| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
10. புராபே⁴த³ஸுத்தவண்ணனா
10. Purābhedasuttavaṇṇanā
855. கத²ங்த³ஸ்ஸீதி புராபே⁴த³ஸுத்தங். கா உப்பத்தி? இமஸ்ஸ ஸுத்தஸ்ஸ இதோ பரேஸஞ்ச பஞ்சன்னங் கலஹவிவாத³சூளப்³யூஹமஹாப்³யூஹதுவடகஅத்தத³ண்ட³ஸுத்தானங் ஸம்மாபரிப்³பா³ஜனீயஸ்ஸ உப்பத்தியங் வுத்தனயேனேவ ஸாமஞ்ஞதோ உப்பத்தி வுத்தா. விஸேஸதோ பன யதே²வ தஸ்மிங் மஹாஸமயே ராக³சரிததே³வதானங் ஸப்பாயவஸேன த⁴ம்மங் தே³ஸேதுங் நிம்மிதபு³த்³தே⁴ன அத்தானங் புச்சா²பெத்வா ஸம்மாபரிப்³பா³ஜனீயஸுத்தமபா⁴ஸி, ஏவங் தஸ்மிங்யேவ மஹாஸமயே ‘‘கிங் நு கோ² புரா ஸரீரபே⁴தா³ கத்தப்³ப³’’ந்தி உப்பன்னசித்தானங் தே³வதானங் சித்தங் ஞத்வா தாஸங் அனுக்³க³ஹத்த²ங் அட்³ட⁴தேளஸபி⁴க்கு²ஸதபரிவாரங் நிம்மிதபு³த்³த⁴ங் ஆகாஸேன ஆனெத்வா தேன அத்தானங் புச்சா²பெத்வா இமங் ஸுத்தமபா⁴ஸி.
855.Kathaṃdassīti purābhedasuttaṃ. Kā uppatti? Imassa suttassa ito paresañca pañcannaṃ kalahavivādacūḷabyūhamahābyūhatuvaṭakaattadaṇḍasuttānaṃ sammāparibbājanīyassa uppattiyaṃ vuttanayeneva sāmaññato uppatti vuttā. Visesato pana yatheva tasmiṃ mahāsamaye rāgacaritadevatānaṃ sappāyavasena dhammaṃ desetuṃ nimmitabuddhena attānaṃ pucchāpetvā sammāparibbājanīyasuttamabhāsi, evaṃ tasmiṃyeva mahāsamaye ‘‘kiṃ nu kho purā sarīrabhedā kattabba’’nti uppannacittānaṃ devatānaṃ cittaṃ ñatvā tāsaṃ anuggahatthaṃ aḍḍhateḷasabhikkhusataparivāraṃ nimmitabuddhaṃ ākāsena ānetvā tena attānaṃ pucchāpetvā imaṃ suttamabhāsi.
தத்த² புச்சா²ய தாவ ஸோ நிம்மிதோ கத²ங்த³ஸ்ஸீதி அதி⁴பஞ்ஞங் கத²ங்ஸீலோதி அதி⁴ஸீலங், உபஸந்தோதி அதி⁴சித்தங் புச்ச²தி. ஸேஸங் பாகடமேவ.
Tattha pucchāya tāva so nimmito kathaṃdassīti adhipaññaṃ kathaṃsīloti adhisīlaṃ, upasantoti adhicittaṃ pucchati. Sesaṃ pākaṭameva.
856. விஸ்ஸஜ்ஜனே பன ப⁴க³வா ஸரூபேன அதி⁴பஞ்ஞாதீ³னி அவிஸ்ஸஜ்ஜெத்வாவ அதி⁴பஞ்ஞாதி³ப்பபா⁴வேன யேஸங் கிலேஸானங் உபஸமா ‘‘உபஸந்தோ’’தி வுச்சதி, நானாதே³வதானங் ஆஸயானுலோமேன தேஸங் உபஸமமேவ தீ³பெந்தோ ‘‘வீததண்ஹோ’’திஆதி³கா கா³தா²யோ அபா⁴ஸி. தத்த² ஆதி³தோ அட்ட²ன்னங் கா³தா²னங் ‘‘தங் ப்³ரூமி உபஸந்தோ’’தி இமாய கா³தா²ய ஸம்ப³ந்தோ⁴ வேதி³தப்³போ³. ததோ பராஸங் ‘‘ஸ வே ஸந்தோதி வுச்சதீ’’தி இமினா ஸப்³ப³பச்சி²மேன பதே³ன.
856. Vissajjane pana bhagavā sarūpena adhipaññādīni avissajjetvāva adhipaññādippabhāvena yesaṃ kilesānaṃ upasamā ‘‘upasanto’’ti vuccati, nānādevatānaṃ āsayānulomena tesaṃ upasamameva dīpento ‘‘vītataṇho’’tiādikā gāthāyo abhāsi. Tattha ādito aṭṭhannaṃ gāthānaṃ ‘‘taṃ brūmi upasanto’’ti imāya gāthāya sambandho veditabbo. Tato parāsaṃ ‘‘sa ve santoti vuccatī’’ti iminā sabbapacchimena padena.
அனுபத³வண்ணனானயேன ச – வீததண்ஹோ புரா பே⁴தா³தி யோ ஸரீரபே⁴தா³ புப்³ப³மேவ பஹீனதண்ஹோ. புப்³ப³மந்தமனிஸ்ஸிதோதி அதீதத்³தா⁴தி³பே⁴த³ங் புப்³ப³ந்தமனிஸ்ஸிதோ. வேமஜ்ஜே²னுபஸங்கெ²ய்யோதி பச்சுப்பன்னேபி அத்³த⁴னி ‘‘ரத்தோ’’திஆதி³னா நயேன ந உபஸங்கா²தப்³போ³. தஸ்ஸ நத்தி² புரக்க²தந்தி தஸ்ஸ அரஹதோ த்³வின்னங் புரெக்கா²ரானங் அபா⁴வா அனாக³தே அத்³த⁴னி புரக்க²தம்பி நத்தி², தங் ப்³ரூமி உபஸந்தோதி ஏவமெத்த² யோஜனா வேதி³தப்³பா³. ஏஸ நயோ ஸப்³ப³த்த². இதோ பரங் பன யோஜனங் அத³ஸ்ஸெத்வா அனுத்தானபத³வண்ணனங்யேவ கரிஸ்ஸாம.
Anupadavaṇṇanānayena ca – vītataṇho purā bhedāti yo sarīrabhedā pubbameva pahīnataṇho. Pubbamantamanissitoti atītaddhādibhedaṃ pubbantamanissito. Vemajjhenupasaṅkheyyoti paccuppannepi addhani ‘‘ratto’’tiādinā nayena na upasaṅkhātabbo. Tassa natthi purakkhatanti tassa arahato dvinnaṃ purekkhārānaṃ abhāvā anāgate addhani purakkhatampi natthi, taṃ brūmi upasantoti evamettha yojanā veditabbā. Esa nayo sabbattha. Ito paraṃ pana yojanaṃ adassetvā anuttānapadavaṇṇanaṃyeva karissāma.
857. அஸந்தாஸீதி தேன தேன அலாப⁴கேன அஸந்தஸந்தோ. அவிகத்தீ²தி ஸீலாதீ³ஹி அவிகத்த²னஸீலோ . அகுக்குசோதி ஹத்த²குக்குசாதி³விரஹிதோ . மந்தபா⁴ணீதி மந்தாய பரிக்³க³ஹெத்வா வாசங் பா⁴ஸிதா. அனுத்³த⁴தோதி உத்³த⁴ச்சவிரஹிதோ. ஸ வே வாசாயதோதி ஸோ வாசாய யதோ ஸங்யதோ சதுதோ³ஸவிரஹிதங் வாசங் பா⁴ஸிதா ஹோதி.
857.Asantāsīti tena tena alābhakena asantasanto. Avikatthīti sīlādīhi avikatthanasīlo . Akukkucoti hatthakukkucādivirahito . Mantabhāṇīti mantāya pariggahetvā vācaṃ bhāsitā. Anuddhatoti uddhaccavirahito. Sa ve vācāyatoti so vācāya yato saṃyato catudosavirahitaṃ vācaṃ bhāsitā hoti.
858. நிராஸத்தீதி நித்தண்ஹோ. விவேகத³ஸ்ஸீ ப²ஸ்ஸேஸூதி பச்சுப்பன்னேஸு சக்கு²ஸம்ப²ஸ்ஸாதீ³ஸு அத்தாதி³பா⁴வவிவேகங் பஸ்ஸதி. தி³ட்டீ²ஸு ச ந நீயதீதி த்³வாஸட்டி²தி³ட்டீ²ஸு காயசி தி³ட்டி²யா ந நீயதி.
858.Nirāsattīti nittaṇho. Vivekadassī phassesūti paccuppannesu cakkhusamphassādīsu attādibhāvavivekaṃ passati. Diṭṭhīsu ca na nīyatīti dvāsaṭṭhidiṭṭhīsu kāyaci diṭṭhiyā na nīyati.
859. பதிலீனோதி ராகா³தீ³னங் பஹீனத்தா ததோ அபக³தோ. அகுஹகோதி அவிம்ஹாபகோ தீஹி குஹனவத்தூ²ஹி. அபிஹாலூதி அபிஹனஸீலோ, பத்த²னாதண்ஹாய ரஹிதோதி வுத்தங் ஹோதி. அமச்ச²ரீதி பஞ்சமச்சே²ரவிரஹிதோ. அப்பக³ப்³போ⁴தி காயபாக³ப்³பி⁴யாதி³விரஹிதோ. அஜேகு³ச்சோ²தி ஸம்பன்னஸீலாதி³தாய அஜேகு³ச்ச²னீயோ அஸேசனகோ மனாபோ. பேஸுணெய்யே ச நோ யுதோதி த்³வீஹி ஆகாரேஹி உபஸங்ஹரிதப்³பே³ பிஸுணகம்மே அயுத்தோ.
859.Patilīnoti rāgādīnaṃ pahīnattā tato apagato. Akuhakoti avimhāpako tīhi kuhanavatthūhi. Apihālūti apihanasīlo, patthanātaṇhāya rahitoti vuttaṃ hoti. Amaccharīti pañcamaccheravirahito. Appagabbhoti kāyapāgabbhiyādivirahito. Ajegucchoti sampannasīlāditāya ajegucchanīyo asecanako manāpo. Pesuṇeyye ca no yutoti dvīhi ākārehi upasaṃharitabbe pisuṇakamme ayutto.
860. ஸாதியேஸு அனஸ்ஸாவீதி ஸாதவத்தூ²ஸு காமகு³ணேஸு தண்ஹாஸந்த²வவிரஹிதோ. ஸண்ஹோதி ஸண்ஹேஹி காயகம்மாதீ³ஹி ஸமன்னாக³தோ. படிபா⁴னவாதி பரியத்திபரிபுச்சா²தி⁴க³மபடிபா⁴னேஹி ஸமன்னாக³தோ. ந ஸத்³தோ⁴தி ஸாமங் அதி⁴க³தத⁴ம்மங் ந கஸ்ஸசி ஸத்³த³ஹதி. ந விரஜ்ஜதீதி க²யா ராக³ஸ்ஸ விரத்தத்தா இதா³னி ந விரஜ்ஜதி.
860.Sātiyesu anassāvīti sātavatthūsu kāmaguṇesu taṇhāsanthavavirahito. Saṇhoti saṇhehi kāyakammādīhi samannāgato. Paṭibhānavāti pariyattiparipucchādhigamapaṭibhānehi samannāgato. Na saddhoti sāmaṃ adhigatadhammaṃ na kassaci saddahati. Na virajjatīti khayā rāgassa virattattā idāni na virajjati.
861. லாப⁴கம்யா ந ஸிக்க²தீதி ந லாப⁴பத்த²னாய ஸுத்தந்தாதீ³னி ஸிக்க²தி. அவிருத்³தோ⁴ ச தண்ஹாய, ரஸேஸு நானுகி³ஜ்ஜ²தீதி விரோதா⁴பா⁴வேன ச அவிருத்³தோ⁴ ஹுத்வா தண்ஹாய மூலரஸாதீ³ஸு கே³த⁴ங் நாபஜ்ஜதி.
861.Lābhakamyā na sikkhatīti na lābhapatthanāya suttantādīni sikkhati. Aviruddho ca taṇhāya, rasesu nānugijjhatīti virodhābhāvena ca aviruddho hutvā taṇhāya mūlarasādīsu gedhaṃ nāpajjati.
862. உபெக்க²கோதி ச²ளங்கு³பெக்கா²ய ஸமன்னாக³தோ. ஸதோதி காயானுபஸ்ஸனாதி³ஸதியுத்தோ.
862.Upekkhakoti chaḷaṅgupekkhāya samannāgato. Satoti kāyānupassanādisatiyutto.
863. நிஸ்ஸயனாதி தண்ஹாதி³ட்டி²னிஸ்ஸயா. ஞத்வா த⁴ம்மந்தி அனிச்சாதீ³ஹி ஆகாரேஹி த⁴ம்மங் ஜானித்வா. அனிஸ்ஸிதோதி ஏவங் தேஹி நிஸ்ஸயேஹி அனிஸ்ஸிதோ. தேன அஞ்ஞத்ர த⁴ம்மஞாணா நத்தி² நிஸ்ஸயானங் அபா⁴வோதி தீ³பேதி ப⁴வாய விப⁴வாய வாதி ஸஸ்ஸதாய உச்சே²தா³ய வா.
863.Nissayanāti taṇhādiṭṭhinissayā. Ñatvā dhammanti aniccādīhi ākārehi dhammaṃ jānitvā. Anissitoti evaṃ tehi nissayehi anissito. Tena aññatra dhammañāṇā natthi nissayānaṃ abhāvoti dīpeti bhavāya vibhavāya vāti sassatāya ucchedāya vā.
864. தங் ப்³ரூமி உபஸந்தோதி தங் ஏவரூபங் ஏகேககா³தா²ய வுத்தங் உபஸந்தோதி கதே²மி. அதரீ ஸோ விஸத்திகந்தி ஸோ இமங் விஸதாதி³பா⁴வேன விஸத்திகாஸங்கா²தங் மஹாதண்ஹங் அதரி.
864.Taṃbrūmi upasantoti taṃ evarūpaṃ ekekagāthāya vuttaṃ upasantoti kathemi. Atarī so visattikanti so imaṃ visatādibhāvena visattikāsaṅkhātaṃ mahātaṇhaṃ atari.
865. இதா³னி தமேவ உபஸந்தங் பஸங்ஸந்தோ ஆஹ ‘‘ந தஸ்ஸ புத்தா’’தி ஏவமாதி³. தத்த² புத்தா அத்ரஜாத³யோ சத்தாரோ. எத்த² ச புத்தபரிக்³க³ஹாத³யோ புத்தாதி³னாமேன வுத்தாதி வேதி³தப்³பா³. தே ஹிஸ்ஸ ந விஜ்ஜந்தி, தேஸங் வா அபா⁴வேன புத்தாத³யோ ந விஜ்ஜந்தீதி.
865. Idāni tameva upasantaṃ pasaṃsanto āha ‘‘na tassa puttā’’ti evamādi. Tattha puttā atrajādayo cattāro. Ettha ca puttapariggahādayo puttādināmena vuttāti veditabbā. Te hissa na vijjanti, tesaṃ vā abhāvena puttādayo na vijjantīti.
866. யேன நங் வஜ்ஜுங் புது²ஜ்ஜனா, அதோ² ஸமணப்³ராஹ்மணாதி யேன தங் ராகா³தி³னா வஜ்ஜேன புது²ஜ்ஜனா ஸப்³பே³பி தே³வமனுஸ்ஸா இதோ ப³ஹித்³தா⁴ ஸமணப்³ராஹ்மணா ச ரத்தோ வா து³ட்டோ² வாதி, வதெ³ய்யுங். தங் தஸ்ஸ அபுரக்க²தந்தி தங் ராகா³தி³வஜ்ஜங் தஸ்ஸ அரஹதோ அபுரக்க²தங் தஸ்மா வாதே³ஸு நேஜதீதி தங் காரணா நிந்தா³வசனேஸு ந கம்பதி.
866.Yena naṃ vajjuṃ puthujjanā, atho samaṇabrāhmaṇāti yena taṃ rāgādinā vajjena puthujjanā sabbepi devamanussā ito bahiddhā samaṇabrāhmaṇā ca ratto vā duṭṭho vāti, vadeyyuṃ. Taṃ tassa apurakkhatanti taṃ rāgādivajjaṃ tassa arahato apurakkhataṃ tasmā vādesu nejatīti taṃ kāraṇā nindāvacanesu na kampati.
867. ந உஸ்ஸேஸு வத³தேதி விஸிட்டே²ஸு அத்தானங் அந்தோகத்வா ‘‘அஹங் விஸிட்டோ²’’தி அதிமானவஸேன ந வத³தி. ஏஸ நயோ இதரேஸு த்³வீஸு. கப்பங் நேதி அகப்பியோதி ஸோ ஏவரூபோ து³வித⁴ம்பி கப்பங் ந ஏதி. கஸ்மா? யஸ்மா அகப்பியோ, பஹீனகப்போதி வுத்தங் ஹோதி.
867.Na ussesu vadateti visiṭṭhesu attānaṃ antokatvā ‘‘ahaṃ visiṭṭho’’ti atimānavasena na vadati. Esa nayo itaresu dvīsu. Kappaṃ neti akappiyoti so evarūpo duvidhampi kappaṃ na eti. Kasmā? Yasmā akappiyo, pahīnakappoti vuttaṃ hoti.
868. ஸகந்தி மய்ஹந்தி பரிக்³க³ஹிதங். அஸதா ச ந ஸோசதீதி அவிஜ்ஜமானாதி³னா அஸதா ச ந ஸோசதி. த⁴ம்மேஸு ச ந க³ச்ச²தீதி ஸப்³பே³ஸு த⁴ம்மேஸு ச²ந்தா³தி³வஸேன ந க³ச்ச²தி. ஸ வே ஸந்தோதி வுச்சதீதி ஸோ ஏவரூபோ நருத்தமோ ‘‘ஸந்தோ’’தி வுச்சதீதி அரஹத்தனிகூடேன தே³ஸனங் நிட்டா²பேஸி. தே³ஸனாபரியோஸானே கோடிஸதஸஹஸ்ஸதே³வதானங் அரஹத்தப்பத்தி அஹோஸி, ஸோதாபன்னாதீ³னங் க³ணனா நத்தீ²தி.
868.Sakanti mayhanti pariggahitaṃ. Asatā ca na socatīti avijjamānādinā asatā ca na socati. Dhammesu ca na gacchatīti sabbesu dhammesu chandādivasena na gacchati. Sa ve santoti vuccatīti so evarūpo naruttamo ‘‘santo’’ti vuccatīti arahattanikūṭena desanaṃ niṭṭhāpesi. Desanāpariyosāne koṭisatasahassadevatānaṃ arahattappatti ahosi, sotāpannādīnaṃ gaṇanā natthīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய புராபே⁴த³ஸுத்தவண்ணனா நிட்டி²தா.
Suttanipāta-aṭṭhakathāya purābhedasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 10. புராபே⁴த³ஸுத்தங் • 10. Purābhedasuttaṃ
