| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ಪೇಸಲಸುತ್ತವಣ್ಣನಾ
3. Pesalasuttavaṇṇanā
೨೧೧. ಏತೇಸನ್ತಿ ಏತೇಸಂ ಮಹಲ್ಲಕಾನಂ। ನ ಪಾಳಿ ಆಗಚ್ಛತಿ ಅಪ್ಪಗುಣಭಾವತೋ। ನ ಚ ಪಾಳಿ ಉಪಟ್ಠಾತಿ, ಏಕಾಯ ಪಾಳಿಯಾ ಸತಿ ಪಾಳಿಗತಿಯಾ ತಥಾ ತಥಾ ಉಪಟ್ಠಾನಮ್ಪಿ ನೇಸಂ ನತ್ಥೀತಿ ವದತಿ। ನ ಅಟ್ಠಕಥಾತಿ ಏತ್ಥಾಪಿ ಏಸೇವ ನಯೋ। ಸಿಥಿಲಧನಿತಾದಿತಂತಂಬ್ಯಞ್ಜನಬುದ್ಧಿಂ ಅಹಾಪೇತ್ವಾ ಉಚ್ಚಾರಣಂ ಪದಬ್ಯಞ್ಜನಮಧುರತಾ। ಅತಿಕ್ಕಮಿತ್ವಾ ಮಞ್ಞತಿ ಅಞ್ಞೇ ಭಿಕ್ಖೂ। ಹೀಳನವಸೇನ ಅಭಿಭವಿತ್ವಾ ಪಟಿಭಾನಸುತೇನ ಅತ್ತಾನಂ ಪಸಂಸತಿ ಸಮ್ಭಾವೇತಿ। ಮಾನಸ್ಸ ಪವತ್ತಿತಾಯ ಸಹಜಾತನಿಸ್ಸಯಾದಿಪಚ್ಚಯಧಮ್ಮಾ ತಂಸಹಭುಧಮ್ಮಾ। ಮಾನವಸೇನ ವಿಪ್ಪಟಿಸಾರೀ ಅಹುವಾ। ಮಾ ಅಹೋಸೀತಿ ಯೋಜನಾ। ವಣ್ಣಭಣನನ್ತಿ ಪರೇಹಿ ಕಿರಿಯಮಾನಂ ಗುಣಾಭಿತ್ಥವಂ। ಅಖಿಲೋತಿ ಪಞ್ಚಚೇತೋಖಿಲರಹಿತೋ। ನಿಸ್ಸೇಸಂ ನವವಿಧನ್ತಿ ನವವಿಧಮ್ಪಿ ಮಾನಂ ಕಸ್ಸಚಿ ಏಕದೇಸಸ್ಸಪಿ ಅಸೇಸತೋ। ವಿಜ್ಜಾಯಾತಿ ಅಗ್ಗಮಗ್ಗವಿಜ್ಜಾಯ। ಅಚ್ಚನ್ತಮೇವ ಸಮಿತತಾಯ ವೂಪಸಮಿತತಾಯ ಸಮಿತಾವೀ।
211.Etesanti etesaṃ mahallakānaṃ. Na pāḷi āgacchati appaguṇabhāvato. Na ca pāḷi upaṭṭhāti, ekāya pāḷiyā sati pāḷigatiyā tathā tathā upaṭṭhānampi nesaṃ natthīti vadati. Na aṭṭhakathāti etthāpi eseva nayo. Sithiladhanitāditaṃtaṃbyañjanabuddhiṃ ahāpetvā uccāraṇaṃ padabyañjanamadhuratā. Atikkamitvā maññati aññe bhikkhū. Hīḷanavasena abhibhavitvā paṭibhānasutena attānaṃ pasaṃsati sambhāveti. Mānassa pavattitāya sahajātanissayādipaccayadhammā taṃsahabhudhammā. Mānavasena vippaṭisārī ahuvā. Mā ahosīti yojanā. Vaṇṇabhaṇananti parehi kiriyamānaṃ guṇābhitthavaṃ. Akhiloti pañcacetokhilarahito. Nissesaṃ navavidhanti navavidhampi mānaṃ kassaci ekadesassapi asesato. Vijjāyāti aggamaggavijjāya. Accantameva samitatāya vūpasamitatāya samitāvī.
ಪೇಸಲಸುತ್ತವಣ್ಣನಾ ನಿಟ್ಠಿತಾ।
Pesalasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ಪೇಸಲಸುತ್ತಂ • 3. Pesalasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ಪೇಸಲಸುತ್ತವಣ್ಣನಾ • 3. Pesalasuttavaṇṇanā
