| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૩. પત્તવગ્ગો
3. Pattavaggo
૧૬૪. અતિરેકપત્તં દસાહં અતિક્કામેન્તો એકં આપત્તિં આપજ્જતિ. નિસ્સગ્ગિયં પાચિત્તિયં.
164. Atirekapattaṃ dasāhaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
ઊનપઞ્ચબન્ધનેન પત્તેન અઞ્ઞં નવં પત્તં ચેતાપેન્તો દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.
Ūnapañcabandhanena pattena aññaṃ navaṃ pattaṃ cetāpento dve āpattiyo āpajjati. Cetāpeti, payoge dukkaṭaṃ; cetāpite nissaggiyaṃ pācittiyaṃ.
ભેસજ્જાનિ પટિગ્ગહેત્વા સત્તાહં અતિક્કામેન્તો એકં આપત્તિં આપજ્જતિ. નિસ્સગ્ગિયં પાચિત્તિયં.
Bhesajjāni paṭiggahetvā sattāhaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
અતિરેકમાસે સેસે ગિમ્હાને વસ્સિકસાટિકચીવરં પરિયેસન્તો દ્વે આપત્તિયો આપજ્જતિ. પરિયેસતિ, પયોગે દુક્કટં; પરિયિટ્ઠે નિસ્સગ્ગિયં પાચિત્તિયં.
Atirekamāse sese gimhāne vassikasāṭikacīvaraṃ pariyesanto dve āpattiyo āpajjati. Pariyesati, payoge dukkaṭaṃ; pariyiṭṭhe nissaggiyaṃ pācittiyaṃ.
ભિક્ખુસ્સ સામં ચીવરં દત્વા કુપિતો અનત્તમનો અચ્છિન્દન્તો દ્વે આપત્તિયો આપજ્જતિ. અચ્છિન્દતિ, પયોગે દુક્કટં; અચ્છિન્ને નિસ્સગ્ગિયં પાચિત્તિયં.
Bhikkhussa sāmaṃ cīvaraṃ datvā kupito anattamano acchindanto dve āpattiyo āpajjati. Acchindati, payoge dukkaṭaṃ; acchinne nissaggiyaṃ pācittiyaṃ.
સામં સુત્તં વિઞ્ઞાપેત્વા તન્તવાયેહિ ચીવરં વાયાપેન્તો દ્વે આપત્તિયો આપજ્જતિ. વાયાપેતિ, પયોગે દુક્કટં; વાયાપિતે નિસ્સગ્ગિયં પાચિત્તિયં.
Sāmaṃ suttaṃ viññāpetvā tantavāyehi cīvaraṃ vāyāpento dve āpattiyo āpajjati. Vāyāpeti, payoge dukkaṭaṃ; vāyāpite nissaggiyaṃ pācittiyaṃ.
પુબ્બે અપ્પવારિતો અઞ્ઞાતકસ્સ ગહપતિકસ્સ તન્તવાયે ઉપસઙ્કમિત્વા ચીવરે વિકપ્પં આપજ્જન્તો દ્વે આપત્તિયો આપજ્જતિ. વિકપ્પં આપજ્જતિ, પયોગે દુક્કટં; વિકપ્પં આપન્ને નિસ્સગ્ગિયં પાચિત્તિયં.
Pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajjanto dve āpattiyo āpajjati. Vikappaṃ āpajjati, payoge dukkaṭaṃ; vikappaṃ āpanne nissaggiyaṃ pācittiyaṃ.
અચ્ચેકચીવરં પટિગ્ગહેત્વા ચીવરકાલસમયં અતિક્કામેન્તો એકં આપત્તિં આપજ્જતિ. નિસ્સગ્ગિયં પાચિત્તિયં.
Accekacīvaraṃ paṭiggahetvā cīvarakālasamayaṃ atikkāmento ekaṃ āpattiṃ āpajjati. Nissaggiyaṃ pācittiyaṃ.
તિણ્ણં ચીવરાનં અઞ્ઞતરં ચીવરં અન્તરઘરે નિક્ખિપિત્વા અતિરેકછારત્તં વિપ્પવસન્તો એકં આપત્તિં આપજ્જતિ. નિસ્સગ્ગિયં પાચિત્તિયં.
Tiṇṇaṃ cīvarānaṃ aññataraṃ cīvaraṃ antaraghare nikkhipitvā atirekachārattaṃ vippavasanto ekaṃ āpattiṃ āpajjati. Nissaggiyaṃ pācittiyaṃ.
જાનં સઙ્ઘિકં લાભં પરિણતં અત્તનો પરિણામેન્તો દ્વે આપત્તિયો આપજ્જતિ. પરિણામેતિ, પયોગે દુક્કટં; પરિણામિતે નિસ્સગ્ગિયં પાચિત્તિયં.
Jānaṃ saṅghikaṃ lābhaṃ pariṇataṃ attano pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite nissaggiyaṃ pācittiyaṃ.
પત્તવગ્ગો તતિયો.
Pattavaggo tatiyo.
તિંસ નિસ્સગ્ગિયા પાચિત્તિયા નિટ્ઠિતા.
Tiṃsa nissaggiyā pācittiyā niṭṭhitā.
