| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૬. પુઞ્ઞકિરિયવત્થુસુત્તવણ્ણના
6. Puññakiriyavatthusuttavaṇṇanā
૩૬. છટ્ઠે પુઞ્ઞકિરિયાનિ ચ તાનિ તેસં તેસં આનિસંસાનં વત્થૂનિ ચાતિ પુઞ્ઞકિરિયવત્થૂનિ. દાનાદીનઞ્હિ લક્ખણે ચિત્તં ઠપેત્વા ‘‘એવરૂપં નામ અમ્હેહિ દાનં દાતબ્બં, સીલં રક્ખિતબ્બં, ભાવના ભાવેતબ્બા’’તિ સત્તા પુઞ્ઞાનિ કરોન્તિ. દાનમેવ દાનમયં, દાનચેતનાસુ વા પુરિમચેતનાતો નિપ્ફન્ના સન્નિટ્ઠાપકચેતના દાનમયં સીલાદીહિ સીલમયાદીનિ વિય. સેસદ્વયેસુપિ એસેવ નયો. પરિત્તં કતં હોતીતિ થોકં મન્દં કતં હોતિ. નાભિસમ્ભોતીતિ ન નિપ્ફજ્જતિ. અકતં હોતીતિ ભાવનાયયોગોયેવ અનારદ્ધો હોતીતિ અત્થો. મનુસ્સદોભગ્યન્તિ મનુસ્સેસુ સમ્પત્તિરહિતં પઞ્ચવિધં નીચકુલં. ઉપપજ્જતીતિ પટિસન્ધિવસેન ઉપગચ્છતિ, તત્થ નિબ્બત્તતીતિ અત્થો. મત્તસો કતન્તિ પમાણેન કતં, થોકં ન બહુ. મનુસ્સસોભગ્યન્તિ મનુસ્સેસુ સુભગભાવં તિવિધકુલસમ્પત્તિં. અધિમત્તન્તિ અધિકપ્પમાણં બલવં વા. અધિગણ્હન્તીતિ અભિભવિત્વા ગણ્હન્તિ, વિસિટ્ઠતરા જેટ્ઠકા હોન્તીતિ અત્થો.
36. Chaṭṭhe puññakiriyāni ca tāni tesaṃ tesaṃ ānisaṃsānaṃ vatthūni cāti puññakiriyavatthūni. Dānādīnañhi lakkhaṇe cittaṃ ṭhapetvā ‘‘evarūpaṃ nāma amhehi dānaṃ dātabbaṃ, sīlaṃ rakkhitabbaṃ, bhāvanā bhāvetabbā’’ti sattā puññāni karonti. Dānameva dānamayaṃ, dānacetanāsu vā purimacetanāto nipphannā sanniṭṭhāpakacetanā dānamayaṃ sīlādīhi sīlamayādīni viya. Sesadvayesupi eseva nayo. Parittaṃ kataṃ hotīti thokaṃ mandaṃ kataṃ hoti. Nābhisambhotīti na nipphajjati. Akataṃ hotīti bhāvanāyayogoyeva anāraddho hotīti attho. Manussadobhagyanti manussesu sampattirahitaṃ pañcavidhaṃ nīcakulaṃ. Upapajjatīti paṭisandhivasena upagacchati, tattha nibbattatīti attho. Mattaso katanti pamāṇena kataṃ, thokaṃ na bahu. Manussasobhagyanti manussesu subhagabhāvaṃ tividhakulasampattiṃ. Adhimattanti adhikappamāṇaṃ balavaṃ vā. Adhigaṇhantīti abhibhavitvā gaṇhanti, visiṭṭhatarā jeṭṭhakā hontīti attho.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૬. પુઞ્ઞકિરિયવત્થુસુત્તં • 6. Puññakiriyavatthusuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૬. પુઞ્ઞકિરિયવત્થુસુત્તવણ્ણના • 6. Puññakiriyavatthusuttavaṇṇanā
