A World of Knowledge
    Library / Tipiṭaka / ਤਿਪਿਟਕ • Tipiṭaka / ਥੇਰਗਾਥਾ-ਅਟ੍ਠਕਥਾ • Theragāthā-aṭṭhakathā

    ੯. ਪਿਲਿਨ੍ਦવਚ੍ਛਤ੍ਥੇਰਗਾਥਾવਣ੍ਣਨਾ

    9. Pilindavacchattheragāthāvaṇṇanā

    ਸ੍વਾਗਤਨ੍ਤਿ ਆਯਸ੍ਮਤੋ ਪਿਲਿਨ੍ਦવਚ੍ਛਤ੍ਥੇਰਸ੍ਸ ਗਾਥਾ। ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸવਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਹੇਟ੍ਠਾ વੁਤ੍ਤਨਯੇਨੇવ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਦੇવਤਾਨਂ ਪਿਯਮਨਾਪਭਾવੇਨ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍વਾ ਤਂ ਠਾਨਨ੍ਤਰਂ ਪਤ੍ਥੇਤ੍વਾ ਯਾવਜੀવਂ ਕੁਸਲਂ ਕਤ੍વਾ ਤਤੋ ਚੁਤੋ ਦੇવਮਨੁਸ੍ਸੇਸੁ ਸਂਸਰਨ੍ਤੋ ਸੁਮੇਧਸ੍ਸ ਭਗવਤੋ ਕਾਲੇ ਮਨੁਸ੍ਸਲੋਕੇ ਨਿਬ੍ਬਤ੍ਤਿਤ੍વਾ ਭਗવਤਿ ਪਰਿਨਿਬ੍ਬੁਤੇ ਸਤ੍ਥੁ ਥੂਪਸ੍ਸ ਪੂਜਂ ਕਤ੍વਾ ਸਙ੍ਘੇ ਚ ਮਹਾਦਾਨਂ ਪવਤ੍ਤੇਤ੍વਾ ਤਤੋ ਚੁਤੋ ਦੇવਮਨੁਸ੍ਸੇਸੁ ਏવ ਸਂਸਰਨ੍ਤੋ ਅਨੁਪ੍ਪਨ੍ਨੇ ਬੁਦ੍ਧੇ ਚਕ੍ਕવਤ੍ਤੀ ਰਾਜਾ ਹੁਤ੍વਾ ਮਹਾਜਨਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍વਾ ਸਗ੍ਗਪਰਾਯਣਂ ਅਕਾਸਿ। ਸੋ ਅਨੁਪ੍ਪਨ੍ਨੇਯੇવ ਅਮ੍ਹਾਕਂ ਭਗવਤਿ ਸਾવਤ੍ਥਿਯਂ ਬ੍ਰਾਹ੍ਮਣਗੇਹੇ ਨਿਬ੍ਬਤ੍ਤਿ। ‘‘ਪਿਲਿਨ੍ਦੋ’’ਤਿਸ੍ਸ ਨਾਮਂ ਅਕਂਸੁ। વਚ੍ਛੋਤਿ ਪਨ ਗੋਤ੍ਤਂ । ਤੇਨ ਸੋ ਅਪਰਭਾਗੇ ‘‘ਪਿਲਿਨ੍ਦવਚ੍ਛੋ’’ਤਿ ਪਞ੍ਞਾਯਿਤ੍ਥ। ਸਂਸਾਰੇ ਪਨ ਸਂવੇਗਬਹੁਲਤਾਯ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍વਾ ਚੂਲ਼ਗਨ੍ਧਾਰਂ ਨਾਮ વਿਜ੍ਜਂ ਸਾਧੇਤ੍વਾ ਤਾਯ વਿਜ੍ਜਾਯ ਆਕਾਸਚਾਰੀ ਪਰਚਿਤ੍ਤવਿਦੂ ਚ ਹੁਤ੍વਾ ਰਾਜਗਹੇ ਲਾਭਗ੍ਗਯਸਗ੍ਗਪ੍ਪਤ੍ਤੋ ਪਟਿવਸਤਿ।

    Svāgatanti āyasmato pilindavacchattherassa gāthā. Kā uppatti? Ayaṃ kira padumuttarabuddhakāle haṃsavatīnagare mahābhogakule nibbatto heṭṭhā vuttanayeneva satthu santike dhammaṃ suṇanto satthāraṃ ekaṃ bhikkhuṃ devatānaṃ piyamanāpabhāvena aggaṭṭhāne ṭhapentaṃ disvā taṃ ṭhānantaraṃ patthetvā yāvajīvaṃ kusalaṃ katvā tato cuto devamanussesu saṃsaranto sumedhassa bhagavato kāle manussaloke nibbattitvā bhagavati parinibbute satthu thūpassa pūjaṃ katvā saṅghe ca mahādānaṃ pavattetvā tato cuto devamanussesu eva saṃsaranto anuppanne buddhe cakkavattī rājā hutvā mahājanaṃ pañcasu sīlesu patiṭṭhāpetvā saggaparāyaṇaṃ akāsi. So anuppanneyeva amhākaṃ bhagavati sāvatthiyaṃ brāhmaṇagehe nibbatti. ‘‘Pilindo’’tissa nāmaṃ akaṃsu. Vacchoti pana gottaṃ . Tena so aparabhāge ‘‘pilindavaccho’’ti paññāyittha. Saṃsāre pana saṃvegabahulatāya paribbājakapabbajjaṃ pabbajitvā cūḷagandhāraṃ nāma vijjaṃ sādhetvā tāya vijjāya ākāsacārī paracittavidū ca hutvā rājagahe lābhaggayasaggappatto paṭivasati.

    ਅਥ ਯਦਾ ਅਮ੍ਹਾਕਂ ਭਗવਾ ਅਭਿਸਮ੍ਬੁਦ੍ਧੋ ਹੁਤ੍વਾ ਅਨੁਕ੍ਕਮੇਨ ਰਾਜਗਹਂ ਉਪਗਤੋ, ਤਤੋ ਪਟ੍ਠਾਯ ਬੁਦ੍ਧਾਨੁਭਾવੇਨ ਤਸ੍ਸ ਸਾ વਿਜ੍ਜਾ ਨ ਸਮ੍ਪਜ੍ਜਤਿ, ਅਤ੍ਤਨੋ ਕਿਚ੍ਚਂ ਨ ਸਾਧੇਤਿ। ਸੋ ਚਿਨ੍ਤੇਸਿ – ‘‘ਸੁਤਂ ਖੋ ਪਨ ਮੇਤਂ ਆਚਰਿਯਪਾਚਰਿਯਾਨਂ ਭਾਸਮਾਨਾਨਂ ‘ਯਤ੍ਥ ਮਹਾਗਨ੍ਧਾਰવਿਜ੍ਜਾ ਧਰਤਿ, ਤਤ੍ਥ ਚੂਲ਼ਗਨ੍ਧਾਰવਿਜ੍ਜਾ ਨ ਸਮ੍ਪਜ੍ਜਤੀ’ਤਿ, ਸਮਣਸ੍ਸ ਪਨ ਗੋਤਮਸ੍ਸ ਆਗਤਕਾਲਤੋ ਪਟ੍ਠਾਯ ਨਾਯਂ ਮਮ વਿਜ੍ਜਾ ਸਮ੍ਪਜ੍ਜਤਿ, ਨਿਸ੍ਸਂਸਯਂ ਸਮਣੋ ਗੋਤਮੋ ਮਹਾਗਨ੍ਧਾਰવਿਜ੍ਜਂ ਜਾਨਾਤਿ, ਯਂਨੂਨਾਹਂ ਤਂ ਪਯਿਰੁਪਾਸਿਤ੍વਾ ਤਸ੍ਸ ਸਨ੍ਤਿਕੇ ਤਂ વਿਜ੍ਜਂ ਪਰਿਯਾਪੁਣੇਯ੍ਯ’’ਨ੍ਤਿ। ਸੋ ਭਗવਨ੍ਤਂ ਉਪਸਙ੍ਕਮਿਤ੍વਾ ਏਤਦવੋਚ – ‘‘ਅਹਂ, ਮਹਾਸਮਣ, ਤવ ਸਨ੍ਤਿਕੇ ਏਕਂ વਿਜ੍ਜਂ ਪਰਿਯਾਪੁਣਿਤੁਕਾਮੋ, ਓਕਾਸਂ ਮੇ ਕਰੋਹੀ’’ਤਿ। ਭਗવਾ ‘‘ਤੇਨ ਹਿ ਪਬ੍ਬਜਾ’’ਤਿ ਆਹ। ਸੋ ‘‘વਿਜ੍ਜਾਯ ਪਰਿਕਮ੍ਮਂ ਪਬ੍ਬਜ੍ਜਾ’’ਤਿ ਮਞ੍ਞਮਾਨੋ ਪਬ੍ਬਜਿ। ਤਸ੍ਸ ਭਗવਾ ਧਮ੍ਮਂ ਕਥੇਤ੍વਾ ਚਰਿਤਾਨੁਕੂਲਂ ਕਮ੍ਮਟ੍ਠਾਨਂ ਅਦਾਸਿ। ਸੋ ਉਪਨਿਸ੍ਸਯਸਮ੍ਪਨ੍ਨਤਾਯ ਨਚਿਰਸ੍ਸੇવ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਪਾਪੁਣਿ। ਯਾ ਪਨ ਪੁਰਿਮਜਾਤਿਯਂ ਤਸ੍ਸੋવਾਦੇ ਠਤ੍વਾ ਸਗ੍ਗੇ ਨਿਬ੍ਬਤ੍ਤਾ ਦੇવਤਾ, ਤਂ ਕਤਞ੍ਞੁਤਂ ਨਿਸ੍ਸਾਯ ਸਞ੍ਜਾਤਬਹੁਮਾਨਾ ਸਾਯਂ ਪਾਤਂ ਥੇਰਂ ਪਯਿਰੁਪਾਸਿਤ੍વਾ ਗਚ੍ਛਨ੍ਤਿ। ਤਸ੍ਮਾ ਥੇਰੋ ਦੇવਤਾਨਂ ਪਿਯਮਨਾਪਤਾਯ ਅਗ੍ਗਤਂ ਪਤ੍ਤੋ। ਤੇਨ વੁਤ੍ਤਂ ਅਪਦਾਨੇ (ਅਪ॰ ਥੇਰ ੧.੨.੫੫-੬੭) –

    Atha yadā amhākaṃ bhagavā abhisambuddho hutvā anukkamena rājagahaṃ upagato, tato paṭṭhāya buddhānubhāvena tassa sā vijjā na sampajjati, attano kiccaṃ na sādheti. So cintesi – ‘‘sutaṃ kho pana metaṃ ācariyapācariyānaṃ bhāsamānānaṃ ‘yattha mahāgandhāravijjā dharati, tattha cūḷagandhāravijjā na sampajjatī’ti, samaṇassa pana gotamassa āgatakālato paṭṭhāya nāyaṃ mama vijjā sampajjati, nissaṃsayaṃ samaṇo gotamo mahāgandhāravijjaṃ jānāti, yaṃnūnāhaṃ taṃ payirupāsitvā tassa santike taṃ vijjaṃ pariyāpuṇeyya’’nti. So bhagavantaṃ upasaṅkamitvā etadavoca – ‘‘ahaṃ, mahāsamaṇa, tava santike ekaṃ vijjaṃ pariyāpuṇitukāmo, okāsaṃ me karohī’’ti. Bhagavā ‘‘tena hi pabbajā’’ti āha. So ‘‘vijjāya parikammaṃ pabbajjā’’ti maññamāno pabbaji. Tassa bhagavā dhammaṃ kathetvā caritānukūlaṃ kammaṭṭhānaṃ adāsi. So upanissayasampannatāya nacirasseva vipassanaṃ vaḍḍhetvā arahattaṃ pāpuṇi. Yā pana purimajātiyaṃ tassovāde ṭhatvā sagge nibbattā devatā, taṃ kataññutaṃ nissāya sañjātabahumānā sāyaṃ pātaṃ theraṃ payirupāsitvā gacchanti. Tasmā thero devatānaṃ piyamanāpatāya aggataṃ patto. Tena vuttaṃ apadāne (apa. thera 1.2.55-67) –

    ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਸੁਮੇਧੇ ਅਗ੍ਗਪੁਗ੍ਗਲੇ।

    ‘‘Nibbute lokanāthamhi, sumedhe aggapuggale;

    ਪਸਨ੍ਨਚਿਤ੍ਤੋ ਸੁਮਨੋ, ਥੂਪਪੂਜਂ ਅਕਾਸਹਂ॥

    Pasannacitto sumano, thūpapūjaṃ akāsahaṃ.

    ‘‘ਯੇ ਚ ਖੀਣਾਸવਾ ਤਤ੍ਥ, ਛਲ਼ਭਿਞ੍ਞਾ ਮਹਿਦ੍ਧਿਕਾ।

    ‘‘Ye ca khīṇāsavā tattha, chaḷabhiññā mahiddhikā;

    ਤੇਹਂ ਤਤ੍ਥ ਸਮਾਨੇਤ੍વਾ, ਸਙ੍ਘਭਤ੍ਤਂ ਅਕਾਸਹਂ॥

    Tehaṃ tattha samānetvā, saṅghabhattaṃ akāsahaṃ.

    ‘‘ਸੁਮੇਧਸ੍ਸ ਭਗવਤੋ, ਉਪਟ੍ਠਾਕੋ ਤਦਾ ਅਹੁ।

    ‘‘Sumedhassa bhagavato, upaṭṭhāko tadā ahu;

    ਸੁਮੇਧੋ ਨਾਮ ਨਾਮੇਨ, ਅਨੁਮੋਦਿਤ੍ਥ ਸੋ ਤਦਾ॥

    Sumedho nāma nāmena, anumodittha so tadā.

    ‘‘ਤੇਨ ਚਿਤ੍ਤਪ੍ਪਸਾਦੇਨ, વਿਮਾਨਂ ਉਪਪਜ੍ਜਹਂ।

    ‘‘Tena cittappasādena, vimānaṃ upapajjahaṃ;

    ਛਲ਼ਾਸੀਤਿਸਹਸ੍ਸਾਨਿ, ਅਚ੍ਛਰਾਯੋ ਰਮਿਂਸੁ ਮੇ॥

    Chaḷāsītisahassāni, accharāyo ramiṃsu me.

    ‘‘ਮਮੇવ ਅਨੁવਤ੍ਤਨ੍ਤਿ, ਸਬ੍ਬਕਾਮੇਹਿ ਤਾ ਸਦਾ।

    ‘‘Mameva anuvattanti, sabbakāmehi tā sadā;

    ਅਞ੍ਞੇ ਦੇવੇ ਅਭਿਭੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ॥

    Aññe deve abhibhomi, puññakammassidaṃ phalaṃ.

    ‘‘ਪਞ੍ਚવੀਸਮ੍ਹਿ ਕਪ੍ਪਮ੍ਹਿ, વਰੁਣੋ ਨਾਮ ਖਤ੍ਤਿਯੋ।

    ‘‘Pañcavīsamhi kappamhi, varuṇo nāma khattiyo;

    વਿਸੁਦ੍ਧਭੋਜਨੋ ਆਸਿਂ, ਚਕ੍ਕવਤ੍ਤੀ ਅਹਂ ਤਦਾ॥

    Visuddhabhojano āsiṃ, cakkavattī ahaṃ tadā.

    ‘‘ਨ ਤੇ ਬੀਜਂ ਪવਪ੍ਪਨ੍ਤਿ, ਨਪਿ ਨੀਯਨ੍ਤਿ ਨਙ੍ਗਲਾ।

    ‘‘Na te bījaṃ pavappanti, napi nīyanti naṅgalā;

    ਅਕਟ੍ਠਪਾਕਿਮਂ ਸਾਲਿਂ, ਪਰਿਭੁਞ੍ਜਨ੍ਤਿ ਮਾਨੁਸਾ॥

    Akaṭṭhapākimaṃ sāliṃ, paribhuñjanti mānusā.

    ‘‘ਤਤ੍ਥ ਰਜ੍ਜਂ ਕਰਿਤ੍વਾਨ, ਦੇવਤ੍ਤਂ ਪੁਨ ਗਚ੍ਛਹਂ।

    ‘‘Tattha rajjaṃ karitvāna, devattaṃ puna gacchahaṃ;

    ਤਦਾਪਿ ਏਦਿਸਾ ਮਯ੍ਹਂ, ਨਿਬ੍ਬਤ੍ਤਾ ਭੋਗਸਮ੍ਪਦਾ॥

    Tadāpi edisā mayhaṃ, nibbattā bhogasampadā.

    ‘‘ਨ ਮਂ ਮਿਤ੍ਤਾ ਅਮਿਤ੍ਤਾ વਾ, ਹਿਂਸਨ੍ਤਿ ਸਬ੍ਬਪਾਣਿਨੋ।

    ‘‘Na maṃ mittā amittā vā, hiṃsanti sabbapāṇino;

    ਸਬ੍ਬੇਸਮ੍ਪਿ ਪਿਯੋ ਹੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ॥

    Sabbesampi piyo homi, puññakammassidaṃ phalaṃ.

    ‘‘ਤਿਂਸਕਪ੍ਪਸਹਸ੍ਸਮ੍ਹਿ , ਯਂ ਦਾਨਮਦਦਿਂ ਤਦਾ।

    ‘‘Tiṃsakappasahassamhi , yaṃ dānamadadiṃ tadā;

    ਦੁਗ੍ਗਤਿਂ ਨਾਭਿਜਾਨਾਮਿ, ਗਨ੍ਧਾਲੇਪਸ੍ਸਿਦਂ ਫਲਂ॥

    Duggatiṃ nābhijānāmi, gandhālepassidaṃ phalaṃ.

    ‘‘ਇਮਸ੍ਮਿਂ ਭਦ੍ਦਕੇ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ।

    ‘‘Imasmiṃ bhaddake kappe, eko āsiṃ janādhipo;

    ਮਹਾਨੁਭਾવੋ ਰਾਜਾਹਂ, ਚਕ੍ਕવਤ੍ਤੀ ਮਹਬ੍ਬਲੋ॥

    Mahānubhāvo rājāhaṃ, cakkavattī mahabbalo.

    ‘‘ਸੋਹਂ ਪਞ੍ਚਸੁ ਸੀਲੇਸੁ, ਠਪੇਤ੍વਾ ਜਨਤਂ ਬਹੁਂ।

    ‘‘Sohaṃ pañcasu sīlesu, ṭhapetvā janataṃ bahuṃ;

    ਪਾਪੇਤ੍વਾ ਸੁਗਤਿਂਯੇવ, ਦੇવਤਾਨਂ ਪਿਯੋ ਅਹੁਂ॥

    Pāpetvā sugatiṃyeva, devatānaṃ piyo ahuṃ.

    ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ॰… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ॥

    ‘‘Kilesā jhāpitā mayhaṃ…pe… kataṃ buddhassa sāsana’’nti.

    ਤਥਾ ਦੇવਤਾਹਿ ਅਤਿવਿਯ ਪਿਯਾਯਿਤਬ੍ਬਭਾવਤੋ ਇਮਂ ਥੇਰਂ ਭਗવਾ ਦੇવਤਾਨਂ ਪਿਯਮਨਾਪਭਾવੇਨ ਅਗ੍ਗਟ੍ਠਾਨੇ ਠਪੇਸਿ – ‘‘ਏਤਦਗ੍ਗਂ, ਭਿਕ੍ਖવੇ, ਮਮ ਸਾવਕਾਨਂ ਭਿਕ੍ਖੂਨਂ ਦੇવਤਾਨਂ ਪਿਯਮਨਾਪਾਨਂ ਯਦਿਦਂ ਪਿਲਿਨ੍ਦવਚ੍ਛੋ’’ਤਿ (ਅ॰ ਨਿ॰ ੧.੨੦੯, ੨੧੫) ਸੋ ਏਕਦਿવਸਂ ਭਿਕ੍ਖੁਸਙ੍ਘਮਜ੍ਝੇ ਨਿਸਿਨ੍ਨੋ ਅਤ੍ਤਨੋ ਗੁਣੇ ਪਚ੍ਚવੇਕ੍ਖਿਤ੍વਾ ਤੇਸਂ ਕਾਰਣਭੂਤਂ વਿਜ੍ਜਾਨਿਮਿਤ੍ਤਂ ਭਗવਤੋ ਸਨ੍ਤਿਕੇ ਆਗਮਨਂ ਪਸਂਸਨ੍ਤੋ ‘‘ਸ੍વਾਗਤਂ ਨਾਪਗਤ’’ਨ੍ਤਿ ਗਾਥਂ ਅਭਾਸਿ।

    Tathā devatāhi ativiya piyāyitabbabhāvato imaṃ theraṃ bhagavā devatānaṃ piyamanāpabhāvena aggaṭṭhāne ṭhapesi – ‘‘etadaggaṃ, bhikkhave, mama sāvakānaṃ bhikkhūnaṃ devatānaṃ piyamanāpānaṃ yadidaṃ pilindavaccho’’ti (a. ni. 1.209, 215) so ekadivasaṃ bhikkhusaṅghamajjhe nisinno attano guṇe paccavekkhitvā tesaṃ kāraṇabhūtaṃ vijjānimittaṃ bhagavato santike āgamanaṃ pasaṃsanto ‘‘svāgataṃ nāpagata’’nti gāthaṃ abhāsi.

    . ਤਤ੍ਥ ਸ੍વਾਗਤਨ੍ਤਿ ਸੁਨ੍ਦਰਂ ਆਗਮਨਂ, ਇਦਂ ਮਮਾਤਿ ਸਮ੍ਬਨ੍ਧੋ। ਅਥ વਾ ਸ੍વਾਗਤਨ੍ਤਿ ਸੁਟ੍ਠੁ ਆਗਤਂ, ਮਯਾਤਿ વਿਭਤ੍ਤਿ વਿਪਰਿਣਾਮੇਤਬ੍ਬਾ। ਨਾਪਗਤਨ੍ਤਿ ਨ ਅਪਗਤਂ ਹਿਤਾਭਿવੁਦ੍ਧਿਤੋ ਨ ਅਪੇਤਂ। ਨਯਿਦਂ ਦੁਮਨ੍ਤਿਤਂ ਮਮਾਤਿ ਇਦਂ ਮਮ ਦੁਟ੍ਠੁ ਕਥਿਤਂ, ਦੁਟ੍ਠੁ વਾ વੀਮਂਸਿਤਂ ਨ ਹੋਤਿ। ਇਦਂ વੁਤ੍ਤਂ ਹੋਤਿ – ਯਂ ਭਗવਤੋ ਸਨ੍ਤਿਕੇ ਮਮਾਗਮਨਂ, ਯਂ વਾ ਮਯਾ ਤਤ੍ਥ ਆਗਤਂ, ਤਂ ਸ੍વਾਗਤਂ, ਸ੍વਾਗਤਤ੍ਤਾਯੇવ ਨ ਦੁਰਾਗਤਂ। ਯਂ ‘‘ਭਗવਤੋ ਸਨ੍ਤਿਕੇ ਧਮ੍ਮਂ ਸੁਤ੍વਾ ਪਬ੍ਬਜਿਸ੍ਸਾਮੀ’’ਤਿ ਮਮ ਮਨ੍ਤਿਤਂ ਗਦਿਤਂ ਕਥਿਤਂ, ਚਿਤ੍ਤੇਨ વਾ વੀਮਂਸਿਤਂ ਇਦਮ੍ਪਿ ਨ ਦੁਮ੍ਮਨ੍ਤਿਨ੍ਤਿ। ਇਦਾਨਿ ਤਤ੍ਥ ਕਾਰਣਂ ਦਸ੍ਸੇਨ੍ਤੋ ‘‘ਸਂવਿਭਤ੍ਤੇਸੂ’’ਤਿਆਦਿਮਾਹ। ਸਂવਿਭਤ੍ਤੇਸੂਤਿ ਪਕਾਰਤੋ વਿਭਤ੍ਤੇਸੁ। ਧਮ੍ਮੇਸੂਤਿ ਞੇਯ੍ਯਧਮ੍ਮੇਸੁ ਸਮਥਧਮ੍ਮੇਸੁ વਾ, ਨਾਨਾਤਿਤ੍ਥਿਯੇਹਿ ਪਕਤਿਆਦਿવਸੇਨ, ਸਮ੍ਮਾਸਮ੍ਬੁਦ੍ਧੇਹਿ ਦੁਕ੍ਖਾਦਿવਸੇਨ ਸਂવਿਭਜਿਤ੍વਾ વੁਤ੍ਤਧਮ੍ਮੇਸੁ। ਯਂ ਸੇਟ੍ਠਂ ਤਦੁਪਾਗਮਿਨ੍ਤਿ ਯਂ ਤਤ੍ਥ ਸੇਟ੍ਠਂ, ਤਂ ਚਤੁਸਚ੍ਚਧਮ੍ਮਂ, ਤਸ੍ਸ વਾ ਬੋਧਕਂ ਸਾਸਨਧਮ੍ਮਂ ਉਪਾਗਮਿਂ, ‘‘ਅਯਂ ਧਮ੍ਮੋ ਅਯਂ વਿਨਯੋ’’ਤਿ ਉਪਗਚ੍ਛਿਂ। ਸਮ੍ਮਾਸਮ੍ਬੁਦ੍ਧੇਹਿ ਏવ વਾ ਕੁਸਲਾਦਿવਸੇਨ ਖਨ੍ਧਾਦਿવਸੇਨ ਯਥਾਸਭਾવਤੋ ਸਂવਿਭਤ੍ਤੇਸੁ ਸਭਾવਧਮ੍ਮੇਸੁ ਯਂ ਤਤ੍ਥ ਸੇਟ੍ਠਂ ਉਤ੍ਤਮਂ ਪવਰਂ, ਤਂ ਮਗ੍ਗਫਲਨਿਬ੍ਬਾਨਧਮ੍ਮਂ ਉਪਾਗਮਿਂ, ਅਤ੍ਤਪਚ੍ਚਕ੍ਖਤੋ ਉਪਗਚ੍ਛਿਂ ਸਚ੍ਛਾਕਾਸਿਂ, ਤਸ੍ਮਾ ਸ੍વਾਗਤਂ ਮਮ ਨ ਅਪਗਤਂ ਸੁਮਨ੍ਤਿਤਂ ਨ ਦੁਮ੍ਮਨ੍ਤਿਤਨ੍ਤਿ ਯੋਜਨਾ।

    9. Tattha svāgatanti sundaraṃ āgamanaṃ, idaṃ mamāti sambandho. Atha vā svāgatanti suṭṭhu āgataṃ, mayāti vibhatti vipariṇāmetabbā. Nāpagatanti na apagataṃ hitābhivuddhito na apetaṃ. Nayidaṃ dumantitaṃ mamāti idaṃ mama duṭṭhu kathitaṃ, duṭṭhu vā vīmaṃsitaṃ na hoti. Idaṃ vuttaṃ hoti – yaṃ bhagavato santike mamāgamanaṃ, yaṃ vā mayā tattha āgataṃ, taṃ svāgataṃ, svāgatattāyeva na durāgataṃ. Yaṃ ‘‘bhagavato santike dhammaṃ sutvā pabbajissāmī’’ti mama mantitaṃ gaditaṃ kathitaṃ, cittena vā vīmaṃsitaṃ idampi na dummantinti. Idāni tattha kāraṇaṃ dassento ‘‘saṃvibhattesū’’tiādimāha. Saṃvibhattesūti pakārato vibhattesu. Dhammesūti ñeyyadhammesu samathadhammesu vā, nānātitthiyehi pakatiādivasena, sammāsambuddhehi dukkhādivasena saṃvibhajitvā vuttadhammesu. Yaṃ seṭṭhaṃ tadupāgaminti yaṃ tattha seṭṭhaṃ, taṃ catusaccadhammaṃ, tassa vā bodhakaṃ sāsanadhammaṃ upāgamiṃ, ‘‘ayaṃ dhammo ayaṃ vinayo’’ti upagacchiṃ. Sammāsambuddhehi eva vā kusalādivasena khandhādivasena yathāsabhāvato saṃvibhattesu sabhāvadhammesu yaṃ tattha seṭṭhaṃ uttamaṃ pavaraṃ, taṃ maggaphalanibbānadhammaṃ upāgamiṃ, attapaccakkhato upagacchiṃ sacchākāsiṃ, tasmā svāgataṃ mama na apagataṃ sumantitaṃ na dummantitanti yojanā.

    ਪਿਲਿਨ੍ਦવਚ੍ਛਤ੍ਥੇਰਗਾਥਾવਣ੍ਣਨਾ ਨਿਟ੍ਠਿਤਾ।

    Pilindavacchattheragāthāvaṇṇanā niṭṭhitā.







    Related texts:



    ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਥੇਰਗਾਥਾਪਾਲ਼ਿ • Theragāthāpāḷi / ੯. ਪਿਲਿਨ੍ਦવਚ੍ਛਤ੍ਥੇਰਗਾਥਾ • 9. Pilindavacchattheragāthā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact