| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೭. ಪುಲಿನಪೂಜಕತ್ಥೇರಅಪದಾನವಣ್ಣನಾ
7. Pulinapūjakattheraapadānavaṇṇanā
ವಿಪಸ್ಸಿಸ್ಸ ಭಗವತೋತಿಆದಿಕಂ ಆಯಸ್ಮತೋ ಪುಲಿನಪೂಜಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲೇ ನಿಬ್ಬತ್ತೋ ಸಾಸನೇ ಪಸನ್ನಚಿತ್ತೋ ಚೇತಿಯಙ್ಗಣಬೋಧಿಯಙ್ಗಣೇಸು ಪುರಾಣವಾಲುಕಂ ಅಪನೇತ್ವಾ ನವಂ ಮುತ್ತಾದಲಸದಿಸಪಣ್ಡರಪುಲಿನಂ ಓಕಿರಿತ್ವಾ ಮಾಳಕಂ ಅಲಙ್ಕರಿ। ತೇನ ಕಮ್ಮೇನ ಸೋ ದೇವಲೋಕೇ ನಿಬ್ಬತ್ತೋ ತತ್ಥ ದಿಬ್ಬೇಹಿ ರತನೇಹಿ ವಿಜ್ಜೋತಮಾನೇ ಅನೇಕಯೋಜನೇ ಕನಕವಿಮಾನೇ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ತತೋ ಚುತೋ ಮನುಸ್ಸಲೋಕೇ ಸತ್ತರತನಸಮ್ಪನ್ನೋ ಚಕ್ಕವತ್ತೀ ರಾಜಾ ಹುತ್ವಾ ಮನುಸ್ಸಸಮ್ಪತ್ತಿಂ ಅನುಭವಿತ್ವಾ ಅಪರಾಪರಂ ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ವಿಭವಸಮ್ಪನ್ನೇ ಏಕಸ್ಮಿಂ ಕುಲೇ ನಿಬ್ಬತ್ತೋ ಸಾಸನೇ ಪಸನ್ನೋ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪಾಪುಣಿ। ಸೋ ಅತ್ತನೋ ಕತಪುಞ್ಞನಾಮಸದಿಸೇನ ನಾಮೇನ ಪುಲಿನಪೂಜಕತ್ಥೇರೋತಿ ಪಾಕಟೋ।
Vipassissabhagavatotiādikaṃ āyasmato pulinapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kule nibbatto sāsane pasannacitto cetiyaṅgaṇabodhiyaṅgaṇesu purāṇavālukaṃ apanetvā navaṃ muttādalasadisapaṇḍarapulinaṃ okiritvā māḷakaṃ alaṅkari. Tena kammena so devaloke nibbatto tattha dibbehi ratanehi vijjotamāne anekayojane kanakavimāne dibbasampattiṃ anubhavitvā tato cuto manussaloke sattaratanasampanno cakkavattī rājā hutvā manussasampattiṃ anubhavitvā aparāparaṃ saṃsaranto imasmiṃ buddhuppāde vibhavasampanne ekasmiṃ kule nibbatto sāsane pasanno pabbajitvā vipassanaṃ vaḍḍhetvā arahattaṃ pāpuṇi. So attano katapuññanāmasadisena nāmena pulinapūjakattheroti pākaṭo.
೧೬೫. ಸೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ದಸ್ಸೇನ್ತೋ ವಿಪಸ್ಸಿಸ್ಸ ಭಗವತೋತಿಆದಿಮಾಹ। ತತ್ಥ ವಿವಿಧಂ ಪಸ್ಸತೀತಿ ವಿಪಸ್ಸೀ, ವಿವಿಚ್ಚ ಪಸ್ಸತೀತಿ ವಾ ವಿಪಸ್ಸೀ, ವಿವಿಧೇ ಅತ್ತತ್ಥಪರತ್ಥಾದಿಭೇದೇ ಅತ್ಥೇ ಪಸ್ಸತೀತಿ ವಾ ವಿಪಸ್ಸೀ, ವಿವಿಧೇ ವೋಹಾರಪರಮತ್ಥಾದಿಭೇದೇ ಪಸ್ಸತೀತಿ ವಾ ವಿಪಸ್ಸೀ, ತಸ್ಸ ವಿಪಸ್ಸಿಸ್ಸ ಬೋಧಿಯಾ ಪಾದಪುತ್ತಮೇ ಉತ್ತಮೇ ಬೋಧಿರುಕ್ಖಮಣ್ಡಲಮಾಳಕೇ ಪುರಾಣಪುಲಿನಂ ವಾಲುಕಂ ಛಡ್ಡೇತ್ವಾ ಸುದ್ಧಂ ಪಣ್ಡರಂ ಪುಲಿನಂ ಆಕಿರಿಂ ಸನ್ಥರಿಂ। ಸೇಸಂ ಸುವಿಞ್ಞೇಯ್ಯಮೇವಾತಿ।
165. So attano pubbakammaṃ saritvā somanassajāto pubbacaritāpadānaṃ dassento vipassissa bhagavatotiādimāha. Tattha vividhaṃ passatīti vipassī, vivicca passatīti vā vipassī, vividhe attatthaparatthādibhede atthe passatīti vā vipassī, vividhe vohāraparamatthādibhede passatīti vā vipassī, tassa vipassissa bodhiyā pādaputtame uttame bodhirukkhamaṇḍalamāḷake purāṇapulinaṃ vālukaṃ chaḍḍetvā suddhaṃ paṇḍaraṃ pulinaṃ ākiriṃ santhariṃ. Sesaṃ suviññeyyamevāti.
ಪುಲಿನಪೂಜಕತ್ಥೇರಅಪದಾನವಣ್ಣನಾ ಸಮತ್ತಾ।
Pulinapūjakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೭. ಪುಲಿನಪೂಜಕತ್ಥೇರಅಪದಾನಂ • 7. Pulinapūjakattheraapadānaṃ
