| Library / Tipiṭaka / तिपिटक • Tipiṭaka / परिवार-अट्ठकथा • Parivāra-aṭṭhakathā |
पुब्बकरणनिदानादिविभागवण्णना
Pubbakaraṇanidānādivibhāgavaṇṇanā
४०५. पुब्बकरणं किंनिदानन्तिआदिपुच्छाविस्सज्जनं उत्तानमेव।
405.Pubbakaraṇaṃ kiṃnidānantiādipucchāvissajjanaṃ uttānameva.
४०६-७. ‘‘पयोगो किंनिदानो’’तिआदीसु पुच्छाद्वयविस्सज्जनेसु हेतुनिदानो पच्चयनिदानोति एत्थ छ चीवरानि हेतु चेव पच्चयो चाति वेदितब्बानि। पुब्बपयोगादीनञ्हि सब्बेसं तानियेव हेतु, तानि पच्चयो। न हि छब्बिधे चीवरे असति पयोगो अत्थि, न पुब्बकरणादीनि, तस्मा ‘‘पयोगो हेतुनिदानो’’तिआदि वुत्तं।
406-7. ‘‘Payogo kiṃnidāno’’tiādīsu pucchādvayavissajjanesu hetunidāno paccayanidānoti ettha cha cīvarāni hetu ceva paccayo cāti veditabbāni. Pubbapayogādīnañhi sabbesaṃ tāniyeva hetu, tāni paccayo. Na hi chabbidhe cīvare asati payogo atthi, na pubbakaraṇādīni, tasmā ‘‘payogo hetunidāno’’tiādi vuttaṃ.
४०८. सङ्गहवारे – वचीभेदेनाति ‘‘इमाय सङ्घाटिया, इमिना उत्तरासङ्गेन, इमिना अन्तरवासकेन कथिनं अत्थरामी’’ति एतेन वचीभेदेन। कतिमूलादिपुच्छाविस्सज्जने – किरिया मज्झेति पच्चुद्धारो चेव अधिट्ठानञ्च।
408. Saṅgahavāre – vacībhedenāti ‘‘imāya saṅghāṭiyā, iminā uttarāsaṅgena, iminā antaravāsakena kathinaṃ attharāmī’’ti etena vacībhedena. Katimūlādipucchāvissajjane – kiriyā majjheti paccuddhāro ceva adhiṭṭhānañca.
४११. वत्थुविपन्नं होतीति अकप्पियदुस्सं होति। कालविपन्नं नाम अज्ज दायकेहि दिन्नं स्वे सङ्घो कथिनत्थारकस्स देति। करणविपन्नं नाम तदहेव छिन्दित्वा अकतं।
411.Vatthuvipannaṃ hotīti akappiyadussaṃ hoti. Kālavipannaṃ nāma ajja dāyakehi dinnaṃ sve saṅgho kathinatthārakassa deti. Karaṇavipannaṃ nāma tadaheva chinditvā akataṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / ३. पुब्बकरणनिदानादिविभागो • 3. Pubbakaraṇanidānādivibhāgo
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / पुब्बकरणनिदानादिविभागवण्णना • Pubbakaraṇanidānādivibhāgavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / पुब्बकरणनिदानादिविभागवण्णना • Pubbakaraṇanidānādivibhāgavaṇṇanā
