| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४. पुप्फच्छदनियत्थेरअपदानं
4. Pupphacchadaniyattheraapadānaṃ
२६.
26.
‘‘सुनन्दो नाम नामेन, ब्राह्मणो मन्तपारगू।
‘‘Sunando nāma nāmena, brāhmaṇo mantapāragū;
अज्झायको याचयोगो, वाजपेय्यं अयाजयि॥
Ajjhāyako yācayogo, vājapeyyaṃ ayājayi.
२७.
27.
‘‘पदुमुत्तरो लोकविदू, अग्गो कारुणिको इसि।
‘‘Padumuttaro lokavidū, aggo kāruṇiko isi;
जनतं अनुकम्पन्तो, अम्बरे चङ्कमी तदा॥
Janataṃ anukampanto, ambare caṅkamī tadā.
२८.
28.
‘‘चङ्कमित्वान सम्बुद्धो, सब्बञ्ञू लोकनायको।
‘‘Caṅkamitvāna sambuddho, sabbaññū lokanāyako;
२९.
29.
‘‘वण्टे छेत्वान पुप्फानि, ब्राह्मणो मन्तपारगू।
‘‘Vaṇṭe chetvāna pupphāni, brāhmaṇo mantapāragū;
सब्बे सिस्से समानेत्वा, आकासे उक्खिपापयि॥
Sabbe sisse samānetvā, ākāse ukkhipāpayi.
३०.
30.
‘‘यावता नगरं आसि, पुप्फानं छदनं तदा।
‘‘Yāvatā nagaraṃ āsi, pupphānaṃ chadanaṃ tadā;
बुद्धस्स आनुभावेन, सत्ताहं न विगच्छथ॥
Buddhassa ānubhāvena, sattāhaṃ na vigacchatha.
३१.
31.
‘‘तेनेव सुक्कमूलेन, अनुभोत्वान सम्पदा।
‘‘Teneva sukkamūlena, anubhotvāna sampadā;
सब्बासवे परिञ्ञाय, तिण्णो लोके विसत्तिकं॥
Sabbāsave pariññāya, tiṇṇo loke visattikaṃ.
३२.
32.
‘‘एकारसे कप्पसते, पञ्चतिंसासु खत्तिया।
‘‘Ekārase kappasate, pañcatiṃsāsu khattiyā;
अम्बरंससनामा ते, चक्कवत्ती महब्बला॥
Ambaraṃsasanāmā te, cakkavattī mahabbalā.
३३.
33.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पुप्फच्छदनियो थेरो इमा गाथायो अभासित्थाति।
Itthaṃ sudaṃ āyasmā pupphacchadaniyo thero imā gāthāyo abhāsitthāti.
पुप्फच्छदनियत्थेरस्सापदानं चतुत्थं।
Pupphacchadaniyattherassāpadānaṃ catutthaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ४. पुप्फच्छदनियत्थेरअपदानवण्णना • 4. Pupphacchadaniyattheraapadānavaṇṇanā
