| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౩. పేణాహికఙ్గపఞ్హో
3. Peṇāhikaṅgapañho
౩. ‘‘భన్తే నాగసేన, ‘పేణాహికాయ ద్వే అఙ్గాని గహేతబ్బానీ’తి యం వదేసి, కతమాని తాని ద్వే అఙ్గాని గహేతబ్బానీ’’తి? ‘‘యథా, మహారాజ, పేణాహికా సకపతిమ్హి ఉసూయాయ ఛాపకే న పోసయతి, ఏవమేవ ఖో, మహారాజ, యోగినా యోగావచరేన సకమనే 1 కిలేసే ఉప్పన్నే ఉసూయాయితబ్బం, సతిపట్ఠానేన సమ్మాసంవరసుసిరే పక్ఖిపిత్వా మనోద్వారే కాయగతాసతి భావేతబ్బా. ఇదం, మహారాజ, పేణాహికాయ పఠమం అఙ్గం గహేతబ్బం.
3. ‘‘Bhante nāgasena, ‘peṇāhikāya dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, peṇāhikā sakapatimhi usūyāya chāpake na posayati, evameva kho, mahārāja, yoginā yogāvacarena sakamane 2 kilese uppanne usūyāyitabbaṃ, satipaṭṭhānena sammāsaṃvarasusire pakkhipitvā manodvāre kāyagatāsati bhāvetabbā. Idaṃ, mahārāja, peṇāhikāya paṭhamaṃ aṅgaṃ gahetabbaṃ.
‘‘పున చపరం, మహారాజ, పేణాహికా పవనే దివసం గోచరం చరిత్వా సాయం పక్ఖిగణం ఉపేతి అత్తనో గుత్తియా, ఏవమేవ ఖో, మహారాజ, యోగినా యోగావచరేన ఏకకేన పవివేకం సేవితబ్బం సంయోజనపరిముత్తియా, తత్ర రతిం అలభమానేన ఉపవాదభయపరిరక్ఖణాయ సఙ్ఘం ఓసరిత్వా సఙ్ఘరక్ఖితేన వసితబ్బం. ఇదం, మహారాజ, పేణాహికాయ దుతియం అఙ్గం గహేతబ్బం. భాసితమ్పేతం, మహారాజ, బ్రహ్మునా సహమ్పతినా భగవతో సన్తికే –
‘‘Puna caparaṃ, mahārāja, peṇāhikā pavane divasaṃ gocaraṃ caritvā sāyaṃ pakkhigaṇaṃ upeti attano guttiyā, evameva kho, mahārāja, yoginā yogāvacarena ekakena pavivekaṃ sevitabbaṃ saṃyojanaparimuttiyā, tatra ratiṃ alabhamānena upavādabhayaparirakkhaṇāya saṅghaṃ osaritvā saṅgharakkhitena vasitabbaṃ. Idaṃ, mahārāja, peṇāhikāya dutiyaṃ aṅgaṃ gahetabbaṃ. Bhāsitampetaṃ, mahārāja, brahmunā sahampatinā bhagavato santike –
‘‘‘సేవేథ పన్తాని సేనాసనాని, చరేయ్య సంయోజనవిప్పమోక్ఖా;
‘‘‘Sevetha pantāni senāsanāni, careyya saṃyojanavippamokkhā;
సచే రతిం నాధిగచ్ఛేయ్య తత్థ, సఙ్ఘే వసే రక్ఖితత్తో సతీమా’’’తి.
Sace ratiṃ nādhigaccheyya tattha, saṅghe vase rakkhitatto satīmā’’’ti.
పేణాహికఙ్గపఞ్హో తతియో.
Peṇāhikaṅgapañho tatiyo.
Footnotes:
