| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ಪವಿವೇಕಸುತ್ತಂ
2. Pavivekasuttaṃ
೯೪. ‘‘ತೀಣಿಮಾನಿ , ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಪವಿವೇಕಾನಿ ಪಞ್ಞಾಪೇನ್ತಿ। ಕತಮಾನಿ ತೀಣಿ? ಚೀವರಪವಿವೇಕಂ, ಪಿಣ್ಡಪಾತಪವಿವೇಕಂ, ಸೇನಾಸನಪವಿವೇಕಂ।
94. ‘‘Tīṇimāni , bhikkhave, aññatitthiyā paribbājakā pavivekāni paññāpenti. Katamāni tīṇi? Cīvarapavivekaṃ, piṇḍapātapavivekaṃ, senāsanapavivekaṃ.
‘‘ತತ್ರಿದಂ, ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಚೀವರಪವಿವೇಕಸ್ಮಿಂ ಪಞ್ಞಾಪೇನ್ತಿ, ಸಾಣಾನಿಪಿ ಧಾರೇನ್ತಿ, ಮಸಾಣಾನಿಪಿ ಧಾರೇನ್ತಿ, ಛವದುಸ್ಸಾನಿಪಿ ಧಾರೇನ್ತಿ, ಪಂಸುಕೂಲಾನಿಪಿ ಧಾರೇನ್ತಿ, ತಿರೀಟಾನಿಪಿ ಧಾರೇನ್ತಿ, ಅಜಿನಮ್ಪಿ ಧಾರೇನ್ತಿ, ಅಜಿನಕ್ಖಿಪಮ್ಪಿ ಧಾರೇನ್ತಿ, ಕುಸಚೀರಮ್ಪಿ ಧಾರೇನ್ತಿ, ವಾಕಚೀರಮ್ಪಿ ಧಾರೇನ್ತಿ, ಫಲಕಚೀರಮ್ಪಿ ಧಾರೇನ್ತಿ, ಕೇಸಕಮ್ಬಲಮ್ಪಿ ಧಾರೇನ್ತಿ, ವಾಲಕಮ್ಬಲಮ್ಪಿ ಧಾರೇನ್ತಿ , ಉಲೂಕಪಕ್ಖಿಕಮ್ಪಿ ಧಾರೇನ್ತಿ। ಇದಂ ಖೋ, ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಚೀವರಪವಿವೇಕಸ್ಮಿಂ ಪಞ್ಞಾಪೇನ್ತಿ।
‘‘Tatridaṃ, bhikkhave, aññatitthiyā paribbājakā cīvarapavivekasmiṃ paññāpenti, sāṇānipi dhārenti, masāṇānipi dhārenti, chavadussānipi dhārenti, paṃsukūlānipi dhārenti, tirīṭānipi dhārenti, ajinampi dhārenti, ajinakkhipampi dhārenti, kusacīrampi dhārenti, vākacīrampi dhārenti, phalakacīrampi dhārenti, kesakambalampi dhārenti, vālakambalampi dhārenti , ulūkapakkhikampi dhārenti. Idaṃ kho, bhikkhave, aññatitthiyā paribbājakā cīvarapavivekasmiṃ paññāpenti.
‘‘ತತ್ರಿದಂ, ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಪಿಣ್ಡಪಾತಪವಿವೇಕಸ್ಮಿಂ ಪಞ್ಞಾಪೇನ್ತಿ। ಸಾಕಭಕ್ಖಾಪಿ ಹೋನ್ತಿ, ಸಾಮಾಕಭಕ್ಖಾಪಿ ಹೋನ್ತಿ, ನೀವಾರಭಕ್ಖಾಪಿ ಹೋನ್ತಿ, ದದ್ದುಲಭಕ್ಖಾಪಿ ಹೋನ್ತಿ, ಹಟಭಕ್ಖಾಪಿ ಹೋನ್ತಿ, ಕಣಭಕ್ಖಾಪಿ ಹೋನ್ತಿ, ಆಚಾಮಭಕ್ಖಾಪಿ ಹೋನ್ತಿ, ಪಿಞ್ಞಾಕಭಕ್ಖಾಪಿ ಹೋನ್ತಿ, ತಿಣಭಕ್ಖಾಪಿ ಹೋನ್ತಿ, ಗೋಮಯಭಕ್ಖಾಪಿ ಹೋನ್ತಿ, ವನಮೂಲಫಲಾಹಾರಾ ಯಾಪೇನ್ತಿ ಪವತ್ತಫಲಭೋಜೀ। ಇದಂ ಖೋ, ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಪಿಣ್ಡಪಾತಪವಿವೇಕಸ್ಮಿಂ ಪಞ್ಞಾಪೇನ್ತಿ।
‘‘Tatridaṃ, bhikkhave, aññatitthiyā paribbājakā piṇḍapātapavivekasmiṃ paññāpenti. Sākabhakkhāpi honti, sāmākabhakkhāpi honti, nīvārabhakkhāpi honti, daddulabhakkhāpi honti, haṭabhakkhāpi honti, kaṇabhakkhāpi honti, ācāmabhakkhāpi honti, piññākabhakkhāpi honti, tiṇabhakkhāpi honti, gomayabhakkhāpi honti, vanamūlaphalāhārā yāpenti pavattaphalabhojī. Idaṃ kho, bhikkhave, aññatitthiyā paribbājakā piṇḍapātapavivekasmiṃ paññāpenti.
‘‘ತತ್ರಿದಂ, ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಸೇನಾಸನಪವಿವೇಕಸ್ಮಿಂ ಪಞ್ಞಾಪೇನ್ತಿ ಅರಞ್ಞಂ ರುಕ್ಖಮೂಲಂ ಸುಸಾನಂ 1 ವನಪತ್ಥಂ ಅಬ್ಭೋಕಾಸಂ ಪಲಾಲಪುಞ್ಜಂ ಭುಸಾಗಾರಂ 2। ಇದಂ ಖೋ, ಭಿಕ್ಖವೇ, ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಸೇನಾಸನಪವಿವೇಕಸ್ಮಿಂ ಪಞ್ಞಾಪೇನ್ತಿ। ಇಮಾನಿ ಖೋ, ಭಿಕ್ಖವೇ, ತೀಣಿ ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಪವಿವೇಕಾನಿ ಪಞ್ಞಾಪೇನ್ತಿ।
‘‘Tatridaṃ, bhikkhave, aññatitthiyā paribbājakā senāsanapavivekasmiṃ paññāpenti araññaṃ rukkhamūlaṃ susānaṃ 3 vanapatthaṃ abbhokāsaṃ palālapuñjaṃ bhusāgāraṃ 4. Idaṃ kho, bhikkhave, aññatitthiyā paribbājakā senāsanapavivekasmiṃ paññāpenti. Imāni kho, bhikkhave, tīṇi aññatitthiyā paribbājakā pavivekāni paññāpenti.
‘‘ತೀಣಿ ಖೋ ಪನಿಮಾನಿ, ಭಿಕ್ಖವೇ, ಇಮಸ್ಮಿಂ ಧಮ್ಮವಿನಯೇ ಭಿಕ್ಖುನೋ ಪವಿವೇಕಾನಿ। ಕತಮಾನಿ ತೀಣಿ? ಇಧ, ಭಿಕ್ಖವೇ, ಭಿಕ್ಖು ಸೀಲವಾ ಚ ಹೋತಿ, ದುಸ್ಸೀಲ್ಯಞ್ಚಸ್ಸ ಪಹೀನಂ ಹೋತಿ, ತೇನ ಚ ವಿವಿತ್ತೋ ಹೋತಿ; ಸಮ್ಮಾದಿಟ್ಠಿಕೋ ಚ ಹೋತಿ, ಮಿಚ್ಛಾದಿಟ್ಠಿ ಚಸ್ಸ ಪಹೀನಾ ಹೋತಿ, ತಾಯ ಚ ವಿವಿತ್ತೋ ಹೋತಿ; ಖೀಣಾಸವೋ ಚ ಹೋತಿ, ಆಸವಾ ಚಸ್ಸ ಪಹೀನಾ ಹೋನ್ತಿ, ತೇಹಿ ಚ ವಿವಿತ್ತೋ ಹೋತಿ । ಯತೋ ಖೋ, ಭಿಕ್ಖವೇ, ಭಿಕ್ಖು ಸೀಲವಾ ಹೋತಿ, ದುಸ್ಸೀಲ್ಯಞ್ಚಸ್ಸ ಪಹೀನಂ ಹೋತಿ, ತೇನ ಚ ವಿವಿತ್ತೋ ಹೋತಿ; ಸಮ್ಮಾದಿಟ್ಠಿಕೋ ಚ ಹೋತಿ, ಮಿಚ್ಛಾದಿಟ್ಠಿ ಚಸ್ಸ ಪಹೀನಾ ಹೋತಿ, ತಾಯ ಚ ವಿವಿತ್ತೋ ಹೋತಿ; ಖೀಣಾಸವೋ ಚ ಹೋತಿ, ಆಸವಾ ಚಸ್ಸ ಪಹೀನಾ ಹೋನ್ತಿ, ತೇಹಿ ಚ ವಿವಿತ್ತೋ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ‘ಭಿಕ್ಖು ಅಗ್ಗಪ್ಪತ್ತೋ ಸಾರಪ್ಪತ್ತೋ ಸುದ್ಧೋ ಸಾರೇ ಪತಿಟ್ಠಿತೋ’’’।
‘‘Tīṇi kho panimāni, bhikkhave, imasmiṃ dhammavinaye bhikkhuno pavivekāni. Katamāni tīṇi? Idha, bhikkhave, bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti . Yato kho, bhikkhave, bhikkhu sīlavā hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’.
‘‘ಸೇಯ್ಯಥಾಪಿ, ಭಿಕ್ಖವೇ, ಕಸ್ಸಕಸ್ಸ ಗಹಪತಿಸ್ಸ ಸಮ್ಪನ್ನಂ ಸಾಲಿಕ್ಖೇತ್ತಂ। ತಮೇನಂ ಕಸ್ಸಕೋ ಗಹಪತಿ ಸೀಘಂ ಸೀಘಂ 5 ಲವಾಪೇಯ್ಯ। ಸೀಘಂ ಸೀಘಂ ಲವಾಪೇತ್ವಾ ಸೀಘಂ ಸೀಘಂ ಸಙ್ಘರಾಪೇಯ್ಯ। ಸೀಘಂ ಸೀಘಂ ಸಙ್ಘರಾಪೇತ್ವಾ ಸೀಘಂ ಸೀಘಂ ಉಬ್ಬಹಾಪೇಯ್ಯ 6। ಸೀಘಂ ಸೀಘಂ ಉಬ್ಬಹಾಪೇತ್ವಾ ಸೀಘಂ ಸೀಘಂ ಪುಞ್ಜಂ ಕಾರಾಪೇಯ್ಯ। ಸೀಘಂ ಸೀಘಂ ಪುಞ್ಜಂ ಕಾರಾಪೇತ್ವಾ ಸೀಘಂ ಸೀಘಂ ಮದ್ದಾಪೇಯ್ಯ। ಸೀಘಂ ಸೀಘಂ ಮದ್ದಾಪೇತ್ವಾ ಸೀಘಂ ಸೀಘಂ ಪಲಾಲಾನಿ ಉದ್ಧರಾಪೇಯ್ಯ। ಸೀಘಂ ಸೀಘಂ ಪಲಾಲಾನಿ ಉದ್ಧರಾಪೇತ್ವಾ ಸೀಘಂ ಸೀಘಂ ಭುಸಿಕಂ ಉದ್ಧರಾಪೇಯ್ಯ। ಸೀಘಂ ಸೀಘಂ ಭುಸಿಕಂ ಉದ್ಧರಾಪೇತ್ವಾ ಸೀಘಂ ಸೀಘಂ ಓಪುನಾಪೇಯ್ಯ। ಸೀಘಂ ಸೀಘಂ ಓಪುನಾಪೇತ್ವಾ ಸೀಘಂ ಸೀಘಂ ಅತಿಹರಾಪೇಯ್ಯ। ಸೀಘಂ ಸೀಘಂ ಅತಿಹರಾಪೇತ್ವಾ ಸೀಘಂ ಸೀಘಂ ಕೋಟ್ಟಾಪೇಯ್ಯ। ಸೀಘಂ ಸೀಘಂ ಕೋಟ್ಟಾಪೇತ್ವಾ ಸೀಘಂ ಸೀಘಂ ಥುಸಾನಿ ಉದ್ಧರಾಪೇಯ್ಯ। ಏವಮಸ್ಸು 7 ತಾನಿ, ಭಿಕ್ಖವೇ, ಕಸ್ಸಕಸ್ಸ ಗಹಪತಿಸ್ಸ ಧಞ್ಞಾನಿ ಅಗ್ಗಪ್ಪತ್ತಾನಿ ಸಾರಪ್ಪತ್ತಾನಿ ಸುದ್ಧಾನಿ ಸಾರೇ ಪತಿಟ್ಠಿತಾನಿ।
‘‘Seyyathāpi, bhikkhave, kassakassa gahapatissa sampannaṃ sālikkhettaṃ. Tamenaṃ kassako gahapati sīghaṃ sīghaṃ 8 lavāpeyya. Sīghaṃ sīghaṃ lavāpetvā sīghaṃ sīghaṃ saṅgharāpeyya. Sīghaṃ sīghaṃ saṅgharāpetvā sīghaṃ sīghaṃ ubbahāpeyya 9. Sīghaṃ sīghaṃ ubbahāpetvā sīghaṃ sīghaṃ puñjaṃ kārāpeyya. Sīghaṃ sīghaṃ puñjaṃ kārāpetvā sīghaṃ sīghaṃ maddāpeyya. Sīghaṃ sīghaṃ maddāpetvā sīghaṃ sīghaṃ palālāni uddharāpeyya. Sīghaṃ sīghaṃ palālāni uddharāpetvā sīghaṃ sīghaṃ bhusikaṃ uddharāpeyya. Sīghaṃ sīghaṃ bhusikaṃ uddharāpetvā sīghaṃ sīghaṃ opunāpeyya. Sīghaṃ sīghaṃ opunāpetvā sīghaṃ sīghaṃ atiharāpeyya. Sīghaṃ sīghaṃ atiharāpetvā sīghaṃ sīghaṃ koṭṭāpeyya. Sīghaṃ sīghaṃ koṭṭāpetvā sīghaṃ sīghaṃ thusāni uddharāpeyya. Evamassu 10 tāni, bhikkhave, kassakassa gahapatissa dhaññāni aggappattāni sārappattāni suddhāni sāre patiṭṭhitāni.
‘‘ಏವಮೇವಂ ಖೋ, ಭಿಕ್ಖವೇ, ಯತೋ ಭಿಕ್ಖು ಸೀಲವಾ ಚ ಹೋತಿ, ದುಸ್ಸೀಲ್ಯಞ್ಚಸ್ಸ ಪಹೀನಂ ಹೋತಿ, ತೇನ ಚ ವಿವಿತ್ತೋ ಹೋತಿ; ಸಮ್ಮಾದಿಟ್ಠಿಕೋ ಚ ಹೋತಿ, ಮಿಚ್ಛಾದಿಟ್ಠಿ ಚಸ್ಸ ಪಹೀನಾ ಹೋತಿ, ತಾಯ ಚ ವಿವಿತ್ತೋ ಹೋತಿ; ಖೀಣಾಸವೋ ಚ ಹೋತಿ, ಆಸವಾ ಚಸ್ಸ ಪಹೀನಾ ಹೋನ್ತಿ, ತೇಹಿ ಚ ವಿವಿತ್ತೋ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ‘ಭಿಕ್ಖು ಅಗ್ಗಪ್ಪತ್ತೋ ಸಾರಪ್ಪತ್ತೋ ಸುದ್ಧೋ ಸಾರೇ ಪತಿಟ್ಠಿತೋ’’’ತಿ। ದುತಿಯಂ।
‘‘Evamevaṃ kho, bhikkhave, yato bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’ti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ಪವಿವೇಕಸುತ್ತವಣ್ಣನಾ • 2. Pavivekasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೨. ಪವಿವೇಕಸುತ್ತವಣ್ಣನಾ • 2. Pavivekasuttavaṇṇanā
