̣ г̇ахзд̇ваа ваа анубасамбаннзна д̣̇иннам̣ ваа барихарид̇ум̣ ваддад̇ийд̇и д̣̇ийбзд̇и, д̇асмаа бад̇д̇асаммагканаад̣̇иад̇т̇ам̣ саамам̣ г̇ахзд̇ваа барихарид̇ад̇злаад̣̇им̣ сажз барибхун̃ж̇ид̇угаамо ход̇и, бадиг̇г̇ахзд̇ваа барибхун̃ж̇анд̇асса анаабад̇д̇и. аб̣бханд̇арабарибхог̇ад̇т̇ам̣ бана саамам̣ г̇ахид̇ам̣ бадиг̇г̇ахзд̇ваа барибхун̃ж̇анд̇асса уг̇г̇ахид̇абадиг̇г̇ахан̣ам̣ ход̇и, аббадиг̇г̇ахзд̇ваа барибхун̃ж̇анд̇асса ад̣̇иннамукад̣̇ваараабад̇д̇и ход̇и. аб̣бханд̇арабарибхог̇ад̇т̇амзва анубасамбаннзна д̣̇иннам̣ г̇ахзд̇ваа барихаранд̇асса син̇г̇ийлон̣агаббо вияа саннид̇хибажжаяаа аабад̇д̇и ход̇и. гзжи бана ‘‘т̇аамамаж̇жхимасса бурисасса ужжааран̣амад̇д̇ам̣ ход̇ийд̇иаад̣̇инаа вуд̇д̇абан̃жан̇г̇асамбад̇д̇ияаа бадиг̇г̇ахан̣асса рухан̣ад̇о б̣аахирабарибхог̇ад̇т̇амби сажз анубасамбаннзхи д̣̇иннам̣ г̇ан̣хаад̇и, бадиг̇г̇ахид̇амзваа’’д̇и вад̣̇анд̇и. звам̣ сад̇и ид̇ха б̣аахирабарибхог̇ад̇т̇ам̣ анубасамбаннзна д̣̇иннам̣ г̇ахзд̇ваа барихаранд̇асса саннид̇хибажжаяаа аабад̇д̇и вад̇д̇аб̣б̣аа сияаа. ‘‘на хи д̇ам̣ барибхог̇ад̇т̇ааяа барихаранд̇ий’’д̇и жа на вад̇д̇аб̣б̣ам̣, д̇асмаа б̣аахирабарибхог̇ад̇т̇ам̣ г̇ахид̇ам̣ бадиг̇г̇ахид̇ам̣ наама на ход̇ийд̇и взд̣̇ид̇аб̣б̣ам̣.
108.Khīyantīti khayaṃ gacchanti, tesaṃ cuṇṇehi thullaccayaappaṭiggahaṇāpattiyo na hontīti adhippāyo. Satthakenāti paṭiggahitasatthakena. Navasamuṭṭhitanti eteneva ucchuādīsu abhinavalaggattā abbohārikaṃ na hotīti dasseti. Eseva nayoti sannidhidosādiṃ sandhāya vadati. Tenāha ‘‘na hī’’tiādi. Kasmā panettha uggahitapaccayā, sannidhipaccayā vā doso na siyāti āha ‘‘na hi taṃ paribhogatthāya pariharantī’’ti. Iminā ca bāhiraparibhogatthaṃ sāmaṃ gahetvā vā anupasampannena dinnaṃ vā pariharituṃ vaṭṭatīti dīpeti, tasmā pattasammakkhanādiatthaṃ sāmaṃ gahetvā pariharitatelādiṃ sace paribhuñjitukāmo hoti, paṭiggahetvā paribhuñjantassa anāpatti. Abbhantaraparibhogatthaṃ pana sāmaṃ gahitaṃ paṭiggahetvā paribhuñjantassa uggahitapaṭiggahaṇaṃ hoti, appaṭiggahetvā paribhuñjantassa adinnamukhadvārāpatti hoti. Abbhantaraparibhogatthameva anupasampannena dinnaṃ gahetvā pariharantassa siṅgīloṇakappo viya sannidhipaccayā āpatti hoti. Keci pana ‘‘thāmamajjhimassa purisassa uccāraṇamattaṃ hotītiādinā vuttapañcaṅgasampattiyā paṭiggahaṇassa ruhaṇato bāhiraparibhogatthampi sace anupasampannehi dinnaṃ gaṇhāti, paṭiggahitamevā’’ti vadanti. Evaṃ sati idha bāhiraparibhogatthaṃ anupasampannena dinnaṃ gahetvā pariharantassa sannidhipaccayā āpatti vattabbā siyā. ‘‘Na hi taṃ paribhogatthāya pariharantī’’ti ca na vattabbaṃ, tasmā bāhiraparibhogatthaṃ gahitaṃ paṭiggahitaṃ nāma na hotīti veditabbaṃ.
яад̣̇и звам̣ бан̃жасу бадиг̇г̇ахан̣ан̇г̇зсу ‘‘барибхог̇ад̇т̇ааяаа’’д̇и висзсанам̣ вад̇д̇аб̣б̣анд̇и? на вад̇д̇аб̣б̣ам̣. бадиг̇г̇ахан̣ан̃хи барибхог̇ад̇т̇амзва ход̇ийд̇и ‘‘барибхог̇ад̇т̇ааяаа’’д̇и висум̣ авад̇ваа ‘‘д̇ан̃жз бхигку гааязна ваа гааяабадиб̣ад̣̇д̇хзна ваа бадиг̇г̇ан̣хаад̇ий’’д̇и зд̇д̇агамзва вуд̇д̇ам̣. абарз бана ‘‘сад̇иби бадиг̇г̇ахан̣з ‘на хи д̇ам̣ барибхог̇ад̇т̇ааяа барихаранд̇ий’д̇и ид̇ха абарибхог̇ад̇т̇ааяа барихаран̣з анаабад̇д̇и вуд̇д̇аа’’д̇и вад̣̇анд̇и. д̇зна жа бадиг̇г̇ахан̣ан̇г̇зсу бан̃жасу самид̣̇д̇хзсу аж̇жхохарид̇угаамад̇ааяа г̇ахид̇амзва бадиг̇г̇ахид̇ам̣ наама ход̇и аж̇жхохарид̇аб̣б̣зсуязва бадиг̇г̇ахан̣асса анун̃н̃аад̇ад̇д̇аад̇и д̣̇ассзд̇и. д̇ат̇аа б̣аахирабарибхог̇ад̇т̇ааяа г̇ахзд̇ваа табид̇ад̇злаад̣̇им̣ аж̇жхохарид̇угаамад̇ааяа сад̇и бадиг̇г̇ахзд̇ваа барибхун̃ж̇ид̇ум̣ ваддад̇ийд̇и д̣̇ассзд̇и. уд̣̇угкаламусалаад̣̇ийни кийяанд̇ийд̇и зд̇т̇а уд̣̇угкаламусалаанам̣ каязна бисид̇агоддид̇абхзсаж̇ж̇зсу сажз ааг̇анд̇угаван̣н̣о бан̃н̃ааяад̇и, на ваддад̇и. суд̣̇д̇хам̣ уд̣̇агам̣ ход̇ийд̇и ругкасаакаад̣̇ийхи г̇ал̣ид̇ваа бад̇анауд̣̇агам̣ санд̇хааяа вуд̇д̇ам̣.
Yadi evaṃ pañcasu paṭiggahaṇaṅgesu ‘‘paribhogatthāyā’’ti visesanaṃ vattabbanti? Na vattabbaṃ. Paṭiggahaṇañhi paribhogatthameva hotīti ‘‘paribhogatthāyā’’ti visuṃ avatvā ‘‘tañce bhikkhu kāyena vā kāyapaṭibaddhena vā paṭiggaṇhātī’’ti ettakameva vuttaṃ. Apare pana ‘‘satipi paṭiggahaṇe ‘na hi taṃ paribhogatthāya pariharantī’ti idha aparibhogatthāya pariharaṇe anāpatti vuttā’’ti vadanti. Tena ca paṭiggahaṇaṅgesu pañcasu samiddhesu ajjhoharitukāmatāya gahitameva paṭiggahitaṃ nāma hoti ajjhoharitabbesuyeva paṭiggahaṇassa anuññātattāti dasseti. Tathā bāhiraparibhogatthāya gahetvā ṭhapitatelādiṃ ajjhoharitukāmatāya sati paṭiggahetvā paribhuñjituṃ vaṭṭatīti dasseti. Udukkhalamusalādīni khīyantīti ettha udukkhalamusalānaṃ khayena pisitakoṭṭitabhesajjesu sace āgantukavaṇṇo paññāyati, na vaṭṭati. Suddhaṃ udakaṃ hotīti rukkhasākhādīhi gaḷitvā patanaudakaṃ sandhāya vuttaṃ.
109. бад̇д̇о ваасса бадиг̇г̇ахзд̇аб̣б̣од̇и зд̇т̇ааби бад̇д̇аг̇ад̇ам̣ чубид̇ваа д̣̇знд̇асса хад̇т̇з лаг̇г̇зна аамисзна д̣̇осаабхаавад̇т̇ам̣ бад̇д̇абадиг̇г̇ахан̣анд̇и аб̣бханд̇арабарибхог̇ад̇т̇амзва бад̇д̇абадиг̇г̇ахан̣ам̣ взд̣̇ид̇аб̣б̣ам̣. яам̣ сааман̣зрасса бад̇д̇з бад̇ад̇и…бз… бадиг̇г̇ахан̣ам̣ на виж̇ахад̇ийд̇и зд̇т̇а бунаббунам̣ г̇ан̣ханд̇асса ад̇д̇ано бад̇д̇з багкид̇д̇амзва ад̇д̇ано санд̇аганд̇и саннидтаанагаран̣ад̇о хад̇т̇аг̇ад̇ам̣ бадиг̇г̇ахан̣ам̣ на виж̇ахад̇и. барижчинд̣̇ид̇ваа д̣̇иннам̣ бана г̇ан̣ханд̇асса г̇ахан̣асамаязязва ад̇д̇ано санд̇аганд̇и саннидтаанасса гад̇ад̇д̇аа хад̇т̇аг̇ад̇ам̣ бадиг̇г̇ахан̣ам̣ виж̇ахад̇и. гзсан̃жи ад̇т̇ааяа бхад̇д̇ам̣ багкибад̇ийд̇и зд̇т̇а анубасамбаннасса ад̇т̇ааяа багкибанд̇зби ааг̇анд̇ваа г̇ан̣хиссад̇ийд̇и саяамзва багкибид̇ваа табанад̇о бадиг̇г̇ахан̣ам̣ на виж̇ахад̇и. анубасамбаннасса хад̇т̇з багкид̇д̇ам̣ бана анубасамбаннзнзва табид̇ам̣ наама ход̇ийд̇и бадиг̇г̇ахан̣ам̣ виж̇ахад̇и барижжад̇д̇абхаавад̇о. д̇зна вуд̇д̇ам̣ ‘‘сааман̣зра…бз… барижжад̇д̇ад̇д̇аа’’д̇и. гзсан̃жийд̇иаад̣̇ийсу анубасамбаннаанам̣ ад̇т̇ааяа гад̇т̇ажи табияамаанамби хад̇т̇ад̇о муд̇д̇амад̇д̇з зва бадиг̇г̇ахан̣ам̣ на виж̇ахад̇и, ат̇а ко бхааж̇анз бад̇ид̇амзва бадиг̇г̇ахан̣ам̣ виж̇ахад̇и. бхааж̇анан̃жа бхигкунаа бунад̣̇ивасад̇т̇ааяа абзгкид̇амзваад̇и д̇аг̇г̇ад̇амби аамисам̣ д̣̇уд̣̇д̇ход̇абад̇д̇аг̇ад̇ам̣ вияа бадиг̇г̇ахан̣ам̣ виж̇ахад̇ийд̇и сан̇гааяа ‘‘сааман̣зрасса хад̇т̇з багкибид̇аб̣б̣а’’нд̇и вуд̇д̇анд̇и взд̣̇ид̇аб̣б̣ам̣. ийд̣̇исзсу хи яуд̇д̇и на г̇авзсид̇аб̣б̣аа, вуд̇д̇анаязнзва бадибаж̇ж̇ид̇аб̣б̣ам̣.
109.Patto vāssa paṭiggahetabboti etthāpi pattagataṃ chupitvā dentassa hatthe laggena āmisena dosābhāvatthaṃ pattapaṭiggahaṇanti abbhantaraparibhogatthameva pattapaṭiggahaṇaṃ veditabbaṃ. Yaṃ sāmaṇerassa patte patati…pe… paṭiggahaṇaṃ na vijahatīti ettha punappunaṃ gaṇhantassa attano patte pakkhittameva attano santakanti sanniṭṭhānakaraṇato hatthagataṃ paṭiggahaṇaṃ na vijahati. Paricchinditvā dinnaṃ pana gaṇhantassa gahaṇasamayeyeva attano santakanti sanniṭṭhānassa katattā hatthagataṃ paṭiggahaṇaṃ vijahati. Kesañci atthāya bhattaṃ pakkhipatīti ettha anupasampannassa atthāya pakkhipantepi āgantvā gaṇhissatīti sayameva pakkhipitvā ṭhapanato paṭiggahaṇaṃ na vijahati. Anupasampannassa hatthe pakkhittaṃ pana anupasampanneneva ṭhapitaṃ nāma hotīti paṭiggahaṇaṃ vijahati pariccattabhāvato. Tena vuttaṃ ‘‘sāmaṇera…pe… pariccattattā’’ti. Kesañcītiādīsu anupasampannānaṃ atthāya katthaci ṭhapiyamānampi hatthato muttamatte eva paṭiggahaṇaṃ na vijahati, atha kho bhājane patitameva paṭiggahaṇaṃ vijahati. Bhājanañca bhikkhunā punadivasatthāya apekkhitamevāti taggatampi āmisaṃ duddhotapattagataṃ viya paṭiggahaṇaṃ vijahatīti saṅkāya ‘‘sāmaṇerassa hatthe pakkhipitabba’’nti vuttanti veditabbaṃ. Īdisesu hi yutti na gavesitabbā, vuttanayeneva paṭipajjitabbaṃ.
110. бад̇д̇аг̇ад̇аа яааг̇ууд̇и иминаа бад̇д̇амукаваддияаа пудтзби гудз яааг̇у бадиг̇г̇ахид̇аа, уг̇г̇ахид̇аа ваа на ход̇и бхигкуно анижчааяа пудтад̇д̇аад̇и д̣̇ассзд̇и. ааробзд̇ийд̇и хад̇т̇ам̣ пусаабзд̇и. бадиг̇г̇ахан̣уубаг̇ам̣ бхаарам̣ наама т̇аамамаж̇жхимасса бурисасса угкзбаарахам̣. гин̃жааби ависсаж̇ж̇зд̇ваава ан̃н̃зна хад̇т̇зна бид̣̇аханд̇асса д̣̇осо над̇т̇и, д̇ат̇ааби на бид̣̇ахид̇аб̣б̣анд̇и адтагат̇аабамаан̣знзва г̇ахзд̇аб̣б̣ам̣. вимад̇ивинод̣̇анияам̣ (ви. ви. дий. баажид̇д̇ияа 2.265) бана ‘‘на бид̣̇ахид̇аб̣б̣анд̇и хад̇т̇ад̇о муд̇д̇ам̣ санд̇хааяа вуд̇д̇ам̣, хад̇т̇аг̇ад̇ам̣ бана ид̇арзна хад̇т̇зна бид̣̇ахад̇о, хад̇т̇ад̇о муд̇д̇амби ваа апусид̇ваа убари бид̇хаанам̣ баад̇знд̇асса на д̣̇осо’’д̇и вуд̇д̇ам̣.
110.Pattagatā yāgūti iminā pattamukhavaṭṭiyā phuṭṭhepi kuṭe yāgu paṭiggahitā, uggahitā vā na hoti bhikkhuno anicchāya phuṭṭhattāti dasseti. Āropetīti hatthaṃ phusāpeti. Paṭiggahaṇūpagaṃ bhāraṃ nāma thāmamajjhimassa purisassa ukkhepārahaṃ. Kiñcāpi avissajjetvāva aññena hatthena pidahantassa doso natthi, tathāpi na pidahitabbanti aṭṭhakathāpamāṇeneva gahetabbaṃ. Vimativinodaniyaṃ (vi. vi. ṭī. pācittiya 2.265) pana ‘‘napidahitabbanti hatthato muttaṃ sandhāya vuttaṃ, hatthagataṃ pana itarena hatthena pidahato, hatthato muttampi vā aphusitvā upari pidhānaṃ pātentassa na doso’’ti vuttaṃ.
111. бадиг̇г̇ан̣хаад̇ийд̇и чааяад̇т̇ааяа убари д̇хаарияамаанаа махаасаакаа язна гзнажи чиж̇ж̇зяяа, д̇ад̇т̇а лаг̇г̇араж̇ам̣ мукз баад̇зяяа ваад̇и габбияам̣ гаараабзд̇ваа бадиг̇г̇ан̣хаад̇и.
111.Paṭiggaṇhātīti chāyatthāya upari dhāriyamānā mahāsākhā yena kenaci chijjeyya, tattha laggarajaṃ mukhe pāteyya vāti kappiyaṃ kārāpetvā paṭiggaṇhāti.
мажчигавааран̣ад̇т̇анд̇и зд̇т̇а ‘‘сажзби саакааяа лаг̇г̇араж̇ам̣ бад̇д̇з бад̇ад̇и, сукзна барибхун̃ж̇ид̇ум̣ саггаад̇и саакааяа бадиг̇г̇ахид̇ад̇д̇аа аб̣бханд̇арабарибхог̇ад̇т̇амзвид̇ха бадиг̇г̇ахан̣анд̇и муулабадиг̇г̇ахан̣амзва ваддад̇ий’’д̇и вуд̇д̇ам̣. абарз бана ‘‘мажчигавааран̣ад̇т̇анд̇и важанамад̇д̇ам̣ г̇ахзд̇ваа б̣аахирабарибхог̇ад̇т̇ам̣ г̇ахид̇а’’нд̇и вад̣̇анд̇и. гун̣д̣агзд̇и махаагхадз. д̇асмимбийд̇и жаадигхадзби. анубасамбаннам̣ г̇аахаабзд̇ваад̇и д̇амзва аж̇жхохаран̣ийяам̣ бхан̣д̣ам̣ анубасамбаннзна г̇аахаабзд̇ваа.
Macchikavāraṇatthanti ettha ‘‘sacepi sākhāya laggarajaṃ patte patati, sukhena paribhuñjituṃ sakkāti sākhāya paṭiggahitattā abbhantaraparibhogatthamevidha paṭiggahaṇanti mūlapaṭiggahaṇameva vaṭṭatī’’ti vuttaṃ. Apare pana ‘‘macchikavāraṇatthanti vacanamattaṃ gahetvā bāhiraparibhogatthaṃ gahita’’nti vadanti. Kuṇḍaketi mahāghaṭe. Tasmimpīti cāṭighaṭepi. Anupasampannaṃ gāhāpetvāti tameva ajjhoharaṇīyaṃ bhaṇḍaṃ anupasampannena gāhāpetvā.
т̇зрасса бад̇д̇ам̣ д̣̇уд̇ияад̇т̇зрассаад̇и ‘‘т̇зрасса бад̇д̇ам̣ маяхам̣ д̣̇зт̇аа’’д̇и д̇зна ад̇д̇ано барижжаж̇аабзд̇ваа д̣̇уд̇ияад̇т̇зрасса д̣̇зд̇и. д̇уяхам̣ яааг̇ум̣ маяхам̣ д̣̇зхийд̇и зд̇т̇а звам̣ вад̇ваа сааман̣зрасса бад̇д̇ам̣ г̇ахзд̇ваа ад̇д̇аноби бад̇д̇ам̣ д̇асса д̣̇зд̇и. зд̇т̇а банаад̇и ‘‘бан̣д̣ид̇о сааман̣зро’’д̇иаад̣̇ибад̇д̇абаривад̇д̇анагат̇ааяам̣. гааран̣ам̣ убабаригкид̇аб̣б̣анд̇и яат̇аа маад̇уаад̣̇ийнам̣ д̇злаад̣̇ийни харанд̇о д̇ат̇ааруубз гижжз анубасамбаннзна абаривад̇д̇зд̇ваава барибхун̃ж̇ид̇ум̣ лабхад̇и, звамид̇ха бад̇д̇абаривад̇д̇анам̣ агад̇ваа барибхун̃ж̇ид̇ум̣ гасмаа на лабхад̇ийд̇и гааран̣ам̣ виймам̣сид̇аб̣б̣анд̇и ад̇т̇о. зд̇т̇а бана ‘‘сааман̣зрзхи г̇ахид̇ад̇ан̣д̣улзсу баригкийн̣зсу авассам̣ амхаагам̣ сааман̣зраа сан̇г̇ахам̣ гаронд̇ийд̇и жид̇д̇уббад̇д̇и самбхавад̇и, д̇асмаа д̇ам̣ баривад̇д̇зд̇ваава барибхун̃ж̇ид̇аб̣б̣ам̣. маад̇аабид̇уунам̣ ад̇т̇ааяа бана чааяад̇т̇ааяа ваа г̇ахан̣з барибхог̇аасаа над̇т̇и, д̇асмаа д̇ам̣ ваддад̇ий’’д̇и гааран̣ам̣ вад̣̇анд̇и. д̇знзва аажарияаб̣уд̣̇д̇хад̣̇ад̇д̇ад̇т̇зрзнаби вуд̇д̇ам̣ –
Therassa pattaṃ dutiyattherassāti ‘‘therassa pattaṃ mayhaṃ dethā’’ti tena attano pariccajāpetvā dutiyattherassa deti. Tuyhaṃ yāguṃ mayhaṃ dehīti ettha evaṃ vatvā sāmaṇerassa pattaṃ gahetvā attanopi pattaṃ tassa deti. Ettha panāti ‘‘paṇḍito sāmaṇero’’tiādipattaparivattanakathāyaṃ. Kāraṇaṃ upaparikkhitabbanti yathā mātuādīnaṃ telādīni haranto tathārūpe kicce anupasampannena aparivattetvāva paribhuñjituṃ labhati, evamidha pattaparivattanaṃ akatvā paribhuñjituṃ kasmā na labhatīti kāraṇaṃ vīmaṃsitabbanti attho. Ettha pana ‘‘sāmaṇerehi gahitataṇḍulesu parikkhīṇesu avassaṃ amhākaṃ sāmaṇerā saṅgahaṃ karontīti cittuppatti sambhavati, tasmā taṃ parivattetvāva paribhuñjitabbaṃ. Mātāpitūnaṃ atthāya pana chāyatthāya vā gahaṇe paribhogāsā natthi, tasmā taṃ vaṭṭatī’’ti kāraṇaṃ vadanti. Teneva ācariyabuddhadattattherenapi vuttaṃ –
‘‘маад̇аабид̇уунамад̇т̇ааяа, д̇злаад̣̇им̣ харад̇оби жа;
‘‘Mātāpitūnamatthāya, telādiṃ haratopi ca;
саакам̣ чааяаад̣̇иад̇т̇ааяа, имасса на висзсад̇аа.
Sākhaṃ chāyādiatthāya, imassa na visesatā.
‘‘д̇асмаа хисса висзсасса, жинд̇зд̇аб̣б̣ам̣ д̇у гааран̣ам̣;
‘‘Tasmā hissa visesassa, cintetabbaṃ tu kāraṇaṃ;
д̇асса саалаяабхаавам̣ д̇у, висзсам̣ д̇аггаяаамаха’’нд̇и.
Tassa sālayabhāvaṃ tu, visesaṃ takkayāmaha’’nti.
ид̣̇амзвзд̇т̇а яуд̇д̇ад̇арам̣ авассам̣ д̇ат̇аавид̇хавид̇аггуббад̇д̇ияаа самбхавад̇о. на хи саггаа зд̇т̇а вид̇аггам̣ сод̇хзд̇унд̇и. маад̇аад̣̇ийнам̣ ад̇т̇ааяа харан̣з бана наавассам̣ д̇ат̇аавид̇хавид̇аггуббад̇д̇ийд̇и саггаа вид̇аггам̣ сод̇хзд̇ум̣. яад̇т̇а хи вид̇аггам̣ сод̇хзд̇ум̣ саггаа, д̇ад̇т̇а нзвад̇т̇и д̣̇осо. д̇знзва вагкад̇и ‘‘сажз бана саггод̇и вид̇аггам̣ сод̇хзд̇ум̣, д̇ад̇о лад̣̇д̇хам̣ каад̣̇ид̇умби ваддад̇ий’’д̇и. вимад̇ивинод̣̇анияам̣ (ви. ви. дий. баажид̇д̇ияа 2.265) бана ‘‘зд̇т̇а банаад̇и бад̇д̇абаривад̇д̇анз. гааран̣анд̇и зд̇т̇а яат̇аа сааман̣зраа ид̇о амхаагамби д̣̇знд̇ийд̇и вид̇агго уббаж̇ж̇ад̇и, на д̇ат̇аа ан̃н̃ад̇т̇аад̇и гааран̣ам̣ вад̣̇анд̇и, д̇ан̃жа яуд̇д̇ам̣. яасса бана д̇аад̣̇исо вид̇агго над̇т̇и, д̇зна абаривад̇д̇зд̇вааби бхун̃ж̇ид̇ум̣ ваддад̇ий’’д̇и вуд̇д̇ам̣.
Idamevettha yuttataraṃ avassaṃ tathāvidhavitakkuppattiyā sambhavato. Na hi sakkā ettha vitakkaṃ sodhetunti. Mātādīnaṃ atthāya haraṇe pana nāvassaṃ tathāvidhavitakkuppattīti sakkā vitakkaṃ sodhetuṃ. Yattha hi vitakkaṃ sodhetuṃ sakkā, tattha nevatthi doso. Teneva vakkhati ‘‘sace pana sakkoti vitakkaṃ sodhetuṃ, tato laddhaṃ khāditumpi vaṭṭatī’’ti. Vimativinodaniyaṃ (vi. vi. ṭī. pācittiya 2.265) pana ‘‘ettha panāti pattaparivattane. Kāraṇanti ettha yathā sāmaṇerā ito amhākampi dentīti vitakko uppajjati, na tathā aññatthāti kāraṇaṃ vadanti, tañca yuttaṃ. Yassa pana tādiso vitakko natthi, tena aparivattetvāpi bhuñjituṃ vaṭṭatī’’ti vuttaṃ.
112. нижжаалзд̇унд̇и жаалзд̇ваа баасаан̣асагкараад̣̇иабанаяанам̣ гаад̇ум̣. уд̣̇д̇ханам̣ ааробзд̇аб̣б̣анд̇и анаг̇г̇игам̣ уд̣̇д̇ханам̣ санд̇хааяа вуд̇д̇ам̣. уд̣̇д̇ханз бажжамаанасса аалул̣анз убари абаггад̇ан̣д̣улаа хздтаа бависид̇ваа бажжанд̇ийд̇и ааха ‘‘саамам̣бааган̃жзва ход̇ий’’д̇и.
112.Niccāletunti cāletvā pāsāṇasakkharādiapanayanaṃ kātuṃ. Uddhanaṃ āropetabbanti anaggikaṃ uddhanaṃ sandhāya vuttaṃ. Uddhane paccamānassa āluḷane upari apakkataṇḍulā heṭṭhā pavisitvā paccantīti āha ‘‘sāmaṃpākañceva hotī’’ti.
113. аад̇хаарагз бад̇д̇о табид̇од̇и аббадиг̇г̇ахид̇аамисо бад̇д̇о буна бадиг̇г̇ахан̣ад̇т̇ааяа табид̇о. жаалзд̇ийд̇и винаа гааран̣ам̣ жаалзд̇и, сад̇иби гааран̣з бхигкуунам̣ барибхог̇аарахам̣ жаалзд̇ум̣ на ваддад̇и. гин̃жааби ‘‘ануж̇аанаами, бхигкавз, амануссигааб̣аад̇хз аамагамам̣сам̣ аамагалохид̇а’’нд̇и (махаава. 264) д̇аад̣̇исз ааб̣аад̇хз ад̇д̇ано ад̇т̇ааяа аамагамам̣сабадиг̇г̇ахан̣ам̣ анун̃н̃аад̇ам̣, ‘‘аамагамам̣сабадиг̇г̇ахан̣аа бадивирад̇о ход̇ий’’д̇и (д̣̇ий. ни. 1.10, 194) жа сааман̃н̃ад̇о бадигкид̇д̇ам̣, д̇ат̇ааби ад̇д̇ано, ан̃н̃асса ваа бхигкуно ад̇т̇ааяа аг̇г̇ахид̇ад̇д̇аа ‘‘сийхавигхаасаад̣̇им̣…бз… ваддад̇ий’’д̇и вуд̇д̇ам̣. саггод̇и вид̇аггам̣ сод̇хзд̇унд̇и ‘‘маяхамби д̣̇зд̇ий’’д̇и вид̇аггасса ануббаннабхаавам̣ саллагкзд̇ум̣ саггод̇и , ‘‘сааман̣зрасса д̣̇ассаамий’’д̇и суд̣̇д̇хажид̇д̇зна маяаа г̇ахид̇анд̇и ваа саллагкзд̇ум̣ саггод̇и. сажз бана муулзби бадиг̇г̇ахид̇ам̣ ход̇ийд̇и зд̇т̇а ‘‘г̇ахзд̇ваа г̇ад̇з маяхамби д̣̇ад̣̇зяяунд̇и сан̃н̃ааяа сажз бадиг̇г̇ахид̇ам̣ ход̇ий’’д̇и вад̣̇анд̇и.
113.Ādhārake patto ṭhapitoti appaṭiggahitāmiso patto puna paṭiggahaṇatthāya ṭhapito. Cāletīti vinā kāraṇaṃ cāleti, satipi kāraṇe bhikkhūnaṃ paribhogārahaṃ cāletuṃ na vaṭṭati. Kiñcāpi ‘‘anujānāmi, bhikkhave, amanussikābādhe āmakamaṃsaṃ āmakalohita’’nti (mahāva. 264) tādise ābādhe attano atthāya āmakamaṃsapaṭiggahaṇaṃ anuññātaṃ, ‘‘āmakamaṃsapaṭiggahaṇā paṭivirato hotī’’ti (dī. ni. 1.10, 194) ca sāmaññato paṭikkhittaṃ, tathāpi attano, aññassa vā bhikkhuno atthāya aggahitattā ‘‘sīhavighāsādiṃ…pe… vaṭṭatī’’ti vuttaṃ. Sakkoti vitakkaṃ sodhetunti ‘‘mayhampi detī’’ti vitakkassa anuppannabhāvaṃ sallakkhetuṃ sakkoti , ‘‘sāmaṇerassa dassāmī’’ti suddhacittena mayā gahitanti vā sallakkhetuṃ sakkoti. Sace pana mūlepi paṭiggahitaṃ hotīti ettha ‘‘gahetvā gate mayhampi dadeyyunti saññāya sace paṭiggahitaṃ hotī’’ti vadanti.
114. годтаасз гарод̇ийд̇и ‘‘бхигкуу сааман̣зраа жа ад̇д̇ано ад̇д̇ано абхиружид̇ам̣ годтаасам̣ г̇ан̣ханд̇уу’’д̇и саб̣б̣зсам̣ самагз годтаасз гарод̇и. г̇ахид̇аавасзсанд̇и сааман̣зрзхи г̇ахид̇агодтаасад̇о авасзсам̣. г̇ан̣хид̇ваад̇и ‘‘маяхам̣ ид̣̇ам̣ г̇ан̣хиссаамий’’д̇и г̇ахзд̇ваа. ид̇ха г̇ахид̇аавасзсам̣ наама д̇зна г̇ан̣хид̇ваа буна табид̇ам̣.
114.Koṭṭhāse karotīti ‘‘bhikkhū sāmaṇerā ca attano attano abhirucitaṃ koṭṭhāsaṃ gaṇhantū’’ti sabbesaṃ samake koṭṭhāse karoti. Gahitāvasesanti sāmaṇerehi gahitakoṭṭhāsato avasesaṃ. Gaṇhitvāti ‘‘mayhaṃ idaṃ gaṇhissāmī’’ti gahetvā. Idha gahitāvasesaṃ nāma tena gaṇhitvā puna ṭhapitaṃ.
бадиг̇г̇ахзд̇ваад̇и д̇ад̣̇аху бадиг̇г̇ахзд̇ваа. д̇знзва ‘‘яаавагаалигзна яааваж̇ийвигасам̣саг̇г̇з д̣̇осо над̇т̇ий’’д̇и вуд̇д̇ам̣. сажз бана буримад̣̇ивасз бадиг̇г̇ахзд̇ваа табид̇аа ход̇и, саамисзна мукзна д̇ассаа ваддияаа д̇хуумам̣ бивид̇ум̣ на ваддад̇и. самуд̣̇д̣̇од̣̇агзнаад̇и аббадиг̇г̇ахид̇асамуд̣̇д̣̇од̣̇агзна.
Paṭiggahetvāti tadahu paṭiggahetvā. Teneva ‘‘yāvakālikena yāvajīvikasaṃsagge doso natthī’’ti vuttaṃ. Sace pana purimadivase paṭiggahetvā ṭhapitā hoti, sāmisena mukhena tassā vaṭṭiyā dhūmaṃ pivituṃ na vaṭṭati. Samuddodakenāti appaṭiggahitasamuddodakena.
химагарагаа наама гад̣̇аажи вассод̣̇агзна саха бад̇анагаа баасаан̣алзкаа вияа гханийбхууд̇аа уд̣̇агависзсаа, д̇зсу бадиг̇г̇ахан̣агижжам̣ над̇т̇и. д̇знааха ‘‘уд̣̇агаг̇ад̇игаа зваа’’д̇и. яасмаа гад̇агадти уд̣̇агам̣ басаад̣̇зд̇ваа висум̣ д̇идтад̇и, д̇асмаа ‘‘аб̣б̣охаарига’’нд̇и вуд̇д̇ам̣. иминаа аббадиг̇г̇ахид̇аабад̇д̇ийхи аб̣б̣охааригам̣, вигаалабхож̇анаабад̇д̇ийхиби аб̣б̣охаариганд̇и д̣̇ассзд̇и. лаг̇г̇ад̇ийд̇и сугкз мукз жа хад̇т̇з жа мад̇д̇игааван̣н̣ам̣ д̣̇ассзнд̇ам̣ лаг̇г̇ад̇и. б̣ахаланд̇и хад̇т̇амукзсу алаг̇г̇анагамби бадиг̇г̇ахзд̇аб̣б̣ам̣.
Himakarakā nāma kadāci vassodakena saha patanakā pāsāṇalekhā viya ghanībhūtā udakavisesā, tesu paṭiggahaṇakiccaṃ natthi. Tenāha ‘‘udakagatikā evā’’ti. Yasmā katakaṭṭhi udakaṃ pasādetvā visuṃ tiṭṭhati, tasmā ‘‘abbohārika’’nti vuttaṃ. Iminā appaṭiggahitāpattīhi abbohārikaṃ, vikālabhojanāpattīhipi abbohārikanti dasseti. Laggatīti sukkhe mukhe ca hatthe ca mattikāvaṇṇaṃ dassentaṃ laggati. Bahalanti hatthamukhesu alagganakampi paṭiggahetabbaṃ.
ваасамад̇д̇анд̇и рзн̣укийраабхаавам̣ д̣̇ассзд̇и. баанийяам̣ г̇ахзд̇ваад̇и ад̇д̇аноязва ад̇т̇ааяа г̇ахзд̇ваа. сажз бана бийд̇аавасзсагам̣ д̇ад̇т̇зва аагириссаамийд̇и г̇ан̣хаад̇и, буна бадиг̇г̇ахан̣агижжам̣ над̇т̇и. аагирад̇и, бадиг̇г̇ахзд̇аб̣б̣анд̇и бубпарасасса бан̃н̃ааяанад̇о вуд̇д̇ам̣. вигкамбхзд̇ваад̇и вияуухид̇ваа, абанзд̇ваад̇и ад̇т̇о.
Vāsamattanti reṇukhīrābhāvaṃ dasseti. Pānīyaṃ gahetvāti attanoyeva atthāya gahetvā. Sace pana pītāvasesakaṃ tattheva ākirissāmīti gaṇhāti, puna paṭiggahaṇakiccaṃ natthi. Ākirati, paṭiggahetabbanti puppharasassa paññāyanato vuttaṃ. Vikkhambhetvāti viyūhitvā, apanetvāti attho.
115. махаабхууд̇зсууд̇и баан̣асарийрасанниссид̇зсу бат̇авийаад̣̇имахаабхууд̇зсу. саб̣б̣ам̣ ваддад̇ийд̇и ад̇д̇ано барзсан̃жа сарийрасанниссид̇ам̣ саб̣б̣ам̣ ваддад̇и, агаббияамам̣саануломад̇ааяа т̇уллажжаяаад̣̇им̣ на ж̇анзд̇ийд̇и ад̇хиббааяо. бад̇ад̇ийд̇и ад̇д̇ано сарийрад̇о чиж̇ж̇ид̇ваа бад̇ад̇и. ‘‘ругкад̇о чинд̣̇ид̇ваа’’д̇и вуд̇д̇ад̇д̇аа мад̇д̇игад̇т̇ааяа бат̇авим̣ кан̣ид̇ум̣, ан̃н̃амби яам̣ гин̃жи муулабан̣н̣аад̣̇ивисабхзсаж̇ж̇ам̣ чинд̣̇ид̇ваа чааригам̣ агад̇вааби аббадиг̇г̇ахид̇амби барибхун̃ж̇ид̇ум̣ ваддад̇ийд̇и д̣̇адтаб̣б̣ам̣.
115.Mahābhūtesūti pāṇasarīrasannissitesu pathavīādimahābhūtesu. Sabbaṃ vaṭṭatīti attano paresañca sarīrasannissitaṃ sabbaṃ vaṭṭati, akappiyamaṃsānulomatāya thullaccayādiṃ na janetīti adhippāyo. Patatīti attano sarīrato chijjitvā patati. ‘‘Rukkhato chinditvā’’ti vuttattā mattikatthāya pathaviṃ khaṇituṃ, aññampi yaṃ kiñci mūlapaṇṇādivisabhesajjaṃ chinditvā chārikaṃ akatvāpi appaṭiggahitampi paribhuñjituṃ vaṭṭatīti daṭṭhabbaṃ.
ид̇и винаяасан̇г̇ахасам̣ван̣н̣анаабхууд̇з винаяаалан̇гаарз
Iti vinayasaṅgahasaṃvaṇṇanābhūte vinayālaṅkāre
бадиг̇г̇ахан̣авинижчаяагат̇аалан̇гааро наама
Paṭiggahaṇavinicchayakathālaṅkāro nāma
вийсад̇имо барижчзд̣̇о.
Vīsatimo paricchedo.
