| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੧੦. ਪੁਪ੍ਫਚਙ੍ਕੋਟਿਯਤ੍ਥੇਰਅਪਦਾਨવਣ੍ਣਨਾ
10. Pupphacaṅkoṭiyattheraapadānavaṇṇanā
ਅਭੀਤਰੂਪਂ ਸੀਹਂ વਾਤਿਆਦਿਕਂ ਆਯਸ੍ਮਤੋ ਪੁਪ੍ਫਚਙ੍ਕੋਟਿਯਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗવਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ વਿਞ੍ਞੁਤਂ ਪਤ੍ਤੋ ਮਹਾવਿਭવਸਮ੍ਪਨ੍ਨੋ ਸਤ੍ਥਰਿ ਪਸੀਦਿਤ੍વਾ ਪਸਨ੍ਨਾਕਾਰਂ ਦਸ੍ਸੇਨ੍ਤੋ ਸੁવਣ੍ਣવਣ੍ਣਂ ਅਨੋਜਪੁਪ੍ਫਮੋਚਿਨਿਤ੍વਾ ਚਙ੍ਕੋਟਕਂ ਪੂਰੇਤ੍વਾ ਭਗવਨ੍ਤਂ ਪੂਜੇਤ੍વਾ ‘‘ਭਗવਾ , ਇਮਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸੁવਣ੍ਣવਣ੍ਣੋ ਪੂਜਨੀਯੋ ਹੁਤ੍વਾ ਨਿਬ੍ਬਾਨਂ ਪਾਪੁਣੇਯ੍ਯ’’ਨ੍ਤਿ ਪਤ੍ਥਨਮਕਾਸਿ। ਸੋ ਤੇਨ ਪੁਞ੍ਞਕਮ੍ਮੇਨ ਦੇવਮਨੁਸ੍ਸੇਸੁ ਨਿਬ੍ਬਤ੍ਤੋ ਸਬ੍ਬਤ੍ਥ ਪੂਜਿਤੋ ਸੁવਣ੍ਣવਣ੍ਣੋ ਅਭਿਰੂਪੋ ਅਹੋਸਿ। ਸੋ ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ વਿਭવਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ વੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍વਾ ਪਬ੍ਬਜਿਤੋ વਿਪਸ੍ਸਨਂ વਡ੍ਢੇਤ੍વਾ ਨਚਿਰਸ੍ਸੇવ ਅਰਹਾ ਅਹੋਸਿ।
Abhītarūpaṃ sīhaṃ vātiādikaṃ āyasmato pupphacaṅkoṭiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto mahāvibhavasampanno satthari pasīditvā pasannākāraṃ dassento suvaṇṇavaṇṇaṃ anojapupphamocinitvā caṅkoṭakaṃ pūretvā bhagavantaṃ pūjetvā ‘‘bhagavā , imassa nissandena nibbattanibbattaṭṭhāne suvaṇṇavaṇṇo pūjanīyo hutvā nibbānaṃ pāpuṇeyya’’nti patthanamakāsi. So tena puññakammena devamanussesu nibbatto sabbattha pūjito suvaṇṇavaṇṇo abhirūpo ahosi. So aparabhāge imasmiṃ buddhuppāde vibhavasampanne ekasmiṃ kulagehe nibbatto vuddhippatto satthari pasīditvā pabbajito vipassanaṃ vaḍḍhetvā nacirasseva arahā ahosi.
੬੮-੯. ਸੋ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍વਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਭੀਤਰੂਪਂ ਸੀਹਂ વਾਤਿਆਦਿਮਾਹ। ਤਤ੍ਥ ਸੀਹਨ੍ਤਿ ਦ੍વਿਪਦਚਤੁਪ੍ਪਦਾਦਯੋ ਸਤ੍ਤੇ ਅਭਿਭવਤਿ ਅਜ੍ਝੋਤ੍ਥਰਤੀਤਿ ਸੀਹੋ, ਅਭੀਤਰੂਪੋ ਅਭੀਤਸਭਾવੋ, ਤਂ ਅਭੀਤਰੂਪਂ ਸੀਹਂ ਇવ ਨਿਸਿਨ੍ਨਂ ਪੂਜੇਸਿਨ੍ਤਿ ਸਮ੍ਬਨ੍ਧੋ। ਪਕ੍ਖੀਨਂ ਅਗ੍ਗਂ ਗਰੁਲ਼ਰਾਜਂ ਇવ ਪવਰਂ ਉਤ੍ਤਮਂ ਬ੍ਯਗ੍ਘਰਾਜਂ ਇવ ਅਭਿ વਿਸੇਸੇਨ ਜਾਤਂ ਸਬ੍ਬਸੀਹਾਨਂ વਿਸੇਸਂ ਕੇਸਰਸੀਹਂ ਇવ ਤਿਲੋਕਸ੍ਸ ਸਰਣਂ ਸਿਖਿਂ ਸਮ੍ਮਾਸਮ੍ਬੁਦ੍ਧਂ। ਕਿਂ ਭੂਤਂ? ਅਨੇਜਂ ਨਿਕ੍ਕਿਲੇਸਂ ਖਨ੍ਧਮਾਰਾਦੀਹਿ ਅਪਰਾਜਿਤਂ ਨਿਸਿਨ੍ਨਂ ਸਿਖਿਨ੍ਤਿ ਸਮ੍ਬਨ੍ਧੋ। ਮਾਰਣਾਨਗ੍ਗਨ੍ਤਿ ਸਬ੍ਬਕਿਲੇਸਾਨਂ ਮਾਰਣੇ ਸੋਸਨੇ વਿਦ੍ਧਂਸਨੇ ਅਗ੍ਗਂ ਸੇਟ੍ਠਂ ਕਿਲੇਸੇ ਮਾਰੇਨ੍ਤਾਨਂ ਪਚ੍ਚੇਕਬੁਦ੍ਧਬੁਦ੍ਧਸਾવਕਾਨਂ વਿਜ੍ਜਮਾਨਾਨਮ੍ਪਿ ਤੇਸਂ ਅਗ੍ਗਨ੍ਤਿ ਅਤ੍ਥੋ। ਭਿਕ੍ਖੁਸਙ੍ਘਪੁਰਕ੍ਖਤਂ ਪਰਿવਾਰਿਤਂ ਪਰਿવਾਰੇਤ੍વਾ ਨਿਸਿਨ੍ਨਂ ਸਿਖਿਨ੍ਤਿ ਸਮ੍ਬਨ੍ਧੋ।
68-9. So pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento abhītarūpaṃ sīhaṃ vātiādimāha. Tattha sīhanti dvipadacatuppadādayo satte abhibhavati ajjhottharatīti sīho, abhītarūpo abhītasabhāvo, taṃ abhītarūpaṃ sīhaṃ iva nisinnaṃ pūjesinti sambandho. Pakkhīnaṃ aggaṃ garuḷarājaṃ iva pavaraṃ uttamaṃ byaggharājaṃ iva abhi visesena jātaṃ sabbasīhānaṃ visesaṃ kesarasīhaṃ iva tilokassa saraṇaṃ sikhiṃ sammāsambuddhaṃ. Kiṃ bhūtaṃ? Anejaṃ nikkilesaṃ khandhamārādīhi aparājitaṃ nisinnaṃ sikhinti sambandho. Māraṇānagganti sabbakilesānaṃ māraṇe sosane viddhaṃsane aggaṃ seṭṭhaṃ kilese mārentānaṃ paccekabuddhabuddhasāvakānaṃ vijjamānānampi tesaṃ agganti attho. Bhikkhusaṅghapurakkhataṃ parivāritaṃ parivāretvā nisinnaṃ sikhinti sambandho.
੭੦. ਚਙ੍ਕੋਟਕੇ ਠਪੇਤ੍વਾਨਾਤਿ ਉਤ੍ਤਮਂ ਅਨੋਜਪੁਪ੍ਫਂ ਕਰਣ੍ਡਕੇ ਪੂਰੇਤ੍વਾ ਸਿਖੀਸਮ੍ਬੁਦ੍ਧਂ ਸੇਟ੍ਠਂ ਸਮੋਕਿਰਿਂ ਪੂਜੇਸਿਨ੍ਤਿ ਅਤ੍ਥੋ।
70.Caṅkoṭake ṭhapetvānāti uttamaṃ anojapupphaṃ karaṇḍake pūretvā sikhīsambuddhaṃ seṭṭhaṃ samokiriṃ pūjesinti attho.
ਪੁਪ੍ਫਚਙ੍ਕੋਟਿਯਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Pupphacaṅkoṭiyattheraapadānavaṇṇanā samattā.
ਸਤ੍ਤਮવਗ੍ਗવਣ੍ਣਨਾ ਸਮਤ੍ਤਾ।
Sattamavaggavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੧੦. ਪੁਪ੍ਫਚਙ੍ਕੋਟਿਯਤ੍ਥੇਰਅਪਦਾਨਂ • 10. Pupphacaṅkoṭiyattheraapadānaṃ
