| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
20. бадиг̇г̇ахан̣авинижчаяагат̇аа
20. Paṭiggahaṇavinicchayakathā
104. каад̣̇анийяаад̣̇ибадиг̇г̇ааход̇и аж̇жхохарид̇аб̣б̣асса яасса гассажи каад̣̇анийяасса ваа бхож̇анийяасса ваа бадиг̇г̇ахан̣ам̣. д̇ад̇рааяам̣ винижчаяо – бан̃жахи ан̇г̇зхи бадиг̇г̇ахан̣ам̣ рухад̇и, т̇аамамаж̇жхимасса бурисасса ужжааран̣амад̇д̇ам̣ ход̇и, хад̇т̇абаасо бан̃н̃ааяад̇и, абхихааро бан̃н̃ааяад̇и, д̣̇зво ваа мануссо ваа д̇иражчаанаг̇ад̇о ваа гааязна гааяабадиб̣ад̣̇д̇хзна ниссаг̇г̇иязна ваа д̣̇зд̇и, д̇ан̃жз бхигку гааязна ваа гааяабадиб̣ад̣̇д̇хзна ваа бадиг̇г̇ан̣хаад̇и. звам̣ бан̃жахан̇г̇зхи бадиг̇г̇ахан̣ам̣ рухад̇и.
104.Khādanīyādipaṭiggāhoti ajjhoharitabbassa yassa kassaci khādanīyassa vā bhojanīyassa vā paṭiggahaṇaṃ. Tatrāyaṃ vinicchayo – pañcahi aṅgehi paṭiggahaṇaṃ ruhati, thāmamajjhimassa purisassa uccāraṇamattaṃ hoti, hatthapāso paññāyati, abhihāro paññāyati, devo vā manusso vā tiracchānagato vā kāyena kāyapaṭibaddhena nissaggiyena vā deti, tañce bhikkhu kāyena vā kāyapaṭibaddhena vā paṭiggaṇhāti. Evaṃ pañcahaṅgehi paṭiggahaṇaṃ ruhati.
д̇ад̇т̇а тид̇анисиннанибаннаанам̣ васзна звам̣ хад̇т̇абаасо взд̣̇ид̇аб̣б̣о – сажз бхигку нисинно ход̇и, аасанасса бажчиманд̇ад̇о бадтааяа, сажз тид̇о, бан̣хианд̇ад̇о бадтааяа, сажз нибанно, язна бассзна нибанно, д̇асса баариманд̇ад̇о бадтааяа, д̣̇ааяагасса нисиннасса ваа тид̇асса ваа нибаннасса ваа табзд̇ваа басаарид̇ахад̇т̇ам̣ яам̣ аасаннад̇арам̣ ан̇г̇ам̣, д̇асса ориманд̇зна барижчинд̣̇ид̇ваа ад̣дхад̇зяяахад̇т̇о хад̇т̇абаасо наама.
Tattha ṭhitanisinnanipannānaṃ vasena evaṃ hatthapāso veditabbo – sace bhikkhu nisinno hoti, āsanassa pacchimantato paṭṭhāya, sace ṭhito, paṇhiantato paṭṭhāya, sace nipanno, yena passena nipanno, tassa pārimantato paṭṭhāya, dāyakassa nisinnassa vā ṭhitassa vā nipannassa vā ṭhapetvā pasāritahatthaṃ yaṃ āsannataraṃ aṅgaṃ, tassa orimantena paricchinditvā aḍḍhateyyahattho hatthapāso nāma.
сажз бана д̣̇ааяагабадиг̇г̇аахагзсу зго аагаасз ход̇и, зго бхуумияам̣, бхуумадтасса жа сийсзна, аагаасадтасса жа табзд̇ваа д̣̇аад̇ум̣ ваа г̇ахзд̇ум̣ ваа басаарид̇ахад̇т̇ам̣ яам̣ аасаннад̇арам̣ ан̇г̇ам̣, д̇асса ориманд̇зна хад̇т̇абаасабамаан̣ам̣ барижчинд̣̇ид̇аб̣б̣ам̣. сажзби зго гуубз ход̇и, зго гуубад̇адз, зго ваа бана ругкз, зго бат̇авияам̣, вуд̇д̇анаязнзва хад̇т̇абаасабамаан̣ам̣ барижчинд̣̇ид̇аб̣б̣ам̣. зваруубз хад̇т̇абаасз тад̇ваа сажзби багкий мукад̇ун̣д̣агзна ваа хад̇т̇ий ваа сон̣д̣ааяа г̇ахзд̇ваа бубпам̣ ваа палам̣ ваа д̣̇зд̇и, бадиг̇г̇ахан̣ам̣ рухад̇и. сажз бана ад̣дхадтамарад̇анассаби хад̇т̇ино канд̇хз нисинно д̇зна сон̣д̣ааяа д̣̇ийяамаанам̣ г̇ан̣хаад̇и, ваддад̇иязва. хад̇т̇аад̣̇ийсу язна гзнажи сарийрааваяавзна анд̇амасо баад̣̇ан̇г̇улияааби д̣̇ийяамаанам̣ гааязна д̣̇иннам̣ наама ход̇и. бадиг̇г̇ахан̣зби зсзва наяо. язна гзнажи хи сарийрааваяавзна г̇ахид̇ам̣ гааязна г̇ахид̇амзва ход̇и. сажзби над̇т̇угаран̣ияам̣ д̣̇ийяамаанам̣ наасаабудзна агаллаго ваа мукзна бадиг̇г̇ан̣хаад̇и, аабхог̇амзва хзд̇т̇а бамаан̣ам̣.
Sace pana dāyakapaṭiggāhakesu eko ākāse hoti, eko bhūmiyaṃ, bhūmaṭṭhassa ca sīsena, ākāsaṭṭhassa ca ṭhapetvā dātuṃ vā gahetuṃ vā pasāritahatthaṃ yaṃ āsannataraṃ aṅgaṃ, tassa orimantena hatthapāsapamāṇaṃ paricchinditabbaṃ. Sacepi eko kūpe hoti, eko kūpataṭe, eko vā pana rukkhe, eko pathaviyaṃ, vuttanayeneva hatthapāsapamāṇaṃ paricchinditabbaṃ. Evarūpe hatthapāse ṭhatvā sacepi pakkhī mukhatuṇḍakena vā hatthī vā soṇḍāya gahetvā pupphaṃ vā phalaṃ vā deti, paṭiggahaṇaṃ ruhati. Sace pana aḍḍhaṭṭhamaratanassapi hatthino khandhe nisinno tena soṇḍāya dīyamānaṃ gaṇhāti, vaṭṭatiyeva. Hatthādīsu yena kenaci sarīrāvayavena antamaso pādaṅguliyāpi dīyamānaṃ kāyena dinnaṃ nāma hoti. Paṭiggahaṇepi eseva nayo. Yena kenaci hi sarīrāvayavena gahitaṃ kāyena gahitameva hoti. Sacepi natthukaraṇiyaṃ dīyamānaṃ nāsāpuṭena akallako vā mukhena paṭiggaṇhāti, ābhogameva hettha pamāṇaṃ.
105. гадажчуаад̣̇ийсу бана язна гзнажи убагаран̣зна д̣̇иннам̣ гааяабадиб̣ад̣̇д̇хзна д̣̇иннам̣ наама ход̇и. бадиг̇г̇ахан̣зби зсзва наяо. язна гзнажи хи сарийрасамб̣ад̣̇д̇хзна бад̇д̇ат̇аалагаад̣̇инаа г̇ахид̇ам̣ гааяабадиб̣ад̣̇д̇хзна г̇ахид̇амзва ход̇и. гааяад̇о бана гааяабадиб̣ад̣̇д̇хад̇о жа можзд̇ваа хад̇т̇абаасз тид̇асса гааяз ваа гааяабадиб̣ад̣̇д̇хз ваа баад̇ияамаанамби ниссаг̇г̇иязна баяог̇зна д̣̇иннам̣ наама ход̇и. зго б̣ахууни бхад̇д̇аб̣яан̃ж̇анабхааж̇анаани сийсз гад̇ваа бхигкусса санд̇игам̣ ааг̇анд̇ваа тид̇агова ‘‘г̇ан̣хат̇аа’’д̇и вад̣̇ад̇и, на д̇аава абхихааро бан̃н̃ааяад̇и, д̇асмаа на г̇ахзд̇аб̣б̣ам̣. сажз бана ийсагамби онамад̇и, бхигкунаа хад̇т̇ам̣ басаарзд̇ваа хздтимабхааж̇анам̣ згад̣̇зсзнаби самбадижчид̇аб̣б̣ам̣. зд̇д̇аавад̇аа саб̣б̣абхааж̇анаани бадиг̇г̇ахид̇аани хонд̇и. д̇ад̇о бадтааяа оробзд̇ваа уг̇гхаадзд̇ваа ваа яам̣ ижчад̇и, д̇ам̣ г̇ахзд̇ум̣ ваддад̇и. бхад̇д̇абажчиаад̣̇имхи бана згабхааж̇анз вад̇д̇аб̣б̣амзва над̇т̇и.
105. Kaṭacchuādīsu pana yena kenaci upakaraṇena dinnaṃ kāyapaṭibaddhena dinnaṃ nāma hoti. Paṭiggahaṇepi eseva nayo. Yena kenaci hi sarīrasambaddhena pattathālakādinā gahitaṃ kāyapaṭibaddhena gahitameva hoti. Kāyato pana kāyapaṭibaddhato ca mocetvā hatthapāse ṭhitassa kāye vā kāyapaṭibaddhe vā pātiyamānampi nissaggiyena payogena dinnaṃ nāma hoti. Eko bahūni bhattabyañjanabhājanāni sīse katvā bhikkhussa santikaṃ āgantvā ṭhitakova ‘‘gaṇhathā’’ti vadati, na tāva abhihāro paññāyati, tasmā na gahetabbaṃ. Sace pana īsakampi onamati, bhikkhunā hatthaṃ pasāretvā heṭṭhimabhājanaṃ ekadesenapi sampaṭicchitabbaṃ. Ettāvatā sabbabhājanāni paṭiggahitāni honti. Tato paṭṭhāya oropetvā ugghāṭetvā vā yaṃ icchati, taṃ gahetuṃ vaṭṭati. Bhattapacchiādimhi pana ekabhājane vattabbameva natthi.
гааж̇зна бхад̇д̇ам̣ харанд̇оби сажз гааж̇ам̣ онамзд̇ваа д̣̇зд̇и, ваддад̇и. д̇им̣сахад̇т̇о взн̣у ход̇и, згасмим̣ анд̇з г̇ул̣агумбхо б̣ад̣̇д̇хо, згасмим̣ саббигумбхо, д̇ан̃жз бадиг̇г̇ан̣хаад̇и, саб̣б̣ам̣ бадиг̇г̇ахид̇амзва. ужчуяанд̇ад̣̇он̣ид̇о баг̇гхаранд̇амзва ‘‘расам̣ г̇ан̣хат̇аа’’д̇и вад̣̇ад̇и, абхихааро на бан̃н̃ааяад̇ийд̇и на г̇ахзд̇аб̣б̣о. сажз бана гасадам̣ чад̣д̣зд̇ваа хад̇т̇зна уссин̃жид̇ваа д̣̇зд̇и, ваддад̇и. б̣ахуу бад̇д̇аа ман̃жз ваа бийтз ваа гадасаарз ваа д̣̇он̣ияам̣ ваа палагз ваа табид̇аа хонд̇и, яад̇т̇а тид̇асса д̣̇ааяаго хад̇т̇абаасз ход̇и, д̇ад̇т̇а тад̇ваа бадиг̇г̇ахан̣асан̃н̃ааяа ман̃жаад̣̇ийни ан̇г̇улияааби пусид̇ваа тид̇зна ваа нисиннзна ваа нибаннзна ваа яам̣ д̇зсу бад̇д̇зсу д̣̇ийяад̇и, д̇ам̣ саб̣б̣ам̣ бадиг̇г̇ахид̇ам̣ ход̇и. сажзби ‘‘бадиг̇г̇ахзссаамий’’д̇и ман̃жаад̣̇ийни абхирухид̇ваа нисийд̣̇ад̇и, ваддад̇иязва.
Kājena bhattaṃ harantopi sace kājaṃ onametvā deti, vaṭṭati. Tiṃsahattho veṇu hoti, ekasmiṃ ante guḷakumbho baddho, ekasmiṃ sappikumbho, tañce paṭiggaṇhāti, sabbaṃ paṭiggahitameva. Ucchuyantadoṇito paggharantameva ‘‘rasaṃ gaṇhathā’’ti vadati, abhihāro na paññāyatīti na gahetabbo. Sace pana kasaṭaṃ chaḍḍetvā hatthena ussiñcitvā deti, vaṭṭati. Bahū pattā mañce vā pīṭhe vā kaṭasāre vā doṇiyaṃ vā phalake vā ṭhapitā honti, yattha ṭhitassa dāyako hatthapāse hoti, tattha ṭhatvā paṭiggahaṇasaññāya mañcādīni aṅguliyāpi phusitvā ṭhitena vā nisinnena vā nipannena vā yaṃ tesu pattesu dīyati, taṃ sabbaṃ paṭiggahitaṃ hoti. Sacepi ‘‘paṭiggahessāmī’’ti mañcādīni abhiruhitvā nisīdati, vaṭṭatiyeva.
бат̇авияам̣ бана сажзби гужчияаа гужчим̣ аахажжа тид̇аа хонд̇и, яам̣ яам̣ ан̇г̇улияаа ваа суужияаа ваа пусид̇ваа нисинно ход̇и, д̇ад̇т̇а д̇ад̇т̇а д̣̇ийяамаанамзва бадиг̇г̇ахид̇ам̣ ход̇и. яад̇т̇а гад̇т̇ажи махаагадасаарахад̇т̇ад̇т̇аран̣аад̣̇ийсу табид̇абад̇д̇з бадиг̇г̇ахан̣ам̣ на рухад̇ийд̇и вуд̇д̇ам̣, д̇ам̣ хад̇т̇абаасаад̇иггамам̣ санд̇хааяа вуд̇д̇анд̇и взд̣̇ид̇аб̣б̣ам̣, хад̇т̇абаасз бана сад̇и яад̇т̇а гад̇т̇ажи ваддад̇и ан̃н̃ад̇ра д̇ад̇т̇аж̇аад̇агаа. д̇ад̇т̇аж̇аад̇агз бана бад̣̇уминибан̣н̣з ваа гим̣сугабан̣н̣аад̣̇имхи ваа на ваддад̇и. на хи д̇ам̣ гааяабадиб̣ад̣̇д̇хасан̇кяам̣ г̇ажчад̇и. яат̇аа жа д̇ад̇т̇аж̇аад̇агз, звам̣ каан̣угз б̣анд̇хид̇ваа табид̇аман̃жаад̣̇имхи асам̣хааримз палагз ваа баасаан̣з ваа на рухад̇иязва. д̇зби хи д̇ад̇т̇аж̇аад̇агасан̇кяубаг̇аа хонд̇и. бхуумияам̣ ад̇т̇ад̇зсу сукумзсу д̇инд̇ин̣игаад̣̇ибан̣н̣зсу бадиг̇г̇ахан̣ам̣ на рухад̇и. на хи д̇аани санд̇хаарзд̇ум̣ самад̇т̇аанийд̇и. маханд̇зсу бана бад̣̇уминибан̣н̣аад̣̇ийсу рухад̇и. сажз хад̇т̇абаасам̣ ад̇иггамматид̇о д̣̇ийгхад̣̇ан̣д̣агзна ул̣ун̇гзна д̣̇зд̇и, ‘‘ааг̇анд̇ваа д̣̇зхий’’д̇и вад̇д̇аб̣б̣о. важанам̣ асуд̇ваа ваа анаад̣̇ияид̇ваа ваа бад̇д̇з аагирад̇иязва, буна бадиг̇г̇ахзд̇аб̣б̣ам̣. д̣̇уурз тад̇ваа бхад̇д̇абин̣д̣ам̣ кибанд̇зби зсзва наяо.
Pathaviyaṃ pana sacepi kucchiyā kucchiṃ āhacca ṭhitā honti, yaṃ yaṃ aṅguliyā vā sūciyā vā phusitvā nisinno hoti, tattha tattha dīyamānameva paṭiggahitaṃ hoti. Yattha katthaci mahākaṭasārahatthattharaṇādīsu ṭhapitapatte paṭiggahaṇaṃ na ruhatīti vuttaṃ, taṃ hatthapāsātikkamaṃ sandhāya vuttanti veditabbaṃ, hatthapāse pana sati yattha katthaci vaṭṭati aññatra tatthajātakā. Tatthajātake pana paduminipaṇṇe vā kiṃsukapaṇṇādimhi vā na vaṭṭati. Na hi taṃ kāyapaṭibaddhasaṅkhyaṃ gacchati. Yathā ca tatthajātake, evaṃ khāṇuke bandhitvā ṭhapitamañcādimhi asaṃhārime phalake vā pāsāṇe vā na ruhatiyeva. Tepi hi tatthajātakasaṅkhyupagā honti. Bhūmiyaṃ atthatesu sukhumesu tintiṇikādipaṇṇesu paṭiggahaṇaṃ na ruhati. Na hi tāni sandhāretuṃ samatthānīti. Mahantesu pana paduminipaṇṇādīsu ruhati. Sace hatthapāsaṃ atikkammaṭhito dīghadaṇḍakena uḷuṅkena deti, ‘‘āgantvā dehī’’ti vattabbo. Vacanaṃ asutvā vā anādiyitvā vā patte ākiratiyeva, puna paṭiggahetabbaṃ. Dūre ṭhatvā bhattapiṇḍaṃ khipantepi eseva nayo.
106. сажз бад̇д̇ат̇авигад̇о нийхарияамаанз бад̇д̇з раж̇анажун̣н̣аани хонд̇и, сад̇и уд̣̇агз д̇ховид̇аб̣б̣о, асад̇и раж̇анажун̣н̣ам̣ бун̃чид̇ваа бадиг̇г̇ахзд̇ваа ваа бин̣д̣ааяа жарид̇аб̣б̣ам̣. сажз бин̣д̣ааяа жаранд̇асса бад̇д̇з раж̇ам̣ бад̇ад̇и, бадиг̇г̇ахзд̇ваа бхигкаа г̇ан̣хид̇аб̣б̣аа, аббадиг̇г̇ахзд̇ваа г̇ан̣хад̇о винаяад̣̇уггадам̣, д̇ам̣ бана буна бадиг̇г̇ахзд̇ваа бхун̃ж̇ад̇о анаабад̇д̇и. сажз бана ‘‘бадиг̇г̇ахзд̇ваа д̣̇зт̇аа’’д̇и вуд̇д̇з важанам̣ асуд̇ваа ваа анаад̣̇ияид̇ваа ваа бхигкам̣ д̣̇знд̇иязва, винаяад̣̇уггадам̣ над̇т̇и, буна бадиг̇г̇ахзд̇ваа ан̃н̃аа бхигкаа г̇ахзд̇аб̣б̣аа. сажз махааваад̇о д̇ад̇о д̇ад̇о раж̇ам̣ баад̇зд̇и, на саггаа ход̇и бхигкам̣ г̇ахзд̇ум̣, ‘‘анубасамбаннасса д̣̇ассаамий’’д̇и суд̣̇д̇хажид̇д̇зна аабхог̇ам̣ гад̇ваа г̇ан̣хид̇ум̣ ваддад̇и. звам̣ бин̣д̣ааяа жарид̇ваа вихаарам̣ ваа аасанасаалам̣ ваа г̇анд̇ваа д̇ам̣ анубасамбаннасса д̣̇ад̇ваа буна д̇зна д̣̇иннам̣ ваа д̇асса виссаасзна ваа бадиг̇г̇ахзд̇ваа бхун̃ж̇ид̇ум̣ ваддад̇и. сажз бхигкаажаарз сараж̇ам̣ бад̇д̇ам̣ бхигкусса д̣̇зд̇и, со вад̇д̇аб̣б̣о ‘‘имам̣ бадиг̇г̇ахзд̇ваа бхигкам̣ ваа г̇ан̣хзяяааси барибхун̃ж̇зяяааси ваа’’д̇и, д̇зна д̇ат̇аа гаад̇аб̣б̣ам̣. сажз раж̇ам̣ убари уббилавад̇и, ган̃ж̇игам̣ баваахзд̇ваа сзсам̣ бхун̃ж̇ид̇аб̣б̣ам̣. сажз анд̇обавидтам̣ ход̇и, бадиг̇г̇ахзд̇аб̣б̣ам̣. анубасамбаннз асад̇и хад̇т̇ад̇о аможзнд̇знзва яад̇т̇а анубасамбанно ад̇т̇и, д̇ад̇т̇а нзд̇ваа бадиг̇г̇ахзд̇аб̣б̣ам̣. сугкабхад̇д̇з бад̇ид̇араж̇ам̣ абанзд̇ваа бхун̃ж̇ид̇ум̣ ваддад̇и. сажз ад̇исукумам̣ ход̇и, убари бхад̇д̇зна сад̣̇д̇хим̣ абанзд̇аб̣б̣ам̣, бадиг̇г̇ахзд̇ваа ваа бхун̃ж̇ид̇аб̣б̣ам̣. яааг̇ум̣ ваа суубам̣ ваа бурад̇о табзд̇ваа аалул̣знд̇аанам̣ бхааж̇анад̇о пусид̇аани уг̇г̇анд̇ваа бад̇д̇з бад̇анд̇и, бад̇д̇о бадиг̇г̇ахзд̇аб̣б̣о.
106. Sace pattathavikato nīhariyamāne patte rajanacuṇṇāni honti, sati udake dhovitabbo, asati rajanacuṇṇaṃ puñchitvā paṭiggahetvā vā piṇḍāya caritabbaṃ. Sace piṇḍāya carantassa patte rajaṃ patati, paṭiggahetvā bhikkhā gaṇhitabbā, appaṭiggahetvā gaṇhato vinayadukkaṭaṃ, taṃ pana puna paṭiggahetvā bhuñjato anāpatti. Sace pana ‘‘paṭiggahetvā dethā’’ti vutte vacanaṃ asutvā vā anādiyitvā vā bhikkhaṃ dentiyeva, vinayadukkaṭaṃ natthi, puna paṭiggahetvā aññā bhikkhā gahetabbā. Sace mahāvāto tato tato rajaṃ pāteti, na sakkā hoti bhikkhaṃ gahetuṃ, ‘‘anupasampannassa dassāmī’’ti suddhacittena ābhogaṃ katvā gaṇhituṃ vaṭṭati. Evaṃ piṇḍāya caritvā vihāraṃ vā āsanasālaṃ vā gantvā taṃ anupasampannassa datvā puna tena dinnaṃ vā tassa vissāsena vā paṭiggahetvā bhuñjituṃ vaṭṭati. Sace bhikkhācāre sarajaṃ pattaṃ bhikkhussa deti, so vattabbo ‘‘imaṃ paṭiggahetvā bhikkhaṃ vā gaṇheyyāsi paribhuñjeyyāsi vā’’ti, tena tathā kātabbaṃ. Sace rajaṃ upari uppilavati, kañjikaṃ pavāhetvā sesaṃ bhuñjitabbaṃ. Sace antopaviṭṭhaṃ hoti, paṭiggahetabbaṃ. Anupasampanne asati hatthato amocenteneva yattha anupasampanno atthi, tattha netvā paṭiggahetabbaṃ. Sukkhabhatte patitarajaṃ apanetvā bhuñjituṃ vaṭṭati. Sace atisukhumaṃ hoti, upari bhattena saddhiṃ apanetabbaṃ, paṭiggahetvā vā bhuñjitabbaṃ. Yāguṃ vā sūpaṃ vā purato ṭhapetvā āluḷentānaṃ bhājanato phusitāni uggantvā patte patanti, patto paṭiggahetabbo.
107. ул̣ун̇гзна аахарид̇ваа д̣̇знд̇аанам̣ батамад̇арам̣ ул̣ун̇гад̇о т̇зваа бад̇д̇з бад̇анд̇и, субад̇ид̇аа, абхихадад̇д̇аа д̣̇осо над̇т̇и. сажзби жаругзна бхад̇д̇з аагирияамаанз жаругад̇о маси ваа чааригаа ваа бад̇ад̇и, абхихадад̇д̇аа нзвад̇т̇и д̣̇осо. ананд̇арасса бхигкуно д̣̇ийяамаанам̣ бад̇д̇ад̇о уббад̇ид̇ваа ид̇арасса бад̇д̇з бад̇ад̇и, субад̇ид̇ам̣. бадиг̇г̇ахид̇амзва хи д̇ам̣ ход̇и. сажз ж̇аж̇жхарисаакаад̣̇им̣ паалзд̇ваа згасса бхигкуно д̣̇знд̇аанам̣ саакад̇о пусид̇аани ан̃н̃асса бад̇д̇з бад̇анд̇и, бад̇д̇о бадиг̇г̇ахзд̇аб̣б̣о, яасса бад̇д̇асса убари паалзнд̇и, д̇асса бад̇д̇з бад̇ид̇зсу д̣̇аад̇угаамад̇ааяа абхихадад̇д̇аа д̣̇осо над̇т̇и. бааяаасасса буурзд̇ваа бад̇д̇ам̣ д̣̇знд̇и, ун̣хад̇д̇аа хздтаа г̇ахзд̇ум̣ на саггод̇и, мукаваддияааби г̇ахзд̇ум̣ ваддад̇и. сажз д̇ат̇ааби на саггод̇и, аад̇хаарагзна г̇ахзд̇аб̣б̣о. аасанасаалааяа бад̇д̇ам̣ г̇ахзд̇ваа нисинно бхигку нид̣̇д̣̇ам̣ огганд̇о ход̇и, нзва аахарияамаанам̣, на д̣̇ийяамаанам̣ ж̇аанаад̇и, аббадиг̇г̇ахид̇ам̣ ход̇и. сажз бана аабхог̇ам̣ гад̇ваа нисинно ход̇и, ваддад̇и. сажзби со хад̇т̇зна аад̇хаарагам̣ мун̃жид̇ваа баад̣̇зна бзллзд̇ваа нид̣̇д̣̇ааяад̇и, ваддад̇иязва. баад̣̇зна аад̇хаарагам̣ аггамид̇ваа бадиг̇г̇ан̣ханд̇асса бана ж̇ааг̇аранд̇ассаби анаад̣̇арабадиг̇г̇ахан̣ам̣ ход̇и, д̇асмаа на гад̇д̇аб̣б̣ам̣. гзжи ‘‘звам̣ аад̇хаарагзна бадиг̇г̇ахан̣ам̣ гааяабадиб̣ад̣̇д̇хабадиб̣ад̣̇д̇хзна бадиг̇г̇ахан̣ам̣ наама ход̇и , д̇асмаа на ваддад̇ий’’д̇и вад̣̇анд̇и, д̇ам̣ важанамад̇д̇амзва, ад̇т̇ад̇о бана саб̣б̣амбзд̇ам̣ гааяабадиб̣ад̣̇д̇хамзва ход̇и. гааяасам̣саг̇г̇зби жзса наяо д̣̇ассид̇о. яамби бхигкусса д̣̇ийяамаанам̣ бад̇ад̇и, д̇амби саамам̣ г̇ахзд̇ваа барибхун̃ж̇ид̇ум̣ ваддад̇и.
107. Uḷuṅkena āharitvā dentānaṃ paṭhamataraṃ uḷuṅkato thevā patte patanti, supatitā, abhihaṭattā doso natthi. Sacepi carukena bhatte ākiriyamāne carukato masi vā chārikā vā patati, abhihaṭattā nevatthi doso. Anantarassa bhikkhuno dīyamānaṃ pattato uppatitvā itarassa patte patati, supatitaṃ. Paṭiggahitameva hi taṃ hoti. Sace jajjharisākhādiṃ phāletvā ekassa bhikkhuno dentānaṃ sākhato phusitāni aññassa patte patanti, patto paṭiggahetabbo, yassa pattassa upari phālenti, tassa patte patitesu dātukāmatāya abhihaṭattā doso natthi. Pāyāsassa pūretvā pattaṃ denti, uṇhattā heṭṭhā gahetuṃ na sakkoti, mukhavaṭṭiyāpi gahetuṃ vaṭṭati. Sace tathāpi na sakkoti, ādhārakena gahetabbo. Āsanasālāya pattaṃ gahetvā nisinno bhikkhu niddaṃ okkanto hoti, neva āhariyamānaṃ, na dīyamānaṃ jānāti, appaṭiggahitaṃ hoti. Sace pana ābhogaṃ katvā nisinno hoti, vaṭṭati. Sacepi so hatthena ādhārakaṃ muñcitvā pādena pelletvā niddāyati, vaṭṭatiyeva. Pādena ādhārakaṃ akkamitvā paṭiggaṇhantassa pana jāgarantassapi anādarapaṭiggahaṇaṃ hoti, tasmā na kattabbaṃ. Keci ‘‘evaṃ ādhārakena paṭiggahaṇaṃ kāyapaṭibaddhapaṭibaddhena paṭiggahaṇaṃ nāma hoti , tasmā na vaṭṭatī’’ti vadanti, taṃ vacanamattameva, atthato pana sabbampetaṃ kāyapaṭibaddhameva hoti. Kāyasaṃsaggepi cesa nayo dassito. Yampi bhikkhussa dīyamānaṃ patati, tampi sāmaṃ gahetvā paribhuñjituṃ vaṭṭati.
д̇ад̇рид̣̇ам̣ суд̇д̇ам̣ –
Tatridaṃ suttaṃ –
‘‘ануж̇аанаами, бхигкавз, яам̣ д̣̇ийяамаанам̣ бад̇ад̇и, д̇ам̣ саамам̣ г̇ахзд̇ваа барибхун̃ж̇ид̇ум̣, барижжад̇д̇ам̣ д̇ам̣, бхигкавз, д̣̇ааяагзхий’’д̇и (жуул̣ава. 273).
‘‘Anujānāmi, bhikkhave, yaṃ dīyamānaṃ patati, taṃ sāmaṃ gahetvā paribhuñjituṃ, pariccattaṃ taṃ, bhikkhave, dāyakehī’’ti (cūḷava. 273).
ид̣̇ан̃жа бана суд̇д̇ам̣ нзяяад̇т̇ам̣, д̇асмаа звамзд̇т̇а ад̇хиббааяо взд̣̇ид̇аб̣б̣о – яам̣ д̣̇ийяамаанам̣ д̣̇ааяагасса хад̇т̇ад̇о бариг̇ал̣ид̇ваа суд̣̇д̇хааяа ваа бхуумияаа бад̣̇уминибан̣н̣з ваа вад̇т̇агадасаарагаад̣̇ийсу ваа бад̇ад̇и, д̇ам̣ саамам̣ г̇ахзд̇ваа барибхун̃ж̇ид̇ум̣ ваддад̇и. яам̣ бана сараж̇ааяа бхуумияам̣ бад̇ад̇и, д̇ам̣ раж̇ам̣ бун̃чид̇ваа ваа д̇ховид̇ваа ваа бадиг̇г̇ахзд̇ваа ваа барибхун̃ж̇ид̇аб̣б̣ам̣. сажз бавадданд̇ам̣ ан̃н̃асса бхигкуно санд̇игам̣ г̇ажчад̇и, д̇зна аахараабзд̇умби ваддад̇и. сажз д̇ам̣ бхигкум̣ вад̣̇ад̇и ‘‘д̇вам̣язва каад̣̇аа’’д̇и, д̇ассаби каад̣̇ид̇ум̣ ваддад̇и, анаан̣ад̇д̇зна бана д̇зна на г̇ахзд̇аб̣б̣ам̣. ‘‘анаан̣ад̇д̇знаби ид̇арасса д̣̇ассаамийд̇и г̇ахзд̇ум̣ ваддад̇ий’’д̇и гурунд̣̇ияам̣ вуд̇д̇ам̣. гасмаа банзд̇ам̣ ид̇арасса бхигкуно г̇ахзд̇ум̣ на ваддад̇ийд̇и? бхаг̇авад̇аа ананун̃н̃аад̇ад̇д̇аа. бхаг̇авад̇аа хи ‘‘саамам̣ г̇ахзд̇ваа барибхун̃ж̇ид̇у’’нд̇и вад̣̇анд̇зна яассзва д̇ам̣ д̣̇ийяамаанам̣ бад̇ад̇и, д̇асса аббадиг̇г̇ахид̇агамби д̇ам̣ г̇ахзд̇ваа барибхог̇о анун̃н̃аад̇о. ‘‘барижжад̇д̇ам̣ д̇ам̣, бхигкавз, д̣̇ааяагзхий’’д̇и важанзна банзд̇т̇а барасанд̇агабхааво д̣̇ийбид̇о, д̇асмаа ан̃н̃асса саамам̣ г̇ахзд̇ваа барибхун̃ж̇ид̇ум̣ на ваддад̇и, д̇асса бана аан̣ад̇д̇ияаа ваддад̇ийд̇и аяам̣ гирзд̇т̇а ад̇хиббааяо. яасмаа жа зд̇ам̣ аббадиг̇г̇ахид̇агад̇д̇аа анун̃н̃аад̇ам̣, д̇асмаа яат̇аатид̇ам̣язва анаамасид̇ваа гзнажи бид̣̇ахид̇ваа табид̇ам̣ д̣̇уд̇ияад̣̇ивасзби барибхун̃ж̇ид̇ум̣ ваддад̇и, саннид̇хибажжаяаа анаабад̇д̇и, бадиг̇г̇ахзд̇ваа бана барибхун̃ж̇ид̇аб̣б̣ам̣. д̇ам̣ д̣̇ивасам̣язва хи д̇асса саамам̣ г̇ахзд̇ваа барибхог̇о анун̃н̃аад̇о, на д̇ад̇о баранд̇и аяамби гирзд̇т̇а ад̇хиббааяо.
Idañca pana suttaṃ neyyatthaṃ, tasmā evamettha adhippāyo veditabbo – yaṃ dīyamānaṃ dāyakassa hatthato parigaḷitvā suddhāya vā bhūmiyā paduminipaṇṇe vā vatthakaṭasārakādīsu vā patati, taṃ sāmaṃ gahetvā paribhuñjituṃ vaṭṭati. Yaṃ pana sarajāya bhūmiyaṃ patati, taṃ rajaṃ puñchitvā vā dhovitvā vā paṭiggahetvā vā paribhuñjitabbaṃ. Sace pavaṭṭantaṃ aññassa bhikkhuno santikaṃ gacchati, tena āharāpetumpi vaṭṭati. Sace taṃ bhikkhuṃ vadati ‘‘tvaṃyeva khādā’’ti, tassapi khādituṃ vaṭṭati, anāṇattena pana tena na gahetabbaṃ. ‘‘Anāṇattenapi itarassa dassāmīti gahetuṃ vaṭṭatī’’ti kurundiyaṃ vuttaṃ. Kasmā panetaṃ itarassa bhikkhuno gahetuṃ na vaṭṭatīti? Bhagavatā ananuññātattā. Bhagavatā hi ‘‘sāmaṃ gahetvā paribhuñjitu’’nti vadantena yasseva taṃ dīyamānaṃ patati, tassa appaṭiggahitakampi taṃ gahetvā paribhogo anuññāto. ‘‘Pariccattaṃ taṃ, bhikkhave, dāyakehī’’ti vacanena panettha parasantakabhāvo dīpito, tasmā aññassa sāmaṃ gahetvā paribhuñjituṃ na vaṭṭati, tassa pana āṇattiyā vaṭṭatīti ayaṃ kirettha adhippāyo. Yasmā ca etaṃ appaṭiggahitakattā anuññātaṃ, tasmā yathāṭhitaṃyeva anāmasitvā kenaci pidahitvā ṭhapitaṃ dutiyadivasepi paribhuñjituṃ vaṭṭati, sannidhipaccayā anāpatti, paṭiggahetvā pana paribhuñjitabbaṃ. Taṃ divasaṃyeva hi tassa sāmaṃ gahetvā paribhogo anuññāto, na tato paranti ayampi kirettha adhippāyo.
108. ид̣̇аани аб̣б̣охаариганаяо вужжад̇и. бхун̃ж̇анд̇аанан̃хи д̣̇анд̇аа кийяанд̇и, накаа кийяанд̇и, бад̇д̇асса ван̣н̣о кийяад̇и, саб̣б̣ам̣ аб̣б̣охааригам̣. сад̇т̇агзна ужчуаад̣̇ийсу паалид̇зсу малам̣ бан̃н̃ааяад̇и, зд̇ам̣ навасамудтид̇ам̣ наама, бадиг̇г̇ахзд̇ваа барибхун̃ж̇ид̇аб̣б̣ам̣. сад̇т̇агам̣ д̇ховид̇ваа паалид̇зсу малам̣ на бан̃н̃ааяад̇и, лохаг̇анд̇хамад̇д̇ам̣ ход̇и, д̇ам̣ аб̣б̣охааригам̣. яамби сад̇т̇агам̣ г̇ахзд̇ваа барихаранд̇и , д̇зна паалид̇зби зсзва наяо. на хи д̇ам̣ барибхог̇ад̇т̇ааяа барихаранд̇ийд̇и. муулабхзсаж̇ж̇аад̣̇ийни бисанд̇аанам̣ ваа годдзнд̇аанам̣ ваа нисад̣̇анисад̣̇абод̇агауд̣̇угкаламусалаад̣̇ийни кийяанд̇и, барихаран̣агаваасим̣ д̇аабзд̇ваа бхзсаж̇ж̇ад̇т̇ааяа д̇аггз ваа кийрз ваа багкибанд̇и, д̇ад̇т̇а нийлигаа бан̃н̃ааяад̇и, сад̇т̇агз вуд̇д̇асад̣̇исова винижчаяо. аамагад̇аггаад̣̇ийсу бана саяам̣ на багкибид̇аб̣б̣аа, багкибад̇и жз, саамам̣баагад̇о на мужжад̇и. д̣̇звз вассанд̇з бин̣д̣ааяа жаранд̇асса сарийрад̇о ваа жийварад̇о ваа гилидтауд̣̇агам̣ бад̇д̇з бад̇ад̇и, бадиг̇г̇ахзд̇аб̣б̣ам̣. ругкамуулаад̣̇ийсу бхун̃ж̇анд̇асса бад̇ид̇зби зсзва наяо. сажз бана сад̇д̇аахам̣ вассанд̇з д̣̇звз суд̣̇д̇хам̣ уд̣̇агам̣ ход̇и, аб̣бхогаасад̇о ваа бад̇ад̇и, ваддад̇и.
108. Idāni abbohārikanayo vuccati. Bhuñjantānañhi dantā khīyanti, nakhā khīyanti, pattassa vaṇṇo khīyati, sabbaṃ abbohārikaṃ. Satthakena ucchuādīsu phālitesu malaṃ paññāyati, etaṃ navasamuṭṭhitaṃ nāma, paṭiggahetvā paribhuñjitabbaṃ. Satthakaṃ dhovitvā phālitesu malaṃ na paññāyati, lohagandhamattaṃ hoti, taṃ abbohārikaṃ. Yampi satthakaṃ gahetvā pariharanti , tena phālitepi eseva nayo. Na hi taṃ paribhogatthāya pariharantīti. Mūlabhesajjādīni pisantānaṃ vā koṭṭentānaṃ vā nisadanisadapotakaudukkhalamusalādīni khīyanti, pariharaṇakavāsiṃ tāpetvā bhesajjatthāya takke vā khīre vā pakkhipanti, tattha nīlikā paññāyati, satthake vuttasadisova vinicchayo. Āmakatakkādīsu pana sayaṃ na pakkhipitabbā, pakkhipati ce, sāmaṃpākato na muccati. Deve vassante piṇḍāya carantassa sarīrato vā cīvarato vā kiliṭṭhaudakaṃ patte patati, paṭiggahetabbaṃ. Rukkhamūlādīsu bhuñjantassa patitepi eseva nayo. Sace pana sattāhaṃ vassante deve suddhaṃ udakaṃ hoti, abbhokāsato vā patati, vaṭṭati.
109. сааман̣зрасса од̣̇анам̣ д̣̇знд̇зна д̇асса бад̇д̇аг̇ад̇ам̣ ажчубанд̇знзва д̣̇аад̇аб̣б̣о, бад̇д̇о ваасса бадиг̇г̇ахзд̇аб̣б̣о. аббадиг̇г̇ахид̇з од̣̇анам̣ чубид̇ваа буна ад̇д̇ано бад̇д̇з од̣̇анам̣ г̇ан̣ханд̇асса уг̇г̇ахид̇аго ход̇и. сажз бана д̣̇аад̇угаамо худ̇ваа ‘‘аахара, сааман̣зра, бад̇д̇ам̣, од̣̇анам̣ г̇ан̣хаахий’’д̇и вад̣̇ад̇и, ид̇аро ‘‘алам̣ маяха’’нд̇и бадигкибад̇и, буна ‘‘д̇авзд̇ам̣ маяаа барижжад̇д̇а’’нд̇и жа вуд̇д̇з ‘‘на маяхам̣ зд̇знад̇т̇о’’д̇и вад̣̇ад̇и, сад̇агкад̇д̇умби барижжаж̇ад̇у, яаава ад̇д̇ано хад̇т̇аг̇ад̇ам̣, д̇аава бадиг̇г̇ахид̇амзва ход̇и. сажз бана аад̇хаарагз тид̇ам̣ нирабзгко ‘‘г̇ан̣хаахий’’д̇и вад̣̇ад̇и, буна бадиг̇г̇ахзд̇аб̣б̣ам̣. саабзгко аад̇хаарагз бад̇д̇ам̣ табзд̇ваа ‘‘зд̇д̇о буувам̣ ваа бхад̇д̇ам̣ ваа г̇ан̣хаахий’’д̇и сааман̣зрам̣ вад̣̇ад̇и, сааман̣зро хад̇т̇ам̣ д̇ховид̇ваа сажзби сад̇агкад̇д̇ум̣ г̇ахзд̇ваа ад̇д̇ано бад̇д̇аг̇ад̇ам̣ апусанд̇ова ад̇д̇ано бад̇д̇з багкибад̇и, буна бадиг̇г̇ахан̣агижжам̣ над̇т̇и. яад̣̇и бана ад̇д̇ано бад̇д̇аг̇ад̇ам̣ пусид̇ваа д̇ад̇о г̇ан̣хаад̇и, сааман̣зрасанд̇агзна сам̣садтам̣ ход̇и, буна бадиг̇г̇ахзд̇аб̣б̣ам̣. гзжи бана ‘‘сажзби г̇аяхамаанам̣ чиж̇ж̇ид̇ваа д̇ад̇т̇а бад̇ад̇и, буна бадиг̇г̇ахзд̇аб̣б̣а’’нд̇и вад̣̇анд̇и. д̇ам̣ ‘‘згам̣ бхад̇д̇абин̣д̣ам̣ г̇ан̣ха, згам̣ буувам̣ г̇ан̣ха, имасса г̇ул̣абин̣д̣асса зд̇д̇агам̣ бад̣̇зсам̣ г̇ан̣хаа’’д̇и звам̣ барижчинд̣̇ид̇ваа вуд̇д̇з взд̣̇ид̇аб̣б̣ам̣, ид̇ха бана барижчзд̣̇о над̇т̇и, д̇асмаа яам̣ сааман̣зрасса бад̇д̇з бад̇ад̇и, д̇ад̣̇зва бадиг̇г̇ахан̣ам̣ виж̇ахад̇и, хад̇т̇аг̇ад̇ам̣ бана яаава сааман̣зро ваа ‘‘ала’’нд̇и на орамад̇и, бхигку ваа на ваарзд̇и, д̇аава бхигкуссзва санд̇агам̣, д̇асмаа бадиг̇г̇ахан̣ам̣ на виж̇ахад̇и. сажз ад̇д̇ано ваа бхигкуунам̣ ваа яааг̇убажанагабхааж̇анз гзсан̃жи ад̇т̇ааяа бхад̇д̇ам̣ багкибад̇и, ‘‘сааман̣зра, бхааж̇анасса убари хад̇т̇ам̣ гарохий’’д̇и вад̇ваа д̇асса хад̇т̇з багкибид̇аб̣б̣ам̣. д̇асса хад̇т̇ад̇о бхааж̇анз бад̇ид̇ан̃хи д̣̇уд̇ияад̣̇ивасз бхааж̇анасса агаббияабхаавам̣ на гарод̇и барижжад̇д̇ад̇д̇аа. сажз звам̣ агад̇ваа багкибад̇и, бад̇д̇амива бхааж̇анам̣ нираамисам̣ гад̇ваа барибхун̃ж̇ид̇аб̣б̣ам̣.
109. Sāmaṇerassa odanaṃ dentena tassa pattagataṃ acchupanteneva dātabbo, patto vāssa paṭiggahetabbo. Appaṭiggahite odanaṃ chupitvā puna attano patte odanaṃ gaṇhantassa uggahitako hoti. Sace pana dātukāmo hutvā ‘‘āhara, sāmaṇera, pattaṃ, odanaṃ gaṇhāhī’’ti vadati, itaro ‘‘alaṃ mayha’’nti paṭikkhipati, puna ‘‘tavetaṃ mayā pariccatta’’nti ca vutte ‘‘na mayhaṃ etenattho’’ti vadati, satakkhattumpi pariccajatu, yāva attano hatthagataṃ, tāva paṭiggahitameva hoti. Sace pana ādhārake ṭhitaṃ nirapekkho ‘‘gaṇhāhī’’ti vadati, puna paṭiggahetabbaṃ. Sāpekkho ādhārake pattaṃ ṭhapetvā ‘‘etto pūvaṃ vā bhattaṃ vā gaṇhāhī’’ti sāmaṇeraṃ vadati, sāmaṇero hatthaṃ dhovitvā sacepi satakkhattuṃ gahetvā attano pattagataṃ aphusantova attano patte pakkhipati, puna paṭiggahaṇakiccaṃ natthi. Yadi pana attano pattagataṃ phusitvā tato gaṇhāti, sāmaṇerasantakena saṃsaṭṭhaṃ hoti, puna paṭiggahetabbaṃ. Keci pana ‘‘sacepi gayhamānaṃ chijjitvā tattha patati, puna paṭiggahetabba’’nti vadanti. Taṃ ‘‘ekaṃ bhattapiṇḍaṃ gaṇha, ekaṃ pūvaṃ gaṇha, imassa guḷapiṇḍassa ettakaṃ padesaṃ gaṇhā’’ti evaṃ paricchinditvā vutte veditabbaṃ, idha pana paricchedo natthi, tasmā yaṃ sāmaṇerassa patte patati, tadeva paṭiggahaṇaṃ vijahati, hatthagataṃ pana yāva sāmaṇero vā ‘‘ala’’nti na oramati, bhikkhu vā na vāreti, tāva bhikkhusseva santakaṃ, tasmā paṭiggahaṇaṃ na vijahati. Sace attano vā bhikkhūnaṃ vā yāgupacanakabhājane kesañci atthāya bhattaṃ pakkhipati, ‘‘sāmaṇera, bhājanassa upari hatthaṃ karohī’’ti vatvā tassa hatthe pakkhipitabbaṃ. Tassa hatthato bhājane patitañhi dutiyadivase bhājanassa akappiyabhāvaṃ na karoti pariccattattā. Sace evaṃ akatvā pakkhipati, pattamiva bhājanaṃ nirāmisaṃ katvā paribhuñjitabbaṃ.
110. д̣̇ааяагаа яааг̇угудам̣ табзд̇ваа г̇ад̇аа, д̇ам̣ д̣̇ахарасааман̣зро бадиг̇г̇ан̣хаабзд̇ум̣ на саггод̇и, бхигку бад̇д̇ам̣ убанаамзд̇и, сааман̣зро гудасса г̇ийвам̣ бад̇д̇асса мукаваддияам̣ табзд̇ваа ааваж̇ж̇зд̇и, бад̇д̇аг̇ад̇аа яааг̇у бадиг̇г̇ахид̇аава ход̇и. ат̇а ваа бхигку бхуумияам̣ хад̇т̇ам̣ табзд̇и, сааман̣зро баваддзд̇ваа хад̇т̇ам̣ ааробзд̇и, ваддад̇и. буувабажчибхад̇д̇абажчиужчубхаараад̣̇ийсуби зсзва наяо. сажз бадиг̇г̇ахан̣уубаг̇ам̣ бхаарам̣ д̣̇вз д̇аяо сааман̣зраа д̣̇знд̇и, згзна ваа б̣алавад̇аа угкид̇д̇ам̣ д̣̇вз д̇аяо бхигкуу г̇ан̣ханд̇и, ваддад̇и. ман̃жасса ваа бийтасса ваа баад̣̇з д̇злагхадам̣ ваа паан̣ид̇агхадам̣ ваа лаг̇г̇знд̇и, бхигкусса ман̃жзби бийтзби нисийд̣̇ид̇ум̣ ваддад̇и, уг̇г̇ахид̇агам̣ наама на ход̇и.
110. Dāyakā yāgukuṭaṃ ṭhapetvā gatā, taṃ daharasāmaṇero paṭiggaṇhāpetuṃ na sakkoti, bhikkhu pattaṃ upanāmeti, sāmaṇero kuṭassa gīvaṃ pattassa mukhavaṭṭiyaṃ ṭhapetvā āvajjeti, pattagatā yāgu paṭiggahitāva hoti. Atha vā bhikkhu bhūmiyaṃ hatthaṃ ṭhapeti, sāmaṇero pavaṭṭetvā hatthaṃ āropeti, vaṭṭati. Pūvapacchibhattapacchiucchubhārādīsupi eseva nayo. Sace paṭiggahaṇūpagaṃ bhāraṃ dve tayo sāmaṇerā denti, ekena vā balavatā ukkhittaṃ dve tayo bhikkhū gaṇhanti, vaṭṭati. Mañcassa vā pīṭhassa vā pāde telaghaṭaṃ vā phāṇitaghaṭaṃ vā laggenti, bhikkhussa mañcepi pīṭhepi nisīdituṃ vaṭṭati, uggahitakaṃ nāma na hoti.
нааг̇ад̣̇анд̇агз ваа ан̇гусагз ваа д̣̇вз д̇злагхадаа лаг̇г̇ид̇аа хонд̇и убари бадиг̇г̇ахид̇аго, хздтаа аббадиг̇г̇ахид̇аго. убаримам̣ г̇ахзд̇ум̣ ваддад̇и, хздтаа бадиг̇г̇ахид̇аго, убари аббадиг̇г̇ахид̇аго, убаримам̣ г̇ахзд̇ваа ид̇арам̣ г̇ан̣хад̇о убаримо уг̇г̇ахид̇аго ход̇и. хздтааман̃жз аббадиг̇г̇ахид̇агам̣ д̇злат̇аалагам̣ ход̇и, д̇ан̃жз саммаж̇ж̇анд̇о саммун̃ж̇анияаа гхаддзд̇и, уг̇г̇ахид̇агам̣ на ход̇и, ‘‘бадиг̇г̇ахид̇агам̣ г̇ан̣хиссаамий’’д̇и аббадиг̇г̇ахид̇агам̣ г̇ахзд̇ваа н̃ад̇ваа буна табзд̇и, уг̇г̇ахид̇агам̣ на ход̇и, б̣ахи нийхарид̇ваа сан̃ж̇аанаад̇и, б̣ахи адтабзд̇ваа харид̇ваа д̇ад̇т̇зва табзд̇аб̣б̣ам̣, над̇т̇и д̣̇осо. сажз бана буб̣б̣з виварид̇ваа табид̇ам̣, на бид̣̇ахид̇аб̣б̣ам̣. яат̇аа буб̣б̣з тид̇ам̣, д̇ат̇зва табзд̇аб̣б̣ам̣. сажз б̣ахи табзд̇и, буна на чубид̇аб̣б̣ам̣.
Nāgadantake vā aṅkusake vā dve telaghaṭā laggitā honti upari paṭiggahitako, heṭṭhā appaṭiggahitako. Uparimaṃ gahetuṃ vaṭṭati, heṭṭhā paṭiggahitako, upari appaṭiggahitako, uparimaṃ gahetvā itaraṃ gaṇhato uparimo uggahitako hoti. Heṭṭhāmañce appaṭiggahitakaṃ telathālakaṃ hoti, tañce sammajjanto sammuñjaniyā ghaṭṭeti, uggahitakaṃ na hoti, ‘‘paṭiggahitakaṃ gaṇhissāmī’’ti appaṭiggahitakaṃ gahetvā ñatvā puna ṭhapeti, uggahitakaṃ na hoti, bahi nīharitvā sañjānāti, bahi aṭṭhapetvā haritvā tattheva ṭhapetabbaṃ, natthi doso. Sace pana pubbe vivaritvā ṭhapitaṃ, na pidahitabbaṃ. Yathā pubbe ṭhitaṃ, tatheva ṭhapetabbaṃ. Sace bahi ṭhapeti, puna na chupitabbaṃ.
111. бадиг̇г̇ахид̇агз д̇злаад̣̇имхи ган̣н̣игаа удтзд̇и, син̇г̇ивзраад̣̇имхи гханажун̣н̣ам̣, д̇ам̣самудтаанамзва наама д̇ам̣, буна бадиг̇г̇ахан̣агижжам̣ над̇т̇и. д̇аалам̣ ваа наал̣игзрам̣ ваа аарул̣хо яод̇д̇зна палабин̣д̣им̣ од̇аарзд̇ваа убари тид̇ова ‘‘г̇ан̣хат̇аа’’д̇и вад̣̇ад̇и, на г̇ахзд̇аб̣б̣ам̣. сажз ан̃н̃о бхуумияам̣ тид̇о яод̇д̇абаасагз г̇ахзд̇ваа угкибид̇ваа д̣̇зд̇и, ваддад̇и. сапалам̣ махаасаакам̣ габбияам̣ гаарзд̇ваа бадиг̇г̇ан̣хаад̇и, палаани бадиг̇г̇ахид̇аанзва хонд̇и, яат̇аасукам̣ барибхун̃ж̇ид̇ум̣ ваддад̇и. анд̇овад̇ияам̣ тад̇ваа вад̇им̣ чинд̣̇ид̇ваа ужчум̣ ваа д̇имб̣аруусагам̣ ваа д̣̇знд̇и, хад̇т̇абаасз сад̇и ваддад̇и. д̣̇ан̣д̣агзсу абахарид̇ваа ниг̇г̇ад̇ам̣ г̇ан̣ханд̇асса ваддад̇и, бахарид̇ваа ниг̇г̇ад̇з адтагат̇аасу д̣̇осо на д̣̇ассид̇о. маяам̣ бана ‘‘яам̣ таанам̣ бахадам̣, д̇ад̇о саяам̣бад̇ид̇амива ход̇ий’’д̇и д̇аггаяаама, д̇амби тад̇ваа г̇ажчанд̇з яуж̇ж̇ад̇и сун̇гагхаад̇ад̇о баваддзд̇ваа б̣ахибад̇ид̇абхан̣д̣ам̣ вияа. вад̇им̣ ваа баагаарам̣ ваа лан̇гхаабзд̇ваа д̣̇знд̇и, сажз бана абут̇уло баагааро, анд̇обаагаарз б̣ахибаагаарз жа тид̇асса хад̇т̇абаасо баход̇и, хад̇т̇асад̇амби уд̣̇д̇хам̣ г̇анд̇ваа самбад̇д̇ам̣ г̇ахзд̇ум̣ ваддад̇и.
111. Paṭiggahitake telādimhi kaṇṇikā uṭṭheti, siṅgiverādimhi ghanacuṇṇaṃ, taṃsamuṭṭhānameva nāma taṃ, puna paṭiggahaṇakiccaṃ natthi. Tālaṃ vā nāḷikeraṃ vā āruḷho yottena phalapiṇḍiṃ otāretvā upari ṭhitova ‘‘gaṇhathā’’ti vadati, na gahetabbaṃ. Sace añño bhūmiyaṃ ṭhito yottapāsake gahetvā ukkhipitvā deti, vaṭṭati. Saphalaṃ mahāsākhaṃ kappiyaṃ kāretvā paṭiggaṇhāti, phalāni paṭiggahitāneva honti, yathāsukhaṃ paribhuñjituṃ vaṭṭati. Antovatiyaṃ ṭhatvā vatiṃ chinditvā ucchuṃ vā timbarūsakaṃ vā denti, hatthapāse sati vaṭṭati. Daṇḍakesu apaharitvā niggataṃ gaṇhantassa vaṭṭati, paharitvā niggate aṭṭhakathāsu doso na dassito. Mayaṃ pana ‘‘yaṃ ṭhānaṃ pahaṭaṃ, tato sayaṃpatitamiva hotī’’ti takkayāma, tampi ṭhatvā gacchante yujjati suṅkaghātato pavaṭṭetvā bahipatitabhaṇḍaṃ viya. Vatiṃ vā pākāraṃ vā laṅghāpetvā denti, sace pana aputhulo pākāro, antopākāre bahipākāre ca ṭhitassa hatthapāso pahoti, hatthasatampi uddhaṃ gantvā sampattaṃ gahetuṃ vaṭṭati.
бхигку г̇илаанам̣ сааман̣зрам̣ канд̇хзна вахад̇и, со палаапалам̣ д̣̇исваа г̇ахзд̇ваа канд̇хз нисиннова д̣̇зд̇и , ваддад̇и. абаро бхигкум̣ ваханд̇о канд̇хз нисиннасса бхигкуно д̣̇зд̇и, ваддад̇иязва. бхигку палиним̣ саакам̣ чааяад̇т̇ааяа г̇ахзд̇ваа г̇ажчад̇и, палаани каад̣̇ид̇ум̣ жид̇д̇з уббаннз бадиг̇г̇ахаабзд̇ваа каад̣̇ид̇ум̣ ваддад̇и. мажчигавааран̣ад̇т̇ам̣ габбияам̣ гаарзд̇ваа бадиг̇г̇ан̣хаад̇и, каад̣̇ид̇угаамо жз ход̇и, муулабадиг̇г̇ахан̣амзва ваддад̇и, каад̣̇анд̇асса над̇т̇и д̣̇осо. бхигку бадиг̇г̇ахан̣аарахам̣ бхан̣д̣ам̣ мануссаанам̣ яаанз табзд̇ваа маг̇г̇ам̣ г̇ажчад̇и, яаанам̣ гад̣̇д̣̇амз лаг̇г̇ад̇и, д̣̇ахаро жаггам̣ г̇ахзд̇ваа угкибад̇и, ваддад̇и, уг̇г̇ахид̇агам̣ наама на ход̇и. наавааяа табзд̇ваа наавам̣ арид̇д̇зна ваа бааж̇зд̇и, хад̇т̇зна ваа гад̣дхад̇и, ваддад̇и. ул̣умбзби зсзва наяо. жаадияам̣ ваа гун̣д̣агз ваа табзд̇вааби д̇ам̣ анубасамбаннзна г̇аахаабзд̇ваа анубасамбаннам̣ б̣аахааяам̣ г̇ахзд̇ваа д̇арид̇ум̣ ваддад̇и. д̇асмимби асад̇и анубасамбаннам̣ г̇аахаабзд̇ваа д̇ам̣ б̣аахааяам̣ г̇ахзд̇ваа д̇арид̇ум̣ ваддад̇и.
Bhikkhu gilānaṃ sāmaṇeraṃ khandhena vahati, so phalāphalaṃ disvā gahetvā khandhe nisinnova deti , vaṭṭati. Aparo bhikkhuṃ vahanto khandhe nisinnassa bhikkhuno deti, vaṭṭatiyeva. Bhikkhu phaliniṃ sākhaṃ chāyatthāya gahetvā gacchati, phalāni khādituṃ citte uppanne paṭiggahāpetvā khādituṃ vaṭṭati. Macchikavāraṇatthaṃ kappiyaṃ kāretvā paṭiggaṇhāti, khāditukāmo ce hoti, mūlapaṭiggahaṇameva vaṭṭati, khādantassa natthi doso. Bhikkhu paṭiggahaṇārahaṃ bhaṇḍaṃ manussānaṃ yāne ṭhapetvā maggaṃ gacchati, yānaṃ kaddame laggati, daharo cakkaṃ gahetvā ukkhipati, vaṭṭati, uggahitakaṃ nāma na hoti. Nāvāya ṭhapetvā nāvaṃ arittena vā pājeti, hatthena vā kaḍḍhati, vaṭṭati. Uḷumpepi eseva nayo. Cāṭiyaṃ vā kuṇḍake vā ṭhapetvāpi taṃ anupasampannena gāhāpetvā anupasampannaṃ bāhāyaṃ gahetvā tarituṃ vaṭṭati. Tasmimpi asati anupasampannaṃ gāhāpetvā taṃ bāhāyaṃ gahetvā tarituṃ vaṭṭati.
убаасагаа г̇амигабхигкуунам̣ баат̇зяяад̇ан̣д̣улз д̣̇знд̇и, сааман̣зраа бхигкуунам̣ д̇ан̣д̣улз г̇ахзд̇ваа ад̇д̇ано д̇ан̣д̣улз г̇ахзд̇ум̣ на саггонд̇и, бхигкуу д̇зсам̣ д̇ан̣д̣улз г̇ан̣ханд̇и, сааман̣зраа ад̇д̇анаа г̇ахид̇ад̇ан̣д̣улзсу кийн̣зсу ид̇арзхи д̇ан̣д̣улзхи яааг̇ум̣ бажид̇ваа саб̣б̣зсам̣ бад̇д̇аани бадибаадияаа табзд̇ваа яааг̇ум̣ аагиранд̇и, бан̣д̣ид̇о сааман̣зро ад̇д̇ано бад̇д̇ам̣ г̇ахзд̇ваа т̇зрасса д̣̇зд̇и, т̇зрасса бад̇д̇ам̣ д̣̇уд̇ияад̇т̇зрассаад̇и звам̣ саб̣б̣ааниби баривад̇д̇зд̇и, саб̣б̣зхи сааман̣зрасса санд̇агам̣ бхуд̇д̇ам̣ ход̇и, ваддад̇и. сажзби сааман̣зро абан̣д̣ид̇о ход̇и, ад̇д̇ано бад̇д̇з яааг̇ум̣ саяамзва баад̇ум̣ аарабхад̇и, ‘‘аавусо, д̇уяхам̣ яааг̇ум̣ маяхам̣ д̣̇зхий’’д̇и т̇зрзхи бадибаадияаа яаажид̇вааби бивид̇ум̣ ваддад̇и, саб̣б̣зхи сааман̣зрасса санд̇агамзва бхуд̇д̇ам̣ ход̇и, нзва уг̇г̇ахид̇абажжаяаа, на саннид̇хибажжаяаа важ̇ж̇ам̣ пусанд̇и. зд̇т̇а бана маад̇аабид̇уунам̣ д̇злаад̣̇ийни, чааяаад̣̇ийнам̣ ад̇т̇ааяа саакаад̣̇ийни жа харанд̇аанам̣ имзсан̃жа висзсо на д̣̇иссад̇и, д̇асмаа гааран̣ам̣ убабаригкид̇аб̣б̣ам̣.
Upāsakā gamikabhikkhūnaṃ pātheyyataṇḍule denti, sāmaṇerā bhikkhūnaṃ taṇḍule gahetvā attano taṇḍule gahetuṃ na sakkonti, bhikkhū tesaṃ taṇḍule gaṇhanti, sāmaṇerā attanā gahitataṇḍulesu khīṇesu itarehi taṇḍulehi yāguṃ pacitvā sabbesaṃ pattāni paṭipāṭiyā ṭhapetvā yāguṃ ākiranti, paṇḍito sāmaṇero attano pattaṃ gahetvā therassa deti, therassa pattaṃ dutiyattherassāti evaṃ sabbānipi parivatteti, sabbehi sāmaṇerassa santakaṃ bhuttaṃ hoti, vaṭṭati. Sacepi sāmaṇero apaṇḍito hoti, attano patte yāguṃ sayameva pātuṃ ārabhati, ‘‘āvuso, tuyhaṃ yāguṃ mayhaṃ dehī’’ti therehi paṭipāṭiyā yācitvāpi pivituṃ vaṭṭati, sabbehi sāmaṇerassa santakameva bhuttaṃ hoti, neva uggahitapaccayā, na sannidhipaccayā vajjaṃ phusanti. Ettha pana mātāpitūnaṃ telādīni, chāyādīnaṃ atthāya sākhādīni ca harantānaṃ imesañca viseso na dissati, tasmā kāraṇaṃ upaparikkhitabbaṃ.
112. сааман̣зро бхад̇д̇ам̣ бажид̇угаамо д̇ан̣д̣улз д̇ховид̇ваа нижжаалзд̇ум̣ на саггод̇и, бхигкунаа д̇ан̣д̣улз жа бхааж̇анан̃жа бадиг̇г̇ахзд̇ваа д̇ан̣д̣улз д̇ховид̇ваа нижжаалзд̇ваа бхааж̇анам̣ уд̣̇д̇ханам̣ ааробзд̇аб̣б̣ам̣, аг̇г̇и на гаад̇аб̣б̣о, баггагаалз виварид̇ваа баггабхааво ж̇аанид̇аб̣б̣о. сажз д̣̇уббаггам̣ ход̇и, баагад̇т̇ааяа бид̣̇ахид̇ум̣ на ваддад̇и, раж̇асса ваа чааригааяа ваа абад̇анад̇т̇ааяа ваддад̇и, баггагаалз оробид̇ум̣ бхун̃ж̇ид̇умби ваддад̇и, буна бадиг̇г̇ахан̣агижжам̣ над̇т̇и. сааман̣зро бадиб̣ало бажид̇ум̣, кан̣о банасса над̇т̇и гад̇т̇ажи г̇анд̇угаамо, бхигкунаа сад̇ан̣д̣улод̣̇агам̣ бхааж̇анам̣ бадиг̇г̇ахзд̇ваа уд̣̇д̇ханам̣ ааробзд̇ваа ‘‘аг̇г̇им̣ ж̇аалзд̇ваа г̇ажчаа’’д̇и вад̇д̇аб̣б̣о. д̇ад̇о барам̣ буриманаязнзва саб̣б̣ам̣ гаад̇ум̣ ваддад̇и. бхигку яааг̇уад̇т̇ааяа суд̣̇д̇хабхааж̇анам̣ ааробзд̇ваа уд̣̇агам̣ д̇аабзд̇и, ваддад̇и. д̇ад̇д̇з уд̣̇агз сааман̣зро д̇ан̣д̣улз багкибад̇и, д̇ад̇о бадтааяа бхигкунаа аг̇г̇и на гаад̇аб̣б̣о, баггаяааг̇ум̣ бадиг̇г̇ахзд̇ваа баад̇ум̣ ваддад̇и. сааман̣зро яааг̇ум̣ бажад̇и, хад̇т̇агуггужжаго бхигку гийл̣анд̇о бхааж̇анам̣ аамасад̇и, бид̇хаанам̣ аамасад̇и, уг̇г̇ад̇ам̣ пзн̣ам̣ чинд̣̇ид̇ваа бахарад̇и, д̇ассзва баад̇ум̣ на ваддад̇и, д̣̇урубажин̣н̣ам̣ наама ход̇и. сажз бана д̣̇аб̣б̣им̣ ваа ул̣ун̇гам̣ ваа г̇ахзд̇ваа анугкибанд̇о аалол̣зд̇и, саб̣б̣зсам̣ на ваддад̇и, саамам̣бааган̃жзва ход̇и д̣̇урубажин̣н̣ан̃жа. сажз угкибад̇и, уг̇г̇ахид̇агамби ход̇и.
112. Sāmaṇero bhattaṃ pacitukāmo taṇḍule dhovitvā niccāletuṃ na sakkoti, bhikkhunā taṇḍule ca bhājanañca paṭiggahetvā taṇḍule dhovitvā niccāletvā bhājanaṃ uddhanaṃ āropetabbaṃ, aggi na kātabbo, pakkakāle vivaritvā pakkabhāvo jānitabbo. Sace duppakkaṃ hoti, pākatthāya pidahituṃ na vaṭṭati, rajassa vā chārikāya vā apatanatthāya vaṭṭati, pakkakāle oropituṃ bhuñjitumpi vaṭṭati, puna paṭiggahaṇakiccaṃ natthi. Sāmaṇero paṭibalo pacituṃ, khaṇo panassa natthi katthaci gantukāmo, bhikkhunā sataṇḍulodakaṃ bhājanaṃ paṭiggahetvā uddhanaṃ āropetvā ‘‘aggiṃ jāletvā gacchā’’ti vattabbo. Tato paraṃ purimanayeneva sabbaṃ kātuṃ vaṭṭati. Bhikkhu yāguatthāya suddhabhājanaṃ āropetvā udakaṃ tāpeti, vaṭṭati. Tatte udake sāmaṇero taṇḍule pakkhipati, tato paṭṭhāya bhikkhunā aggi na kātabbo, pakkayāguṃ paṭiggahetvā pātuṃ vaṭṭati. Sāmaṇero yāguṃ pacati, hatthakukkuccako bhikkhu kīḷanto bhājanaṃ āmasati, pidhānaṃ āmasati, uggataṃ pheṇaṃ chinditvā paharati, tasseva pātuṃ na vaṭṭati, durupaciṇṇaṃ nāma hoti. Sace pana dabbiṃ vā uḷuṅkaṃ vā gahetvā anukkhipanto āloḷeti, sabbesaṃ na vaṭṭati, sāmaṃpākañceva hoti durupaciṇṇañca. Sace ukkhipati, uggahitakampi hoti.
113. бхигкунаа бин̣д̣ааяа жарид̇ваа аад̇хаарагз бад̇д̇о табид̇о ход̇и. д̇ад̇ра жз ан̃н̃о лолабхигку гийл̣анд̇о бад̇д̇ам̣ аамасад̇и, бад̇д̇абид̇хаанам̣ аамасад̇и, д̇ассзва д̇ад̇о лад̣̇д̇хабхад̇д̇ам̣ на ваддад̇и. сажз на бад̇д̇ам̣ угкибид̇ваа табзд̇и, саб̣б̣зсам̣ на ваддад̇и. д̇ад̇т̇аж̇аад̇агапалинисаакааяа ваа валлияаа ваа г̇ахзд̇ваа жаалзд̇и, д̇ассзва д̇ад̇о лад̣̇д̇хапалам̣ на ваддад̇и, д̣̇урубажин̣н̣ад̣̇уггадан̃жа аабаж̇ж̇ад̇и. ‘‘паларугкам̣ бана абассаяид̇ум̣ ваа д̇ад̇т̇а ган̣дагам̣ ваа б̣анд̇хид̇ум̣ ваддад̇и, д̣̇урубажин̣н̣ам̣ на ход̇ий’’д̇и махаабажжарияам̣ вуд̇д̇ам̣. аран̃н̃з бад̇ид̇ам̣ бана амб̣апалаад̣̇им̣ д̣̇исваа ‘‘сааман̣зрасса д̣̇ассаамий’’д̇и аахарид̇ваа д̣̇аад̇ум̣ ваддад̇и. сийхавигхаасаад̣̇им̣ д̣̇исвааби ‘‘сааман̣зрасса д̣̇ассаамий’’д̇и бадиг̇г̇ахзд̇ваа ваа аббадиг̇г̇ахзд̇ваа ваа аахарид̇ваа д̣̇аад̇ум̣ ваддад̇и. сажз бана саггод̇и вид̇аггам̣ сод̇хзд̇ум̣, д̇ад̇о лад̣̇д̇хам̣ каад̣̇ид̇умби ваддад̇и, нзва аамагамам̣сабадиг̇г̇ахан̣абажжаяаа, на уг̇г̇ахид̇агабажжаяаа важ̇ж̇ам̣ пусад̇и. маад̇аабид̇уунам̣ ад̇т̇ааяа д̇злаад̣̇ийни г̇ахзд̇ваа г̇ажчад̇о анд̇араамаг̇г̇з б̣яаад̇хи уббаж̇ж̇ад̇и, д̇ад̇о яам̣ ижчад̇и, д̇ам̣ бадиг̇г̇ахзд̇ваа барибхун̃ж̇ид̇ум̣ ваддад̇и. сажз бана муулзби бадиг̇г̇ахид̇ам̣ ход̇и, буна бадиг̇г̇ахан̣агижжам̣ над̇т̇и. маад̇аабид̇уунам̣ д̇ан̣д̣улз аахарид̇ваа д̣̇зд̇и, д̇з д̇ад̇оязва яааг̇уаад̣̇ийни самбаад̣̇зд̇ваа д̇асса д̣̇знд̇и, ваддад̇и, саннид̇хибажжаяаа уг̇г̇ахид̇абажжаяаа ваа д̣̇осо над̇т̇и.
113. Bhikkhunā piṇḍāya caritvā ādhārake patto ṭhapito hoti. Tatra ce añño lolabhikkhu kīḷanto pattaṃ āmasati, pattapidhānaṃ āmasati, tasseva tato laddhabhattaṃ na vaṭṭati. Sace na pattaṃ ukkhipitvā ṭhapeti, sabbesaṃ na vaṭṭati. Tatthajātakaphalinisākhāya vā valliyā vā gahetvā cāleti, tasseva tato laddhaphalaṃ na vaṭṭati, durupaciṇṇadukkaṭañca āpajjati. ‘‘Phalarukkhaṃ pana apassayituṃ vā tattha kaṇṭakaṃ vā bandhituṃ vaṭṭati, durupaciṇṇaṃ na hotī’’ti mahāpaccariyaṃ vuttaṃ. Araññe patitaṃ pana ambaphalādiṃ disvā ‘‘sāmaṇerassa dassāmī’’ti āharitvā dātuṃ vaṭṭati. Sīhavighāsādiṃ disvāpi ‘‘sāmaṇerassa dassāmī’’ti paṭiggahetvā vā appaṭiggahetvā vā āharitvā dātuṃ vaṭṭati. Sace pana sakkoti vitakkaṃ sodhetuṃ, tato laddhaṃ khāditumpi vaṭṭati, neva āmakamaṃsapaṭiggahaṇapaccayā, na uggahitakapaccayā vajjaṃ phusati. Mātāpitūnaṃ atthāya telādīni gahetvā gacchato antarāmagge byādhi uppajjati, tato yaṃ icchati, taṃ paṭiggahetvā paribhuñjituṃ vaṭṭati. Sace pana mūlepi paṭiggahitaṃ hoti, puna paṭiggahaṇakiccaṃ natthi. Mātāpitūnaṃ taṇḍule āharitvā deti, te tatoyeva yāguādīni sampādetvā tassa denti, vaṭṭati, sannidhipaccayā uggahitapaccayā vā doso natthi.
114. бхигку бид̣̇ахид̇ваа уд̣̇агам̣ д̇аабзд̇и, яаава баригкаяаа барибхун̃ж̇ид̇ум̣ ваддад̇и. сажз банзд̇т̇а чааригаа бад̇ад̇и, бадиг̇г̇ахзд̇аб̣б̣ам̣. д̣̇ийгхасан̣д̣аасзна т̇аалагам̣ г̇ахзд̇ваа д̇злам̣ бажанд̇асса чааригаа бад̇ад̇и, хад̇т̇зна амун̃жанд̇знзва бажид̇ваа од̇аарзд̇ваа бадиг̇г̇ахзд̇аб̣б̣ам̣. сажз ан̇г̇аарааби д̣̇аарууниби бадиг̇г̇ахзд̇ваа табид̇аани, муулабадиг̇г̇ахан̣амзва ваддад̇и. бхигку ужчум̣ каад̣̇ад̇и, сааман̣зро ‘‘маяхамби д̣̇зт̇аа’’д̇и вад̣̇ад̇и, ‘‘ид̇о чинд̣̇ид̇ваа г̇ан̣хаа’’д̇и вуд̇д̇о г̇ан̣хаад̇и, авасзсз буна бадиг̇г̇ахан̣агижжам̣ над̇т̇и. г̇ул̣абин̣д̣ам̣ каад̣̇анд̇ассаби зсзва наяо. вуд̇д̇огаасад̇о чинд̣̇ид̇ваа г̇ахид̇аавасзсан̃хи аж̇ахид̇абадиг̇г̇ахан̣амзва ход̇и. бхигку г̇ул̣ам̣ бхааж̇знд̇о бадиг̇г̇ахзд̇ваа годтаасз гарод̇и, бхигкууби сааман̣зрааби ааг̇анд̇ваа згаг̇г̇ахан̣знзва згамзгам̣ годтаасам̣ г̇ан̣ханд̇и, г̇ахид̇аавасзсам̣ бадиг̇г̇ахид̇амзва ход̇и. сажз лоласааман̣зро г̇ан̣хид̇ваа г̇ан̣хид̇ваа буна табзд̇и, д̇асса г̇ахид̇аавасзсам̣ аббадиг̇г̇ахид̇агамзва ход̇и.
114. Bhikkhu pidahitvā udakaṃ tāpeti, yāva parikkhayā paribhuñjituṃ vaṭṭati. Sace panettha chārikā patati, paṭiggahetabbaṃ. Dīghasaṇḍāsena thālakaṃ gahetvā telaṃ pacantassa chārikā patati, hatthena amuñcanteneva pacitvā otāretvā paṭiggahetabbaṃ. Sace aṅgārāpi dārūnipi paṭiggahetvā ṭhapitāni, mūlapaṭiggahaṇameva vaṭṭati. Bhikkhu ucchuṃ khādati, sāmaṇero ‘‘mayhampi dethā’’ti vadati, ‘‘ito chinditvā gaṇhā’’ti vutto gaṇhāti, avasese puna paṭiggahaṇakiccaṃ natthi. Guḷapiṇḍaṃ khādantassapi eseva nayo. Vuttokāsato chinditvā gahitāvasesañhi ajahitapaṭiggahaṇameva hoti. Bhikkhu guḷaṃ bhājento paṭiggahetvā koṭṭhāse karoti, bhikkhūpi sāmaṇerāpi āgantvā ekaggahaṇeneva ekamekaṃ koṭṭhāsaṃ gaṇhanti, gahitāvasesaṃ paṭiggahitameva hoti. Sace lolasāmaṇero gaṇhitvā gaṇhitvā puna ṭhapeti, tassa gahitāvasesaṃ appaṭiggahitakameva hoti.
бхигку д̇хуумаваддим̣ бадиг̇г̇ахзд̇ваа д̇хуумам̣ бивад̇и, мукан̃жа ган̣то жа маносилааяа лид̇д̇о вияа ход̇и, яаавагаалигам̣ бхун̃ж̇ид̇ум̣ ваддад̇и, яаавагаалигзна яааваж̇ийвигасам̣саг̇г̇з д̣̇осо над̇т̇и. бад̇д̇ам̣ ваа раж̇анам̣ ваа бажанд̇асса ган̣н̣анаасажчид̣̇д̣̇зхи д̇хуумо бависад̇и, б̣яаад̇хибажжаяаа бубпам̣ ваа палам̣ ваа убасин̇гхад̇и, аб̣б̣охааригад̇д̇аа ваддад̇и. бхад̇д̇уг̇г̇ааро д̇аалум̣ аахажжа анд̇оязва бависад̇и, ависаяад̇д̇аа ваддад̇и, мукам̣ бавидтам̣ бана аж̇жхохарад̇о вигаалз аабад̇д̇и. д̣̇анд̇анд̇арз лаг̇г̇асса аамисасса расо бависад̇и, аабад̇д̇иязва. сажз сукумам̣ аамисам̣ ход̇и, расо на бан̃н̃ааяад̇и, аб̣б̣охааригабагкам̣ бхаж̇ад̇и. убагадтз гаалз нируд̣̇агадтаанз бхад̇д̇ам̣ бхун̃ж̇ид̇ваа гагкаарзд̇ваа д̣̇вз д̇аяо кзл̣абин̣д̣з баад̇зд̇ваа уд̣̇агадтаанам̣ г̇анд̇ваа мукам̣ вигкаалзд̇аб̣б̣ам̣. бадиг̇г̇ахзд̇ваа табид̇асин̇г̇ивзраад̣̇ийнам̣ ан̇гураа нигкаманд̇и, буна бадиг̇г̇ахан̣агижжам̣ над̇т̇и. лон̣з асад̇и самуд̣̇д̣̇од̣̇агзна лон̣агижжам̣ гаад̇ум̣ ваддад̇и, бадиг̇г̇ахзд̇ваа табид̇алон̣од̣̇агам̣ лон̣ам̣ ход̇и, лон̣ам̣ ваа уд̣̇агам̣ ход̇и, расо ваа паан̣ид̇ам̣ ход̇и, паан̣ид̇ам̣ ваа расо ход̇и, муулабадиг̇г̇ахан̣амзва ваддад̇и.
Bhikkhu dhūmavaṭṭiṃ paṭiggahetvā dhūmaṃ pivati, mukhañca kaṇṭho ca manosilāya litto viya hoti, yāvakālikaṃ bhuñjituṃ vaṭṭati, yāvakālikena yāvajīvikasaṃsagge doso natthi. Pattaṃ vā rajanaṃ vā pacantassa kaṇṇanāsacchiddehi dhūmo pavisati, byādhipaccayā pupphaṃ vā phalaṃ vā upasiṅghati, abbohārikattā vaṭṭati. Bhattuggāro tāluṃ āhacca antoyeva pavisati, avisayattā vaṭṭati, mukhaṃ paviṭṭhaṃ pana ajjhoharato vikāle āpatti. Dantantare laggassa āmisassa raso pavisati, āpattiyeva. Sace sukhumaṃ āmisaṃ hoti, raso na paññāyati, abbohārikapakkhaṃ bhajati. Upakaṭṭhe kāle nirudakaṭṭhāne bhattaṃ bhuñjitvā kakkhāretvā dve tayo kheḷapiṇḍe pātetvā udakaṭṭhānaṃ gantvā mukhaṃ vikkhāletabbaṃ. Paṭiggahetvā ṭhapitasiṅgiverādīnaṃ aṅkurā nikkhamanti, puna paṭiggahaṇakiccaṃ natthi. Loṇe asati samuddodakena loṇakiccaṃ kātuṃ vaṭṭati, paṭiggahetvā ṭhapitaloṇodakaṃ loṇaṃ hoti, loṇaṃ vā udakaṃ hoti, raso vā phāṇitaṃ hoti, phāṇitaṃ vā raso hoti, mūlapaṭiggahaṇameva vaṭṭati.
химагарагаа уд̣̇агаг̇ад̇игаа зва. баарихааригзна гад̇агадтинаа уд̣̇агам̣ басаад̣̇знд̇и, д̇ам̣ аб̣б̣охааригам̣, аамисзна сад̣̇д̇хим̣ ваддад̇и. аамисаг̇ад̇игзхи габид̇т̇апалаад̣̇ийхи басаад̣̇ид̇ам̣ бурзбхад̇д̇амзва ваддад̇и. богкаран̣ийаад̣̇ийсу уд̣̇агам̣ б̣ахалам̣ ход̇и, ваддад̇и. сажз бана мукз хад̇т̇з жа лаг̇г̇ад̇и, на ваддад̇и, бадиг̇г̇ахзд̇ваа барибхун̃ж̇ид̇аб̣б̣ам̣. кзд̇д̇зсу гасид̇адтаанз б̣ахалам̣ уд̣̇агам̣ ход̇и, бадиг̇г̇ахзд̇аб̣б̣ам̣. сажз санд̣̇ид̇ваа ганд̣̇араад̣̇ийни бависид̇ваа над̣̇им̣ буурзд̇и, ваддад̇и. гагуд̇хасоб̣бхаад̣̇аяо хонд̇и ругкад̇о бад̇ид̇зхи бубпзхи сан̃чаннод̣̇агаа. сажз бубпарасо на бан̃н̃ааяад̇и, бадиг̇г̇ахан̣агижжам̣ над̇т̇и. барид̇д̇ам̣ уд̣̇агам̣ ход̇и, расо бан̃н̃ааяад̇и, бадиг̇г̇ахзд̇аб̣б̣ам̣. баб̣б̣ад̇аганд̣̇араад̣̇ийсу гаал̣аван̣н̣абан̣н̣ажчаннауд̣̇агзби зсзва наяо.
Himakarakā udakagatikā eva. Pārihārikena katakaṭṭhinā udakaṃ pasādenti, taṃ abbohārikaṃ, āmisena saddhiṃ vaṭṭati. Āmisagatikehi kapitthaphalādīhi pasāditaṃ purebhattameva vaṭṭati. Pokkharaṇīādīsu udakaṃ bahalaṃ hoti, vaṭṭati. Sace pana mukhe hatthe ca laggati, na vaṭṭati, paṭiggahetvā paribhuñjitabbaṃ. Khettesu kasitaṭṭhāne bahalaṃ udakaṃ hoti, paṭiggahetabbaṃ. Sace sanditvā kandarādīni pavisitvā nadiṃ pūreti, vaṭṭati. Kakudhasobbhādayo honti rukkhato patitehi pupphehi sañchannodakā. Sace puppharaso na paññāyati, paṭiggahaṇakiccaṃ natthi. Parittaṃ udakaṃ hoti, raso paññāyati, paṭiggahetabbaṃ. Pabbatakandarādīsu kāḷavaṇṇapaṇṇacchannaudakepi eseva nayo.
баанийяагхадз сарзн̣угаани ваа саван̣дакийраани ваа бубпаани багкид̇д̇аани хонд̇и, бадиг̇г̇ахзд̇аб̣б̣ам̣, бубпаани ваа бадиг̇г̇ахзд̇ваа багкибид̇аб̣б̣аани. баадалималлигаа багкид̇д̇аа хонд̇и, ваасамад̇д̇ам̣ д̇идтад̇и, д̇ам̣ аб̣б̣охааригам̣. д̣̇убхияад̣̇ивасзби аамисзна сад̣̇д̇хим̣ ваддад̇и. бхигкунаа табид̇абубпаваасид̇агабаанийяад̇о сааман̣зро баанийяам̣ г̇ахзд̇ваа бийд̇аавасзсагам̣ д̇ад̇т̇зва аагирад̇и, бадиг̇г̇ахзд̇аб̣б̣ам̣. бад̣̇умасараад̣̇ийсу уд̣̇агам̣ сант̇арид̇ваа тид̇ам̣ бубпарзн̣ум̣ гхадзна вигкамбхзд̇ваа уд̣̇агам̣ г̇ахзд̇ум̣ ваддад̇и. габбияам̣ гаараабзд̇ваа бадиг̇г̇ахзд̇ваа табид̇ам̣ д̣̇анд̇агадтам̣ ход̇и, сажз д̇асса расам̣ бивид̇угаамо , муулабадиг̇г̇ахан̣амзва ваддад̇и, аббадиг̇г̇ахзд̇ваа табид̇ам̣ бадиг̇г̇ахзд̇аб̣б̣ам̣. аж̇аананд̇асса расз бавидтзби аабад̇д̇иязва. ажид̇д̇аган̃хи ид̣̇ам̣ сигкаабад̣̇ам̣.
Pānīyaghaṭe sareṇukāni vā savaṇṭakhīrāni vā pupphāni pakkhittāni honti, paṭiggahetabbaṃ, pupphāni vā paṭiggahetvā pakkhipitabbāni. Pāṭalimallikā pakkhittā honti, vāsamattaṃ tiṭṭhati, taṃ abbohārikaṃ. Dubhiyadivasepi āmisena saddhiṃ vaṭṭati. Bhikkhunā ṭhapitapupphavāsitakapānīyato sāmaṇero pānīyaṃ gahetvā pītāvasesakaṃ tattheva ākirati, paṭiggahetabbaṃ. Padumasarādīsu udakaṃ santharitvā ṭhitaṃ pupphareṇuṃ ghaṭena vikkhambhetvā udakaṃ gahetuṃ vaṭṭati. Kappiyaṃ kārāpetvā paṭiggahetvā ṭhapitaṃ dantakaṭṭhaṃ hoti, sace tassa rasaṃ pivitukāmo , mūlapaṭiggahaṇameva vaṭṭati, appaṭiggahetvā ṭhapitaṃ paṭiggahetabbaṃ. Ajānantassa rase paviṭṭhepi āpattiyeva. Acittakañhi idaṃ sikkhāpadaṃ.
115. махаабхууд̇зсу гим̣ ваддад̇и, гим̣ на ваддад̇ийд̇и? кийрам̣ д̇аава ваддад̇и, габбияамам̣сакийрам̣ ваа ход̇у агаббияамам̣сакийрам̣ ваа, биванд̇асса анаабад̇д̇и. ассу кзл̣о син̇гхаан̣игаа муд̇д̇ам̣ гарийсам̣ сзмхам̣ д̣̇анд̇амалам̣ агкиг̇уут̇аго ган̣н̣аг̇уут̇аго сарийрз удтид̇алон̣анд̇и ид̣̇ам̣ саб̣б̣ам̣ ваддад̇и. яам̣ банзд̇т̇а таанад̇о жавид̇ваа бад̇д̇з ваа хад̇т̇з ваа бад̇ад̇и, д̇ам̣ бадиг̇г̇ахзд̇аб̣б̣ам̣, ан̇г̇алаг̇г̇ам̣ бадиг̇г̇ахид̇агамзва. ун̣хабааяаасам̣ бхун̃ж̇анд̇асса сзд̣̇о ан̇г̇улианусаарзна згааб̣ад̣̇д̇хова худ̇ваа бааяаасз санд̇идтад̇и, бин̣д̣ааяа ваа жаранд̇асса хад̇т̇ад̇о бад̇д̇асса мукаваддид̇о ваа бад̇д̇ад̇алам̣ орохад̇и, зд̇т̇а бадиг̇г̇ахан̣агижжам̣ над̇т̇и, жхаамамахаабхууд̇з ид̣̇ам̣ наама на ваддад̇ийд̇и над̇т̇и, д̣̇уж̇жхаабид̇ам̣ бана на ваддад̇и. суж̇жхаабид̇ам̣ бана мануссадтимби жун̣н̣ам̣ гад̇ваа лзхз убанзд̇ум̣ ваддад̇и. жад̇д̇аари махаавигадаани асад̇и габбияагаарагз саамам̣ г̇ахзд̇ваа барибхун̃ж̇ид̇ум̣ вадданд̇и. зд̇т̇а жа д̣̇уб̣б̣ажоби асамад̇т̇оби габбияагаараго асанд̇абагкзязва д̇идтад̇и. чааригааяа асад̇и сугкад̣̇аарум̣ жхаабзд̇ваа чааригаа г̇ахзд̇аб̣б̣аа. сугкад̣̇аарумхи асад̇и аллад̣̇аарум̣ ругкад̇о чинд̣̇ид̇вааби гаад̇ум̣ ваддад̇и. ид̣̇ам̣ бана жад̇уб̣б̣ид̇хамби махаавигадам̣ гаалод̣̇иссам̣ наама, саббад̣̇адтагкан̣зязва ваддад̇и.
115. Mahābhūtesu kiṃ vaṭṭati, kiṃ na vaṭṭatīti? Khīraṃ tāva vaṭṭati, kappiyamaṃsakhīraṃ vā hotu akappiyamaṃsakhīraṃ vā, pivantassa anāpatti. Assu kheḷo siṅghāṇikā muttaṃ karīsaṃ semhaṃ dantamalaṃ akkhigūthako kaṇṇagūthako sarīre uṭṭhitaloṇanti idaṃ sabbaṃ vaṭṭati. Yaṃ panettha ṭhānato cavitvā patte vā hatthe vā patati, taṃ paṭiggahetabbaṃ, aṅgalaggaṃ paṭiggahitakameva. Uṇhapāyāsaṃ bhuñjantassa sedo aṅgulianusārena ekābaddhova hutvā pāyāse santiṭṭhati, piṇḍāya vā carantassa hatthato pattassa mukhavaṭṭito vā pattatalaṃ orohati, ettha paṭiggahaṇakiccaṃ natthi, jhāmamahābhūte idaṃ nāma na vaṭṭatīti natthi, dujjhāpitaṃ pana na vaṭṭati. Sujjhāpitaṃ pana manussaṭṭhimpi cuṇṇaṃ katvā lehe upanetuṃ vaṭṭati. Cattāri mahāvikaṭāni asati kappiyakārake sāmaṃ gahetvā paribhuñjituṃ vaṭṭanti. Ettha ca dubbacopi asamatthopi kappiyakārako asantapakkheyeva tiṭṭhati. Chārikāya asati sukkhadāruṃ jhāpetvā chārikā gahetabbā. Sukkhadārumhi asati alladāruṃ rukkhato chinditvāpi kātuṃ vaṭṭati. Idaṃ pana catubbidhampi mahāvikaṭaṃ kālodissaṃ nāma, sappadaṭṭhakkhaṇeyeva vaṭṭati.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
бадиг̇г̇ахан̣авинижчаяагат̇аа самад̇д̇аа.
Paṭiggahaṇavinicchayakathā samattā.
