| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩-೮. ಪಿಣ್ಡೋಲಭಾರದ್ವಾಜತ್ಥೇರಅಪದಾನವಣ್ಣನಾ
3-8. Piṇḍolabhāradvājattheraapadānavaṇṇanā
ಪದುಮುತ್ತರೋ ನಾಮ ಜಿನೋತಿಆದಿಕಂ ಆಯಸ್ಮತೋ ಪಿಣ್ಡೋಲಭಾರದ್ವಾಜಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಸೀಹಯೋನಿಯಂ ನಿಬ್ಬತ್ತಿತ್ವಾ ಪಬ್ಬತಪಾದೇ ಗುಹಾಯಂ ವಿಹಾಸಿ। ಭಗವಾ ತಸ್ಸ ಅನುಗ್ಗಹಂ ಕಾತುಂ ಗೋಚರಾಯ ಪಕ್ಕನ್ತಕಾಲೇ ತಸ್ಸ ಸಯನಗುಹಂ ಪವಿಸಿತ್ವಾ ನಿರೋಧಂ ಸಮಾಪಜ್ಜಿತ್ವಾ ನಿಸೀದಿ। ಸೀಹೋ ಗೋಚರಂ ಗಹೇತ್ವಾ ನಿವತ್ತೋ ಗುಹದ್ವಾರೇ ಠತ್ವಾ ಭಗವನ್ತಂ ದಿಸ್ವಾ ಹಟ್ಠತುಟ್ಠೋ ಜಲಜಥಲಜಪುಪ್ಫೇಹಿ ಪೂಜಂ ಕತ್ವಾ ಚಿತ್ತಂ ಪಸಾದೇನ್ತೋ ಭಗವತೋ ಆರಕ್ಖಣತ್ಥಾಯ ಅಞ್ಞೇ ವಾಳಮಿಗೇ ಅಪನೇತುಂ ತೀಸು ವೇಲಾಸು ಸೀಹನಾದಂ ನದನ್ತೋ ಬುದ್ಧಗತಾಯ ಸತಿಯಾ ಅಟ್ಠಾಸಿ। ಯಥಾ ಪಠಮದಿವಸೇ, ಏವಂ ಸತ್ತಾಹಂ ಪೂಜೇಸಿ। ಭಗವಾ ‘‘ಸತ್ತಾಹಚ್ಚಯೇನ ನಿರೋಧಾ ವುಟ್ಠಹಿತ್ವಾ ವಟ್ಟಿಸ್ಸತಿ ಇಮಸ್ಸ ಏತ್ತಕೋ ಉಪನಿಸ್ಸಯೋ’’ತಿ ತಸ್ಸ ಪಸ್ಸನ್ತಸ್ಸೇವ ಆಕಾಸಂ ಪಕ್ಖನ್ದಿತ್ವಾ ವಿಹಾರಮೇವ ಗತೋ।
Padumuttaronāma jinotiādikaṃ āyasmato piṇḍolabhāradvājassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle sīhayoniyaṃ nibbattitvā pabbatapāde guhāyaṃ vihāsi. Bhagavā tassa anuggahaṃ kātuṃ gocarāya pakkantakāle tassa sayanaguhaṃ pavisitvā nirodhaṃ samāpajjitvā nisīdi. Sīho gocaraṃ gahetvā nivatto guhadvāre ṭhatvā bhagavantaṃ disvā haṭṭhatuṭṭho jalajathalajapupphehi pūjaṃ katvā cittaṃ pasādento bhagavato ārakkhaṇatthāya aññe vāḷamige apanetuṃ tīsu velāsu sīhanādaṃ nadanto buddhagatāya satiyā aṭṭhāsi. Yathā paṭhamadivase, evaṃ sattāhaṃ pūjesi. Bhagavā ‘‘sattāhaccayena nirodhā vuṭṭhahitvā vaṭṭissati imassa ettako upanissayo’’ti tassa passantasseva ākāsaṃ pakkhanditvā vihārameva gato.
ಸೀಹೋ ಬುದ್ಧವಿಯೋಗದುಕ್ಖಂ ಅಧಿವಾಸೇತುಂ ಅಸಕ್ಕೋನ್ತೋ ಕಾಲಂ ಕತ್ವಾ ಹಂಸವತೀನಗರೇ ಮಹಾಭೋಗಕುಲೇ ನಿಬ್ಬತ್ತಿತ್ವಾ ವಯಪ್ಪತ್ತೋ ನಗರವಾಸೀಹಿ ಸದ್ಧಿಂ ವಿಹಾರಂ ಗನ್ತ್ವಾ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನೋ ಸತ್ತಾಹಂ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ಮಹಾದಾನಂ ಪವತ್ತೇತ್ವಾ ಯಾವಜೀವಂ ಪುಞ್ಞಾನಿ ಕತ್ವಾ ಅಪರಾಪರಂ ದೇವಮನುಸ್ಸೇಸು ಸಂಸರನ್ತೋ ಅಮ್ಹಾಕಂ ಭಗವತೋ ಕಾಲೇ ಕೋಸಮ್ಬಿಯಂ ರಞ್ಞೋ ಉದೇನಸ್ಸ ಪುರೋಹಿತಸ್ಸ ಪುತ್ತೋ ಹುತ್ವಾ ನಿಬ್ಬತ್ತಿ। ಭಾರದ್ವಾಜೋತಿಸ್ಸ ನಾಮಂ ಅಹೋಸಿ। ಸೋ ವಯಪ್ಪತೋ ತಯೋ ವೇದೇ ಉಗ್ಗಹೇತ್ವಾ ಪಞ್ಚ ಮಾಣವಕಸತಾನಿ ಮನ್ತೇ ವಾಚೇನ್ತೋ ಮಹಗ್ಘಸಭಾವೇನ ಅನನುರೂಪಾಚಾರತ್ತಾ ತೇಹಿ ಪರಿಚ್ಚತ್ತೋ ರಾಜಗಹಂ ಗನ್ತ್ವಾ ಭಗವತೋ ಭಿಕ್ಖುಸಙ್ಘಸ್ಸ ಚ ಲಾಭಸಕ್ಕಾರಂ ದಿಸ್ವಾ ಸಾಸನೇ ಪಬ್ಬಜಿತ್ವಾ ಭೋಜನೇ ಅಮತ್ತಞ್ಞೂ ಹುತ್ವಾ ವಿಹರತಿ। ಸತ್ಥಾರಾ ಉಪಾಯೇನ ಮತ್ತಞ್ಞುತಾಯ ಪತಿಟ್ಠಾಪೇನ್ತೋ ವಿಪಸ್ಸನಂ ಪಟ್ಠಪೇತ್ವಾ ನಚಿರಸ್ಸೇವ ಛಳಭಿಞ್ಞೋ ಅಹೋಸಿ। ಛಳಭಿಞ್ಞೋ ಪನ ಹುತ್ವಾ ಭಗವತೋ ಸಮ್ಮುಖಾ ‘‘ಯಂ ಸಾವಕೇಹಿ ಪತ್ತಬ್ಬಂ, ತಂ ಮಯಾ ಅನುಪ್ಪತ್ತ’’ನ್ತಿ, ಭಿಕ್ಖುಸಙ್ಘೇ ಚ ‘‘ಯಸ್ಸ ಮಗ್ಗೇ ವಾ ಫಲೇ ವಾ ಕಙ್ಖಾ ಅತ್ಥಿ, ಸೋ ಮಂ ಪುಚ್ಛತೂ’’ತಿ ಸೀಹನಾದಂ ನದಿ। ತೇನ ತಂ ಭಗವಾ – ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಸೀಹನಾದಿಕಾನಂ ಯದಿದಂ ಪಿಣ್ಡೋಲಭಾರದ್ವಾಜೋ’’ತಿ (ಅ॰ ನಿ॰ ೧.೧೮೮, ೧೯೫) ಏತದಗ್ಗೇ ಠಪೇಸಿ।
Sīho buddhaviyogadukkhaṃ adhivāsetuṃ asakkonto kālaṃ katvā haṃsavatīnagare mahābhogakule nibbattitvā vayappatto nagaravāsīhi saddhiṃ vihāraṃ gantvā satthu dhammadesanaṃ sutvā pasanno sattāhaṃ buddhappamukhassa bhikkhusaṅghassa mahādānaṃ pavattetvā yāvajīvaṃ puññāni katvā aparāparaṃ devamanussesu saṃsaranto amhākaṃ bhagavato kāle kosambiyaṃ rañño udenassa purohitassa putto hutvā nibbatti. Bhāradvājotissa nāmaṃ ahosi. So vayappato tayo vede uggahetvā pañca māṇavakasatāni mante vācento mahagghasabhāvena ananurūpācārattā tehi pariccatto rājagahaṃ gantvā bhagavato bhikkhusaṅghassa ca lābhasakkāraṃ disvā sāsane pabbajitvā bhojane amattaññū hutvā viharati. Satthārā upāyena mattaññutāya patiṭṭhāpento vipassanaṃ paṭṭhapetvā nacirasseva chaḷabhiñño ahosi. Chaḷabhiñño pana hutvā bhagavato sammukhā ‘‘yaṃ sāvakehi pattabbaṃ, taṃ mayā anuppatta’’nti, bhikkhusaṅghe ca ‘‘yassa magge vā phale vā kaṅkhā atthi, so maṃ pucchatū’’ti sīhanādaṃ nadi. Tena taṃ bhagavā – ‘‘etadaggaṃ, bhikkhave, mama sāvakānaṃ bhikkhūnaṃ sīhanādikānaṃ yadidaṃ piṇḍolabhāradvājo’’ti (a. ni. 1.188, 195) etadagge ṭhapesi.
೬೧೩. ಏವಂ ಏತದಗ್ಗಂ ಠಾನಂ ಪತ್ವಾ ಪುಬ್ಬೇ ಕತಪುಞ್ಞಸಮ್ಭಾರಂ ಸರಿತ್ವಾ ಸೋಮನಸ್ಸವಸೇನ ಅತ್ತನೋ ಪುಞ್ಞಕಮ್ಮಾಪದಾನಂ ವಿಭಾವೇನ್ತೋ ಪದುಮುತ್ತರೋತಿಆದಿಮಾಹ। ತಸ್ಸತ್ಥೋ ಹೇಟ್ಠಾ ವುತ್ತೋವ। ಪುರತೋ ಹಿಮವನ್ತಸ್ಸಾತಿ ಹಿಮಾಲಯಪಬ್ಬತತೋ ಪುಬ್ಬದಿಸಾಭಾಗೇತಿ ಅತ್ಥೋ। ಚಿತ್ತಕೂಟೇ ವಸೀ ತದಾತಿ ಯದಾ ಅಹಂ ಸೀಹೋ ಮಿಗರಾಜಾ ಹುತ್ವಾ ಹಿಮವನ್ತಪಬ್ಬತಸಮೀಪೇ ವಸಾಮಿ, ತದಾ ಪದುಮುತ್ತರೋ ನಾಮ ಸತ್ಥಾ ಅನೇಕೇಹಿ ಚ ಓಸಧೇಹಿ, ಅನೇಕೇಹಿ ಚ ರತನೇಹಿ ಚಿತ್ತವಿಚಿತ್ತತಾಯ ಚಿತ್ತಕೂಟೇ ಚಿತ್ತಪಬ್ಬತಸಿಖರೇ ವಸೀತಿ ಸಮ್ಬನ್ಧೋ।
613. Evaṃ etadaggaṃ ṭhānaṃ patvā pubbe katapuññasambhāraṃ saritvā somanassavasena attano puññakammāpadānaṃ vibhāvento padumuttarotiādimāha. Tassattho heṭṭhā vuttova. Purato himavantassāti himālayapabbatato pubbadisābhāgeti attho. Cittakūṭevasī tadāti yadā ahaṃ sīho migarājā hutvā himavantapabbatasamīpe vasāmi, tadā padumuttaro nāma satthā anekehi ca osadhehi, anekehi ca ratanehi cittavicittatāya cittakūṭe cittapabbatasikhare vasīti sambandho.
೬೧೪. ಅಭೀತರೂಪೋ ತತ್ಥಾಸಿನ್ತಿ ಅಭೀತಸಭಾವೋ ನಿಬ್ಭಯಸಭಾವೋ ಮಿಗರಾಜಾ ತತ್ಥ ಆಸಿಂ ಅಹೋಸಿನ್ತಿ ಅತ್ಥೋ। ಚತುಕ್ಕಮೋತಿ ಚತೂಹಿ ದಿಸಾಹಿ ಕಮೋ ಗನ್ತುಂ ಸಮತ್ಥೋ। ಯಸ್ಸ ಸದ್ದಂ ಸುಣಿತ್ವಾನಾತಿ ಯಸ್ಸ ಮಿಗರಞ್ಞೋ ಸೀಹನಾದಂ ಸುತ್ವಾ ಬಹುಜ್ಜನಾ ಬಹುಸತ್ತಾ ವಿಕ್ಖಮ್ಭನ್ತಿ ವಿಸೇಸೇನ ಖಮ್ಭನ್ತಿ ಭಾಯನ್ತಿ।
614.Abhītarūpo tatthāsinti abhītasabhāvo nibbhayasabhāvo migarājā tattha āsiṃ ahosinti attho. Catukkamoti catūhi disāhi kamo gantuṃ samattho. Yassa saddaṃ suṇitvānāti yassa migarañño sīhanādaṃ sutvā bahujjanā bahusattā vikkhambhanti visesena khambhanti bhāyanti.
೬೧೫. ಸುಫುಲ್ಲಂ ಪದುಮಂ ಗಯ್ಹಾತಿ ಭಗವತಿ ಪಸಾದೇನ ಸುಪುಪ್ಫಿತಪದುಮಪುಪ್ಫಂ ಡಂಸಿತ್ವಾ। ನರಾಸಭಂ ನರಾನಂ ಆಸಭಂ ಉತ್ತಮಂ ಸೇಟ್ಠಂ ಸಮ್ಬುದ್ಧಂ ಉಪಗಚ್ಛಿಂ, ಸಮೀಪಂ ಅಗಮಿನ್ತಿ ಅತ್ಥೋ। ವುಟ್ಠಿತಸ್ಸ ಸಮಾಧಿಮ್ಹಾತಿ ನಿರೋಧಸಮಾಪತ್ತಿತೋ ವುಟ್ಠಿತಸ್ಸ ಬುದ್ಧಸ್ಸ ತಂ ಪುಪ್ಫಂ ಅಭಿರೋಪಯಿಂ ಪೂಜೇಸಿನ್ತಿ ಅತ್ಥೋ।
615.Suphullaṃ padumaṃ gayhāti bhagavati pasādena supupphitapadumapupphaṃ ḍaṃsitvā. Narāsabhaṃ narānaṃ āsabhaṃ uttamaṃ seṭṭhaṃ sambuddhaṃ upagacchiṃ, samīpaṃ agaminti attho. Vuṭṭhitassa samādhimhāti nirodhasamāpattito vuṭṭhitassa buddhassa taṃ pupphaṃ abhiropayiṃ pūjesinti attho.
೬೧೬. ಚತುದ್ದಿಸಂ ನಮಸ್ಸಿತ್ವಾತಿ ಚತೂಸು ದಿಸಾಸು ನಮಸ್ಸಿತ್ವಾ ಸಕಂ ಚಿತ್ತಂ ಅತ್ತನೋ ಚಿತ್ತಂ ಪಸಾದೇತ್ವಾ ಆದರೇನ ಪತಿಟ್ಠಪೇತ್ವಾ ಸೀಹನಾದಂ ಅಭೀತನಾದಂ ಅನದಿಂ ಘೋಸೇಸಿನ್ತಿ ಅತ್ಥೋ।
616.Catuddisaṃ namassitvāti catūsu disāsu namassitvā sakaṃ cittaṃ attano cittaṃ pasādetvā ādarena patiṭṭhapetvā sīhanādaṃ abhītanādaṃ anadiṃ ghosesinti attho.
೬೧೭. ತತೋ ಬುದ್ಧೇನ ದಿನ್ನಬ್ಯಾಕರಣಂ ಪಕಾಸೇನ್ತೋ ಪದುಮುತ್ತರೋತಿಆದಿಮಾಹ। ತಂ ಉತ್ತಾನತ್ಥಮೇವ।
617. Tato buddhena dinnabyākaraṇaṃ pakāsento padumuttarotiādimāha. Taṃ uttānatthameva.
೬೧೮. ವದತಂ ಸೇಟ್ಠೋತಿ ‘‘ಮಯಂ ಬುದ್ಧಾ, ಮಯಂ ಬುದ್ಧಾ’’ತಿ ವದನ್ತಾನಂ ಅಞ್ಞತಿತ್ಥಿಯಾನಂ ಸೇಟ್ಠೋ ಉತ್ತಮೋ ಬುದ್ಧೋ ಆಗತೋತಿ ಸಮ್ಬನ್ಧೋ। ತಸ್ಸ ಆಗತಸ್ಸ ಭಗವತೋ ತಂ ಧಮ್ಮಂ ಸೋಸ್ಸಾಮ ಸುಣಿಸ್ಸಾಮಾತಿ ಅತ್ಥೋ।
618.Vadataṃ seṭṭhoti ‘‘mayaṃ buddhā, mayaṃ buddhā’’ti vadantānaṃ aññatitthiyānaṃ seṭṭho uttamo buddho āgatoti sambandho. Tassa āgatassa bhagavato taṃ dhammaṃ sossāma suṇissāmāti attho.
೬೧೯. ತೇಸಂ ಹಾಸಪರೇತಾನನ್ತಿ ಹಾಸೇಹಿ ಸೋಮನಸ್ಸೇಹಿ ಪರೇತಾನಂ ಅಭಿಭೂತಾನಂ ಸಮನ್ನಾಗತಾನಂ ತೇಸಂ ದೇವಮನುಸ್ಸಾನಂ। ಲೋಕನಾಯಕೋತಿ ಲೋಕಸ್ಸ ನಾಯಕೋ ಸಗ್ಗಮೋಕ್ಖಸಮ್ಪಾಪಕೋ ಮಮ ಸದ್ದಂ ಮಯ್ಹಂ ಸೀಹನಾದಂ ಪಕಿತ್ತೇಸಿ ಪಕಾಸೇಸಿ ಕಥೇಸಿ, ದೀಘದಸ್ಸೀ ಅನಾಗತಕಾಲದಸ್ಸೀ ಮಹಾಮುನಿ ಮುನೀನಮನ್ತರೇ ಮಹನ್ತೋ ಮುನಿ। ಸೇಸಗಾಥಾ ಸುವಿಞ್ಞೇಯ್ಯಮೇವ।
619.Tesaṃhāsaparetānanti hāsehi somanassehi paretānaṃ abhibhūtānaṃ samannāgatānaṃ tesaṃ devamanussānaṃ. Lokanāyakoti lokassa nāyako saggamokkhasampāpako mama saddaṃ mayhaṃ sīhanādaṃ pakittesi pakāsesi kathesi, dīghadassī anāgatakāladassī mahāmuni munīnamantare mahanto muni. Sesagāthā suviññeyyameva.
೬೨೨. ನಾಮೇನ ಪದುಮೋ ನಾಮ ಚಕ್ಕವತ್ತೀ ಹುತ್ವಾ ಚತುಸಟ್ಠಿಯಾ ಜಾತಿಯಾ ಇಸ್ಸರಿಯಂ ಇಸ್ಸರಭಾವಂ ರಜ್ಜಂ ಕಾರಯಿಸ್ಸತೀತಿ ಅತ್ಥೋ।
622. Nāmena padumo nāma cakkavattī hutvā catusaṭṭhiyā jātiyā issariyaṃ issarabhāvaṃ rajjaṃ kārayissatīti attho.
೬೨೩. ಕಪ್ಪಸತಸಹಸ್ಸಮ್ಹೀತಿ ಸಾಮ್ಯತ್ಥೇ ಭುಮ್ಮವಚನಂ, ಕಪ್ಪಸತಸಹಸ್ಸಾನಂ ಪರಿಯೋಸಾನೇತಿ ಅತ್ಥೋ।
623.Kappasatasahassamhīti sāmyatthe bhummavacanaṃ, kappasatasahassānaṃ pariyosāneti attho.
೬೨೪. ಪಕಾಸಿತೇ ಪಾವಚನೇತಿ ತೇನ ಗೋತಮೇನ ಭಗವತಾ ಪಿಟಕತ್ತಯೇ ಪಕಾಸಿತೇ ದೇಸಿತೇತಿ ಅತ್ಥೋ। ಬ್ರಹ್ಮಬನ್ಧು ಭವಿಸ್ಸತೀತಿ ತದಾ ಗೋತಮಸ್ಸ ಭಗವತೋ ಕಾಲೇ ಅಯಂ ಸೀಹೋ ಮಿಗರಾಜಾ ಬ್ರಾಹ್ಮಣಕುಲೇ ನಿಬ್ಬತ್ತಿಸ್ಸತೀತಿ ಅತ್ಥೋ। ಬ್ರಹ್ಮಞ್ಞಾ ಅಭಿನಿಕ್ಖಮ್ಮಾತಿ ಬ್ರಾಹ್ಮಣಕುಲತೋ ನಿಕ್ಖಮಿತ್ವಾ ತಸ್ಸ ಭಗವತೋ ಸಾಸನೇ ಪಬ್ಬಜಿಸ್ಸತೀತಿ ಸಮ್ಬನ್ಧೋ।
624.Pakāsite pāvacaneti tena gotamena bhagavatā piṭakattaye pakāsite desiteti attho. Brahmabandhu bhavissatīti tadā gotamassa bhagavato kāle ayaṃ sīho migarājā brāhmaṇakule nibbattissatīti attho. Brahmaññā abhinikkhammāti brāhmaṇakulato nikkhamitvā tassa bhagavato sāsane pabbajissatīti sambandho.
೬೨೫. ಪಧಾನಪಹಿತತ್ತೋತಿ ವೀರಿಯಕರಣತ್ಥಂ ಪೇಸಿತಚಿತ್ತೋ। ಉಪಧಿಸಙ್ಖಾತಾನಂ ಕಿಲೇಸಾನಂ ಅಭಾವೇನ ನಿರುಪಧಿ। ಕಿಲೇಸದರಥಾನಂ ಅಭಾವೇನ ಉಪಸನ್ತೋ। ಸಬ್ಬಾಸವೇ ಸಕಲಾಸವೇ ಪರಿಞ್ಞಾಯ ಪಹಾಯ ಅನಾಸವೋ ನಿಕ್ಕಿಲೇಸೋ ನಿಬ್ಬಾಯಿಸ್ಸತಿ ಖನ್ಧಪರಿನಿಬ್ಬಾನೇನ ನಿಬ್ಬುತೋ ಭವಿಸ್ಸತೀತಿ ಅತ್ಥೋ।
625.Padhānapahitattoti vīriyakaraṇatthaṃ pesitacitto. Upadhisaṅkhātānaṃ kilesānaṃ abhāvena nirupadhi. Kilesadarathānaṃ abhāvena upasanto. Sabbāsave sakalāsave pariññāya pahāya anāsavo nikkileso nibbāyissati khandhaparinibbānena nibbuto bhavissatīti attho.
೬೨೬. ವಿಜನೇ ಪನ್ತಸೇಯ್ಯಮ್ಹೀತಿ ಜನಸಮ್ಬಾಧರಹಿತೇ ದೂರಾರಞ್ಞಸೇನಾಸನೇತಿ ಅತ್ಥೋ। ವಾಳಮಿಗಸಮಾಕುಲೇತಿ ಕಾಳಸೀಹಾದೀಹಿ ಚಣ್ಡಮಿಗಸಙ್ಗೇಹಿ ಆಕುಲೇ ಸಂಕಿಣ್ಣೇತಿ ಅತ್ಥೋ। ಸೇಸಂ ವುತ್ತತ್ಥಮೇವಾತಿ।
626.Vijane pantaseyyamhīti janasambādharahite dūrāraññasenāsaneti attho. Vāḷamigasamākuleti kāḷasīhādīhi caṇḍamigasaṅgehi ākule saṃkiṇṇeti attho. Sesaṃ vuttatthamevāti.
ಪಿಣ್ಡೋಲಭಾರದ್ವಾಜತ್ಥೇರಅಪದಾನವಣ್ಣನಾ ಸಮತ್ತಾ।
Piṇḍolabhāradvājattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩-೮. ಪಿಣ್ಡೋಲಭಾರದ್ವಾಜತ್ಥೇರಅಪದಾನಂ • 3-8. Piṇḍolabhāradvājattheraapadānaṃ
