| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. பதிலீனஸுத்தவண்ணனா
8. Patilīnasuttavaṇṇanā
38. அட்ட²மே பனுண்ணபச்சேகஸச்சோதி ‘‘இத³மேவ த³ஸ்ஸனங் ஸச்சங், இத³மேவ ஸச்ச’’ந்தி ஏவங் பாடிஏக்கங் க³ஹிதத்தா பச்சேகஸங்கா²தானி தி³ட்டி²ஸச்சானி பனுண்ணானி நீஹடானி பஹீனானி அஸ்ஸாதி பனுண்ணபச்சேகஸச்சோ. ஸமவயஸட்டே²ஸனோதி எத்த² அவயாதி அனூனா, ஸட்டா²தி விஸ்ஸட்டா², ஸம்மா அவயா ஸட்டா² ஏஸனா அஸ்ஸாதி ஸமவயஸட்டே²ஸனோ, ஸம்மா விஸ்ஸட்ட²ஸப்³ப³ஏஸனோதி அத்தோ². பதிலீனோதி நிலீனோ ஏகீபா⁴வங் உபக³தோ. புது²ஸமணப்³ராஹ்மணானந்தி ப³ஹூனங் ஸமணப்³ராஹ்மணானங். எத்த² ச ஸமணாதி பப்³ப³ஜ்ஜூபக³தா, ப்³ராஹ்மணாதி போ⁴வாதி³னோ. புது²பச்சேகஸச்சானீதி ப³ஹூனி பாடேக்கஸச்சானி. நுண்ணானீதி நீஹடானி. பனுண்ணானீதி ஸுட்டு² நீஹடானி. சத்தானீதி விஸ்ஸட்டா²னி. வந்தானீதி வமிதானி. முத்தானீதி சி²ன்னப³ந்த⁴னானி கதானி. பஹீனானீதி பஜஹிதானி. படினிஸ்ஸட்டா²னீதி யதா² ந புன சித்தங் ஆரோஹந்தி, ஏவங் படினிஸ்ஸஜ்ஜிதானி. ஸப்³பா³னேவேதானி க³ஹிதக³ஹணஸ்ஸ விஸ்ஸட்ட²பா⁴வவேவசனானி.
38. Aṭṭhame panuṇṇapaccekasaccoti ‘‘idameva dassanaṃ saccaṃ, idameva sacca’’nti evaṃ pāṭiekkaṃ gahitattā paccekasaṅkhātāni diṭṭhisaccāni panuṇṇāni nīhaṭāni pahīnāni assāti panuṇṇapaccekasacco. Samavayasaṭṭhesanoti ettha avayāti anūnā, saṭṭhāti vissaṭṭhā, sammā avayā saṭṭhā esanā assāti samavayasaṭṭhesano, sammā vissaṭṭhasabbaesanoti attho. Patilīnoti nilīno ekībhāvaṃ upagato. Puthusamaṇabrāhmaṇānanti bahūnaṃ samaṇabrāhmaṇānaṃ. Ettha ca samaṇāti pabbajjūpagatā, brāhmaṇāti bhovādino. Puthupaccekasaccānīti bahūni pāṭekkasaccāni. Nuṇṇānīti nīhaṭāni. Panuṇṇānīti suṭṭhu nīhaṭāni. Cattānīti vissaṭṭhāni. Vantānīti vamitāni. Muttānīti chinnabandhanāni katāni. Pahīnānīti pajahitāni. Paṭinissaṭṭhānīti yathā na puna cittaṃ ārohanti, evaṃ paṭinissajjitāni. Sabbānevetāni gahitagahaṇassa vissaṭṭhabhāvavevacanāni.
காமேஸனா பஹீனா ஹோதீதி அனாகா³மிமக்³கே³ன பஹீனா. ப⁴வேஸனா பன அரஹத்தமக்³கே³ன பஹீயதி. ‘‘ப்³ரஹ்மசரியங் ஏஸிஸ்ஸாமி க³வேஸிஸ்ஸாமீ’’தி ஏவங் பவத்தஜ்ஜா²ஸயஸங்கா²தா ப்³ரஹ்மசரியேஸனாபி அரஹத்தமக்³கே³னேவ படிப்பஸ்ஸத்³தி⁴ங் வூபஸமங் க³ச்ச²தி. தி³ட்டி²ப்³ரஹ்மசரியேஸனா பன ஸோதாபத்திமக்³கே³னேவ படிப்பஸம்ப⁴தீதி வேதி³தப்³பா³. ஏவங் கோ², பி⁴க்க²வேதி ஏவங் சதுத்த²ஜ்ஜா²னேன பஸ்ஸத்³த⁴காயஸங்கா²ரோ வூபஸந்தஅஸ்ஸாஸபஸ்ஸாஸோ நாம ஹோதி. அஸ்மிமானோதி அஸ்மீதி உப்பஜ்ஜனகோ நவவித⁴மானோ.
Kāmesanā pahīnā hotīti anāgāmimaggena pahīnā. Bhavesanā pana arahattamaggena pahīyati. ‘‘Brahmacariyaṃ esissāmi gavesissāmī’’ti evaṃ pavattajjhāsayasaṅkhātā brahmacariyesanāpi arahattamaggeneva paṭippassaddhiṃ vūpasamaṃ gacchati. Diṭṭhibrahmacariyesanā pana sotāpattimaggeneva paṭippasambhatīti veditabbā. Evaṃ kho, bhikkhaveti evaṃ catutthajjhānena passaddhakāyasaṅkhāro vūpasantaassāsapassāso nāma hoti. Asmimānoti asmīti uppajjanako navavidhamāno.
கா³தா²ஸு காமேஸனா ப⁴வேஸனாதி ஏதா த்³வே ஏஸனா, ப்³ரஹ்மசரியேஸனா ஸஹாதி தாஹியேவ ஸஹ ப்³ரஹ்மசரியேஸனாதி திஸ்ஸோபி ஏதா. இத⁴ ட²த்வா ஏஸனா படினிஸ்ஸட்டா²தி இமினா பதே³ன ஸத்³தி⁴ங் யோஜனா காதப்³பா³. இதி ஸச்சபராமாஸோ, தி³ட்டி²ட்டா²னா ஸமுஸ்ஸயாதி ‘‘இதி ஸச்சங் இதி ஸச்ச’’ந்தி க³ஹணபராமாஸோ ச தி³ட்டி²ஸங்கா²தாயேவ தி³ட்டி²ட்டா²னா ச யே ஸமுஸ்ஸிதத்தா உக்³க³ந்த்வா டி²தத்தா ஸமுஸ்ஸயாதி வுச்சந்தி, தே ஸப்³பே³பி. இத⁴ ட²த்வா தி³ட்டி²ட்டா²னா ஸமூஹதாதி இமினா பதே³ன ஸத்³தி⁴ங் யோஜனா காதப்³பா³. கஸ்ஸ பன ஏதா ஏஸனா படினிஸ்ஸட்டா², ஏதே ச தி³ட்டி²ட்டா²னா ஸமூஹதாதி? ஸப்³ப³ராக³விரத்தஸ்ஸ தண்ஹாக்க²யவிமுத்தினோ. யோ ஹி ஸப்³ப³ராகே³ஹிபி விரத்தோ, தண்ஹாக்க²யே ச நிப்³பா³னே பவத்தாய அரஹத்தப²லவிமுத்தியா ஸமன்னாக³தோ, ஏதஸ்ஸ ஏஸனா படினிஸ்ஸட்டா², தி³ட்டி²ட்டா²னா ச ஸமூஹதா . ஸ வே ஸந்தோதி ஸோ ஏவரூபோ கிலேஸஸந்ததாய ஸந்தோ. பஸ்ஸத்³தோ⁴தி த்³வீஹி காயசித்தபஸ்ஸத்³தீ⁴ஹி பஸ்ஸத்³தோ⁴. அபராஜிதோதி ஸப்³ப³கிலேஸே ஜினித்வா டி²தத்தா கேனசி அபராஜிதோ. மானாபி⁴ஸமயாதி மானஸ்ஸ பஹானாபி⁴ஸமயேன. பு³த்³தோ⁴தி சத்தாரி ஸச்சானி பு³ஜ்ஜி²த்வா டி²தோ. இதி இமஸ்மிங் ஸுத்தேபி கா³தா²ஸுபி கீ²ணாஸவோவ கதி²தோதி.
Gāthāsu kāmesanā bhavesanāti etā dve esanā, brahmacariyesanā sahāti tāhiyeva saha brahmacariyesanāti tissopi etā. Idha ṭhatvā esanā paṭinissaṭṭhāti iminā padena saddhiṃ yojanā kātabbā. Iti saccaparāmāso, diṭṭhiṭṭhānā samussayāti ‘‘iti saccaṃ iti sacca’’nti gahaṇaparāmāso ca diṭṭhisaṅkhātāyeva diṭṭhiṭṭhānā ca ye samussitattā uggantvā ṭhitattā samussayāti vuccanti, te sabbepi. Idha ṭhatvā diṭṭhiṭṭhānā samūhatāti iminā padena saddhiṃ yojanā kātabbā. Kassa pana etā esanā paṭinissaṭṭhā, ete ca diṭṭhiṭṭhānā samūhatāti? Sabbarāgavirattassa taṇhākkhayavimuttino. Yo hi sabbarāgehipi viratto, taṇhākkhaye ca nibbāne pavattāya arahattaphalavimuttiyā samannāgato, etassa esanā paṭinissaṭṭhā, diṭṭhiṭṭhānā ca samūhatā . Sa ve santoti so evarūpo kilesasantatāya santo. Passaddhoti dvīhi kāyacittapassaddhīhi passaddho. Aparājitoti sabbakilese jinitvā ṭhitattā kenaci aparājito. Mānābhisamayāti mānassa pahānābhisamayena. Buddhoti cattāri saccāni bujjhitvā ṭhito. Iti imasmiṃ suttepi gāthāsupi khīṇāsavova kathitoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. பதிலீனஸுத்தங் • 8. Patilīnasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. பதிலீனஸுத்தவண்ணனா • 8. Patilīnasuttavaṇṇanā
