| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
7. бавааран̣аасуд̇д̇ам̣
7. Pavāraṇāsuttaṃ
215. згам̣ самаяам̣ бхаг̇аваа саавад̇т̇ияам̣ вихарад̇и буб̣б̣аараамз миг̇аарамаад̇убаасаад̣̇з махад̇аа бхигкусан̇гхзна сад̣̇д̇хим̣ бан̃жамад̇д̇зхи бхигкусад̇зхи саб̣б̣зхзва араханд̇зхи. д̇зна ко бана самаязна бхаг̇аваа д̇ад̣̇ахубосат̇з баннарасз бавааран̣ааяа бхигкусан̇гхабаривуд̇о аб̣бхогаасз нисинно ход̇и. ат̇а ко бхаг̇аваа д̇ун̣хийбхууд̇ам̣ бхигкусан̇гхам̣ анувилогзд̇ваа бхигкуу ааманд̇зси – ‘‘ханд̣̇а д̣̇аани, бхигкавз, баваарзми во. на жа мз гин̃жи г̇арахат̇а гааяигам̣ ваа ваажасигам̣ ваа’’д̇и.
215. Ekaṃ samayaṃ bhagavā sāvatthiyaṃ viharati pubbārāme migāramātupāsāde mahatā bhikkhusaṅghena saddhiṃ pañcamattehi bhikkhusatehi sabbeheva arahantehi. Tena kho pana samayena bhagavā tadahuposathe pannarase pavāraṇāya bhikkhusaṅghaparivuto abbhokāse nisinno hoti. Atha kho bhagavā tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘handa dāni, bhikkhave, pavāremi vo. Na ca me kiñci garahatha kāyikaṃ vā vācasikaṃ vā’’ti.
звам̣ вуд̇д̇з, ааяасмаа саарибуд̇д̇о удтааяаасанаа згам̣сам̣ уд̇д̇араасан̇г̇ам̣ гарид̇ваа язна бхаг̇аваа д̇знан̃ж̇алим̣ бан̣аамзд̇ваа бхаг̇аванд̇ам̣ зд̇ад̣̇авожа – ‘‘на ко маяам̣, бханд̇з, бхаг̇авад̇о гин̃жи г̇арахаама гааяигам̣ ваа ваажасигам̣ ваа. бхаг̇аваа хи , бханд̇з, ануббаннасса маг̇г̇асса уббаад̣̇зд̇аа, асан̃ж̇аад̇асса маг̇г̇асса сан̃ж̇анзд̇аа, анагкаад̇асса маг̇г̇асса агкаад̇аа, маг̇г̇ан̃н̃уу маг̇г̇авид̣̇уу маг̇г̇аговид̣̇о. маг̇г̇аануг̇аа жа, бханд̇з, зд̇арахи саавагаа вихаранд̇и бажчаа саманнааг̇ад̇аа; ахан̃жа ко, бханд̇з, бхаг̇аванд̇ам̣ баваарзми. на жа мз бхаг̇аваа гин̃жи г̇арахад̇и гааяигам̣ ваа ваажасигам̣ ваа’’д̇и.
Evaṃ vutte, āyasmā sāriputto uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘na kho mayaṃ, bhante, bhagavato kiñci garahāma kāyikaṃ vā vācasikaṃ vā. Bhagavā hi , bhante, anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido. Maggānugā ca, bhante, etarahi sāvakā viharanti pacchā samannāgatā; ahañca kho, bhante, bhagavantaṃ pavāremi. Na ca me bhagavā kiñci garahati kāyikaṃ vā vācasikaṃ vā’’ti.
‘‘на кваахам̣ д̇з, саарибуд̇д̇а, гин̃жи г̇арахаами гааяигам̣ ваа ваажасигам̣ ваа. бан̣д̣ид̇о д̇вам̣, саарибуд̇д̇а, махаабан̃н̃о д̇вам̣, саарибуд̇д̇а , бут̇убан̃н̃о д̇вам̣, саарибуд̇д̇а, хаасабан̃н̃о д̇вам̣, саарибуд̇д̇а, ж̇аванабан̃н̃о д̇вам̣, саарибуд̇д̇а, д̇игкабан̃н̃о д̇вам̣, саарибуд̇д̇а, ниб̣б̣зд̇хигабан̃н̃о д̇вам̣, саарибуд̇д̇а. сзяяат̇ааби, саарибуд̇д̇а, ран̃н̃о жаггавад̇д̇исса ж̇здтабуд̇д̇о бид̇араа бавад̇д̇ид̇ам̣ жаггам̣ саммад̣̇зва ануббавад̇д̇зд̇и; звамзва ко д̇вам̣, саарибуд̇д̇а, маяаа ануд̇д̇арам̣ д̇хаммажаггам̣ бавад̇д̇ид̇ам̣ саммад̣̇зва ануббавад̇д̇зсий’’д̇и.
‘‘Na khvāhaṃ te, sāriputta, kiñci garahāmi kāyikaṃ vā vācasikaṃ vā. Paṇḍito tvaṃ, sāriputta, mahāpañño tvaṃ, sāriputta , puthupañño tvaṃ, sāriputta, hāsapañño tvaṃ, sāriputta, javanapañño tvaṃ, sāriputta, tikkhapañño tvaṃ, sāriputta, nibbedhikapañño tvaṃ, sāriputta. Seyyathāpi, sāriputta, rañño cakkavattissa jeṭṭhaputto pitarā pavattitaṃ cakkaṃ sammadeva anuppavatteti; evameva kho tvaṃ, sāriputta, mayā anuttaraṃ dhammacakkaṃ pavattitaṃ sammadeva anuppavattesī’’ti.
‘‘но жз гира мз, бханд̇з, бхаг̇аваа гин̃жи г̇арахад̇и гааяигам̣ ваа ваажасигам̣ ваа. имзсам̣ бана, бханд̇з, бхаг̇аваа бан̃жаннам̣ бхигкусад̇аанам̣ на гин̃жи г̇арахад̇и гааяигам̣ ваа ваажасигам̣ ваа’’д̇и. ‘‘имзсамби кваахам̣, саарибуд̇д̇а, бан̃жаннам̣ бхигкусад̇аанам̣ на гин̃жи г̇арахаами гааяигам̣ ваа ваажасигам̣ ваа. имзсан̃хи, саарибуд̇д̇а, бан̃жаннам̣ бхигкусад̇аанам̣ садти бхигкуу д̇звиж̇ж̇аа, садти бхигкуу чал̣абхин̃н̃аа, садти бхигкуу убхад̇обхааг̇авимуд̇д̇аа, ат̇а ид̇арз бан̃н̃аавимуд̇д̇аа’’д̇и.
‘‘No ce kira me, bhante, bhagavā kiñci garahati kāyikaṃ vā vācasikaṃ vā. Imesaṃ pana, bhante, bhagavā pañcannaṃ bhikkhusatānaṃ na kiñci garahati kāyikaṃ vā vācasikaṃ vā’’ti. ‘‘Imesampi khvāhaṃ, sāriputta, pañcannaṃ bhikkhusatānaṃ na kiñci garahāmi kāyikaṃ vā vācasikaṃ vā. Imesañhi, sāriputta, pañcannaṃ bhikkhusatānaṃ saṭṭhi bhikkhū tevijjā, saṭṭhi bhikkhū chaḷabhiññā, saṭṭhi bhikkhū ubhatobhāgavimuttā, atha itare paññāvimuttā’’ti.
ат̇а ко ааяасмаа ван̇г̇ийсо удтааяаасанаа згам̣сам̣ уд̇д̇араасан̇г̇ам̣ гарид̇ваа язна бхаг̇аваа д̇знан̃ж̇алим̣ бан̣аамзд̇ваа бхаг̇аванд̇ам̣ зд̇ад̣̇авожа – ‘‘бадибхаад̇и мам̣ бхаг̇аваа, бадибхаад̇и мам̣ суг̇ад̇аа’’д̇и. ‘‘бадибхаад̇у д̇ам̣, ван̇г̇ийсаа’’д̇и бхаг̇аваа авожа. ат̇а ко ааяасмаа ван̇г̇ийсо бхаг̇аванд̇ам̣ саммукаа сааруббаахи г̇аат̇аахи абхид̇т̇ави –
Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ bhagavā, paṭibhāti maṃ sugatā’’ti. ‘‘Paṭibhātu taṃ, vaṅgīsā’’ti bhagavā avoca. Atha kho āyasmā vaṅgīso bhagavantaṃ sammukhā sāruppāhi gāthāhi abhitthavi –
‘‘аж̇ж̇а баннарасз висуд̣̇д̇хияаа, бхигкуу бан̃жасад̇аа самааг̇ад̇аа;
‘‘Ajja pannarase visuddhiyā, bhikkhū pañcasatā samāgatā;
сам̣яож̇анаб̣анд̇ханажчид̣̇аа , анийгхаа кийн̣абунаб̣бхаваа исий.
Saṃyojanabandhanacchidā , anīghā khīṇapunabbhavā isī.
‘‘жаггавад̇д̇ий яат̇аа рааж̇аа, амажжабариваарид̇о;
‘‘Cakkavattī yathā rājā, amaccaparivārito;
саманд̇аа анубариязд̇и, сааг̇аранд̇ам̣ махим̣ имам̣.
Samantā anupariyeti, sāgarantaṃ mahiṃ imaṃ.
‘‘звам̣ виж̇ид̇асан̇г̇аамам̣, сад̇т̇аваахам̣ ануд̇д̇арам̣;
‘‘Evaṃ vijitasaṅgāmaṃ, satthavāhaṃ anuttaraṃ;
саавагаа баяирубаасанд̇и, д̇звиж̇ж̇аа мажжухааяино.
Sāvakā payirupāsanti, tevijjā maccuhāyino.
‘‘саб̣б̣з бхаг̇авад̇о буд̇д̇аа, балаабзд̇т̇а на виж̇ж̇ад̇и;
‘‘Sabbe bhagavato puttā, palāpettha na vijjati;
д̇ан̣хаасалласса ханд̇аарам̣, ванд̣̇з аад̣̇ижжаб̣анд̇хуна’’нд̇и.
Taṇhāsallassa hantāraṃ, vande ādiccabandhuna’’nti.
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 7. бавааран̣аасуд̇д̇аван̣н̣анаа • 7. Pavāraṇāsuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 7. бавааран̣аасуд̇д̇аван̣н̣анаа • 7. Pavāraṇāsuttavaṇṇanā
