| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. புப்ப²சங்கோடியத்தே²ரஅபதா³னவண்ணனா
10. Pupphacaṅkoṭiyattheraapadānavaṇṇanā
அபீ⁴தரூபங் ஸீஹங் வாதிஆதி³கங் ஆயஸ்மதோ புப்ப²சங்கோடியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ மஹாவிப⁴வஸம்பன்னோ ஸத்த²ரி பஸீதி³த்வா பஸன்னாகாரங் த³ஸ்ஸெந்தோ ஸுவண்ணவண்ணங் அனோஜபுப்ப²மோசினித்வா சங்கோடகங் பூரெத்வா ப⁴க³வந்தங் பூஜெத்வா ‘‘ப⁴க³வா , இமஸ்ஸ நிஸ்ஸந்தே³ன நிப்³ப³த்தனிப்³ப³த்தட்டா²னே ஸுவண்ணவண்ணோ பூஜனீயோ ஹுத்வா நிப்³பா³னங் பாபுணெய்ய’’ந்தி பத்த²னமகாஸி. ஸோ தேன புஞ்ஞகம்மேன தே³வமனுஸ்ஸேஸு நிப்³ப³த்தோ ஸப்³ப³த்த² பூஜிதோ ஸுவண்ணவண்ணோ அபி⁴ரூபோ அஹோஸி. ஸோ அபரபா⁴கே³ இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ஸத்த²ரி பஸீதி³த்வா பப்³ப³ஜிதோ விபஸ்ஸனங் வட்³டெ⁴த்வா நசிரஸ்ஸேவ அரஹா அஹோஸி.
Abhītarūpaṃ sīhaṃ vātiādikaṃ āyasmato pupphacaṅkoṭiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto mahāvibhavasampanno satthari pasīditvā pasannākāraṃ dassento suvaṇṇavaṇṇaṃ anojapupphamocinitvā caṅkoṭakaṃ pūretvā bhagavantaṃ pūjetvā ‘‘bhagavā , imassa nissandena nibbattanibbattaṭṭhāne suvaṇṇavaṇṇo pūjanīyo hutvā nibbānaṃ pāpuṇeyya’’nti patthanamakāsi. So tena puññakammena devamanussesu nibbatto sabbattha pūjito suvaṇṇavaṇṇo abhirūpo ahosi. So aparabhāge imasmiṃ buddhuppāde vibhavasampanne ekasmiṃ kulagehe nibbatto vuddhippatto satthari pasīditvā pabbajito vipassanaṃ vaḍḍhetvā nacirasseva arahā ahosi.
68-9. ஸோ பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அபீ⁴தரூபங் ஸீஹங் வாதிஆதி³மாஹ. தத்த² ஸீஹந்தி த்³விபத³சதுப்பதா³த³யோ ஸத்தே அபி⁴ப⁴வதி அஜ்ஜொ²த்த²ரதீதி ஸீஹோ, அபீ⁴தரூபோ அபீ⁴தஸபா⁴வோ, தங் அபீ⁴தரூபங் ஸீஹங் இவ நிஸின்னங் பூஜேஸிந்தி ஸம்ப³ந்தோ⁴. பக்கீ²னங் அக்³க³ங் க³ருளராஜங் இவ பவரங் உத்தமங் ப்³யக்³க⁴ராஜங் இவ அபி⁴ விஸேஸேன ஜாதங் ஸப்³ப³ஸீஹானங் விஸேஸங் கேஸரஸீஹங் இவ திலோகஸ்ஸ ஸரணங் ஸிகி²ங் ஸம்மாஸம்பு³த்³த⁴ங். கிங் பூ⁴தங்? அனேஜங் நிக்கிலேஸங் க²ந்த⁴மாராதீ³ஹி அபராஜிதங் நிஸின்னங் ஸிகி²ந்தி ஸம்ப³ந்தோ⁴. மாரணானக்³க³ந்தி ஸப்³ப³கிலேஸானங் மாரணே ஸோஸனே வித்³த⁴ங்ஸனே அக்³க³ங் ஸெட்ட²ங் கிலேஸே மாரெந்தானங் பச்சேகபு³த்³த⁴பு³த்³த⁴ஸாவகானங் விஜ்ஜமானானம்பி தேஸங் அக்³க³ந்தி அத்தோ². பி⁴க்கு²ஸங்க⁴புரக்க²தங் பரிவாரிதங் பரிவாரெத்வா நிஸின்னங் ஸிகி²ந்தி ஸம்ப³ந்தோ⁴.
68-9. So pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento abhītarūpaṃ sīhaṃ vātiādimāha. Tattha sīhanti dvipadacatuppadādayo satte abhibhavati ajjhottharatīti sīho, abhītarūpo abhītasabhāvo, taṃ abhītarūpaṃ sīhaṃ iva nisinnaṃ pūjesinti sambandho. Pakkhīnaṃ aggaṃ garuḷarājaṃ iva pavaraṃ uttamaṃ byaggharājaṃ iva abhi visesena jātaṃ sabbasīhānaṃ visesaṃ kesarasīhaṃ iva tilokassa saraṇaṃ sikhiṃ sammāsambuddhaṃ. Kiṃ bhūtaṃ? Anejaṃ nikkilesaṃ khandhamārādīhi aparājitaṃ nisinnaṃ sikhinti sambandho. Māraṇānagganti sabbakilesānaṃ māraṇe sosane viddhaṃsane aggaṃ seṭṭhaṃ kilese mārentānaṃ paccekabuddhabuddhasāvakānaṃ vijjamānānampi tesaṃ agganti attho. Bhikkhusaṅghapurakkhataṃ parivāritaṃ parivāretvā nisinnaṃ sikhinti sambandho.
70. சங்கோடகே ட²பெத்வானாதி உத்தமங் அனோஜபுப்ப²ங் கரண்ட³கே பூரெத்வா ஸிகீ²ஸம்பு³த்³த⁴ங் ஸெட்ட²ங் ஸமோகிரிங் பூஜேஸிந்தி அத்தோ².
70.Caṅkoṭake ṭhapetvānāti uttamaṃ anojapupphaṃ karaṇḍake pūretvā sikhīsambuddhaṃ seṭṭhaṃ samokiriṃ pūjesinti attho.
புப்ப²சங்கோடியத்தே²ரஅபதா³னவண்ணனா ஸமத்தா.
Pupphacaṅkoṭiyattheraapadānavaṇṇanā samattā.
ஸத்தமவக்³க³வண்ணனா ஸமத்தா.
Sattamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. புப்ப²சங்கோடியத்தே²ரஅபதா³னங் • 10. Pupphacaṅkoṭiyattheraapadānaṃ
