| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
16. பிங்கி³யமாணவஸுத்தனித்³தே³ஸவண்ணனா
16. Piṅgiyamāṇavasuttaniddesavaṇṇanā
89. ஸோளஸமே பிங்கி³யஸுத்தனித்³தே³ஸே – ஜிண்ணோஹமஸ்மி அப³லோ வீதவண்ணோதி ஸோ கிர ப்³ராஹ்மணோ ஜராபி⁴பூ⁴தோ வீஸவஸ்ஸஸதிகோ ஜாதியா, து³ப்³ப³லோ ச ‘‘இத⁴ பாத³ங் கரிஸ்ஸாமீ’’தி அஞ்ஞத்ரேவ கரோதி, வினட்ட²புரிமச²விவண்ணோ ச. தேனாஹ – ‘‘ஜிண்ணோஹமஸ்மி அப³லோ வீதவண்ணோ’’தி. மாஹங் நஸ்ஸங் மோமுஹோ அந்தராவாதி மாஹங் துய்ஹங் த⁴ம்மங் அஸச்சி²கத்வா அந்தரா ஏவ அவித்³வா ஹுத்வா அனஸ்ஸிங். ஜாதிஜராய இத⁴ விப்பஹானந்தி இதே⁴வ தவ பாத³மூலே பாஸாணகே சேதியே வா ஜாதிஜராய விப்பஹானங் நிப்³பா³னங் த⁴ம்மரஸங் அஹங் விஜஞ்ஞங், தங் மே ஆசிக்க².
89. Soḷasame piṅgiyasuttaniddese – jiṇṇohamasmi abalo vītavaṇṇoti so kira brāhmaṇo jarābhibhūto vīsavassasatiko jātiyā, dubbalo ca ‘‘idha pādaṃ karissāmī’’ti aññatreva karoti, vinaṭṭhapurimachavivaṇṇo ca. Tenāha – ‘‘jiṇṇohamasmi abalo vītavaṇṇo’’ti. Māhaṃnassaṃ momuho antarāvāti māhaṃ tuyhaṃ dhammaṃ asacchikatvā antarā eva avidvā hutvā anassiṃ. Jātijarāya idha vippahānanti idheva tava pādamūle pāsāṇake cetiye vā jātijarāya vippahānaṃ nibbānaṃ dhammarasaṃ ahaṃ vijaññaṃ, taṃ me ācikkha.
அப³லோதி ப³லவிரஹிதோ. து³ப்³ப³லோதி து³ப்³ப³லப³லோ. அப்பப³லோதி பரித்தப³லோ. அப்பதா²மோதி பரித்தவீரியோ. வீதவண்ணோதி பரிவத்திதச²விவண்ணோ. விக³தவண்ணோதி அபக³தச²விவண்ணோ. விக³ச்சி²தவண்ணோதி தூ³ரீபூ⁴தச²விவண்ணோ. யா ஸா புரிமா ஸுபா⁴ வண்ணனிபா⁴தி யா ஸா ஸுபா⁴ ஸுந்த³ரா புரிமகாலே ஸதி, ஸா வண்ணனிபா⁴ ஏதரஹி அந்தரஹிதா விக³தா. ஆதீ³னவோ பாதுபூ⁴தோதி உபத்³த³வோ பாதுரஹோஸி. ‘‘யா ஸா புரிமா ஸுபா⁴ வண்ணனிபா⁴’’தி பாட²ங் ட²பெத்வா ‘‘யா ஸுபா⁴ அஸ்ஸா’’தி ஏகே வண்ணயந்தி.
Abaloti balavirahito. Dubbaloti dubbalabalo. Appabaloti parittabalo. Appathāmoti parittavīriyo. Vītavaṇṇoti parivattitachavivaṇṇo. Vigatavaṇṇoti apagatachavivaṇṇo. Vigacchitavaṇṇoti dūrībhūtachavivaṇṇo. Yā sā purimā subhā vaṇṇanibhāti yā sā subhā sundarā purimakāle sati, sā vaṇṇanibhā etarahi antarahitā vigatā. Ādīnavo pātubhūtoti upaddavo pāturahosi. ‘‘Yā sā purimā subhā vaṇṇanibhā’’ti pāṭhaṃ ṭhapetvā ‘‘yā subhā assā’’ti eke vaṇṇayanti.
அஸுத்³தா⁴தி படலாதீ³ஹி அஸுத்³தா⁴. அவிஸுத்³தா⁴தி திமிராதீ³ஹி அவிஸுத்³தா⁴. அபரிஸுத்³தா⁴தி ஸமந்ததோ போ²டபடலாதீ³ஹி பரியோனத்³த⁴த்தா அபரிஸுத்³தா⁴. அவோதா³தாதி நப்பஸன்னா பஸன்னஸதி³ஸா. நோ ததா² சக்கு²னா ரூபே பஸ்ஸாமீதி யதா² போராணசக்கு²னா ரூபாரம்மணங் பஸ்ஸாமி ஓலோகேமி, ததா² தேன பகாரேன இதா³னி ந பஸ்ஸாமி. ஸோதங் அஸுத்³த⁴ந்திஆதீ³ஸுபி ஏஸேவ நயோ. மாஹங் நஸ்ஸந்தி அஹங் மா வினஸ்ஸங்.
Asuddhāti paṭalādīhi asuddhā. Avisuddhāti timirādīhi avisuddhā. Aparisuddhāti samantato phoṭapaṭalādīhi pariyonaddhattā aparisuddhā. Avodātāti nappasannā pasannasadisā. No tathā cakkhunā rūpe passāmīti yathā porāṇacakkhunā rūpārammaṇaṃ passāmi olokemi, tathā tena pakārena idāni na passāmi. Sotaṃ asuddhantiādīsupi eseva nayo. Māhaṃ nassanti ahaṃ mā vinassaṃ.
90. இதா³னி யஸ்மா பிங்கி³யோ காயே ஸாபெக்க²தாய ‘‘ஜிண்ணோஹமஸ்மீ’’திஆதி³மாஹ . தேனஸ்ஸ ப⁴க³வா காயே ஸினேஹப்பஹானத்த²ங் ‘‘தி³ஸ்வான ரூபேஸு விஹஞ்ஞமானே’’தி கா³த²மாஹ. தத்த² ரூபேஸூதி ரூபஹேது ரூபபச்சயா. விஹஞ்ஞமானேதி கம்மகாரணாதீ³ஹி உபஹஞ்ஞமானே. ருப்பந்தி ரூபேஸூதி சக்கு²ரோகா³தீ³ஹி ச ரூபஹேதுயேவ ஜனா ருப்பந்தி பா³தி⁴யந்தி.
90. Idāni yasmā piṅgiyo kāye sāpekkhatāya ‘‘jiṇṇohamasmī’’tiādimāha . Tenassa bhagavā kāye sinehappahānatthaṃ ‘‘disvāna rūpesu vihaññamāne’’ti gāthamāha. Tattha rūpesūti rūpahetu rūpapaccayā. Vihaññamāneti kammakāraṇādīhi upahaññamāne. Ruppanti rūpesūti cakkhurogādīhi ca rūpahetuyeva janā ruppanti bādhiyanti.
ஹஞ்ஞந்தீதி க⁴டீயந்தி. விஹஞ்ஞந்தீதி விஹேஸியந்தி. உபவிஹஞ்ஞந்தீதி ஹத்த²பாத³ச்சே²தா³தி³ங் லப⁴ந்தி. உபகா⁴தியந்தீதி மரணங் லப⁴ந்தி. குப்பந்தீதி பரிவத்தந்தி. பீளயந்தீதி விகா⁴தங் ஆபஜ்ஜந்தி. க⁴ட்டயந்தீதி க⁴ட்டனங் பாபுணந்தி. ப்³யாதி⁴தாதி பீ⁴தா. தோ³மனஸ்ஸிதாதி சித்தவிகா⁴தங் பத்தா. வேமானேதி நஸ்ஸமானே.
Haññantīti ghaṭīyanti. Vihaññantīti vihesiyanti. Upavihaññantīti hatthapādacchedādiṃ labhanti. Upaghātiyantīti maraṇaṃ labhanti. Kuppantīti parivattanti. Pīḷayantīti vighātaṃ āpajjanti. Ghaṭṭayantīti ghaṭṭanaṃ pāpuṇanti. Byādhitāti bhītā. Domanassitāti cittavighātaṃ pattā. Vemāneti nassamāne.
91. ஏவங் ப⁴க³வதா யாவ அரஹத்தங், தாவ கதி²தங் படிபத்திங் ஸுத்வா பிங்கி³யோ ஜராது³ப்³ப³லதாய விஸேஸங் அனதி⁴க³ந்த்வா ச புன ‘‘தி³ஸா சதஸ்ஸோ’’தி இமாய கா³தா²ய ப⁴க³வந்தங் தோ²மெந்தோ தே³ஸனங் யாசதி.
91. Evaṃ bhagavatā yāva arahattaṃ, tāva kathitaṃ paṭipattiṃ sutvā piṅgiyo jarādubbalatāya visesaṃ anadhigantvā ca puna ‘‘disā catasso’’ti imāya gāthāya bhagavantaṃ thomento desanaṃ yācati.
92. அத²ஸ்ஸ ப⁴க³வா புனபி யாவ அரஹத்தங், தாவ படிபத³ங் த³ஸ்ஸெந்தோ ‘‘தண்ஹாதி⁴பன்னே’’தி கா³த²மாஹ.
92. Athassa bhagavā punapi yāva arahattaṃ, tāva paṭipadaṃ dassento ‘‘taṇhādhipanne’’ti gāthamāha.
தண்ஹாதி⁴பன்னேதி தண்ஹாய விமுச்சித்வா டி²தே. தண்ஹானுகே³தி தண்ஹாய ஸஹ க³ச்ச²ந்தே. தண்ஹானுக³தேதி தண்ஹாய அனுப³ந்த⁴ந்தே. தண்ஹானுஸடேதி தண்ஹாய ஸஹ தா⁴வந்தே. தண்ஹாய பன்னேதி தண்ஹாய நிமுக்³கே³. படிபன்னேதி தண்ஹாய அவத்த²டே. அபி⁴பூ⁴தேதி மத்³தி³தே. பரியாதி³ன்னசித்தேதி பரியாதி³யித்வா க³ஹிதகுஸலசித்தே.
Taṇhādhipanneti taṇhāya vimuccitvā ṭhite. Taṇhānugeti taṇhāya saha gacchante. Taṇhānugateti taṇhāya anubandhante. Taṇhānusaṭeti taṇhāya saha dhāvante. Taṇhāya panneti taṇhāya nimugge. Paṭipanneti taṇhāya avatthaṭe. Abhibhūteti maddite. Pariyādinnacitteti pariyādiyitvā gahitakusalacitte.
ஸந்தாபஜாதேதி ஸஞ்ஜாதசித்தஸந்தாபே. ஈதிஜாதேதி ரோகு³ப்பன்னே. உபத்³த³வஜாதேதி ஆதீ³னவஜாதே. உபஸக்³க³ஜாதேதி உப்பன்னது³க்க²ஜாதே.
Santāpajāteti sañjātacittasantāpe. Ītijāteti roguppanne. Upaddavajāteti ādīnavajāte. Upasaggajāteti uppannadukkhajāte.
விரஜங் வீதமலந்தி எத்த² விரஜந்தி விக³தராகா³தி³ரஜங். வீதமலந்தி வீதராகா³தி³மலங். ராகா³த³யோ ஹி அஜ்ஜொ²த்த²ரணட்டே²ன ரஜோ நாம, தூ³ஸட்டே²ன மலங் நாம. த⁴ம்மசக்கு²ந்தி கத்த²சி பட²மமக்³க³ஞாணங் , கத்த²சி ஆதீ³னி தீணி மக்³க³ஞாணானி, கத்த²சி சதுத்த²மக்³க³ஞாணம்பி. இத⁴ பன ஜடிலஸஹஸ்ஸஸ்ஸ சதுத்த²மக்³க³ஞாணங். பிங்கி³யஸ்ஸ ததியமக்³க³ஞாணமேவ. யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி விபஸ்ஸனாவஸேன ஏவங் பவத்தஸ்ஸ த⁴ம்மசக்கு²ங் உத³பாதீ³தி அத்தோ². ஸேஸங் ஸப்³ப³த்த² பாகடமேவ.
Virajaṃ vītamalanti ettha virajanti vigatarāgādirajaṃ. Vītamalanti vītarāgādimalaṃ. Rāgādayo hi ajjhottharaṇaṭṭhena rajo nāma, dūsaṭṭhena malaṃ nāma. Dhammacakkhunti katthaci paṭhamamaggañāṇaṃ , katthaci ādīni tīṇi maggañāṇāni, katthaci catutthamaggañāṇampi. Idha pana jaṭilasahassassa catutthamaggañāṇaṃ. Piṅgiyassa tatiyamaggañāṇameva. Yaṃ kiñci samudayadhammaṃ, sabbaṃ taṃ nirodhadhammanti vipassanāvasena evaṃ pavattassa dhammacakkhuṃ udapādīti attho. Sesaṃ sabbattha pākaṭameva.
ஏவங் இத³ம்பி ஸுத்தங் ப⁴க³வா அரஹத்தனிகூடேனேவ தே³ஸேஸி, தே³ஸனாபரியோஸானே ச பிங்கி³யோ அனாகா³மிப²லே பதிட்டா²ஸி. ஸோ கிர அந்தரந்தரா சிந்தேஸி – ‘‘ஏவங் விசித்ரபடிபா⁴னங் நாம தே³ஸனங் ந லப⁴தி மய்ஹங் மாதுலோ பா³வரீ ஸவனாயா’’தி. தேன ஸினேஹவிக்கே²பேன அரஹத்தங் பாபுணிதுங் நாஸக்கி². அந்தேவாஸிகா பனஸ்ஸ ஸஹஸ்ஸஜடிலா அரஹத்தங் பாபுணிங்ஸு. ஸப்³பே³வ இத்³தி⁴மயபத்தசீவரத⁴ரா ஏஹிபி⁴க்கு²னோ அஹேஸுந்தி.
Evaṃ idampi suttaṃ bhagavā arahattanikūṭeneva desesi, desanāpariyosāne ca piṅgiyo anāgāmiphale patiṭṭhāsi. So kira antarantarā cintesi – ‘‘evaṃ vicitrapaṭibhānaṃ nāma desanaṃ na labhati mayhaṃ mātulo bāvarī savanāyā’’ti. Tena sinehavikkhepena arahattaṃ pāpuṇituṃ nāsakkhi. Antevāsikā panassa sahassajaṭilā arahattaṃ pāpuṇiṃsu. Sabbeva iddhimayapattacīvaradharā ehibhikkhuno ahesunti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
பிங்கி³யமாணவஸுத்தனித்³தே³ஸவண்ணனா நிட்டி²தா.
Piṅgiyamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
16. பிங்கி³யமாணவபுச்சா² • 16. Piṅgiyamāṇavapucchā
16. பிங்கி³யமாணவபுச்சா²னித்³தே³ஸோ • 16. Piṅgiyamāṇavapucchāniddeso
