| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༨. པིཎྜསུཏྟཝཎྞནཱ
8. Piṇḍasuttavaṇṇanā
༡༥༤. ཏཏྠ ཏཏྠཱཏི ཏསྨིཾ ཏསྨིཾ ཉཱཏིམིཏྟཀུལེ། པཱཧུནཀཱནཱིཏི པཧིཏབྦཔཎྞཱཀཱརཱནི། ཨཱགནྟུཀཔཎྞཱཀཱརཱནཱིཏི ཨཱགནྟུཀཱནཾ ཨུཔགཏཱནཾ དཱཏབྦཔཎྞཱཀཱརཱནི། སཡཾཙརདིཝསེཏི ཀུམཱརཀཱནཉྩ ཀུམཱརིཀཱནཉྩ སཡཾ ཨཏྟནཱ ཙརིཏབྦཚཎདིཝསེ། ཨིདཱནི ཏམཏྠཾ ཝིཏྠཱརཏོ དསྶེནྟོ ‘‘སམཝཡཛཱཏིགོཏྟཱ’’ཏིཨཱདིམཱཧ། སམཝཡསམཛཱཏིཀསམགོཏྟཱཏི པཙྩེཀཾ སམ-སདྡོ ཡོཛེཏབྦོ། གོཏྟསམཏཱ ཙ ཨཱཝཱཧཝིཝཱཧཡོགྱཏཱཝསེན དཊྛབྦཱ, ན ཨེཀགོཏྟཏཱཝསེན། ཏཏོ ཏཏོ གཱམཏོ། ཨཉྙསྨིཾ དཱཏབྦེ ཨསཏི། ཚཎཝསེན པཧིཎིཏུཾ སམྤཱདིཏཾ པཱུཝཾ ཚཎཔཱུཝཾ། ཏཱསཾ སམྤཏྟིཡཱཏི ཏཱསཾ དཱནཾ དྷམྨསྶཝནཉྩཱཏི ཏསྶཱ དུཝིདྷཱཡཔི སམྤཏྟིཡཱ།
154.Tattha tatthāti tasmiṃ tasmiṃ ñātimittakule. Pāhunakānīti pahitabbapaṇṇākārāni. Āgantukapaṇṇākārānīti āgantukānaṃ upagatānaṃ dātabbapaṇṇākārāni. Sayaṃcaradivaseti kumārakānañca kumārikānañca sayaṃ attanā caritabbachaṇadivase. Idāni tamatthaṃ vitthārato dassento ‘‘samavayajātigottā’’tiādimāha. Samavayasamajātikasamagottāti paccekaṃ sama-saddo yojetabbo. Gottasamatā ca āvāhavivāhayogyatāvasena daṭṭhabbā, na ekagottatāvasena. Tato tato gāmato. Aññasmiṃ dātabbe asati. Chaṇavasena pahiṇituṃ sampāditaṃ pūvaṃ chaṇapūvaṃ. Tāsaṃ sampattiyāti tāsaṃ dānaṃ dhammassavanañcāti tassā duvidhāyapi sampattiyā.
ཉཱཎཾ ནཱམ ཨཱཝཛྫནཔུབྦཀཾ, ཏསྨཱ ཨཛཱནནསྶ ‘‘ཨནཱཝཛྫནཏཱཡཱ’’ཏི ཀཱརཎཾ ཝཏྭཱ སེསཀཱརཎཾ ཝདནྟོ ‘‘བུདྡྷཱན’’ནྟིཨཱདིམཱཧ། ཨུཔཙཱརབྷེདནྟི བུདྡྷཾ དིསྭཱ མནུསྶེཧི ཀཱཏབྦཨུཔཙཱརསྶ བྷིནྡནཾ། བྷིནྡིཏུནྟི ཝིདྷམིཏུཾ།
Ñāṇaṃ nāma āvajjanapubbakaṃ, tasmā ajānanassa ‘‘anāvajjanatāyā’’ti kāraṇaṃ vatvā sesakāraṇaṃ vadanto ‘‘buddhāna’’ntiādimāha. Upacārabhedanti buddhaṃ disvā manussehi kātabbaupacārassa bhindanaṃ. Bhinditunti vidhamituṃ.
བྷགཝཱ པནཱཏི པནསདྡོ ཝིསེསཏྠཛོཏཀོ། ཏེན ན ཀེཝལཾ བྷགཝཱ ཨུཔྤཎྜནཾ པརིཧརནྟོ ཏཾ གཱམཾ ན པུན པཱཝིསི, ཨཐ ཁོ མཱརཾ ཨནུཀམྤནྟོཏི ཨིདཾ ཝིསེསཾ ཛོཏེཏི།
Bhagavā panāti panasaddo visesatthajotako. Tena na kevalaṃ bhagavā uppaṇḍanaṃ pariharanto taṃ gāmaṃ na puna pāvisi, atha kho māraṃ anukampantoti idaṃ visesaṃ joteti.
ཛནེསཱིཏི ཨཔུཉྙཾ ཛནེསི, ཛནེནྟོ ཙ ཡཐཱ ཏཏོ ཨཱཡཏིཾ ཐིརཏརཾ མཧནྟཾ དུཀྑཾ ནིཔྥཛྫིསྶཏི, ཨེཝཾ ནིཔྥཱདེསི། ཨཱསཛྫནནྟི ཨེཏྠ ནནྟི ནིཔཱཏམཏྟཾ། ཀིཉྩཏི མདྡཏི ཨབྷིབྷཝཏཱིཏི ཀིཉྩནནྟི ཨཱཧ ‘‘མདྡིཏུཾ སམཏྠ’’ནྟི།
Janesīti apuññaṃ janesi, janento ca yathā tato āyatiṃ thirataraṃ mahantaṃ dukkhaṃ nipphajjissati, evaṃ nipphādesi. Āsajjananti ettha nanti nipātamattaṃ. Kiñcati maddati abhibhavatīti kiñcananti āha ‘‘maddituṃ samattha’’nti.
པིཎྜསུཏྟཝཎྞནཱ ནིཊྛིཏཱ།
Piṇḍasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༨. པིཎྜསུཏྟཾ • 8. Piṇḍasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨. པིཎྜསུཏྟཝཎྞནཱ • 8. Piṇḍasuttavaṇṇanā
