| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൧൦. പുബ്ബകമ്മപിലോതികബുദ്ധഅപദാനവണ്ണനാ
10. Pubbakammapilotikabuddhaapadānavaṇṇanā
൬൪. ദസമാപദാനേ അനോതത്തസരാസന്നേതി പബ്ബതകൂടേഹി പടിച്ഛന്നത്താ ചന്ദിമസൂരിയാനം സന്താപേഹി ഓതത്തം ഉണ്ഹം ഉദകം ഏത്ഥ നത്ഥീതി അനോതത്തോ. സരന്തി ഗച്ഛന്തി പഭവന്തി സന്ദന്തി ഏതസ്മാ മഹാനദിയോതി സരോ. സീഹമുഖാദീഹി നിക്ഖന്താ മഹാനദിയോ തിക്ഖത്തും തിക്ഖത്തും പദക്ഖിണം കത്വാ നിക്ഖന്തനിക്ഖന്തദിസാഭാഗേന സരന്തി ഗച്ഛന്തീതി അത്ഥോ. അനോതത്തോ ച സോ സരോ ചാതി അനോതത്തസരോ . തസ്സ ആസന്നം സമീപട്ഠാനന്തി അനോതത്തസരാസന്നം, തസ്മിം അനോതത്തസരാസന്നേ, സമീപേതി അത്ഥോ. രമണീയേതി ദേവദാനവഗന്ധബ്ബകിന്നരോരഗബുദ്ധപച്ചേകബുദ്ധാദീഹി രമിതബ്ബം അല്ലീയിതബ്ബന്തി രമണീയം, തസ്മിം രമണീയേ. സിലാതലേതി ഏകഗ്ഘനപബ്ബതസിലാതലേതി അത്ഥോ. നാനാരതനപജ്ജോതേതി പദുമരാഗവേളുരിയാദിനാനാഅനേകേഹി രതനേഹി പജ്ജോതേ പകാരേന ജോതമാനേ. നാനാഗന്ധവനന്തരേതി നാനപ്പകാരേഹി ചന്ദനാഗരുകപ്പൂരതമാലതിലകാസോകനാഗപുന്നാഗകേതകാദീഹി അനേകേഹി സുഗന്ധപുപ്ഫേഹി ഗഹനീഭൂതവനന്തരേ സിലാതലേതി സമ്ബന്ധോ.
64. Dasamāpadāne anotattasarāsanneti pabbatakūṭehi paṭicchannattā candimasūriyānaṃ santāpehi otattaṃ uṇhaṃ udakaṃ ettha natthīti anotatto. Saranti gacchanti pabhavanti sandanti etasmā mahānadiyoti saro. Sīhamukhādīhi nikkhantā mahānadiyo tikkhattuṃ tikkhattuṃ padakkhiṇaṃ katvā nikkhantanikkhantadisābhāgena saranti gacchantīti attho. Anotatto ca so saro cāti anotattasaro . Tassa āsannaṃ samīpaṭṭhānanti anotattasarāsannaṃ, tasmiṃ anotattasarāsanne, samīpeti attho. Ramaṇīyeti devadānavagandhabbakinnaroragabuddhapaccekabuddhādīhi ramitabbaṃ allīyitabbanti ramaṇīyaṃ, tasmiṃ ramaṇīye. Silātaleti ekagghanapabbatasilātaleti attho. Nānāratanapajjoteti padumarāgaveḷuriyādinānāanekehi ratanehi pajjote pakārena jotamāne. Nānāgandhavanantareti nānappakārehi candanāgarukappūratamālatilakāsokanāgapunnāgaketakādīhi anekehi sugandhapupphehi gahanībhūtavanantare silātaleti sambandho.
൬൫. ഗുണമഹന്തതായ സങ്ഖ്യാമഹന്തതായ ച മഹതാ ഭിക്ഖുസങ്ഘേന, പരേതോ പരിവുതോ ലോകനായകോ ലോകത്തയസാമിസമ്മാസമ്ബുദ്ധോ തത്ഥ സിലാസനേ നിസിന്നോ അത്തനോ പുബ്ബാനി കമ്മാനി ബ്യാകരീ വിസേസേന പാകടമകാസീതി അത്ഥോ. സേസമേത്ഥ ഹേട്ഠാ ബുദ്ധാപദാനേ (അപ॰ ഥേര ൧.൧.൧ ആദയോ) വുത്തത്താ ഉത്താനത്ഥത്താ ച സുവിഞ്ഞേയ്യമേവ. ബുദ്ധാപദാനേ അന്തോഗധമ്പി ഇധാപദാനേ കുസലാകുസലം കമ്മസംസൂചകത്താ വഗ്ഗസങ്ഗഹവസേന ധമ്മസങ്ഗാഹകത്ഥേരാ സങ്ഗായിംസൂതി.
65. Guṇamahantatāya saṅkhyāmahantatāya ca mahatā bhikkhusaṅghena, pareto parivuto lokanāyako lokattayasāmisammāsambuddho tattha silāsane nisinno attano pubbāni kammāni byākarī visesena pākaṭamakāsīti attho. Sesamettha heṭṭhā buddhāpadāne (apa. thera 1.1.1 ādayo) vuttattā uttānatthattā ca suviññeyyameva. Buddhāpadāne antogadhampi idhāpadāne kusalākusalaṃ kammasaṃsūcakattā vaggasaṅgahavasena dhammasaṅgāhakattherā saṅgāyiṃsūti.
പുബ്ബകമ്മപിലോതികബുദ്ധഅപദാനവണ്ണനാ സമത്താ.
Pubbakammapilotikabuddhaapadānavaṇṇanā samattā.
ഏകൂനചത്താലീസമവഗ്ഗവണ്ണനാ സമത്താ.
Ekūnacattālīsamavaggavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൧൦. പുബ്ബകമ്മപിലോതികബുദ്ധഅപദാനം • 10. Pubbakammapilotikabuddhaapadānaṃ
