| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. पुप्फच्छत्तियत्थेरअपदानं
9. Pupphacchattiyattheraapadānaṃ
७३.
73.
‘‘सिद्धत्थस्स भगवतो, लोकजेट्ठस्स तादिनो।
‘‘Siddhatthassa bhagavato, lokajeṭṭhassa tādino;
सच्चं पकासयन्तस्स, निब्बापेन्तस्स पाणिनो॥
Saccaṃ pakāsayantassa, nibbāpentassa pāṇino.
७४.
74.
‘‘जलजं आहरित्वान, सतपत्तं मनोरमं।
‘‘Jalajaṃ āharitvāna, satapattaṃ manoramaṃ;
पुप्फस्स छत्तं कत्वान, बुद्धस्स अभिरोपयिं॥
Pupphassa chattaṃ katvāna, buddhassa abhiropayiṃ.
७५.
75.
‘‘सिद्धत्थो च लोकविदू, आहुतीनं पटिग्गहो।
‘‘Siddhattho ca lokavidū, āhutīnaṃ paṭiggaho;
भिक्खुसङ्घे ठितो सत्था, इमं गाथं अभासथ॥
Bhikkhusaṅghe ṭhito satthā, imaṃ gāthaṃ abhāsatha.
७६.
76.
‘‘‘यो मे चित्तं पसादेत्वा, पुप्फच्छत्तं अधारयिं।
‘‘‘Yo me cittaṃ pasādetvā, pupphacchattaṃ adhārayiṃ;
तेन चित्तप्पसादेन, दुग्गतिं सो न गच्छति’॥
Tena cittappasādena, duggatiṃ so na gacchati’.
७७.
77.
‘‘इदं वत्वान सम्बुद्धो, सिद्धत्थो लोकनायको।
‘‘Idaṃ vatvāna sambuddho, siddhattho lokanāyako;
उय्योजेत्वान परिसं, वेहासं नभमुग्गमि॥
Uyyojetvāna parisaṃ, vehāsaṃ nabhamuggami.
७८.
78.
‘‘वुट्ठिते नरदेवम्हि, सेतच्छत्तम्पि वुट्ठहि।
‘‘Vuṭṭhite naradevamhi, setacchattampi vuṭṭhahi;
पुरतो बुद्धसेट्ठस्स, गच्छति छत्तमुत्तमं॥
Purato buddhaseṭṭhassa, gacchati chattamuttamaṃ.
७९.
79.
‘‘चतुन्नवुतितो कप्पे, यं छत्तं अभिरोपयिं।
‘‘Catunnavutito kappe, yaṃ chattaṃ abhiropayiṃ;
दुग्गतिं नाभिजानामि, पुप्फच्छत्तस्सिदं फलं॥
Duggatiṃ nābhijānāmi, pupphacchattassidaṃ phalaṃ.
८०.
80.
‘‘चतुसत्ततिकप्पम्हि, अट्ठ जलसिखा अहू।
‘‘Catusattatikappamhi, aṭṭha jalasikhā ahū;
सत्तरतनसम्पन्ना, चक्कवत्ती महब्बला॥
Sattaratanasampannā, cakkavattī mahabbalā.
८१.
81.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पुप्फच्छत्तियो थेरो इमा गाथायो अभासित्थाति।
Itthaṃ sudaṃ āyasmā pupphacchattiyo thero imā gāthāyo abhāsitthāti.
पुप्फच्छत्तियत्थेरस्सापदानं नवमं।
Pupphacchattiyattherassāpadānaṃ navamaṃ.
