| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
பவாரணக்க²ந்த⁴ககதா²வண்ணனா
Pavāraṇakkhandhakakathāvaṇṇanā
2633. ‘‘பவாரணா’’தி இத³ங் ‘‘சாதுத்³த³ஸீ’’திஆதீ³ஹி பச்சேகங் யோஜேதப்³ப³ங். தஸ்மிங் தஸ்மிங் தி³னே காதப்³பா³ பவாரணா அபே⁴தோ³பசாரேன ததா² வுத்தா. ஸாமக்³கீ³ உபோஸத²க்க²ந்த⁴ககதா²வண்ணனாய வுத்தஸரூபாவ. ஸாமக்³கி³பவாரணங் கரொந்தேஹி ச பட²மங் பவாரணங் ட²பெத்வா பாடிபத³தோ பட்டா²ய யாவ கத்திகசாதுமாஸிபுண்ணமா எத்த²ந்தரே காதப்³பா³, ததோ பச்சா² வா புரே வா ந வட்டதி. தேவாசீ த்³வேகவாசீதி ‘‘ஸுணாது மே, ப⁴ந்தே…பே॰… தேவாசிகங் பவாரெய்ய, த்³வேவாசிகங் பவாரெய்ய, ஏகவாசிகங் பவாரெய்யா’’தி தங் தங் ஞத்திங் ட²பெத்வா காதப்³பா³ பவாரணா வுச்சதி.
2633.‘‘Pavāraṇā’’ti idaṃ ‘‘cātuddasī’’tiādīhi paccekaṃ yojetabbaṃ. Tasmiṃ tasmiṃ dine kātabbā pavāraṇā abhedopacārena tathā vuttā. Sāmaggī uposathakkhandhakakathāvaṇṇanāya vuttasarūpāva. Sāmaggipavāraṇaṃ karontehi ca paṭhamaṃ pavāraṇaṃ ṭhapetvā pāṭipadato paṭṭhāya yāva kattikacātumāsipuṇṇamā etthantare kātabbā, tato pacchā vā pure vā na vaṭṭati. Tevācī dvekavācīti ‘‘suṇātu me, bhante…pe… tevācikaṃ pavāreyya, dvevācikaṃ pavāreyya, ekavācikaṃ pavāreyyā’’ti taṃ taṃ ñattiṃ ṭhapetvā kātabbā pavāraṇā vuccati.
2634. தீணி கம்மானி முஞ்சித்வா, அந்தேனேவ பவாரயேதி ‘‘சத்தாரிமானி, பி⁴க்க²வே, பவாரணகம்மானி, அத⁴ம்மேன வக்³க³ங் பவாரணகம்மங்…பே॰… த⁴ம்மேன ஸமக்³க³ங் பவாரணகம்ம’’ந்தி (மஹாவ॰ 212) வத்வா ‘‘தத்ர, பி⁴க்க²வே , யதி³த³ங் அத⁴ம்மேன வக்³க³ங் பவாரணகம்மங், ந, பி⁴க்க²வே, ஏவரூபங் பவாரணகம்மங் காதப்³ப³ங்…பே॰… தத்ர, பி⁴க்க²வே, யதி³த³ங் த⁴ம்மேன ஸமக்³க³ங் பவாரணகம்மங், ஏவரூபங், பி⁴க்க²வே, பவாரணகம்மங் காதப்³ப³’’ந்திஆதி³வசனதோ (மஹாவ॰ 212) தீணி அகத்தப்³பா³னி பவாரணகம்மானி முஞ்சித்வா காதுங் அனுஞ்ஞாதேன சதுத்தே²ன பவாரணகம்மேன பவாரெய்யாதி அத்தோ². தஸ்ஸ விபா⁴கே³கதே³ஸங் ‘‘பஞ்ச யஸ்மிங் பனாவாஸே’’திஆதி³னா வக்க²தி.
2634.Tīṇi kammāni muñcitvā, anteneva pavārayeti ‘‘cattārimāni, bhikkhave, pavāraṇakammāni, adhammena vaggaṃ pavāraṇakammaṃ…pe… dhammena samaggaṃ pavāraṇakamma’’nti (mahāva. 212) vatvā ‘‘tatra, bhikkhave , yadidaṃ adhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ…pe… tatra, bhikkhave, yadidaṃ dhammena samaggaṃ pavāraṇakammaṃ, evarūpaṃ, bhikkhave, pavāraṇakammaṃ kātabba’’ntiādivacanato (mahāva. 212) tīṇi akattabbāni pavāraṇakammāni muñcitvā kātuṃ anuññātena catutthena pavāraṇakammena pavāreyyāti attho. Tassa vibhāgekadesaṃ ‘‘pañca yasmiṃ panāvāse’’tiādinā vakkhati.
2635. புப்³ப³கிச்சங் ஸமாபெத்வாதி –
2635.Pubbakiccaṃ samāpetvāti –
‘‘ஸம்மஜ்ஜனீ பதீ³போ ச, உத³கங் ஆஸனேன ச;
‘‘Sammajjanī padīpo ca, udakaṃ āsanena ca;
பவாரணாய ஏதானி, ‘புப்³ப³கரண’ந்தி வுச்சதி.
Pavāraṇāya etāni, ‘pubbakaraṇa’nti vuccati.
‘‘ச²ந்த³பாரிஸுத்³தி⁴உதுக்கா²னங், பி⁴க்கு²க³ணனா ச ஓவாதோ³;
‘‘Chandapārisuddhiutukkhānaṃ, bhikkhugaṇanā ca ovādo;
பவாரணாய ஏதானி, ‘புப்³ப³கிச்ச’ந்தி வுச்சதீ’’தி. –
Pavāraṇāya etāni, ‘pubbakicca’nti vuccatī’’ti. –
வுத்தங் நவவித⁴ங் புப்³ப³கிச்சங் நிட்டா²பெத்வா.
Vuttaṃ navavidhaṃ pubbakiccaṃ niṭṭhāpetvā.
பத்தகல்லே ஸமானிதேதி –
Pattakalle samāniteti –
‘‘பவாரணா யாவதிகா ச பி⁴க்கூ² கம்மப்பத்தா,
‘‘Pavāraṇā yāvatikā ca bhikkhū kammappattā,
ஸபா⁴கா³பத்தியோ ச ந விஜ்ஜந்தி;
Sabhāgāpattiyo ca na vijjanti;
வஜ்ஜனீயா ச புக்³க³லா தஸ்மிங் ந ஹொந்தி,
Vajjanīyā ca puggalā tasmiṃ na honti,
‘பத்தகல்ல’ந்தி வுச்சதீ’’தி. –
‘Pattakalla’nti vuccatī’’ti. –
வுத்தே சதுப்³பி³தே⁴ பத்தகல்லே ஸமோதா⁴னிதே பரிஸமாபிதே.
Vutte catubbidhe pattakalle samodhānite parisamāpite.
ஞத்திங் ட²பெத்வாதி ‘‘ஸுணாது மே, ப⁴ந்தே ஸங்கோ⁴, அஜ்ஜ பவாரணா, யதி³ ஸங்க⁴ஸ்ஸ பத்தகல்லங், ஸங்கோ⁴ பவாரெய்யா’’தி (மஹாவ॰ 210) ஏவங் ஸப்³ப³ஸங்கா³ஹிகவஸேன ச ‘‘தேவாசிகங் பவாரெய்யா’’தி ச தா³னாதி³கரணேன யேபு⁴ய்யேன ரத்தியா கே²பிதாய ச ராஜாதி³அந்தராயே ஸதி ச தத³னுரூபதோ ‘‘த்³வேவாசிகங், ஏகவாசிகங், ஸமானவஸ்ஸிகங் பவாரெய்யா’’தி ச ஞத்திங் ட²பெத்வா , தாஸங் விஸேஸோ அட்ட²கதா²யங் த³ஸ்ஸிதோயேவ. யதா²ஹ –
Ñattiṃ ṭhapetvāti ‘‘suṇātu me, bhante saṅgho, ajja pavāraṇā, yadi saṅghassa pattakallaṃ, saṅgho pavāreyyā’’ti (mahāva. 210) evaṃ sabbasaṅgāhikavasena ca ‘‘tevācikaṃ pavāreyyā’’ti ca dānādikaraṇena yebhuyyena rattiyā khepitāya ca rājādiantarāye sati ca tadanurūpato ‘‘dvevācikaṃ, ekavācikaṃ, samānavassikaṃ pavāreyyā’’ti ca ñattiṃ ṭhapetvā , tāsaṃ viseso aṭṭhakathāyaṃ dassitoyeva. Yathāha –
‘‘ஏவஞ்ஹி வுத்தே தேவாசிகஞ்ச த்³வேவாசிகஞ்ச ஏகவாசிகஞ்ச பவாரேதுங் வட்டதி, ஸமானவஸ்ஸிகங் ந வட்டதி. ‘தேவாசிகங் பவாரெய்யா’தி வுத்தே பன தேவாசிகமேவ வட்டதி, அஞ்ஞங் ந வட்டதி, ‘த்³வேவாசிகங் பவாரெய்யா’தி வுத்தே த்³வேவாசிகஞ்ச தேவாசிகஞ்ச வட்டதி, ஏகவாசிகஞ்ச ஸமானவஸ்ஸிகஞ்ச ந வட்டதி. ‘ஏகவாசிகங் பவாரெய்யா’தி வுத்தே பன ஏகவாசிகத்³வேவாசிகதேவாசிகானி வட்டந்தி, ஸமானவஸ்ஸிகமேவ ந வட்டதி. ‘ஸமானவஸ்ஸிக’ந்தி வுத்தே ஸப்³ப³ங் வட்டதீ’’தி (மஹாவ॰ அட்ட²॰ 210).
‘‘Evañhi vutte tevācikañca dvevācikañca ekavācikañca pavāretuṃ vaṭṭati, samānavassikaṃ na vaṭṭati. ‘Tevācikaṃ pavāreyyā’ti vutte pana tevācikameva vaṭṭati, aññaṃ na vaṭṭati, ‘dvevācikaṃ pavāreyyā’ti vutte dvevācikañca tevācikañca vaṭṭati, ekavācikañca samānavassikañca na vaṭṭati. ‘Ekavācikaṃ pavāreyyā’ti vutte pana ekavācikadvevācikatevācikāni vaṭṭanti, samānavassikameva na vaṭṭati. ‘Samānavassika’nti vutte sabbaṃ vaṭṭatī’’ti (mahāva. aṭṭha. 210).
காதப்³பா³தி தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘ஸங்க⁴ங், ஆவுஸோ, பவாரேமி தி³ட்டே²ன வா…பே॰… ததியம்பி ஆவுஸோ, ஸங்க⁴ங் பவாரேமி தி³ட்டே²ன வா…பே॰… பஸ்ஸந்தோ படிகரிஸ்ஸாமீ’’தி (மஹாவ॰ 210) வுத்தனயேன காதப்³பா³. நவகேன பி⁴க்கு²னா ஏகங்ஸங் உத்தராஸங்க³ங் கரித்வா…பே॰… ததியம்பி, ப⁴ந்தே, ஸங்க⁴ங் பவாரேமி தி³ட்டே²ன வா…பே॰… பஸ்ஸந்தோ படிகரிஸ்ஸாமீதி (மஹாவ॰ 210) வுத்தனயேன காதப்³பா³.
Kātabbāti therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo ‘‘saṅghaṃ, āvuso, pavāremi diṭṭhena vā…pe… tatiyampi āvuso, saṅghaṃ pavāremi diṭṭhena vā…pe… passanto paṭikarissāmī’’ti (mahāva. 210) vuttanayena kātabbā. Navakena bhikkhunā ekaṃsaṃ uttarāsaṅgaṃ karitvā…pe… tatiyampi, bhante, saṅghaṃ pavāremi diṭṭhena vā…pe… passanto paṭikarissāmīti (mahāva. 210) vuttanayena kātabbā.
2636. தே²ரேஸு பவாரெந்தேஸு யோ பன நவோ, ஸோ ஸயங் யாவ பவாரேதி, தாவ உக்குடிகங் நிஸீதெ³ய்யாதி யோஜனா.
2636. Theresu pavārentesu yo pana navo, so sayaṃ yāva pavāreti, tāva ukkuṭikaṃ nisīdeyyāti yojanā.
2637. சத்தாரோ வா தயோபி வா ஏகாவாஸே ஏகஸீமாயங் வஸந்தி சே, ஞத்திங் வத்வா ‘‘ஸுணந்து மே, ஆயஸ்மந்தோ, அஜ்ஜ பவாரணா, யதா³யஸ்மந்தானங் பத்தகல்லங், மயங் அஞ்ஞமஞ்ஞங் பவாரெய்யாமா’’தி (மஹாவ॰ 216) க³ணஞத்திங் ட²பெத்வா பவாரெய்யுந்தி யோஜனா.
2637. Cattāro vā tayopi vā ekāvāse ekasīmāyaṃ vasanti ce, ñattiṃ vatvā ‘‘suṇantu me, āyasmanto, ajja pavāraṇā, yadāyasmantānaṃ pattakallaṃ, mayaṃ aññamaññaṃ pavāreyyāmā’’ti (mahāva. 216) gaṇañattiṃ ṭhapetvā pavāreyyunti yojanā.
பவாரெய்யுந்தி எத்த² தே²ரேன பி⁴க்கு²னா ஏகங்ஸங் உத்தராஸங்க³ங் கத்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே தயோ வா த்³வே வா பி⁴க்கூ² ஏவமஸ்ஸு வசனீயா ‘‘அஹங், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மங் ஆயஸ்மந்தோ அனுகம்பங் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மங் ஆயஸ்மந்தோ அனுகம்பங் உபாதா³ய, பஸ்ஸந்தோ படிகரிஸ்ஸாமீ’’தி (மஹாவ॰ 216) பவாரேதப்³ப³ங். நவேனபி ‘‘அஹங், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மங் ஆயஸ்மந்தோ அனுகம்பங் உபாதா³ய , பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மங் ஆயஸ்மந்தோ அனுகம்பங் உபாதா³ய, பஸ்ஸந்தோ படிகரிஸ்ஸாமீ’’தி பவாரேதப்³ப³ங்.
Pavāreyyunti ettha therena bhikkhunā ekaṃsaṃ uttarāsaṅgaṃ katvā ukkuṭikaṃ nisīditvā añjaliṃ paggahetvā te tayo vā dve vā bhikkhū evamassu vacanīyā ‘‘ahaṃ, āvuso, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya, passanto paṭikarissāmi. Dutiyampi…pe… tatiyampi ahaṃ, āvuso, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya, passanto paṭikarissāmī’’ti (mahāva. 216) pavāretabbaṃ. Navenapi ‘‘ahaṃ, bhante, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya , passanto paṭikarissāmi. Dutiyampi…pe… tatiyampi ahaṃ, bhante, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya, passanto paṭikarissāmī’’ti pavāretabbaṃ.
2638. அஞ்ஞமஞ்ஞங் பவாரெய்யுங், வினா ஞத்திங் து³வே ஜனா. தேஸு தே²ரேன ‘‘அஹங், ஆவுஸோ, ஆயஸ்மந்தங் பவாரேமி தி³ட்டே²ன வா ஸுதேன வா பரிஸங்காய வா, வத³து மங் ஆயஸ்மா அனுகம்பங் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ஆவுஸோ, ஆயஸ்மந்தங் பவாரேமி…பே॰… படிகரிஸ்ஸாமீ’’தி (மஹாவ॰ 217) பவாரேதப்³ப³ங். நவேனபி ‘‘அஹங், ப⁴ந்தே, ஆயஸ்மந்தங் பவாரேமி…பே॰… வத³து மங் ஆயஸ்மா அனுகம்பங் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ப⁴ந்தே, ஆயஸ்மந்தங் பவாரேமி…பே॰… படிகரிஸ்ஸாமீ’’தி பவாரேதப்³ப³ங்.
2638.Aññamaññaṃ pavāreyyuṃ, vinā ñattiṃ duve janā. Tesu therena ‘‘ahaṃ, āvuso, āyasmantaṃ pavāremi diṭṭhena vā sutena vā parisaṅkāya vā, vadatu maṃ āyasmā anukampaṃ upādāya, passanto paṭikarissāmi. Dutiyampi…pe… tatiyampi ahaṃ, āvuso, āyasmantaṃ pavāremi…pe… paṭikarissāmī’’ti (mahāva. 217) pavāretabbaṃ. Navenapi ‘‘ahaṃ, bhante, āyasmantaṃ pavāremi…pe… vadatu maṃ āyasmā anukampaṃ upādāya, passanto paṭikarissāmi. Dutiyampi…pe… tatiyampi ahaṃ, bhante, āyasmantaṃ pavāremi…pe… paṭikarissāmī’’ti pavāretabbaṃ.
அதி⁴ட்டெ²ய்யாதி புப்³ப³கிச்சங் ஸமாபெத்வா ‘‘அஜ்ஜ மே பவாரணா சாதுத்³த³ஸீ’’தி வா ‘‘பன்னரஸீ’’தி வா வத்வா ‘‘அதி⁴ட்டா²மீ’’தி அதி⁴ட்டெ²ய்ய . யதா²ஹ ‘‘அஜ்ஜ மே பவாரணாதி எத்த² ஸசே சாதுத்³த³ஸிகா ஹோதி, ‘அஜ்ஜ மே பவாரணா சாதுத்³த³ஸீ’தி, ஸசே பன்னரஸிகா, ‘அஜ்ஜ மே பவாரணா பன்னரஸீ’தி ஏவங் அதி⁴ட்டா²தப்³ப³’’ந்தி (மஹாவ॰ அட்ட²॰ 218), இமினா ஸப்³ப³ஸங்கா³ஹாதி³ஞத்தீஸு ச தஸ்மிங் தஸ்மிங் தி³வஸே ஸோ ஸோ வோஹாரோ காதப்³போ³தி தீ³பிதமேவ.
Adhiṭṭheyyāti pubbakiccaṃ samāpetvā ‘‘ajja me pavāraṇā cātuddasī’’ti vā ‘‘pannarasī’’ti vā vatvā ‘‘adhiṭṭhāmī’’ti adhiṭṭheyya . Yathāha ‘‘ajja me pavāraṇāti ettha sace cātuddasikā hoti, ‘ajja me pavāraṇā cātuddasī’ti, sace pannarasikā, ‘ajja me pavāraṇā pannarasī’ti evaṃ adhiṭṭhātabba’’nti (mahāva. aṭṭha. 218), iminā sabbasaṅgāhādiñattīsu ca tasmiṃ tasmiṃ divase so so vohāro kātabboti dīpitameva.
ஸேஸா ஸங்க⁴பவாரணாதி பஞ்சஹி, அதிரேகேஹி வா பி⁴க்கூ²ஹி கத்தப்³பா³ பவாரணா ஸங்க⁴பவாரணா.
Sesā saṅghapavāraṇāti pañcahi, atirekehi vā bhikkhūhi kattabbā pavāraṇā saṅghapavāraṇā.
2639. பவாரிதேதி பட²மபவாரணாய பவாரிதே. அனாக³தோதி கேனசி அந்தராயேன புரிமிகாய ச பச்சி²மிகாய ச வஸ்ஸூபனாயிகாய வஸ்ஸங் அனுபக³தோ. அவுத்தோ²தி பச்சி²மிகாய உபக³தோ. வுத்தஞ்ஹி கு²த்³த³ஸிக்கா²வண்ணனாய ‘‘அவுத்தோ²தி பச்சி²மிகாய உபக³தோ அபரினிட்டி²தத்தா ‘அவுத்தோ²’தி வுச்சதீ’’தி. பாரிஸுத்³தி⁴உபோஸத²ங் கரெய்யாதி யோஜனா. எத்த² ‘‘தேஸங் ஸந்திகே’’தி ஸேஸோ.
2639.Pavāriteti paṭhamapavāraṇāya pavārite. Anāgatoti kenaci antarāyena purimikāya ca pacchimikāya ca vassūpanāyikāya vassaṃ anupagato. Avutthoti pacchimikāya upagato. Vuttañhi khuddasikkhāvaṇṇanāya ‘‘avutthoti pacchimikāya upagato apariniṭṭhitattā ‘avuttho’ti vuccatī’’ti. Pārisuddhiuposathaṃ kareyyāti yojanā. Ettha ‘‘tesaṃ santike’’ti seso.
2640-1. யஸ்மிங் பனாவாஸே பஞ்ச வா சத்தாரோ வா தயோ வா ஸமணா வஸந்தி, தே தத்த² ஏகேகஸ்ஸ பவாரணங் ஹரித்வான ஸசே அஞ்ஞமஞ்ஞங் பவாரெந்தி, ஆபத்தி து³க்கடந்தி யோஜனா.
2640-1. Yasmiṃ panāvāse pañca vā cattāro vā tayo vā samaṇā vasanti, te tattha ekekassa pavāraṇaṃ haritvāna sace aññamaññaṃ pavārenti, āpatti dukkaṭanti yojanā.
ஸேஸந்தி ‘‘அத⁴ம்மேன ஸமக்³க³’’ந்திஆதி³கங் வினிச்ச²யங். இதா⁴தி இமஸ்மிங் பவாரணாதி⁴காரே. பு³தோ⁴தி வினயத⁴ரோ. உபோஸதே² வுத்தனயேனாதி உபோஸத²வினிச்ச²யே வுத்தக்கமேன. நயேதி ஜானெய்ய.
Sesanti ‘‘adhammena samagga’’ntiādikaṃ vinicchayaṃ. Idhāti imasmiṃ pavāraṇādhikāre. Budhoti vinayadharo. Uposathe vuttanayenāti uposathavinicchaye vuttakkamena. Nayeti jāneyya.
2642. ஸம்பாதே³தத்தனோ ஸுசிந்தி அத்தனோ உபோஸத²ங் ஸம்பாதே³தி. ஸப்³ப³ங் ஸாதே⁴தீதி உபோஸதா²தி³ஸப்³ப³ங் கம்மங் நிப்பா²தே³தி. நத்தனோதி அத்தனோ உபோஸத²ங் ந நிப்பா²தே³தி.
2642.Sampādetattano sucinti attano uposathaṃ sampādeti. Sabbaṃ sādhetīti uposathādisabbaṃ kammaṃ nipphādeti. Nattanoti attano uposathaṃ na nipphādeti.
2643. தஸ்மாதி யஸ்மா அத்தனோ ஸுசிங் ந ஸாதே⁴தி, தஸ்மா. உபி⁴ன்னந்தி அத்தனோ ச ஸங்க⁴ஸ்ஸ ச. கிச்சஸித்³த⁴த்த²மேவிதா⁴தி உபோஸதா²தி³கம்மனிப்பஜ்ஜனத்த²ங் இத⁴ இமஸ்மிங் உபோஸத²கம்மாதி³பகரணே. பாரிஸுத்³தி⁴பீதி எத்த² பி-ஸத்³தே³ன பவாரணா ஸங்க³ஹிதா. தேனேவ வக்க²தி ‘‘ச²ந்த³ங் வா பாரிஸுத்³தி⁴ங் வா, க³ஹெத்வா வா பவாரண’’ந்தி.
2643.Tasmāti yasmā attano suciṃ na sādheti, tasmā. Ubhinnanti attano ca saṅghassa ca. Kiccasiddhatthamevidhāti uposathādikammanippajjanatthaṃ idha imasmiṃ uposathakammādipakaraṇe. Pārisuddhipīti ettha pi-saddena pavāraṇā saṅgahitā. Teneva vakkhati ‘‘chandaṃ vā pārisuddhiṃ vā, gahetvā vā pavāraṇa’’nti.
ச²ந்த³பாரிஸுத்³தி⁴பவாரணங் தெ³ந்தேன ஸசே ஸாபத்திகோ ஹோதி, ஆபத்திங் தே³ஸெத்வா ஏகங்ஸங் உத்தராஸங்க³ங் கத்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ச²ந்தா³தி³ஹாரகோ பி⁴க்கு² வத்தப்³போ³ ‘‘ச²ந்த³ங் த³ம்மி, ச²ந்த³ங் மே ஹர, ச²ந்த³ங் மே ஆரோசேஹீ’’தி (மஹாவ॰ 165), ‘‘பாரிஸுத்³தி⁴ங் த³ம்மி, பாரிஸுத்³தி⁴ங் மே ஹர, பாரிஸுத்³தி⁴ங் மே ஆரோசேஹீ’’தி (மஹாவ॰ 164), ‘‘பவாரணங் த³ம்மி, பவாரணங் மே ஹர, பவாரணங் மே ஆரோசேஹி, மமத்தா²ய பவாரேஹீ’’தி (மஹாவ॰ 213).
Chandapārisuddhipavāraṇaṃ dentena sace sāpattiko hoti, āpattiṃ desetvā ekaṃsaṃ uttarāsaṅgaṃ katvā ukkuṭikaṃ nisīditvā añjaliṃ paggahetvā chandādihārako bhikkhu vattabbo ‘‘chandaṃ dammi, chandaṃ me hara, chandaṃ me ārocehī’’ti (mahāva. 165), ‘‘pārisuddhiṃ dammi, pārisuddhiṃ me hara, pārisuddhiṃ me ārocehī’’ti (mahāva. 164), ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti (mahāva. 213).
2644. ‘‘ச²ந்தோ³ ஏகேனா’’தி பத³ச்சே²தோ³. ஏகேன ப³ஹூனம்பி ச²ந்தோ³ ஹாதப்³போ³, ததா² பாரிஸுத்³தி⁴ ஹாதப்³பா³. பி-ஸத்³தே³ன பவாரணா ஹாதப்³பா³தி யோஜனா. பரம்பராஹடோ ச²ந்தோ³தி ப³ஹூனங் வா ஏகஸ்ஸ வா ச²ந்தா³தி³ஹாரகஸ்ஸ ஹத்த²தோ அந்தரா அஞ்ஞேன க³ஹிதா ச²ந்த³பாரிஸுத்³தி⁴பவாரணா. விஸுத்³தி⁴யா ந க³ச்ச²தி அனவஜ்ஜபா⁴வாய ந பாபுணாதி பி³ளாலஸங்க²லிகச²ந்தா³தீ³னங் ஸங்க⁴மஜ்ஜ²ங் அக³மனேன வக்³க³பா⁴வகரணதோ.
2644. ‘‘Chando ekenā’’ti padacchedo. Ekena bahūnampi chando hātabbo, tathā pārisuddhi hātabbā. Pi-saddena pavāraṇā hātabbāti yojanā. Paramparāhaṭo chandoti bahūnaṃ vā ekassa vā chandādihārakassa hatthato antarā aññena gahitā chandapārisuddhipavāraṇā. Visuddhiyā na gacchati anavajjabhāvāya na pāpuṇāti biḷālasaṅkhalikachandādīnaṃ saṅghamajjhaṃ agamanena vaggabhāvakaraṇato.
எத்த² ச யதா² பி³ளாலஸங்க²லிகாய பட²மவலயங் து³தியவலயங் பாபுணாதி, ந ததியங், ஏவமிமேபி ச²ந்தா³த³யோ தா³யகேன யஸ்ஸ தி³ன்னா, ததோ அஞ்ஞத்த² ந க³ச்ச²தீதி பி³ளாலஸங்க²லிகாஸதி³ஸத்தா ‘‘பி³ளாலஸங்க²லிகா’’தி வுத்தா. பி³ளாலஸங்க²லிகாக்³க³ஹணஞ்செத்த² யாஸங் காஸஞ்சி ஸங்க²லிகானங் உபலக்க²ணமத்தந்தி த³ட்ட²ப்³ப³ங்.
Ettha ca yathā biḷālasaṅkhalikāya paṭhamavalayaṃ dutiyavalayaṃ pāpuṇāti, na tatiyaṃ, evamimepi chandādayo dāyakena yassa dinnā, tato aññattha na gacchatīti biḷālasaṅkhalikāsadisattā ‘‘biḷālasaṅkhalikā’’ti vuttā. Biḷālasaṅkhalikāggahaṇañcettha yāsaṃ kāsañci saṅkhalikānaṃ upalakkhaṇamattanti daṭṭhabbaṃ.
2645-6. ச²ந்த³ங் வா பாரிஸுத்³தி⁴ங் வா பவாரணங் வா க³ஹெத்வா ச²ந்தா³தி³ஹாரகோ ஸங்க⁴மப்பத்வா ஸசே ஸாமணேராதி³பா⁴வங் படிஜானெய்ய வா விப்³ப⁴மெய்ய வா மரெய்ய வா, தங் ஸப்³ப³ங் ச²ந்தா³தி³பா⁴வங் நாஹடங் ஹோதி, ஸங்க⁴ங் பத்வா ஏவங் ஸியா ஸாமணேராதி³பா⁴வங் படிஜானந்தோ, விப்³ப⁴ந்தோ, காலகதோ வா ப⁴வெய்ய, தங் ஸப்³ப³ங் ஹடங் ஆனீதங் ஹோதீதி யோஜனா.
2645-6. Chandaṃ vā pārisuddhiṃ vā pavāraṇaṃ vā gahetvā chandādihārako saṅghamappatvā sace sāmaṇerādibhāvaṃ paṭijāneyya vā vibbhameyya vā mareyya vā, taṃ sabbaṃ chandādibhāvaṃ nāhaṭaṃ hoti, saṅghaṃ patvā evaṃ siyā sāmaṇerādibhāvaṃ paṭijānanto, vibbhanto, kālakato vā bhaveyya, taṃ sabbaṃ haṭaṃ ānītaṃ hotīti yojanā.
தத்த² ஸாமணேராதி³பா⁴வங் வா படிஜானெய்யாதி ‘‘அஹங் ஸாமணேரோ’’திஆதி³னா பூ⁴தங் ஸாமணேராதி³பா⁴வங் கதெ²ய்ய, பச்சா² ஸாமணேரபூ⁴மியங் பதிட்ட²ஹெய்யாதி அத்தோ². ஆதி³-ஸத்³தே³ன அந்திமவத்து²ங் அஜ்ஜா²பன்னோ க³ஹிதோ.
Tattha sāmaṇerādibhāvaṃ vā paṭijāneyyāti ‘‘ahaṃ sāmaṇero’’tiādinā bhūtaṃ sāmaṇerādibhāvaṃ katheyya, pacchā sāmaṇerabhūmiyaṃ patiṭṭhaheyyāti attho. Ādi-saddena antimavatthuṃ ajjhāpanno gahito.
2647. ஸங்க⁴ங் பத்வாதி அந்தமஸோ தங்தங்கம்மப்பத்தஸ்ஸ சதுவக்³கா³தி³ஸங்க⁴ஸ்ஸ ஹத்த²பாஸங் பத்வாதி அத்தோ². பமத்தோதி பமாத³ங் ஸதிஸம்மோஸங் பத்தோ. ஸுத்தோதி நித்³தூ³பக³தோ. கி²த்தசித்தகோதி யக்கா²தீ³ஹி விக்கே²பமாபாதி³தசித்தோ. நாரோசேதீதி அத்தனோ ச²ந்தா³தீ³னங் ஆஹடபா⁴வங் ஏகஸ்ஸாபி பி⁴க்கு²னோ ந கதே²தி. ஸஞ்சிச்சாதி ஸஞ்சேதெத்வா ஜானந்தோயேவ அனாத³ரியோ நாரோசேதி, து³க்கடங் ஹோதி.
2647.Saṅghaṃ patvāti antamaso taṃtaṃkammappattassa catuvaggādisaṅghassa hatthapāsaṃ patvāti attho. Pamattoti pamādaṃ satisammosaṃ patto. Suttoti niddūpagato. Khittacittakoti yakkhādīhi vikkhepamāpāditacitto. Nārocetīti attano chandādīnaṃ āhaṭabhāvaṃ ekassāpi bhikkhuno na katheti. Sañciccāti sañcetetvā jānantoyeva anādariyo nāroceti, dukkaṭaṃ hoti.
2648. யே தேதி யே தே பி⁴க்கூ² தே²ரா வா நவா வா மஜ்ஜி²மா வா. விபஸ்ஸனாதி ஸஹசரியேன ஸமதோ²பி க³ய்ஹதி. ஸமத²விபஸ்ஸனா ச இத⁴ தருணாயேவ அதி⁴ப்பேதா, தஸ்மா விபஸ்ஸனாயுத்தாதி எத்த² தருணாஹி ஸமத²விபஸ்ஸனாஹி ஸமன்னாக³தாதி அத்தோ². ரத்திந்தி³வந்தி அச்சந்தஸங்யோகே³ உபயோக³வசனங். அதந்தி³தாதி அனலஸா.
2648.Ye teti ye te bhikkhū therā vā navā vā majjhimā vā. Vipassanāti sahacariyena samathopi gayhati. Samathavipassanā ca idha taruṇāyeva adhippetā, tasmā vipassanāyuttāti ettha taruṇāhi samathavipassanāhi samannāgatāti attho. Rattindivanti accantasaṃyoge upayogavacanaṃ. Atanditāti analasā.
‘‘ரத்திந்தி³வ’’ந்தி எத்த² ரத்தி-ஸத்³தே³ன ரத்தியாயேவ க³ஹணங், உதா³ஹு ஏகதே³ஸஸ்ஸாதி ஆஹ ‘‘புப்³ப³ரத்தாபரரத்த’’ந்தி. புப்³பா³ ச ஸா ரத்தி சாதி புப்³ப³ரத்தி, பட²மயாமோ, அபரா ச ஸா ரத்தி சாதி அபரரத்தி, பச்சி²மயாமோ, புப்³ப³ரத்தி ச அபரரத்தி சாதி ஸமாஹாரத்³வந்தே³ ஸமாஸந்தே அ-காரபச்சயங் கத்வா ‘‘புப்³ப³ரத்தாபரரத்த’’ந்தி வுத்தங். இதா⁴பி அச்சந்தஸங்யோகே³ உபயோக³வசனங். மஜ்ஜி²மயாமே காயத³ரத²வூபஸமனத்தா²ய ஸுபனங் அனுஞ்ஞாதந்தி தங் வஜ்ஜெத்வா புரிமபச்சி²மயாமேஸு நிரந்தரபா⁴வனானுயோகோ³ காதப்³போ³தி த³ஸ்ஸனத்த²மேவ வுத்தங். விபஸ்ஸனா பராயனா ஸமத²விபஸ்ஸனாவ பரங் அயனங் பதிட்டா² ஏதேஸந்தி விபஸ்ஸனாபராயனா, ஸமத²விபஸ்ஸனாய யுத்தபயுத்தா ஹொந்தீதி வுத்தங் ஹோதி.
‘‘Rattindiva’’nti ettha ratti-saddena rattiyāyeva gahaṇaṃ, udāhu ekadesassāti āha ‘‘pubbarattāpararatta’’nti. Pubbā ca sā ratti cāti pubbaratti, paṭhamayāmo, aparā ca sā ratti cāti apararatti, pacchimayāmo, pubbaratti ca apararatti cāti samāhāradvande samāsante a-kārapaccayaṃ katvā ‘‘pubbarattāpararatta’’nti vuttaṃ. Idhāpi accantasaṃyoge upayogavacanaṃ. Majjhimayāme kāyadarathavūpasamanatthāya supanaṃ anuññātanti taṃ vajjetvā purimapacchimayāmesu nirantarabhāvanānuyogo kātabboti dassanatthameva vuttaṃ. Vipassanā parāyanā samathavipassanāva paraṃ ayanaṃ patiṭṭhā etesanti vipassanāparāyanā, samathavipassanāya yuttapayuttā hontīti vuttaṃ hoti.
2649. லத்³தோ⁴ பா²ஸுவிஹாரோ யேஹி தே லத்³த⁴பா²ஸுவிஹாரா, தேஸங். பா²ஸுவிஹாரோதி ச ஸுக²விஹாரஸ்ஸ மூலகாரணத்தா தருணா ஸமத²விபஸ்ஸனா அதி⁴ப்பேதா, படிலத்³த⁴தருணஸமத²விபஸ்ஸனானந்தி அத்தோ². ஸியா ந பரிஹானிதி பரிஹானி நாம ஏவங் கதே ந ப⁴வெய்ய.
2649. Laddho phāsuvihāro yehi te laddhaphāsuvihārā, tesaṃ. Phāsuvihāroti ca sukhavihārassa mūlakāraṇattā taruṇā samathavipassanā adhippetā, paṭiladdhataruṇasamathavipassanānanti attho. Siyā na parihāniti parihāni nāma evaṃ kate na bhaveyya.
கத்திகமாஸகேதி சீவரமாஸஸங்கா²தே கத்திகமாஸே பவாரணாய ஸங்க³ஹோ வுத்தோதி யோஜனா. கா³தா²ப³ந்த⁴வஸேன ‘‘ஸங்கா³ஹோ’’தி தீ³கோ⁴ கதோ, பவாரணாஸங்க³ஹோ வுத்தோதி அத்தோ². யதா²ஹ –
Kattikamāsaketi cīvaramāsasaṅkhāte kattikamāse pavāraṇāya saṅgaho vuttoti yojanā. Gāthābandhavasena ‘‘saṅgāho’’ti dīgho kato, pavāraṇāsaṅgaho vuttoti attho. Yathāha –
‘‘பவாரணாஸங்க³ஹோ ச நாமாயங் விஸ்ஸட்ட²கம்மட்டா²னானங் தா²மக³தஸமத²விபஸ்ஸனானங் ஸோதாபன்னாதீ³னஞ்ச ந தா³தப்³போ³. தருணஸமத²விபஸ்ஸனாலாபி⁴னோ பன ஸப்³பே³ வா ஹொந்து, உபட்³டா⁴ வா, ஏகபுக்³க³லோ வா, ஏகஸ்ஸபி வஸேன தா³தப்³போ³யேவ. தி³ன்னே பவாரணாஸங்க³ஹே அந்தோவஸ்ஸே பரிஹாரோவ ஹோதி, ஆக³ந்துகா தேஸங் ஸேனாஸனங் க³ஹேதுங் ந லப⁴ந்தி. தேஹிபி சி²ன்னவஸ்ஸேஹி ந ப⁴விதப்³ப³ங், பவாரெத்வா பன அந்தராபி சாரிகங் பக்கமிதுங் லப⁴ந்தீ’’தி (மஹாவ॰ அட்ட²॰ 241).
‘‘Pavāraṇāsaṅgaho ca nāmāyaṃ vissaṭṭhakammaṭṭhānānaṃ thāmagatasamathavipassanānaṃ sotāpannādīnañca na dātabbo. Taruṇasamathavipassanālābhino pana sabbe vā hontu, upaḍḍhā vā, ekapuggalo vā, ekassapi vasena dātabboyeva. Dinne pavāraṇāsaṅgahe antovasse parihārova hoti, āgantukā tesaṃ senāsanaṃ gahetuṃ na labhanti. Tehipi chinnavassehi na bhavitabbaṃ, pavāretvā pana antarāpi cārikaṃ pakkamituṃ labhantī’’ti (mahāva. aṭṭha. 241).
பவாரணாஸங்க³ஹஸ்ஸ தா³னப்பகாரோ பன பாளிதோ க³ஹேதப்³போ³.
Pavāraṇāsaṅgahassa dānappakāro pana pāḷito gahetabbo.
பவாரணக்க²ந்த⁴ககதா²வண்ணனா.
Pavāraṇakkhandhakakathāvaṇṇanā.
