| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
7. бунаб̣б̣асусуд̇д̇аван̣н̣анаа
7. Punabbasusuttavaṇṇanā
241. сад̇д̇амз д̇зна ко бана самаязнаад̇и гад̇арасамаязна? суурияасса ад̇т̇ан̇г̇аманасамаязна. д̇ад̣̇аа гира бхаг̇аваа бажчаабхад̇д̇з махааж̇анасса д̇хаммам̣ д̣̇зсзд̇ваа махааж̇анам̣ уяяож̇зд̇ваа нхаанагодтагз нхад̇ваа г̇анд̇хагудибаривзн̣з бан̃н̃ад̇д̇авараб̣уд̣̇д̇хаасанз бурад̇т̇ималогад̇хаад̇ум̣ ологаяамаано нисийд̣̇и. ат̇згажааригад̣̇вижааригаад̣̇аяо бам̣сугуулигабин̣д̣абаад̇игабхигкуу ад̇д̇ано ад̇д̇ано васанадтаанзхи нигкамид̇ваа ааг̇амма д̣̇асаб̣алам̣ ванд̣̇ид̇ваа рад̇д̇асаан̣ияаа баригкибамаанаа вияа нисийд̣̇им̣су. ат̇а нзсам̣ аж̇жхаасаяам̣ вид̣̇ид̇ваа сад̇т̇аа ниб̣б̣аанабадисам̣яуд̇д̇ам̣ д̇хаммагат̇ам̣ гат̇зси.
241. Sattame tena kho pana samayenāti katarasamayena? Sūriyassa atthaṅgamanasamayena. Tadā kira bhagavā pacchābhatte mahājanassa dhammaṃ desetvā mahājanaṃ uyyojetvā nhānakoṭṭhake nhatvā gandhakuṭipariveṇe paññattavarabuddhāsane puratthimalokadhātuṃ olokayamāno nisīdi. Athekacārikadvicārikādayo paṃsukūlikapiṇḍapātikabhikkhū attano attano vasanaṭṭhānehi nikkhamitvā āgamma dasabalaṃ vanditvā rattasāṇiyā parikkhipamānā viya nisīdiṃsu. Atha nesaṃ ajjhāsayaṃ viditvā satthā nibbānapaṭisaṃyuttaṃ dhammakathaṃ kathesi.
звам̣ д̇осзсийд̇и саа гира д̇хийд̇арам̣ ан̇гзнаад̣̇ааяа буд̇д̇ам̣ ан̇г̇улияаа г̇ахзд̇ваа ж̇зд̇аванабидтияам̣ баагаарабаригкзбасамийбз ужжаарабассаавакзл̣асин̇гхаан̣игам̣ бариязсамаанаа анубуб̣б̣зна ж̇зд̇аванад̣̇ваарагодтагам̣ самбад̇д̇аа. бхаг̇авад̇о жа, ‘‘аананд̣̇а, бад̇д̇ам̣ аахара, жийварам̣ аахара, вигхаасаад̣̇аанам̣ д̣̇аанам̣ д̣̇зхий’’д̇и гат̇знд̇асса сад̣̇д̣̇о саманд̇аа д̣̇ваад̣̇асахад̇т̇амад̇д̇амзва г̇ан̣хаад̇и. д̇хаммам̣ д̣̇зсзнд̇асса сажзби жаггаваал̣абарияанд̇ам̣ гад̇ваа барисаа нисийд̣̇ад̇и, яат̇аа барисам̣ г̇ажчад̇и, б̣ахибарисааяа зган̇г̇улимад̇д̇амби на ниг̇г̇ажчад̇и, ‘‘маа агааран̣аа мад̇хурасад̣̇д̣̇о нассий’’д̇и. д̇ад̇рааяам̣ яагкиний б̣ахибарисааяа тид̇аа сад̣̇д̣̇ам̣ на сун̣аад̇и, д̣̇ваарагодтагз тид̇ааяа банассаа махад̇ияаа б̣уд̣̇д̇хавийт̇ияаа абхимукз тид̇аа г̇анд̇хагуди бан̃н̃ааяи. саа ниваад̇з д̣̇ийбасикаа вияа б̣уд̣̇д̇хаг̇ааравзна хад̇т̇агуггужжаад̣̇ирахид̇ам̣ нижжалам̣ барисам̣ д̣̇исваа – ‘‘нууна мзд̇т̇а гин̃жи бхааж̇анийяабхан̣д̣ам̣ бхависсад̇и, яад̇о ахам̣ саббид̇зламад̇хупаан̣ид̇аад̣̇ийсу гин̃жид̣̇зва бад̇д̇ад̇о ваа хад̇т̇ад̇о ваа баг̇гхаранд̇ам̣ бхуумияам̣ ваа бана бад̇ид̇ам̣ лабхиссаамий’’д̇и анд̇овихаарам̣ баависи. д̣̇ваарагодтагз аваруд̣̇д̇хагаанам̣ нивааран̣ад̇т̇ааяа тид̇аа аарагкад̣̇звад̇аа яагкинияаа убаниссаяам̣ д̣̇исваа на ниваарзси. д̇ассаа саха барисааяа згийбхааваг̇аманзна мад̇хурассаро чавиаад̣̇ийни чинд̣̇ид̇ваа адтимин̃ж̇ам̣ аахажжа адтааси. д̇ам̣ д̇хаммассаванад̇т̇ааяа нижжалам̣ тид̇ам̣ буриманаязнзва буд̇д̇агаа жод̣̇аяим̣су. саа ‘‘д̇хаммассаванасса мз анд̇арааяам̣ гаронд̇ий’’д̇и буд̇д̇агз д̇ун̣хий уд̇д̇аригз хохийд̇и звам̣ д̇осзси.
Evaṃ tosesīti sā kira dhītaraṃ aṅkenādāya puttaṃ aṅguliyā gahetvā jetavanapiṭṭhiyaṃ pākāraparikkhepasamīpe uccārapassāvakheḷasiṅghāṇikaṃ pariyesamānā anupubbena jetavanadvārakoṭṭhakaṃ sampattā. Bhagavato ca, ‘‘ānanda, pattaṃ āhara, cīvaraṃ āhara, vighāsādānaṃ dānaṃ dehī’’ti kathentassa saddo samantā dvādasahatthamattameva gaṇhāti. Dhammaṃ desentassa sacepi cakkavāḷapariyantaṃ katvā parisā nisīdati, yathā parisaṃ gacchati, bahiparisāya ekaṅgulimattampi na niggacchati, ‘‘mā akāraṇā madhurasaddo nassī’’ti. Tatrāyaṃ yakkhinī bahiparisāya ṭhitā saddaṃ na suṇāti, dvārakoṭṭhake ṭhitāya panassā mahatiyā buddhavīthiyā abhimukhe ṭhitā gandhakuṭi paññāyi. Sā nivāte dīpasikhā viya buddhagāravena hatthakukkuccādirahitaṃ niccalaṃ parisaṃ disvā – ‘‘nūna mettha kiñci bhājanīyabhaṇḍaṃ bhavissati, yato ahaṃ sappitelamadhuphāṇitādīsu kiñcideva pattato vā hatthato vā paggharantaṃ bhūmiyaṃ vā pana patitaṃ labhissāmī’’ti antovihāraṃ pāvisi. Dvārakoṭṭhake avaruddhakānaṃ nivāraṇatthāya ṭhitā ārakkhadevatā yakkhiniyā upanissayaṃ disvā na nivāresi. Tassā saha parisāya ekībhāvagamanena madhurassaro chaviādīni chinditvā aṭṭhimiñjaṃ āhacca aṭṭhāsi. Taṃ dhammassavanatthāya niccalaṃ ṭhitaṃ purimanayeneva puttakā codayiṃsu. Sā ‘‘dhammassavanassa me antarāyaṃ karontī’’ti puttake tuṇhī uttarike hohīti evaṃ tosesi.
д̇ад̇т̇а яааваад̇и яаава д̇хаммам̣ сун̣аами, д̇аава д̇ун̣хий хохийд̇и ад̇т̇о. саб̣б̣аг̇ант̇аббаможананд̇и ниб̣б̣аанам̣ ааг̇амма саб̣б̣з г̇ант̇аа бамужжанд̇и, д̇асмаа д̇ам̣ саб̣б̣аг̇ант̇аббаможананд̇и вужжад̇и. ад̇ивзлаад̇и взлаад̇игганд̇аа бамаан̣аад̇игганд̇аа. бияааяанаад̇и маг̇г̇анаа бад̇т̇анаа. д̇ад̇о бияад̇аранд̇и яаа аяам̣ асса д̇хаммасса маг̇г̇анаа бад̇т̇анаа, ид̣̇ам̣ маяхам̣ д̇ад̇о бияад̇аранд̇и ад̇т̇о. бияад̇араад̇и ваа баато. баан̣инанд̇и яат̇аа баан̣ийнам̣ д̣̇угкаа можзд̇и. гз можзд̇ийд̇и? баан̣инзд̇и аахарид̇ваа вад̇д̇аб̣б̣ам̣. яам̣ д̇хаммам̣ абхисамб̣уд̣̇д̇ханд̇и, яам̣ д̇хаммам̣ бхаг̇аваа абхисамб̣уд̣̇д̇хо. д̇ун̣хийбхууд̇ааяамуд̇д̇араад̇и на гзвалам̣ ахамзва, аяам̣ мз бхаг̇иний уд̇д̇арааби д̇ун̣хийбхууд̇аад̇и вад̣̇ад̇и. сад̣̇д̇хаммасса анан̃н̃ааяаад̇и, амма, маяам̣ буб̣б̣зби имам̣ сад̣̇д̇хаммамзва аж̇аанид̇ваа ид̣̇аани ид̣̇ам̣ куббибаасаад̣̇ид̣̇угкам̣ анубхаванд̇аа д̣̇угкам̣ жараама вихараама.
Tattha yāvāti yāva dhammaṃ suṇāmi, tāva tuṇhī hohīti attho. Sabbaganthappamocananti nibbānaṃ āgamma sabbe ganthā pamuccanti, tasmā taṃ sabbaganthappamocananti vuccati. Ativelāti velātikkantā pamāṇātikkantā. Piyāyanāti magganā patthanā. Tato piyataranti yā ayaṃ assa dhammassa magganā patthanā, idaṃ mayhaṃ tato piyataranti attho. Piyatarāti vā pāṭho. Pāṇinanti yathā pāṇīnaṃ dukkhā moceti. Ke mocetīti? Pāṇineti āharitvā vattabbaṃ. Yaṃ dhammaṃ abhisambuddhanti, yaṃ dhammaṃ bhagavā abhisambuddho. Tuṇhībhūtāyamuttarāti na kevalaṃ ahameva, ayaṃ me bhaginī uttarāpi tuṇhībhūtāti vadati. Saddhammassa anaññāyāti, amma, mayaṃ pubbepi imaṃ saddhammameva ajānitvā idāni idaṃ khuppipāsādidukkhaṃ anubhavantā dukkhaṃ carāma viharāma.
жагкумаад̇и бан̃жахи жагкуухи жагкумаа. д̇хаммам̣ д̣̇зсзнд̇оязва бхаг̇аваа барисам̣ саллагкаяамаано д̇ассаа яагкинияаа жзва яагкад̣̇аарагасса жа сод̇аабад̇д̇ипаласса убаниссаяам̣ д̣̇исваа д̣̇зсанам̣ виниваддзд̇ваа жад̇усажжагат̇ам̣ д̣̇ийбзд̇и, д̇ам̣ суд̇ваа д̇асмим̣язва д̣̇зсз тид̇аа яагкиний сад̣̇д̇хим̣ буд̇д̇зна сод̇аабад̇д̇ипалз бад̇идтид̇аа. д̇хийд̇уяааби банассаа убаниссаяо ад̇т̇и, ад̇ид̣̇ахарад̇д̇аа бана д̣̇зсанам̣ самбадижчид̇ум̣ наасагки.
Cakkhumāti pañcahi cakkhūhi cakkhumā. Dhammaṃ desentoyeva bhagavā parisaṃ sallakkhayamāno tassā yakkhiniyā ceva yakkhadārakassa ca sotāpattiphalassa upanissayaṃ disvā desanaṃ vinivaṭṭetvā catusaccakathaṃ dīpeti, taṃ sutvā tasmiṃyeva dese ṭhitā yakkhinī saddhiṃ puttena sotāpattiphale patiṭṭhitā. Dhītuyāpi panassā upanissayo atthi, atidaharattā pana desanaṃ sampaṭicchituṃ nāsakkhi.
ид̣̇аани саа яагкиний буд̇д̇асса анумод̣̇анам̣ гаронд̇ий саад̇ху ко бан̣д̣ид̇о наамаад̇иаад̣̇имааха. аж̇ж̇аахамхи самуг̇г̇ад̇аад̇и ахамхи аж̇ж̇а ваддад̇о уг̇г̇ад̇аа самуг̇г̇ад̇аа саасанз ваа уг̇г̇ад̇аа самуг̇г̇ад̇аа, д̇вамби сукий хохийд̇и. д̣̇идтаанийд̇и маяаа жа д̇аяаа жа д̣̇идтаани. уд̇д̇арааби сун̣аад̇у мзд̇и, ‘‘амхаагам̣ жад̇усажжабадивзд̇хабхаавам̣, д̇хийд̇аа мз уд̇д̇арааби, сун̣аад̇уу’’д̇и вад̣̇ад̇и. саха сажжабадивзд̇хзнзва сааби суужиломо вияа саб̣б̣ам̣ сзд̇аган̣д̣угажчуаад̣̇ибхаавам̣ бахааяа д̣̇иб̣б̣асамбад̇д̇им̣ бадилабхад̇и сад̣̇д̇хим̣ буд̇д̇зна. д̇хийд̇аа банассаа яат̇аа наама логз маад̇аабид̇уухи иссарияз лад̣̇д̇хз буд̇д̇аанамби д̇ам̣ ход̇и, звам̣ маад̇у-аанубхаавзнзва самбад̇д̇им̣ лабхи. д̇ад̇о бадтааяа жа саа сад̣̇д̇хим̣ буд̇д̇агзхи г̇анд̇хагудисамийбаругкзязва ниваасаругкам̣ лабхид̇ваа сааяам̣ баад̇ам̣ б̣уд̣̇д̇хад̣̇ассанам̣ лабхамаанаа д̇хаммам̣ сун̣амаанаа д̣̇ийгхарад̇д̇ам̣ д̇ад̇т̇зва васи. сад̇д̇амам̣.
Idāni sā yakkhinī puttassa anumodanaṃ karontī sādhu kho paṇḍito nāmātiādimāha. Ajjāhamhi samuggatāti ahamhi ajja vaṭṭato uggatā samuggatā sāsane vā uggatā samuggatā, tvampi sukhī hohīti. Diṭṭhānīti mayā ca tayā ca diṭṭhāni. Uttarāpi suṇātu meti, ‘‘amhākaṃ catusaccapaṭivedhabhāvaṃ, dhītā me uttarāpi, suṇātū’’ti vadati. Saha saccapaṭivedheneva sāpi sūcilomo viya sabbaṃ setakaṇḍukacchuādibhāvaṃ pahāya dibbasampattiṃ paṭilabhati saddhiṃ puttena. Dhītā panassā yathā nāma loke mātāpitūhi issariye laddhe puttānampi taṃ hoti, evaṃ mātu-ānubhāveneva sampattiṃ labhi. Tato paṭṭhāya ca sā saddhiṃ puttakehi gandhakuṭisamīparukkheyeva nivāsarukkhaṃ labhitvā sāyaṃ pātaṃ buddhadassanaṃ labhamānā dhammaṃ suṇamānā dīgharattaṃ tattheva vasi. Sattamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 7. бунаб̣б̣асусуд̇д̇ам̣ • 7. Punabbasusuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 7. бунаб̣б̣асусуд̇д̇аван̣н̣анаа • 7. Punabbasusuttavaṇṇanā
