| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
8. бин̣д̣оляасуд̇д̇аван̣н̣анаа
8. Piṇḍolyasuttavaṇṇanā
80. адтамз гисмин̃жид̣̇зва багаран̣зд̇и гисмин̃жид̣̇зва гааран̣з. бан̣аамзд̇ваад̇и нийхарид̇ваа. гисмим̣ бана гааран̣з зд̇з бхаг̇авад̇аа бан̣аамид̇аад̇и? згасмин̃хи анд̇овассз бхаг̇аваа саавад̇т̇ияам̣ васид̇ваа вуд̇т̇авассо баваарзд̇ваа махаабхигкусан̇гхабаривааро саавад̇т̇ид̇о нигкамид̇ваа ж̇анабад̣̇ажааригам̣ жаранд̇о габилавад̇т̇ум̣ бад̇ваа ниг̇род̇хаараамам̣ баависи. сагяарааж̇аано ‘‘сад̇т̇аа ааг̇ад̇о’’д̇и суд̇ваа бажчаабхад̇д̇з габбияаани д̇зламад̇хупаан̣ид̇аад̣̇ийни жзва баанагаани жа гааж̇асад̇зхи г̇аахаабзд̇ваа вихаарам̣ г̇анд̇ваа сан̇гхасса нияяаад̇зд̇ваа сад̇т̇аарам̣ ванд̣̇ид̇ваа бадисант̇аарам̣ гаронд̇аа згаманд̇з нисийд̣̇им̣су. сад̇т̇аа д̇зсам̣ мад̇хурад̇хаммагат̇ам̣ гат̇знд̇о нисийд̣̇и. д̇асмим̣ кан̣з згажжз бхигкуу сзнаасанам̣ бадиж̇аг̇г̇анд̇и, згажжз ман̃жабийтаад̣̇ийни бан̃н̃аабзнд̇и, сааман̣зраа аббахарид̇ам̣ гаронд̇и. бхааж̇анийяадтаанз самбад̇д̇абхигкууби ад̇т̇и, асамбад̇д̇абхигкууби ад̇т̇и. самбад̇д̇аа асамбад̇д̇аанам̣ лаабхам̣ г̇ан̣ханд̇аа, ‘‘амхаагам̣ д̣̇зт̇а, амхаагам̣ аажарияасса д̣̇зт̇а убаж̇жхааяасса д̣̇зт̇аа’’д̇и гат̇знд̇аа махаасад̣̇д̣̇амагам̣су. сад̇т̇аа суд̇ваа т̇зрам̣ бужчи ‘‘гз бана д̇з, аананд̣̇а, ужжаасад̣̇д̣̇аа махаасад̣̇д̣̇аа гзваддаа ман̃н̃з мажчавилобз’’д̇и? т̇зро зд̇амад̇т̇ам̣ аарожзси. сад̇т̇аа суд̇ваа ‘‘аамисахзд̇у, аананд̣̇а, бхигкуу махаасад̣̇д̣̇ам̣ гаронд̇ий’’д̇и ааха. ‘‘аама, бханд̇з’’д̇и. ‘‘ананужчавигам̣, аананд̣̇а, аббад̇ируубам̣. на хи маяаа габбасад̇асахассаад̇хигаани жад̇д̇аари асан̇кязяяаани жийвараад̣̇ихзд̇у баарамияо буурид̇аа, нааби имз бхигкуу жийвараад̣̇ихзд̇у аг̇аарасмаа анаг̇аарияам̣ баб̣б̣аж̇ид̇аа, арахад̇д̇ахзд̇у баб̣б̣аж̇ид̇ваа анад̇т̇ам̣ ад̇т̇асад̣̇исам̣ асаарам̣ саарасад̣̇исам̣ гаронд̇и, г̇ажчаананд̣̇а, д̇з бхигкуу бан̣аамзхий’’д̇и.
80. Aṭṭhame kismiñcideva pakaraṇeti kismiñcideva kāraṇe. Paṇāmetvāti nīharitvā. Kismiṃ pana kāraṇe ete bhagavatā paṇāmitāti? Ekasmiñhi antovasse bhagavā sāvatthiyaṃ vasitvā vutthavasso pavāretvā mahābhikkhusaṅghaparivāro sāvatthito nikkhamitvā janapadacārikaṃ caranto kapilavatthuṃ patvā nigrodhārāmaṃ pāvisi. Sakyarājāno ‘‘satthā āgato’’ti sutvā pacchābhatte kappiyāni telamadhuphāṇitādīni ceva pānakāni ca kājasatehi gāhāpetvā vihāraṃ gantvā saṅghassa niyyātetvā satthāraṃ vanditvā paṭisanthāraṃ karontā ekamante nisīdiṃsu. Satthā tesaṃ madhuradhammakathaṃ kathento nisīdi. Tasmiṃ khaṇe ekacce bhikkhū senāsanaṃ paṭijagganti, ekacce mañcapīṭhādīni paññāpenti, sāmaṇerā appaharitaṃ karonti. Bhājanīyaṭṭhāne sampattabhikkhūpi atthi, asampattabhikkhūpi atthi. Sampattā asampattānaṃ lābhaṃ gaṇhantā, ‘‘amhākaṃ detha, amhākaṃ ācariyassa detha upajjhāyassa dethā’’ti kathentā mahāsaddamakaṃsu. Satthā sutvā theraṃ pucchi ‘‘ke pana te, ānanda, uccāsaddā mahāsaddā kevaṭṭā maññe macchavilope’’ti? Thero etamatthaṃ ārocesi. Satthā sutvā ‘‘āmisahetu, ānanda, bhikkhū mahāsaddaṃ karontī’’ti āha. ‘‘Āma, bhante’’ti. ‘‘Ananucchavikaṃ, ānanda, appatirūpaṃ. Na hi mayā kappasatasahassādhikāni cattāri asaṅkhyeyyāni cīvarādihetu pāramiyo pūritā, nāpi ime bhikkhū cīvarādihetu agārasmā anagāriyaṃ pabbajitā, arahattahetu pabbajitvā anatthaṃ atthasadisaṃ asāraṃ sārasadisaṃ karonti, gacchānanda, te bhikkhū paṇāmehī’’ti.
буб̣б̣ан̣хасамаяанд̇и д̣̇уд̇ияад̣̇ивасз буб̣б̣ан̣хасамаяам̣. б̣злуваладтигааяа муулзд̇и д̇арун̣аб̣злуваругкамуулз. баб̣аал̣ход̇и баб̣аахид̇о. баваал̣ход̇иби баато, баваахид̇од̇и ад̇т̇о. убхаяамби нийхадабхаавамзва д̣̇ийбзд̇и. сияаа ан̃н̃ат̇ад̇д̇анд̇и басаад̣̇ан̃н̃ат̇ад̇д̇ам̣ ваа бхааван̃н̃ат̇ад̇д̇ам̣ ваа бхавзяяа. гат̇ам̣? ‘‘саммаасамб̣уд̣̇д̇хзна маяам̣ лахугз гааран̣з бан̣аамид̇аа’’д̇и басаад̣̇ам̣ манд̣̇ам̣ гаронд̇аанам̣ басаад̣̇ан̃н̃ат̇ад̇д̇ам̣ наама ход̇и. салин̇г̇знзва д̇ид̇т̇ааяад̇анам̣ баггаманд̇аанам̣ бхааван̃н̃ат̇ад̇д̇ам̣ наама. сияаа вибарин̣аамод̇и зд̇т̇а бана ‘‘маяам̣ сад̇т̇у аж̇жхаасаяам̣ г̇ан̣хид̇ум̣ сагкиссаамаад̇и баб̣б̣аж̇ид̇аа, нам̣ г̇ахзд̇ум̣ асаггонд̇аанам̣ гим̣ амхаагам̣ баб̣б̣аж̇ж̇ааяаа’’д̇и? сигкам̣ бажжагкааяа хийнааяаавад̇д̇анам̣ вибарин̣аамод̇и взд̣̇ид̇аб̣б̣о. важчассаад̇и кийруубагаважчасса. ан̃н̃ат̇ад̇д̇анд̇и милааяанаан̃н̃ат̇ад̇д̇ам̣. кийруубаго хи важчо маад̇у ад̣̇ассанзна кийрам̣ алабханд̇о милааяад̇и гамбад̇и бавзд̇хад̇и. вибарин̣аамод̇и маран̣ам̣. со хи кийрам̣ алабхамаано кийрабибаасааяа суссанд̇о бад̇ид̇ваа марад̇и.
Pubbaṇhasamayanti dutiyadivase pubbaṇhasamayaṃ. Beluvalaṭṭhikāya mūleti taruṇabeluvarukkhamūle. Pabāḷhoti pabāhito. Pavāḷhotipi pāṭho, pavāhitoti attho. Ubhayampi nīhaṭabhāvameva dīpeti. Siyā aññathattanti pasādaññathattaṃ vā bhāvaññathattaṃ vā bhaveyya. Kathaṃ? ‘‘Sammāsambuddhena mayaṃ lahuke kāraṇe paṇāmitā’’ti pasādaṃ mandaṃ karontānaṃ pasādaññathattaṃ nāma hoti. Saliṅgeneva titthāyatanaṃ pakkamantānaṃ bhāvaññathattaṃ nāma. Siyā vipariṇāmoti ettha pana ‘‘mayaṃ satthu ajjhāsayaṃ gaṇhituṃ sakkhissāmāti pabbajitā, naṃ gahetuṃ asakkontānaṃ kiṃ amhākaṃ pabbajjāyā’’ti? Sikkhaṃ paccakkhāya hīnāyāvattanaṃ vipariṇāmoti veditabbo. Vacchassāti khīrūpakavacchassa. Aññathattanti milāyanaaññathattaṃ. Khīrūpako hi vaccho mātu adassanena khīraṃ alabhanto milāyati kampati pavedhati. Vipariṇāmoti maraṇaṃ. So hi khīraṃ alabhamāno khīrapipāsāya sussanto patitvā marati.
б̣ийж̇аанам̣ д̇арун̣аананд̇и уд̣̇агзна ануг̇г̇ахзд̇аб̣б̣аанам̣ вируул̣хаб̣ийж̇аанам̣. ан̃н̃ат̇ад̇д̇анд̇и милааяанан̃н̃ат̇ад̇д̇амзва. д̇аани хи уд̣̇агам̣ алабханд̇аани милааяанд̇и. вибарин̣аамод̇и винаасо. д̇аани хи уд̣̇агам̣ алабханд̇аани сугкид̇ваа винассанд̇и, балааламзва хонд̇и. ануг̇г̇ахид̇од̇и аамисаануг̇г̇ахзна жзва д̇хаммаануг̇г̇ахзна жа ануг̇г̇ахид̇о. ануг̇г̇ан̣хзяяанд̇и д̣̇вийхиби зд̇зхи ануг̇г̇ахзхи ануг̇г̇ан̣хзяяам̣. ажирабаб̣б̣аж̇ид̇аа хи сааман̣зраа жзва д̣̇ахарабхигкуу жа жийвараад̣̇ибажжаяавзгаллз ваа сад̇и г̇злан̃н̃з ваа сад̇т̇аараа ваа аажарияубаж̇жхааязхи ваа аамисаануг̇г̇ахзна анануг̇г̇ахид̇аа гиламанд̇аа на саггонд̇и саж̇жхааяам̣ ваа манасигаарам̣ ваа гаад̇ум̣, д̇хаммаануг̇г̇ахзна анануг̇г̇ахид̇аа уд̣̇д̣̇зсзна жзва оваад̣̇аанусаасанияаа жа барихааяамаанаа на саггонд̇и агусалам̣ бариваж̇ж̇зд̇ваа гусалам̣ бхаавзд̇ум̣. имзхи бана д̣̇вийхи ануг̇г̇ахзхи ануг̇г̇ахид̇аа гааязна агиламанд̇аа саж̇жхааяаманасигаарз бавад̇д̇ид̇ваа яат̇аанусидтам̣ бадибаж̇ж̇амаанаа абарабхааг̇з д̇ам̣ ануг̇г̇ахам̣ алабханд̇ааби д̇знзва буримаануг̇г̇ахзна лад̣̇д̇хаб̣алаа саасанз бад̇идтаханд̇и, д̇асмаа бхаг̇авад̇о звам̣ баривид̇агго уд̣̇абаад̣̇и.
Bījānaṃ taruṇānanti udakena anuggahetabbānaṃ virūḷhabījānaṃ. Aññathattanti milāyanaññathattameva. Tāni hi udakaṃ alabhantāni milāyanti. Vipariṇāmoti vināso. Tāni hi udakaṃ alabhantāni sukkhitvā vinassanti, palālameva honti. Anuggahitoti āmisānuggahena ceva dhammānuggahena ca anuggahito. Anuggaṇheyyanti dvīhipi etehi anuggahehi anuggaṇheyyaṃ. Acirapabbajitā hi sāmaṇerā ceva daharabhikkhū ca cīvarādipaccayavekalle vā sati gelaññe vā satthārā vā ācariyupajjhāyehi vā āmisānuggahena ananuggahitā kilamantā na sakkonti sajjhāyaṃ vā manasikāraṃ vā kātuṃ, dhammānuggahena ananuggahitā uddesena ceva ovādānusāsaniyā ca parihāyamānā na sakkonti akusalaṃ parivajjetvā kusalaṃ bhāvetuṃ. Imehi pana dvīhi anuggahehi anuggahitā kāyena akilamantā sajjhāyamanasikāre pavattitvā yathānusiṭṭhaṃ paṭipajjamānā aparabhāge taṃ anuggahaṃ alabhantāpi teneva purimānuggahena laddhabalā sāsane patiṭṭhahanti, tasmā bhagavato evaṃ parivitakko udapādi.
бхаг̇авад̇о бурад̇о баад̇урахосийд̇и сад̇т̇у жид̇д̇ам̣ н̃ад̇ваа – ‘‘имз бхигкуу бхаг̇авад̇аа бан̣аамид̇аа, ид̣̇аани нзсам̣ ануг̇г̇ахам̣ гаад̇угаамо звам̣ жинд̇зси, гааран̣ам̣ бхаг̇аваа жинд̇зси, ахамзд̇т̇а уссаахам̣ ж̇анзссаамий’’д̇и бурад̇о баагадо ахоси. санд̇зд̇т̇а бхигкууд̇и ид̣̇ам̣ со махааб̣рахмаа яат̇аа наама б̣яад̇д̇о сууд̣̇о яад̣̇зва амб̣илаг̇г̇аад̣̇ийсу расаж̇аад̇ам̣ ран̃н̃о ружжад̇и, д̇ам̣ абхисан̇каарзна саад̣̇уд̇арам̣ гад̇ваа бунад̣̇ивасз убанаамзд̇и, звамзва ад̇д̇ано б̣яад̇д̇ад̇ааяа бхаг̇авад̇аа аахадаубамам̣язва звамзд̇ам̣ бхаг̇аваад̇иаад̣̇иважанзхи абхисан̇карид̇ваа бхаг̇аванд̇ам̣ яаажанд̇о бхигкусан̇гхасса ануг̇г̇ахагаран̣ад̇т̇ам̣ вад̣̇ад̇и . д̇ад̇т̇а абхинанд̣̇ад̇ууд̇и ‘‘мама санд̇игам̣ бхигкусан̇гхо ааг̇ажчад̇уу’’д̇и. звамасса ааг̇аманам̣ самбияааяамаано абхинанд̣̇ад̇у. абхивад̣̇ад̇ууд̇и ааг̇ад̇асса жа оваад̣̇аанусаасаним̣ д̣̇ад̣̇анд̇о абхивад̣̇ад̇у.
Bhagavato purato pāturahosīti satthu cittaṃ ñatvā – ‘‘ime bhikkhū bhagavatā paṇāmitā, idāni nesaṃ anuggahaṃ kātukāmo evaṃ cintesi, kāraṇaṃ bhagavā cintesi, ahamettha ussāhaṃ janessāmī’’ti purato pākaṭo ahosi. Santettha bhikkhūti idaṃ so mahābrahmā yathā nāma byatto sūdo yadeva ambilaggādīsu rasajātaṃ rañño ruccati, taṃ abhisaṅkhārena sādutaraṃ katvā punadivase upanāmeti, evameva attano byattatāya bhagavatā āhaṭaupamaṃyeva evametaṃ bhagavātiādivacanehi abhisaṅkharitvā bhagavantaṃ yācanto bhikkhusaṅghassa anuggahakaraṇatthaṃ vadati . Tattha abhinandatūti ‘‘mama santikaṃ bhikkhusaṅgho āgacchatū’’ti. Evamassa āgamanaṃ sampiyāyamāno abhinandatu. Abhivadatūti āgatassa ca ovādānusāsaniṃ dadanto abhivadatu.
бадисаллаанаад̇и згийбхааваа. ид̣̇д̇хаабхисан̇каарам̣ абхисан̇каасийд̇и ид̣̇д̇хим̣ агааси. згад̣̇вийхигааяаад̇и згзго жзва д̣̇вз д̣̇вз жа худ̇ваа. саараж̇ж̇амаанаруубаад̇и од̇д̇аббамаанасабхааваа бхааяамаанаа. гасмаа бана бхаг̇аваа д̇зсам̣ д̇ат̇аа убасан̇гаманааяа ид̣̇д̇химагаасийд̇и? хид̇абад̇т̇анааяа. яад̣̇и хи д̇з ваг̇г̇аваг̇г̇аа худ̇ваа ааг̇ажчзяяум̣, ‘‘бхаг̇аваа бхигкусан̇гхам̣ бан̣аамзд̇ваа аран̃н̃ам̣ бавидто згад̣̇ивасамби д̇ад̇т̇а васид̇ум̣ наасагки, взг̇знзва ааг̇ад̇о’’д̇и гзл̣имби гарзяяум̣. ат̇а нзсам̣ нзва б̣уд̣̇д̇хаг̇ааравам̣ бажжубадтахзяяа, на д̇хаммад̣̇зсанам̣ самбадижчид̇ум̣ самад̇т̇аа бхавзяяум̣. сабхаяаанам̣ бана сасаараж̇ж̇аанам̣ згад̣̇вийхигааяа ааг̇ажчанд̇аанам̣ б̣уд̣̇д̇хаг̇аараван̃жзва бажжубадтид̇ам̣ бхависсад̇и, д̇хаммад̣̇зсанан̃жа самбадижчид̇ум̣ сагкиссанд̇ийд̇и жинд̇зд̇ваа д̇зсам̣ хид̇абад̇т̇анааяа д̇ат̇ааруубам̣ ид̣̇д̇хим̣ агааси.
Paṭisallānāti ekībhāvā. Iddhābhisaṅkhāraṃ abhisaṅkhāsīti iddhiṃ akāsi. Ekadvīhikāyāti ekeko ceva dve dve ca hutvā. Sārajjamānarūpāti ottappamānasabhāvā bhāyamānā. Kasmā pana bhagavā tesaṃ tathā upasaṅkamanāya iddhimakāsīti? Hitapatthanāya. Yadi hi te vaggavaggā hutvā āgaccheyyuṃ, ‘‘bhagavā bhikkhusaṅghaṃ paṇāmetvā araññaṃ paviṭṭho ekadivasampi tattha vasituṃ nāsakkhi, vegeneva āgato’’ti keḷimpi kareyyuṃ. Atha nesaṃ neva buddhagāravaṃ paccupaṭṭhaheyya, na dhammadesanaṃ sampaṭicchituṃ samatthā bhaveyyuṃ. Sabhayānaṃ pana sasārajjānaṃ ekadvīhikāya āgacchantānaṃ buddhagāravañceva paccupaṭṭhitaṃ bhavissati, dhammadesanañca sampaṭicchituṃ sakkhissantīti cintetvā tesaṃ hitapatthanāya tathārūpaṃ iddhiṃ akāsi.
нисийд̣̇им̣сууд̇и д̇зсу хи саараж̇ж̇амаанаруубзсу ааг̇ажчанд̇зсу зго бхигку ‘‘мамам̣язва сад̇т̇аа ологзд̇и, мам̣язва ман̃н̃з ниг̇г̇ан̣хид̇угаамо’’д̇и сан̣игам̣ ааг̇анд̇ваа ванд̣̇ид̇ваа нисийд̣̇и, ат̇ан̃н̃о ат̇ан̃н̃од̇и звам̣ бан̃жабхигкусад̇аани нисийд̣̇им̣су. звам̣ нисиннам̣ бана бхигкусан̇гхам̣ сийд̣̇анд̇арз саннисиннам̣ махаасамуд̣̇д̣̇ам̣ вияа ниваад̇з бад̣̇ийбам̣ вияа жа нижжалам̣ д̣̇исваа сад̇т̇аа жинд̇зси – ‘‘имзсам̣ бхигкуунам̣ гийд̣̇исий д̇хаммад̣̇зсанаа ваддад̇ий’’д̇и? ат̇асса зд̇ад̣̇ахоси – ‘‘имз аахаарахзд̇у бан̣аамид̇аа, бин̣д̣ияаалобад̇хаммад̣̇зсанаава нзсам̣ саббааяаа, д̇ам̣ д̣̇ассзд̇ваа мад̇т̇агз д̇ибариваддад̣̇зсанам̣ д̣̇зсзссаами, д̣̇зсанаабарияосаанз саб̣б̣з арахад̇д̇ам̣ баабун̣иссанд̇ий’’д̇и. ат̇а нзсам̣ д̇ам̣ д̇хаммад̣̇зсанам̣ д̣̇зсзнд̇о анд̇амид̣̇ам̣, бхигкавзд̇иаад̣̇имааха.
Nisīdiṃsūti tesu hi sārajjamānarūpesu āgacchantesu eko bhikkhu ‘‘mamaṃyeva satthā oloketi, maṃyeva maññe niggaṇhitukāmo’’ti saṇikaṃ āgantvā vanditvā nisīdi, athañño athaññoti evaṃ pañcabhikkhusatāni nisīdiṃsu. Evaṃ nisinnaṃ pana bhikkhusaṅghaṃ sīdantare sannisinnaṃ mahāsamuddaṃ viya nivāte padīpaṃ viya ca niccalaṃ disvā satthā cintesi – ‘‘imesaṃ bhikkhūnaṃ kīdisī dhammadesanā vaṭṭatī’’ti? Athassa etadahosi – ‘‘ime āhārahetu paṇāmitā, piṇḍiyālopadhammadesanāva nesaṃ sappāyā, taṃ dassetvā matthake tiparivaṭṭadesanaṃ desessāmi, desanāpariyosāne sabbe arahattaṃ pāpuṇissantī’’ti. Atha nesaṃ taṃ dhammadesanaṃ desento antamidaṃ, bhikkhavetiādimāha.
д̇ад̇т̇а анд̇анд̇и бажчимам̣ лаамагам̣. яад̣̇ид̣̇ам̣ бин̣д̣оляанд̇и яам̣ звам̣ бин̣д̣абариязсанзна ж̇ийвигам̣ габбзнд̇асса ж̇ийвид̇ам̣. аяам̣ банзд̇т̇а бад̣̇ад̇т̇о – бин̣д̣ааяа улад̇ийд̇и бин̣д̣оло, бин̣д̣оласса гаммам̣ бин̣д̣оляам̣, бин̣д̣абариязсанзна нибпаад̣̇ид̇аж̇ийвид̇анд̇и ад̇т̇о. абхисаабод̇и аггосо. губид̇аа хи мануссаа ад̇д̇ано бажжад̇т̇игам̣ ‘‘жийварам̣ ниваасзд̇ваа габаалам̣ г̇ахзд̇ваа бин̣д̣ам̣ бариязсамаано жариссад̇ий’’д̇и аггосанд̇и. ат̇а ваа бана ‘‘гим̣ д̇уяхам̣ агаад̇аб̣б̣ам̣ ад̇т̇и, яо д̇вам̣ звам̣ б̣алаваа вийрияасамбанноби хирод̇д̇аббам̣ бахааяа габан̣о вияа бин̣д̣оло вижараси бад̇д̇абаан̣ий’’д̇и? звамби аггосанд̇иязва. д̇ан̃жа ко зд̇анд̇и звам̣ д̇ам̣ абхисаабам̣ самаанамби бин̣д̣оляам̣. гулабуд̇д̇аа убзнд̇и ад̇т̇авасигаад̇и мама саасанз ж̇аад̇игулабуд̇д̇аа жа аажаарагулабуд̇д̇аа жа ад̇т̇авасигаа гааран̣авасигаа худ̇ваа гааран̣авасам̣ бадижжа убзнд̇и.
Tattha antanti pacchimaṃ lāmakaṃ. Yadidaṃ piṇḍolyanti yaṃ evaṃ piṇḍapariyesanena jīvikaṃ kappentassa jīvitaṃ. Ayaṃ panettha padattho – piṇḍāya ulatīti piṇḍolo, piṇḍolassa kammaṃ piṇḍolyaṃ, piṇḍapariyesanena nipphāditajīvitanti attho. Abhisāpoti akkoso. Kupitā hi manussā attano paccatthikaṃ ‘‘cīvaraṃ nivāsetvā kapālaṃ gahetvā piṇḍaṃ pariyesamāno carissatī’’ti akkosanti. Atha vā pana ‘‘kiṃ tuyhaṃ akātabbaṃ atthi, yo tvaṃ evaṃ balavā vīriyasampannopi hirottappaṃ pahāya kapaṇo viya piṇḍolo vicarasi pattapāṇī’’ti? Evampi akkosantiyeva. Tañca kho etanti evaṃ taṃ abhisāpaṃ samānampi piṇḍolyaṃ. Kulaputtā upenti atthavasikāti mama sāsane jātikulaputtā ca ācārakulaputtā ca atthavasikā kāraṇavasikā hutvā kāraṇavasaṃ paṭicca upenti.
рааж̇аабхинийд̇аад̇иаад̣̇ийсу яз ран̃н̃о санд̇агам̣ каад̣̇ид̇ваа ран̃н̃аа б̣анд̇ханааг̇аарз б̣анд̇хаабид̇аа балааяид̇ваа баб̣б̣аж̇анд̇и, д̇з рааж̇аабхинийд̇аа наама. д̇з хи ран̃н̃аа б̣анд̇ханам̣ абхинийд̇ад̇д̇аа рааж̇аабхинийд̇аа наама. яз бана жорзхи адавияам̣ г̇ахзд̇ваа згажжзсу маарияамаанзсу згажжз ‘‘маяам̣ саами д̇умхзхи виссадтаа г̇зхам̣ анаж̇жхаавасид̇ваа баб̣б̣аж̇иссаама, д̇ад̇т̇а яам̣ яам̣ б̣уд̣̇д̇хабууж̇аад̣̇ибун̃н̃ам̣ гариссаама, д̇ад̇о д̇умхаагам̣ бад̇д̇им̣ д̣̇ассаамаа’’д̇и д̇зхи виссадтаа баб̣б̣аж̇анд̇и, д̇з жораабхинийд̇аа наама. д̇зби хи жорзхи маарзд̇аб̣б̣ад̇ам̣ абхинийд̇аад̇и жораабхинийд̇аа наама. яз бана ин̣ам̣ г̇ахзд̇ваа бадид̣̇аад̇ум̣ асаггонд̇аа балааяид̇ваа баб̣б̣аж̇анд̇и, д̇з ин̣аддаа наама, ин̣абийл̣ид̇аад̇и ад̇т̇о . ин̣адтаад̇иби баато, ин̣з тид̇аад̇и ад̇т̇о. яз рааж̇ажорачаад̇агарог̇абхаяаанам̣ ан̃н̃ад̇арзна абхибхууд̇аа убад̣̇д̣̇уд̇аа баб̣б̣аж̇анд̇и, д̇з бхаяаддаа наама, бхаяабийл̣ид̇аад̇и ад̇т̇о. бхаяадтаад̇иби баато, бхаяз тид̇аад̇и ад̇т̇о. ааж̇ийвигаабагад̇аад̇и ааж̇ийвигааяа убад̣̇д̣̇уд̇аа абхибхууд̇аа, буд̇д̇ад̣̇аарам̣ босзд̇ум̣ асаггонд̇аад̇и ад̇т̇о. од̇ин̣н̣аамхаад̇и анд̇о анубавидтаа.
Rājābhinītātiādīsu ye rañño santakaṃ khāditvā raññā bandhanāgāre bandhāpitā palāyitvā pabbajanti, te rājābhinītā nāma. Te hi raññā bandhanaṃ abhinītattā rājābhinītā nāma. Ye pana corehi aṭaviyaṃ gahetvā ekaccesu māriyamānesu ekacce ‘‘mayaṃ sāmi tumhehi vissaṭṭhā gehaṃ anajjhāvasitvā pabbajissāma, tattha yaṃ yaṃ buddhapūjādipuññaṃ karissāma, tato tumhākaṃ pattiṃ dassāmā’’ti tehi vissaṭṭhā pabbajanti, te corābhinītā nāma. Tepi hi corehi māretabbataṃ abhinītāti corābhinītā nāma. Ye pana iṇaṃ gahetvā paṭidātuṃ asakkontā palāyitvā pabbajanti, te iṇaṭṭā nāma, iṇapīḷitāti attho . Iṇaṭṭhātipi pāṭho, iṇe ṭhitāti attho. Ye rājacorachātakarogabhayānaṃ aññatarena abhibhūtā upaddutā pabbajanti, te bhayaṭṭā nāma, bhayapīḷitāti attho. Bhayaṭṭhātipi pāṭho, bhaye ṭhitāti attho. Ājīvikāpakatāti ājīvikāya upaddutā abhibhūtā, puttadāraṃ posetuṃ asakkontāti attho. Otiṇṇāmhāti anto anupaviṭṭhā.
со жа ход̇и абхиж̇жхаалууд̇и ид̣̇ам̣ со гулабуд̇д̇о ‘‘д̣̇угкасса анд̇ам̣ гариссаамий’’д̇иаад̣̇ивасзна жид̇д̇ам̣ уббаад̣̇зд̇ваа баб̣б̣аж̇ид̇о, абарабхааг̇з, д̇ам̣ баб̣б̣аж̇ж̇ам̣ д̇ат̇ааруубам̣ гаад̇ум̣ на саггод̇и, д̇ам̣ д̣̇ассзд̇ум̣ вуд̇д̇ам̣. д̇ад̇т̇а абхиж̇жхаалууд̇и барабхан̣д̣аанам̣ абхиж̇жхааяид̇аа. д̇иб̣б̣асаарааг̇од̇и б̣ахаларааг̇о. б̣яаабаннажид̇д̇од̇и бууд̇ибхаавзна вибаннажид̇д̇о. бад̣̇удтаманасан̇габбод̇и д̇икин̣асин̇г̇о вияа г̇он̣о д̣̇удтажид̇д̇о. мудтассад̇ийд̇и бхад̇д̇анигкид̇д̇агааго вияа надтассад̇и, ид̇ха гад̇ам̣ зд̇т̇а нассад̇и. асамбаж̇аанод̇и ниббан̃н̃о. канд̇хаад̣̇ибарижчзд̣̇арахид̇о. асамаахид̇од̇и жан̣д̣асод̇з б̣ад̣̇д̇ханааваа вияа убажаараббанаабхаавзна асан̣тид̇о. виб̣бханд̇ажид̇д̇од̇и б̣анд̇хаарул̣хамаг̇о вияа санд̇амано. баагад̇инд̣̇рияод̇и яат̇аа г̇ихий буд̇д̇ад̇хийд̇аро ологзнд̇о асам̣вуд̇инд̣̇рияо ход̇и, звам̣ асам̣вуд̇инд̣̇рияо.
So ca hoti abhijjhālūti idaṃ so kulaputto ‘‘dukkhassa antaṃ karissāmī’’tiādivasena cittaṃ uppādetvā pabbajito, aparabhāge, taṃ pabbajjaṃ tathārūpaṃ kātuṃ na sakkoti, taṃ dassetuṃ vuttaṃ. Tattha abhijjhālūti parabhaṇḍānaṃ abhijjhāyitā. Tibbasārāgoti bahalarāgo. Byāpannacittoti pūtibhāvena vipannacitto. Paduṭṭhamanasaṅkappoti tikhiṇasiṅgo viya goṇo duṭṭhacitto. Muṭṭhassatīti bhattanikkhittakāko viya naṭṭhassati, idha kataṃ ettha nassati. Asampajānoti nippañño. Khandhādiparicchedarahito. Asamāhitoti caṇḍasote baddhanāvā viya upacārappanābhāvena asaṇṭhito. Vibbhantacittoti bandhāruḷhamago viya santamano. Pākatindriyoti yathā gihī puttadhītaro olokento asaṃvutindriyo hoti, evaṃ asaṃvutindriyo.
чаваалаад̇анд̇и чаваанам̣ д̣̇ад̣дхадтаанз алаад̇ам̣. убхад̇обад̣̇ид̇д̇ам̣ маж̇жхз г̇уут̇аг̇ад̇анд̇и бамаан̣зна адтан̇г̇уламад̇д̇ам̣ д̣̇вийсу таанзсу аад̣̇ид̇д̇ам̣ маж̇жхз г̇уут̇амагкид̇ам̣. нзва г̇аамзд̇и сажз хи д̇ам̣ яуг̇анан̇г̇алаг̇обаанасибагкабаасагаад̣̇ийнам̣ ад̇т̇ааяа убанзд̇ум̣ саггаа асса, г̇аамз гадтад̇т̇ам̣ парзяяа. сажз кзд̇д̇агудияам̣ гадтад̇т̇араман̃жагаад̣̇ийнам̣ ад̇т̇ааяа убанзд̇ум̣ саггаа, аран̃н̃з гадтад̇т̇ам̣ парзяяа. яасмаа бана убхаяат̇ааби на саггаа, д̇асмаа звам̣ вуд̇д̇ам̣. г̇ихибхог̇аа жа барихийнод̇и яо аг̇аарз васанд̇зхи г̇ихийхи д̣̇ааяаж̇ж̇з бхааж̇ияамаанз бхог̇о лад̣̇д̇хаб̣б̣о асса, д̇ад̇о жа барихийно. сааман̃н̃ад̇т̇ан̃жаад̇и аажарияубаж̇жхааяаанам̣ оваад̣̇з тад̇ваа барияад̇д̇ибадивзд̇хавасзна бад̇д̇аб̣б̣ам̣ сааман̃н̃ад̇т̇ан̃жа. иман̃жа бана убамам̣ сад̇т̇аа на д̣̇уссийласса васзна аахари, барисуд̣̇д̇хасийласса бана аласасса абхиж̇жхаад̣̇ийхи д̣̇осзхи убахад̇асса буг̇г̇аласса имам̣ убамам̣ аахари.
Chavālātanti chavānaṃ daḍḍhaṭṭhāne alātaṃ. Ubhatopadittaṃ majjhe gūthagatanti pamāṇena aṭṭhaṅgulamattaṃ dvīsu ṭhānesu ādittaṃ majjhe gūthamakkhitaṃ. Neva gāmeti sace hi taṃ yuganaṅgalagopānasipakkhapāsakādīnaṃ atthāya upanetuṃ sakkā assa, gāme kaṭṭhatthaṃ phareyya. Sace khettakuṭiyaṃ kaṭṭhattharamañcakādīnaṃ atthāya upanetuṃ sakkā, araññe kaṭṭhatthaṃ phareyya. Yasmā pana ubhayathāpi na sakkā, tasmā evaṃ vuttaṃ. Gihibhogā ca parihīnoti yo agāre vasantehi gihīhi dāyajje bhājiyamāne bhogo laddhabbo assa, tato ca parihīno. Sāmaññatthañcāti ācariyupajjhāyānaṃ ovāde ṭhatvā pariyattipaṭivedhavasena pattabbaṃ sāmaññatthañca. Imañca pana upamaṃ satthā na dussīlassa vasena āhari, parisuddhasīlassa pana alasassa abhijjhādīhi dosehi upahatassa puggalassa imaṃ upamaṃ āhari.
д̇аяомз, бхигкавзд̇и гасмаа аарад̣̇д̇хам̣? имасса буг̇г̇аласса чаваалаад̇асад̣̇исабхааво нзва маад̇аабид̇уухи гад̇о, на аажарияубаж̇жхааязхи, имзхи бана баабавид̇аггзхи гад̇од̇и д̣̇ассанад̇т̇ам̣ аарад̣̇д̇хам̣. анимид̇д̇ам̣ ваа самаад̇хинд̇и вибассанаасамаад̇хим̣. со хи нижжанимид̇д̇аад̣̇ийнам̣ самуг̇гхаад̇анзна анимид̇д̇од̇и вужжад̇и. зд̇т̇а жа жад̇д̇ааро сад̇ибадтаанаа миссагаа, анимид̇д̇асамаад̇хи буб̣б̣абхааг̇о. анимид̇д̇асамаад̇хи ваа миссаго, сад̇ибадтаанаа буб̣б̣абхааг̇аад̇и взд̣̇ид̇аб̣б̣аа.
Tayome, bhikkhaveti kasmā āraddhaṃ? Imassa puggalassa chavālātasadisabhāvo neva mātāpitūhi kato, na ācariyupajjhāyehi, imehi pana pāpavitakkehi katoti dassanatthaṃ āraddhaṃ. Animittaṃ vā samādhinti vipassanāsamādhiṃ. So hi niccanimittādīnaṃ samugghātanena animittoti vuccati. Ettha ca cattāro satipaṭṭhānā missakā, animittasamādhi pubbabhāgo. Animittasamādhi vā missako, satipaṭṭhānā pubbabhāgāti veditabbā.
д̣̇взмаа, бхигкавз, д̣̇идтияод̇и ид̣̇ам̣ бана на гзвалам̣ анимид̇д̇асамаад̇хибхааванаа имзсам̣язва д̇ин̣н̣ам̣ махаавид̇аггаанам̣ бахаанааяа сам̣вад̇д̇ад̇и, сассад̇ужчзд̣̇ад̣̇идтийнамби бана самуг̇гхаад̇ам̣ гарод̇ийд̇и д̣̇ассанад̇т̇ам̣ вуд̇д̇ам̣. на важ̇ж̇аваа ассанд̇и нид̣̇д̣̇осо бхавзяяам̣. сзсамзд̇т̇а уд̇д̇аанамзва. ид̇и бхаг̇аваа имасмимби суд̇д̇з д̣̇зсанам̣ д̇ийхи бхавзхи винивад̇д̇зд̇ваа арахад̇д̇зна гуудам̣ г̇ан̣хи. д̣̇зсанаавасаанз бан̃жасад̇аа бхигкуу саха бадисамбхид̣̇аахи арахад̇д̇ам̣ баабун̣им̣сууд̇и. адтамам̣.
Dvemā, bhikkhave, diṭṭhiyoti idaṃ pana na kevalaṃ animittasamādhibhāvanā imesaṃyeva tiṇṇaṃ mahāvitakkānaṃ pahānāya saṃvattati, sassatucchedadiṭṭhīnampi pana samugghātaṃ karotīti dassanatthaṃ vuttaṃ. Na vajjavā assanti niddoso bhaveyyaṃ. Sesamettha uttānameva. Iti bhagavā imasmimpi sutte desanaṃ tīhi bhavehi vinivattetvā arahattena kūṭaṃ gaṇhi. Desanāvasāne pañcasatā bhikkhū saha paṭisambhidāhi arahattaṃ pāpuṇiṃsūti. Aṭṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. бин̣д̣оляасуд̇д̇ам̣ • 8. Piṇḍolyasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 8. бин̣д̣оляасуд̇д̇аван̣н̣анаа • 8. Piṇḍolyasuttavaṇṇanā
