| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೭. ಪಿಯಜಾತಿಕಸುತ್ತವಣ್ಣನಾ
7. Piyajātikasuttavaṇṇanā
೩೫೩. ಏವಂ ಮೇ ಸುತನ್ತಿ ಪಿಯಜಾತಿಕಸುತ್ತಂ। ತತ್ಥ ನೇವ ಕಮ್ಮನ್ತಾ ಪಟಿಭನ್ತೀತಿ ನ ಸಬ್ಬೇನ ಸಬ್ಬಂ ಪಟಿಭನ್ತಿ, ಪಕತಿನಿಯಾಮೇನ ಪನ ನ ಪಟಿಭನ್ತಿ। ದುತಿಯಪದೇಪಿ ಏಸೇವ ನಯೋ। ಏತ್ಥ ಚ ನ ಪಟಿಭಾತೀತಿ ನ ರುಚ್ಚತಿ। ಆಳಾಹನನ್ತಿ ಸುಸಾನಂ। ಅಞ್ಞಥತ್ತನ್ತಿ ವಿವಣ್ಣತಾಯ ಅಞ್ಞಥಾಭಾವೋ। ಇನ್ದ್ರಿಯಾನಿ ನಾಮ ಮನೋವಿಞ್ಞೇಯ್ಯಾ ಧಮ್ಮಾ, ಪತಿಟ್ಠಿತೋಕಾಸಂ ಪನ ಸನ್ಧಾಯ ಇದಂ ವುತ್ತಂ। ಪಿಯಜಾತಿಕಾತಿ ಪಿಯತೋ ಜಾಯನ್ತಿ। ಪಿಯಪ್ಪಭಾವಿಕಾತಿ ಪಿಯತೋ ಪಭವನ್ತಿ।
353.Evaṃme sutanti piyajātikasuttaṃ. Tattha neva kammantā paṭibhantīti na sabbena sabbaṃ paṭibhanti, pakatiniyāmena pana na paṭibhanti. Dutiyapadepi eseva nayo. Ettha ca na paṭibhātīti na ruccati. Āḷāhananti susānaṃ. Aññathattanti vivaṇṇatāya aññathābhāvo. Indriyāni nāma manoviññeyyā dhammā, patiṭṭhitokāsaṃ pana sandhāya idaṃ vuttaṃ. Piyajātikāti piyato jāyanti. Piyappabhāvikāti piyato pabhavanti.
೩೫೫. ಸಚೇ ತಂ, ಮಹಾರಾಜಾತಿ ತಸ್ಸ ಅತ್ಥಂ ಅಸಲ್ಲಕ್ಖಯಮಾನಾಪಿ ಸತ್ಥರಿ ಸದ್ಧಾಯ ಏವಂ ವದತಿ। ಚರ ಪಿರೇತಿ ಅಪೇಹಿ ಅಮ್ಹಾಕಂ ಪರೇ, ಅನಜ್ಝತ್ತಿಕಭೂತೇತಿ ಅತ್ಥೋ। ಅಥ ವಾ ಚರ ಪಿರೇತಿ ಪರತೋ ಗಚ್ಛ, ಮಾ ಇಧ ತಿಟ್ಠಾತಿಪಿ ಅತ್ಥೋ।
355.Sace taṃ, mahārājāti tassa atthaṃ asallakkhayamānāpi satthari saddhāya evaṃ vadati. Cara pireti apehi amhākaṃ pare, anajjhattikabhūteti attho. Atha vā cara pireti parato gaccha, mā idha tiṭṭhātipi attho.
೩೫೬. ದ್ವಿಧಾ ಛೇತ್ವಾತಿ ಅಸಿನಾ ದ್ವೇ ಕೋಟ್ಠಾಸೇ ಕರೋನ್ತೋ ಛಿನ್ದಿತ್ವಾ। ಅತ್ತಾನಂ ಉಪ್ಫಾಲೇಸೀತಿ ತೇನೇವ ಅಸಿನಾ ಅತ್ತನೋ ಉದರಂ ಫಾಲೇಸಿ। ಯದಿ ಹಿ ತಸ್ಸ ಸಾ ಅಪ್ಪಿಯಾ ಭವೇಯ್ಯ, ಇದಾನಿ ಅಞ್ಞಂ ಮಾತುಗಾಮಂ ಗಣ್ಹಿಸ್ಸಾಮೀತಿ ಅತ್ತಾನಂ ನ ಘಾತೇಯ್ಯ। ಯಸ್ಮಾ ಪನಸ್ಸ ಸಾ ಪಿಯಾ ಅಹೋಸಿ, ತಸ್ಮಾ ಪರಲೋಕೇಪಿ ತಾಯ ಸದ್ಧಿಂ ಸಮಙ್ಗಿಭಾವಂ ಪತ್ಥಯಮಾನೋ ಏವಮಕಾಸಿ।
356.Dvidhāchetvāti asinā dve koṭṭhāse karonto chinditvā. Attānaṃupphālesīti teneva asinā attano udaraṃ phālesi. Yadi hi tassa sā appiyā bhaveyya, idāni aññaṃ mātugāmaṃ gaṇhissāmīti attānaṃ na ghāteyya. Yasmā panassa sā piyā ahosi, tasmā paralokepi tāya saddhiṃ samaṅgibhāvaṃ patthayamāno evamakāsi.
೩೫೭. ಪಿಯಾ ತೇ ವಜಿರೀತಿ ಏವಂ ಕಿರಸ್ಸಾ ಅಹೋಸಿ – ‘‘ಸಚಾಹಂ, ‘ಭೂತಪುಬ್ಬಂ, ಮಹಾರಾಜ, ಇಮಿಸ್ಸಾಯೇವ ಸಾವತ್ಥಿಯಂ ಅಞ್ಞತರಿಸ್ಸಾ ಇತ್ಥಿಯಾ’ತಿಆದಿಕಥಂ ಕಥೇಯ್ಯಂ, ‘ಕೋ ತೇ ಏವಂ ಅಕಾಸಿ, ಅಪೇಹಿ ನತ್ಥಿ ಏತ’ನ್ತಿ ಮಂ ಪಟಿಸೇಧೇಯ್ಯ, ವತ್ತಮಾನೇನೇವ ನಂ ಸಞ್ಞಾಪೇಸ್ಸಾಮೀ’’ತಿ ಚಿನ್ತೇತ್ವಾ ಏವಮಾಹ। ವಿಪರಿಣಾಮಞ್ಞಥಾಭಾವಾತಿ ಏತ್ಥ ಮರಣವಸೇನ ವಿಪರಿಣಾಮೋ, ಕೇನಚಿ ಸದ್ಧಿಂ ಪಲಾಯಿತ್ವಾ ಗಮನವಸೇನ ಅಞ್ಞಥಾಭಾವೋ ವೇದಿತಬ್ಬೋ।
357.Piyā te vajirīti evaṃ kirassā ahosi – ‘‘sacāhaṃ, ‘bhūtapubbaṃ, mahārāja, imissāyeva sāvatthiyaṃ aññatarissā itthiyā’tiādikathaṃ katheyyaṃ, ‘ko te evaṃ akāsi, apehi natthi eta’nti maṃ paṭisedheyya, vattamāneneva naṃ saññāpessāmī’’ti cintetvā evamāha. Vipariṇāmaññathābhāvāti ettha maraṇavasena vipariṇāmo, kenaci saddhiṃ palāyitvā gamanavasena aññathābhāvo veditabbo.
ವಾಸಭಾಯಾತಿ ವಾಸಭಾ ನಾಮ ರಞ್ಞೋ ಏಕಾ ದೇವೀ, ತಂ ಸನ್ಧಾಯಾಹ।
Vāsabhāyāti vāsabhā nāma rañño ekā devī, taṃ sandhāyāha.
ಪಿಯಾ ತೇ ಅಹನ್ತಿ ಕಸ್ಮಾ ಸಬ್ಬಪಚ್ಛಾ ಆಹ? ಏವಂ ಕಿರಸ್ಸಾ ಅಹೋಸಿ – ‘‘ಅಯಂ ರಾಜಾ ಮಯ್ಹಂ ಕುಪಿತೋ, ಸಚಾಹಂ ಸಬ್ಬಪಠಮಂ ‘ಪಿಯಾ ತೇ ಅಹ’ನ್ತಿ ಪುಚ್ಛೇಯ್ಯಂ, ‘ನ ಮೇ ತ್ವಂ ಪಿಯಾ, ಚರ ಪಿರೇ’ತಿ ವದೇಯ್ಯ, ಏವಂ ಸನ್ತೇ ಕಥಾ ಪತಿಟ್ಠಾನಂ ನ ಲಭಿಸ್ಸತೀ’’ತಿ ಕಥಾಯ ಪತಿಟ್ಠಾನತ್ಥಂ ಸಬ್ಬಪಚ್ಛಾ ಪುಚ್ಛಿ। ಕಾಸಿಕೋಸಲೇಸು ಛಡ್ಡಿತಭಾವೇನ ವಿಪರಿಣಾಮೋ, ಪಟಿರಾಜೂನಂ ಹತ್ಥಗಮನವಸೇನ ಅಞ್ಞಥಾಭಾವೋ ವೇದಿತಬ್ಬೋ।
Piyāte ahanti kasmā sabbapacchā āha? Evaṃ kirassā ahosi – ‘‘ayaṃ rājā mayhaṃ kupito, sacāhaṃ sabbapaṭhamaṃ ‘piyā te aha’nti puccheyyaṃ, ‘na me tvaṃ piyā, cara pire’ti vadeyya, evaṃ sante kathā patiṭṭhānaṃ na labhissatī’’ti kathāya patiṭṭhānatthaṃ sabbapacchā pucchi. Kāsikosalesu chaḍḍitabhāvena vipariṇāmo, paṭirājūnaṃ hatthagamanavasena aññathābhāvo veditabbo.
ಆಚಮೇಹೀತಿ ಆಚಮನೋದಕಂ ದೇಹಿ। ಆಚಮಿತ್ವಾ ಹತ್ಥಪಾದೇ ಧೋವಿತ್ವಾ ಮುಖಂ ವಿಕ್ಖಾಲೇತ್ವಾ ಸತ್ಥಾರಂ ನಮಸ್ಸಿತುಕಾಮೋ ಏವಮಾಹ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
Ācamehīti ācamanodakaṃ dehi. Ācamitvā hatthapāde dhovitvā mukhaṃ vikkhāletvā satthāraṃ namassitukāmo evamāha. Sesaṃ sabbattha uttānamevāti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಪಿಯಜಾತಿಕಸುತ್ತವಣ್ಣನಾ ನಿಟ್ಠಿತಾ।
Piyajātikasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೭. ಪಿಯಜಾತಿಕಸುತ್ತಂ • 7. Piyajātikasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೭. ಪಿಯಜಾತಿಕಸುತ್ತವಣ್ಣನಾ • 7. Piyajātikasuttavaṇṇanā
