| Library / Tipiṭaka / திபிடக • Tipiṭaka / பு³த்³த⁴வங்ஸபாளி • Buddhavaṃsapāḷi |
20. பு²ஸ்ஸபு³த்³த⁴வங்ஸோ
20. Phussabuddhavaṃso
1.
1.
தத்தே²வ மண்ட³கப்பம்ஹி, அஹு ஸத்தா² அனுத்தரோ;
Tattheva maṇḍakappamhi, ahu satthā anuttaro;
அனுபமோ அஸமஸமோ, பு²ஸ்ஸோ லோகக்³க³னாயகோ.
Anupamo asamasamo, phusso lokagganāyako.
2.
2.
ஸோபி ஸப்³ப³ங் தமங் ஹந்த்வா, விஜடெத்வா மஹாஜடங்;
Sopi sabbaṃ tamaṃ hantvā, vijaṭetvā mahājaṭaṃ;
ஸதே³வகங் தப்பயந்தோ, அபி⁴வஸ்ஸி அமதம்பு³னா.
Sadevakaṃ tappayanto, abhivassi amatambunā.
3.
3.
த⁴ம்மசக்கங் பவத்தெந்தே, பு²ஸ்ஸே நக்க²த்தமங்க³லே;
Dhammacakkaṃ pavattente, phusse nakkhattamaṅgale;
கோடிஸதஸஹஸ்ஸானங், பட²மாபி⁴ஸமயோ அஹு.
Koṭisatasahassānaṃ, paṭhamābhisamayo ahu.
4.
4.
நவுதிஸதஸஹஸ்ஸானங் , து³தியாபி⁴ஸமயோ அஹு;
Navutisatasahassānaṃ , dutiyābhisamayo ahu;
அஸீதிஸதஸஹஸ்ஸானங், ததியாபி⁴ஸமயோ அஹு.
Asītisatasahassānaṃ, tatiyābhisamayo ahu.
5.
5.
ஸன்னிபாதா தயோ ஆஸுங், பு²ஸ்ஸஸ்ஸாபி மஹேஸினோ;
Sannipātā tayo āsuṃ, phussassāpi mahesino;
கீ²ணாஸவானங் விமலானங், ஸந்தசித்தான தாதி³னங்.
Khīṇāsavānaṃ vimalānaṃ, santacittāna tādinaṃ.
6.
6.
ஸட்டி²ஸதஸஹஸ்ஸானங் , பட²மோ ஆஸி ஸமாக³மோ;
Saṭṭhisatasahassānaṃ , paṭhamo āsi samāgamo;
பஞ்ஞாஸஸதஸஹஸ்ஸானங், து³தியோ ஆஸி ஸமாக³மோ.
Paññāsasatasahassānaṃ, dutiyo āsi samāgamo.
7.
7.
சத்தாரீஸஸதஸஹஸ்ஸானங், ததியோ ஆஸி ஸமாக³மோ;
Cattārīsasatasahassānaṃ, tatiyo āsi samāgamo;
அனுபாதா³ விமுத்தானங், வொச்சி²ன்னபடிஸந்தி⁴னங்.
Anupādā vimuttānaṃ, vocchinnapaṭisandhinaṃ.
8.
8.
அஹங் தேன ஸமயேன, விஜிதாவீ நாம க²த்தியோ;
Ahaṃ tena samayena, vijitāvī nāma khattiyo;
ச²ட்³ட³யித்வா மஹாரஜ்ஜங், பப்³ப³ஜிங் தஸ்ஸ ஸந்திகே.
Chaḍḍayitvā mahārajjaṃ, pabbajiṃ tassa santike.
9.
9.
ஸோபி மங் பு³த்³தோ⁴ ப்³யாகாஸி, பு²ஸ்ஸோ லோகக்³க³னாயகோ;
Sopi maṃ buddho byākāsi, phusso lokagganāyako;
‘‘த்³வேனவுதே இதோ கப்பே, அயங் பு³த்³தோ⁴ ப⁴விஸ்ஸதி.
‘‘Dvenavute ito kappe, ayaṃ buddho bhavissati.
10.
10.
‘‘பதா⁴னங் பத³ஹித்வான…பே॰… ஹெஸ்ஸாம ஸம்முகா² இமங்’’.
‘‘Padhānaṃ padahitvāna…pe… hessāma sammukhā imaṃ’’.
11.
11.
தஸ்ஸாபி வசனங் ஸுத்வா, பி⁴ய்யோ சித்தங் பஸாத³யிங்;
Tassāpi vacanaṃ sutvā, bhiyyo cittaṃ pasādayiṃ;
உத்தரிங் வதமதி⁴ட்டா²ஸிங், த³ஸபாரமிபூரியா.
Uttariṃ vatamadhiṭṭhāsiṃ, dasapāramipūriyā.
12.
12.
ஸுத்தந்தங் வினயஞ்சாபி, நவங்க³ங் ஸத்து²ஸாஸனங்;
Suttantaṃ vinayañcāpi, navaṅgaṃ satthusāsanaṃ;
ஸப்³ப³ங் பரியாபுணித்வா, ஸோப⁴யிங் ஜினஸாஸனங்.
Sabbaṃ pariyāpuṇitvā, sobhayiṃ jinasāsanaṃ.
13.
13.
தத்த²ப்பமத்தோ விஹரந்தோ, ப்³ரஹ்மங் பா⁴வெத்வ பா⁴வனங்;
Tatthappamatto viharanto, brahmaṃ bhāvetva bhāvanaṃ;
அபி⁴ஞ்ஞாஸு பாரமிங் க³ந்த்வா, ப்³ரஹ்மலோகமக³ஞ்ச²ஹங்.
Abhiññāsu pāramiṃ gantvā, brahmalokamagañchahaṃ.
14.
14.
காஸிகங் நாம நக³ரங், ஜயஸேனோ நாம க²த்தியோ;
Kāsikaṃ nāma nagaraṃ, jayaseno nāma khattiyo;
ஸிரிமா நாம ஜனிகா, பு²ஸ்ஸஸ்ஸாபி மஹேஸினோ.
Sirimā nāma janikā, phussassāpi mahesino.
15.
15.
நவவஸ்ஸஸஹஸ்ஸானி, அகா³ரங் அஜ்ஜ² ஸோ வஸி;
Navavassasahassāni, agāraṃ ajjha so vasi;
க³ருளபக்க² ஹங்ஸ ஸுவண்ணபா⁴ரா, தயோ பாஸாத³முத்தமா.
Garuḷapakkha haṃsa suvaṇṇabhārā, tayo pāsādamuttamā.
16.
16.
திங்ஸஇத்தி²ஸஹஸ்ஸானி, நாரியோ ஸமலங்கதா;
Tiṃsaitthisahassāni, nāriyo samalaṅkatā;
கிஸாகோ³தமீ நாம நாரீ, அனூபமோ நாம அத்ரஜோ.
Kisāgotamī nāma nārī, anūpamo nāma atrajo.
17.
17.
நிமித்தே சதுரோ தி³ஸ்வா, ஹத்தி²யானேன நிக்க²மி;
Nimitte caturo disvā, hatthiyānena nikkhami;
ச²மாஸங் பதா⁴னசாரங், அசரீ புரிஸுத்தமோ.
Chamāsaṃ padhānacāraṃ, acarī purisuttamo.
18.
18.
ப்³ரஹ்முனா யாசிதோ ஸந்தோ, பு²ஸ்ஸோ லோகக்³க³னாயகோ;
Brahmunā yācito santo, phusso lokagganāyako;
வத்தி சக்கங் மஹாவீரோ, மிக³தா³யே நருத்தமோ.
Vatti cakkaṃ mahāvīro, migadāye naruttamo.
19.
19.
ஸுரக்கி²தோ த⁴ம்மஸேனோ, அஹேஸுங் அக்³க³ஸாவகா;
Surakkhito dhammaseno, ahesuṃ aggasāvakā;
ஸபி⁴யோ நாமுபட்டா²கோ, பு²ஸ்ஸஸ்ஸாபி மஹேஸினோ.
Sabhiyo nāmupaṭṭhāko, phussassāpi mahesino.
20.
20.
சாலா ச உபசாலா ச, அஹேஸுங் அக்³க³ஸாவிகா;
Cālā ca upacālā ca, ahesuṃ aggasāvikā;
போ³தி⁴ தஸ்ஸ ப⁴க³வதோ, ஆமண்டோ³தி பவுச்சதி.
Bodhi tassa bhagavato, āmaṇḍoti pavuccati.
21.
21.
த⁴னஞ்சயோ விஸாகோ² ச, அஹேஸுங் அக்³கு³பட்ட²கா;
Dhanañcayo visākho ca, ahesuṃ aggupaṭṭhakā;
பது³மா சேவ நாகா³ ச, அஹேஸுங் அக்³கு³பட்டி²கா.
Padumā ceva nāgā ca, ahesuṃ aggupaṭṭhikā.
22.
22.
அட்ட²பண்ணாஸரதனங் , ஸோபி அச்சுக்³க³தோ முனி;
Aṭṭhapaṇṇāsaratanaṃ , sopi accuggato muni;
ஸோப⁴தே ஸதரங்ஸீவ, உளுராஜாவ பூரிதோ.
Sobhate sataraṃsīva, uḷurājāva pūrito.
23.
23.
நவுதிவஸ்ஸஸஹஸ்ஸானி, ஆயு விஜ்ஜதி தாவதே³;
Navutivassasahassāni, āyu vijjati tāvade;
தாவதா திட்ட²மானோ ஸோ, தாரேஸி ஜனதங் ப³ஹுங்.
Tāvatā tiṭṭhamāno so, tāresi janataṃ bahuṃ.
24.
24.
ஓவதி³த்வா ப³ஹூ ஸத்தே, ஸந்தாரெத்வா ப³ஹூ ஜனே;
Ovaditvā bahū satte, santāretvā bahū jane;
ஸோபி ஸத்தா² அதுலயஸோ, நிப்³பு³தோ ஸோ ஸஸாவகோ.
Sopi satthā atulayaso, nibbuto so sasāvako.
25.
25.
பு²ஸ்ஸோ ஜினவரோ ஸத்தா², ஸேனாராமம்ஹி நிப்³பு³தோ;
Phusso jinavaro satthā, senārāmamhi nibbuto;
தா⁴துவித்தா²ரிகங் ஆஸி, தேஸு தேஸு பதே³ஸதோதி.
Dhātuvitthārikaṃ āsi, tesu tesu padesatoti.
பு²ஸ்ஸஸ்ஸ ப⁴க³வதோ வங்ஸோ அட்டா²ரஸமோ.
Phussassa bhagavato vaṃso aṭṭhārasamo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / பு³த்³த⁴வங்ஸ-அட்ட²கதா² • Buddhavaṃsa-aṭṭhakathā / 20. பு²ஸ்ஸபு³த்³த⁴வங்ஸவண்ணனா • 20. Phussabuddhavaṃsavaṇṇanā
