| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
6. பாடிஹாரியகதா²
6. Pāṭihāriyakathā
30. ‘‘தீணிமானி , பி⁴க்க²வே 1, பாடிஹாரியானி. கதமானி தீணி? இத்³தி⁴பாடிஹாரியங், ஆதே³ஸனாபாடிஹாரியங், அனுஸாஸனீபாடிஹாரியங்.
30. ‘‘Tīṇimāni , bhikkhave 2, pāṭihāriyāni. Katamāni tīṇi? Iddhipāṭihāriyaṃ, ādesanāpāṭihāriyaṃ, anusāsanīpāṭihāriyaṃ.
‘‘கதமஞ்ச, பி⁴க்க²வே, இத்³தி⁴பாடிஹாரியங்? இத⁴, பி⁴க்க²வே, ஏகச்சோ அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி , ப³ஹுதா⁴பி ஹுத்வா ஏகோ ஹோதி; ஆவிபா⁴வங் திரோபா⁴வங்…பே॰… யாவ ப்³ரஹ்மலோகாபி காயேன வஸங் வத்தேதி. இத³ங் வுச்சதி, பி⁴க்க²வே, இத்³தி⁴பாடிஹாரியங்.
‘‘Katamañca, bhikkhave, iddhipāṭihāriyaṃ? Idha, bhikkhave, ekacco anekavihitaṃ iddhividhaṃ paccanubhoti – ekopi hutvā bahudhā hoti , bahudhāpi hutvā eko hoti; āvibhāvaṃ tirobhāvaṃ…pe… yāva brahmalokāpi kāyena vasaṃ vatteti. Idaṃ vuccati, bhikkhave, iddhipāṭihāriyaṃ.
‘‘கதமஞ்ச , பி⁴க்க²வே, ஆதே³ஸனாபாடிஹாரியங்? இத⁴, பி⁴க்க²வே, ஏகச்சோ நிமித்தேன ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². இத⁴ பன, பி⁴க்க²வே, ஏகச்சோ ந ஹேவ கோ² நிமித்தேன ஆதி³ஸதி, அபி ச கோ² மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². இத⁴ பன, பி⁴க்க²வே, ஏகச்சோ ந ஹேவ கோ² நிமித்தேன ஆதி³ஸதி, நபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி, அபி ச கோ² விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². இத⁴ பன, பி⁴க்க²வே, ஏகச்சோ ந ஹேவ கோ² நிமித்தேன ஆதி³ஸதி, நபி மனுஸ்ஸானங் வா அமனுஸ்ஸானங் வா தே³வதானங் வா ஸத்³த³ங் ஸுத்வா ஆதி³ஸதி, நபி விதக்கயதோ விசாரயதோ விதக்கவிப்பா²ரஸத்³த³ங் ஸுத்வா ஆதி³ஸதி, அபி ச கோ² அவிதக்கங் அவிசாரங் ஸமாதி⁴ங் ஸமாபன்னஸ்ஸ சேதஸா சேதோ பரிச்ச பஜானாதி – ‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ 3 சித்தஸ்ஸ அனந்தரா அமுகங் நாம விதக்கங் விதக்கயிஸ்ஸதீ’தி 4. ஸோ ப³ஹுங் சேபி ஆதி³ஸதி, ததே²வ தங் ஹோதி, நோ அஞ்ஞதா². இத³ங் வுச்சதி, பி⁴க்க²வே, ஆதே³ஸனாபாடிஹாரியங்.
‘‘Katamañca, bhikkhave, ādesanāpāṭihāriyaṃ? Idha, bhikkhave, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa 5 cittassa anantarā amukaṃ nāma vitakkaṃ vitakkayissatī’ti 6. So bahuṃ cepi ādisati, tatheva taṃ hoti, no aññathā. Idaṃ vuccati, bhikkhave, ādesanāpāṭihāriyaṃ.
‘‘கதமஞ்ச, பி⁴க்க²வே, அனுஸாஸனீபாடிஹாரியங்? இத⁴, பி⁴க்க²வே, ஏகச்சோ ஏவமனுஸாஸதி – ‘ஏவங் விதக்கேத², மா ஏவங் விதக்கயித்த². ஏவங் மனஸி கரோத², மா ஏவங் மனஸி கரித்த². இத³ங் பஜஹத², இத³ங் உபஸம்பஜ்ஜ விஹரதா²’தி. இத³ங் வுச்சதி, பி⁴க்க²வே, அனுஸாஸனீபாடிஹாரியங். இமானி கோ², பி⁴க்க²வே, தீணி பாடிஹாரியானி’’.
‘‘Katamañca, bhikkhave, anusāsanīpāṭihāriyaṃ? Idha, bhikkhave, ekacco evamanusāsati – ‘evaṃ vitakketha, mā evaṃ vitakkayittha. Evaṃ manasi karotha, mā evaṃ manasi karittha. Idaṃ pajahatha, idaṃ upasampajja viharathā’ti. Idaṃ vuccati, bhikkhave, anusāsanīpāṭihāriyaṃ. Imāni kho, bhikkhave, tīṇi pāṭihāriyāni’’.
31. நெக்க²ம்மங் இஜ்ஜ²தீதி – இத்³தி⁴. காமச்ச²ந்த³ங் படிஹரதீதி – பாடிஹாரியங். யே தேன நெக்க²ம்மேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘தங் கோ² பன நெக்க²ம்மங் ஏவங் ஆஸேவிதப்³ப³ங், ஏவங் பா⁴வேதப்³ப³ங் , ஏவங் ப³ஹுலீகாதப்³ப³ங், ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்.
31. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Ye tena nekkhammena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana nekkhammaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
அப்³யாபாதோ³ இஜ்ஜ²தீதி – இத்³தி⁴. ப்³யாபாத³ங் படிஹரதீதி – பாடிஹாரியங். யே தேன அப்³யாபாதே³ன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘ஸோ கோ² பன அப்³யாபாதோ³ ஏவங் ஆஸேவிதப்³போ³, ஏவங் பா⁴வேதப்³போ³, ஏவங் ப³ஹுலீகாதப்³போ³, ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்.
Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Ye tena abyāpādena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana abyāpādo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ஆலோகஸஞ்ஞா இஜ்ஜ²தீதி – இத்³தி⁴. தி²னமித்³த⁴ங் படிஹரதீதி – பாடிஹாரியங். யே தாய ஆலோகஸஞ்ஞாய ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘ஸா கோ² பன ஆலோகஸஞ்ஞா ஏவங் ஆஸேவிதப்³பா³, ஏவங் பா⁴வேதப்³பா³, ஏவங் ப³ஹுலீகாதப்³பா³, ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்.
Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ. Ye tāya ālokasaññāya samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Sā kho pana ālokasaññā evaṃ āsevitabbā, evaṃ bhāvetabbā, evaṃ bahulīkātabbā, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
அவிக்கே²போ இஜ்ஜ²தீதி – இத்³தி⁴. உத்³த⁴ச்சங் படிஹரதீதி – பாடிஹாரியங். யே தேன அவிக்கே²பேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘ஸோ கோ² பன அவிக்கே²போ ஏவங் ஆஸேவிதப்³போ³, ஏவங் பா⁴வேதப்³போ³, ஏவங் ப³ஹுலீகாதப்³போ³, ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்.
Avikkhepo ijjhatīti – iddhi. Uddhaccaṃ paṭiharatīti – pāṭihāriyaṃ. Ye tena avikkhepena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana avikkhepo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
த⁴ம்மவவத்தா²னங் இஜ்ஜ²தீதி – இத்³தி⁴. விசிகிச்ச²ங் படிஹரதீதி – பாடிஹாரியங். யே தேன த⁴ம்மவவத்தா²னேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘தங் கோ² பன த⁴ம்மவவத்தா²னங் ஏவங் ஆஸேவிதப்³ப³ங், ஏவங் பா⁴வேதப்³ப³ங், ஏவங் ப³ஹுலீகாதப்³ப³ங், ஏவங் தத³னுத⁴ம்மதா, ஸதி உபட்டா²பேதப்³பா³’’தி – அனுஸாஸனீபாடிஹாரியங்.
Dhammavavatthānaṃ ijjhatīti – iddhi. Vicikicchaṃ paṭiharatīti – pāṭihāriyaṃ. Ye tena dhammavavatthānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana dhammavavatthānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā, sati upaṭṭhāpetabbā’’ti – anusāsanīpāṭihāriyaṃ.
ஞாணங் இஜ்ஜ²தீதி – இத்³தி⁴. அவிஜ்ஜங் படிஹரதீதி – பாடிஹாரியங். யே தேன ஞாணேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘தங் கோ² பன ஞாணங் ஏவங் ஆஸேவிதப்³ப³ங், ஏவங் பா⁴வேதப்³ப³ங், ஏவங் ப³ஹுலீகாதப்³ப³ங், ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்.
Ñāṇaṃ ijjhatīti – iddhi. Avijjaṃ paṭiharatīti – pāṭihāriyaṃ. Ye tena ñāṇena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana ñāṇaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
பாமோஜ்ஜங் இஜ்ஜ²தீதி – இத்³தி⁴. அரதிங் படிஹரதீதி – பாடிஹாரியங். யே தேன பாமோஜ்ஜேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘தங் கோ² பன பாமோஜ்ஜங் ஏவங் ஆஸேவிதப்³ப³ங், ஏவங் பா⁴வேதப்³ப³ங் , ஏவங் ப³ஹுலீகாதப்³ப³ங், ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்…பே॰….
Pāmojjaṃ ijjhatīti – iddhi. Aratiṃ paṭiharatīti – pāṭihāriyaṃ. Ye tena pāmojjena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana pāmojjaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
பட²மங் ஜா²னங் இஜ்ஜ²தீதி – இத்³தி⁴. நீவரணே படிஹரதீதி – பாடிஹாரியங். யே தேன பட²மேன ஜா²னேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘தங் கோ² பன பட²மங் ஜா²னங் ஏவங் ஆஸேவிதப்³ப³ங், ஏவங் பா⁴வேதப்³ப³ங், ஏவங் ப³ஹுலீகாதப்³ப³ங், ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்…பே॰….
Paṭhamaṃ jhānaṃ ijjhatīti – iddhi. Nīvaraṇe paṭiharatīti – pāṭihāriyaṃ. Ye tena paṭhamena jhānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana paṭhamaṃ jhānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
அரஹத்தமக்³கோ³ இஜ்ஜ²தீதி – இத்³தி⁴. ஸப்³ப³கிலேஸே படிஹரதீதி – பாடிஹாரியங். யே தேன அரஹத்தமக்³கே³ன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியங். ‘‘ஸோ கோ² பன அரஹத்தமக்³கோ³ ஏவங் ஆஸேவிதப்³போ³, ஏவங் பா⁴வேதப்³போ³, ஏவங் ப³ஹுலீகாதப்³போ³, ஏவங் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியங்.
Arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Ye tena arahattamaggena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana arahattamaggo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
32. நெக்க²ம்மங் இஜ்ஜ²தீதி – இத்³தி⁴. காமச்ச²ந்த³ங் படிஹரதீதி – பாடிஹாரியங். யா ச இத்³தி⁴ யஞ்ச பாடிஹாரியங், இத³ங் வுச்சதி இத்³தி⁴பாடிஹாரியங். அப்³யாபாதோ³ இஜ்ஜ²தீதி – இத்³தி⁴. ப்³யாபாத³ங் படிஹரதீதி – பாடிஹாரியங். யா ச இத்³தி⁴ யஞ்ச பாடிஹாரியங், இத³ங் வுச்சதி இத்³தி⁴பாடிஹாரியங். ஆலோகஸஞ்ஞா இஜ்ஜ²தீதி – இத்³தி⁴. தி²னமித்³த⁴ங் படிஹரதீதி – பாடிஹாரியங்…பே॰… அரஹத்தமக்³கோ³ இஜ்ஜ²தீதி – இத்³தி⁴. ஸப்³ப³கிலேஸே படிஹரதீதி – பாடிஹாரியங். யா ச இத்³தி⁴ யஞ்ச பாடிஹாரியங், இத³ங் வுச்சதி இத்³தி⁴பாடிஹாரியந்தி .
32. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ…pe… arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyanti .
பாடிஹாரியகதா² நிட்டி²தா.
Pāṭihāriyakathā niṭṭhitā.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / பாடிஹாரியகதா²வண்ணனா • Pāṭihāriyakathāvaṇṇanā
