| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૨. દુતિયપણ્ણાસકં
2. Dutiyapaṇṇāsakaṃ
(૬) ૧. પુગ્ગલવગ્ગવણ્ણના
(6) 1. Puggalavaggavaṇṇanā
૫૩. દુતિયપણ્ણાસકસ્સ પઠમે હિતગ્ગહણેન મેત્તા વુત્તા હોતિ, ન કરુણા, અનુકમ્પાગહણેન પન કરુણાતિ ચક્કવત્તિના સદ્ધિં ગહિતત્તા ‘‘લોકાનુકમ્પાયા’’તિ ન વુત્તં. નિપ્પરિયાયતો લોકાનુકમ્પા નામ સમ્માસમ્બુદ્ધાધીનાતિ. દ્વેતિ મનુસ્સદેવસમ્પત્તિવસેન દ્વે સમ્પત્તિયો. તા દ્વે, નિબ્બાનસમ્પત્તિ ચાતિ તિસ્સો.
53. Dutiyapaṇṇāsakassa paṭhame hitaggahaṇena mettā vuttā hoti, na karuṇā, anukampāgahaṇena pana karuṇāti cakkavattinā saddhiṃ gahitattā ‘‘lokānukampāyā’’ti na vuttaṃ. Nippariyāyato lokānukampā nāma sammāsambuddhādhīnāti. Dveti manussadevasampattivasena dve sampattiyo. Tā dve, nibbānasampatti cāti tisso.
૫૪. દુતિયે બહુસો લોકે ન ચિણ્ણા ન પવત્તા મનુસ્સાતિ આચિણ્ણમનુસ્સા. કદાચિદેવ હિ નેસં લોકે નિબ્બત્તિ અભૂતપુબ્બા ભૂતાતિ અબ્ભુતમનુસ્સા.
54. Dutiye bahuso loke na ciṇṇā na pavattā manussāti āciṇṇamanussā. Kadācideva hi nesaṃ loke nibbatti abhūtapubbā bhūtāti abbhutamanussā.
૫૫. તતિયે દસસુ ચક્કવાળસહસ્સેસુ અનુતાપં કરોતિ તસ્સ એકબુદ્ધખેત્તભાવતો.
55. Tatiye dasasu cakkavāḷasahassesu anutāpaṃ karoti tassa ekabuddhakhettabhāvato.
૫૬. ચતુત્થે થૂપસ્સ યુત્તાતિ ધાતુયો પક્ખિપિત્વા થૂપકરણસ્સ યુત્તા.
56. Catutthe thūpassa yuttāti dhātuyo pakkhipitvā thūpakaraṇassa yuttā.
૫૭. પઞ્ચમે અત્તનો આનુભાવેનાતિ સયમ્ભુઞાણેન. બુદ્ધાતિ બુદ્ધવન્તો.
57. Pañcame attano ānubhāvenāti sayambhuñāṇena. Buddhāti buddhavanto.
૫૮. છટ્ઠે પહીનત્તા ન ભાયતીતિ અત્તસિનેહાભાવતો ન ભાયતિ. સક્કાયદિટ્ઠિગ્ગહણઞ્ચેત્થ નિદસ્સનમત્તં, અત્તસિનેહસ્સ પટિઘસ્સ તદેકટ્ઠસમ્મોહસ્સ ચ વસેન ભાયનં હોતીતિ તેસમ્પિ પહીનત્તા ન ભાયતિ, અઞ્ઞથા સોતાપન્નાદીનં અભયેન ભવિતબ્બં સિયા. સક્કાયદિટ્ઠિયા બલવત્તાતિ એત્થ અહંકારસમ્મોહનતાદીનમ્પિ બલવત્તાતિ વત્તબ્બં.
58. Chaṭṭhe pahīnattā na bhāyatīti attasinehābhāvato na bhāyati. Sakkāyadiṭṭhiggahaṇañcettha nidassanamattaṃ, attasinehassa paṭighassa tadekaṭṭhasammohassa ca vasena bhāyanaṃ hotīti tesampi pahīnattā na bhāyati, aññathā sotāpannādīnaṃ abhayena bhavitabbaṃ siyā. Sakkāyadiṭṭhiyā balavattāti ettha ahaṃkārasammohanatādīnampi balavattāti vattabbaṃ.
૫૯. સત્તમે અસ્સાજાનીયોતિ લિખન્તિ, ઉસભાજાનીયોતિ પન પાઠોતિ.
59. Sattame assājānīyoti likhanti, usabhājānīyoti pana pāṭhoti.
૬૧. નવમે તત્થાતિ અન્તરાપણે. એકોતિ દ્વીસુ કિન્નરેસુ એકો. અમ્બિલિકાફલઞ્ચ અદ્દસાતિ આનેત્વા સમ્બન્ધો. અમ્બિલિકાફલન્તિ તિન્તિણીફલન્તિ વદન્તિ, ચતુરમ્બિલન્તિ અપરે. દ્વે અત્થેતિ પાળિયં વુત્તે દ્વે અત્થે.
61. Navame tatthāti antarāpaṇe. Ekoti dvīsu kinnaresu eko. Ambilikāphalañca addasāti ānetvā sambandho. Ambilikāphalanti tintiṇīphalanti vadanti, caturambilanti apare. Dve attheti pāḷiyaṃ vutte dve atthe.
૬૨. દસમે યથાઆરદ્ધે કિચ્ચે વત્તમાને અન્તરા એવ પટિગમનં પટિવાનં, નત્થિ એતસ્સ પટિવાનન્તિ અપ્પટિવાનો. તત્થ અસંકોચપ્પત્તો. તેનાહ ‘‘અનુક્કણ્ઠિતો’’તિઆદિ.
62. Dasame yathāāraddhe kicce vattamāne antarā eva paṭigamanaṃ paṭivānaṃ, natthi etassa paṭivānanti appaṭivāno. Tattha asaṃkocappatto. Tenāha ‘‘anukkaṇṭhito’’tiādi.
૬૩. એકાદસમે સન્નિવાસન્તિ સહવાસં. યથા અસપ્પુરિસા સહ વસન્તા અઞ્ઞમઞ્ઞં અગારવેન અનાદરિયં કરોન્તિ, તપ્પટિક્ખેપેન સપ્પુરિસાનં સગારવપ્પટિપત્તિદસ્સનપરમિદં સુત્તં દટ્ઠબ્બં.
63. Ekādasame sannivāsanti sahavāsaṃ. Yathā asappurisā saha vasantā aññamaññaṃ agāravena anādariyaṃ karonti, tappaṭikkhepena sappurisānaṃ sagāravappaṭipattidassanaparamidaṃ suttaṃ daṭṭhabbaṃ.
૬૪. દ્વાદસમે દ્વીસુપિ પક્ખેસૂતિ વિવાદાપન્નાનં ભિક્ખૂનં દ્વીસુપિ પક્ખેસુ. સંસરમાનાતિ પવત્તમાના. દિટ્ઠિપળાસોતિ દિટ્ઠિસન્નિસ્સયો પળાસો યુગગ્ગાહો. આઘાતેન્તોતિ આહનન્તો બાધેન્તો. અનભિરાધનવસેનાતિ યસ્સ ઉપ્પજ્જતિ, તસ્સ તદઞ્ઞેસઞ્ચ અત્થસ્સ અનભિરાધનવસેન. સબ્બમ્પેતન્તિ વચીસંસારોતિ સબ્બમ્પેતં. અત્તનો ચિત્તે પરિસાય ચ ચિત્તેતિ આનેત્વા સમ્બન્ધો.
64. Dvādasame dvīsupi pakkhesūti vivādāpannānaṃ bhikkhūnaṃ dvīsupi pakkhesu. Saṃsaramānāti pavattamānā. Diṭṭhipaḷāsoti diṭṭhisannissayo paḷāso yugaggāho. Āghātentoti āhananto bādhento. Anabhirādhanavasenāti yassa uppajjati, tassa tadaññesañca atthassa anabhirādhanavasena. Sabbampetanti vacīsaṃsāroti sabbampetaṃ. Attano citte parisāya ca citteti ānetvā sambandho.
પુગ્ગલવગ્ગવણ્ણના નિટ્ઠિતા.
Puggalavaggavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / (૬) ૧. પુગ્ગલવગ્ગો • (6) 1. Puggalavaggo
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / (૬) ૧. પુગ્ગલવગ્ગવણ્ણના • (6) 1. Puggalavaggavaṇṇanā
