Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၄. ပုရာဏစီဝရသိက္ခာပဒံ
4. Purāṇacīvarasikkhāpadaṃ
၅၀၃. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အာယသ္မတော ဥဒာယိသ္သ ပုရာဏဒုတိယိကာ ဘိက္ခုနီသု ပဗ္ဗဇိတာ ဟောတိ။ သာ အာယသ္မတော ဥဒာယိသ္သ သန္တိကေ အဘိက္ခဏံ အာဂစ္ဆတိ။ အာယသ္မာပိ ဥဒာယီ တသ္သာ ဘိက္ခုနိယာ သန္တိကေ အဘိက္ခဏံ ဂစ္ဆတိ။ တေန ခော ပန သမယေန အာယသ္မာ ဥဒာယီ တသ္သာ ဘိက္ခုနိယာ သန္တိကေ ဘတ္တဝိသ္သဂ္ဂံ ကရောတိ။ အထ ခော အာယသ္မာ ဥဒာယီ ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ ယေန သာ ဘိက္ခုနီ တေနုပသင္ကမိ; ဥပသင္ကမိတ္ဝာ တသ္သာ ဘိက္ခုနိယာ ပုရတော အင္ဂဇာတံ ဝိဝရိတ္ဝာ အာသနေ နိသီဒိ။ သာပိ ခော ဘိက္ခုနီ အာယသ္မတော ဥဒာယိသ္သ ပုရတော အင္ဂဇာတံ ဝိဝရိတ္ဝာ အာသနေ နိသီဒိ။ အထ ခော အာယသ္မာ ဥဒာယီ သာရတ္တော တသ္သာ ဘိက္ခုနိယာ အင္ဂဇာတံ ဥပနိဇ္ဈာယိ။ တသ္သ အသုစိ မုစ္စိ။ အထ ခော အာယသ္မာ ဥဒာယီ တံ ဘိက္ခုနိံ ဧတဒဝောစ – ‘‘ဂစ္ဆ, ဘဂိနိ, ဥဒကံ အာဟရ, အန္တရဝာသကံ ဓောဝိသ္သာမီ’’တိ။ ‘‘အာဟရယ္ယ , အဟမေဝ ဓောဝိသ္သာမီ’’တိ တံ အသုစိံ ဧကဒေသံ မုခေန အဂ္ဂဟေသိ ဧကဒေသံ အင္ဂဇာတေ ပက္ခိပိ။ သာ တေန ဂဗ္ဘံ ဂဏ္ဟိ။ ဘိက္ခုနိယော ဧဝမာဟံသု – ‘‘အဗ္ရဟ္မစာရိနီ အယံ ဘိက္ခုနီ, ဂဗ္ဘိနီ’’တိ။ ‘‘နာဟံ, အယ္ယေ, အဗ္ရဟ္မစာရိနီ’’တိ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယော ဥဒာယီ ဘိက္ခုနိယာ ပုရာဏစီဝရံ ဓောဝာပေသ္သတီ’’တိ! အထ ခော တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ ဥဒာယီ ဘိက္ခုနိယာ ပုရာဏစီဝရံ ဓောဝာပေသ္သတီ’’တိ! အထ ခော တေ ဘိက္ခူ အာယသ္မန္တံ ဥဒာယိံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, ဥဒာယိ, ဘိက္ခုနိယာ ပုရာဏစီဝရံ ဓောဝာပေသီ’’တိ? ‘‘သစ္စံ, ဘဂဝာ’’တိ။ ‘‘ဉာတိကာ တေ, ဥဒာယိ, အညာတိကာ’’တိ? ‘‘အညာတိကာ, ဘဂဝာ’’တိ။ ‘‘အညာတကော, မောဃပုရိသ, အညာတိကာယ န ဇာနာတိ ပတိရူပံ ဝာ အပ္ပတိရူပံ ဝာ ပာသာဒိကံ ဝာ အပာသာဒိကံ ဝာ။ တတ္ထ နာမ တ္ဝံ, မောဃပုရိသ, အညာတိကာယ ဘိက္ခုနိယာ ပုရာဏစီဝရံ ဓောဝာပေသ္သသိ! နေတံ, မောဃပုရိသ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
503. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmato udāyissa purāṇadutiyikā bhikkhunīsu pabbajitā hoti. Sā āyasmato udāyissa santike abhikkhaṇaṃ āgacchati. Āyasmāpi udāyī tassā bhikkhuniyā santike abhikkhaṇaṃ gacchati. Tena kho pana samayena āyasmā udāyī tassā bhikkhuniyā santike bhattavissaggaṃ karoti. Atha kho āyasmā udāyī pubbaṇhasamayaṃ nivāsetvā pattacīvaramādāya yena sā bhikkhunī tenupasaṅkami; upasaṅkamitvā tassā bhikkhuniyā purato aṅgajātaṃ vivaritvā āsane nisīdi. Sāpi kho bhikkhunī āyasmato udāyissa purato aṅgajātaṃ vivaritvā āsane nisīdi. Atha kho āyasmā udāyī sāratto tassā bhikkhuniyā aṅgajātaṃ upanijjhāyi. Tassa asuci mucci. Atha kho āyasmā udāyī taṃ bhikkhuniṃ etadavoca – ‘‘gaccha, bhagini, udakaṃ āhara, antaravāsakaṃ dhovissāmī’’ti. ‘‘Āharayya , ahameva dhovissāmī’’ti taṃ asuciṃ ekadesaṃ mukhena aggahesi ekadesaṃ aṅgajāte pakkhipi. Sā tena gabbhaṃ gaṇhi. Bhikkhuniyo evamāhaṃsu – ‘‘abrahmacārinī ayaṃ bhikkhunī, gabbhinī’’ti. ‘‘Nāhaṃ, ayye, abrahmacārinī’’ti bhikkhunīnaṃ etamatthaṃ ārocesi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī bhikkhuniyā purāṇacīvaraṃ dhovāpessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī bhikkhuniyā purāṇacīvaraṃ dhovāpessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, bhikkhuniyā purāṇacīvaraṃ dhovāpesī’’ti? ‘‘Saccaṃ, bhagavā’’ti. ‘‘Ñātikā te, udāyi, aññātikā’’ti? ‘‘Aññātikā, bhagavā’’ti. ‘‘Aññātako, moghapurisa, aññātikāya na jānāti patirūpaṃ vā appatirūpaṃ vā pāsādikaṃ vā apāsādikaṃ vā. Tattha nāma tvaṃ, moghapurisa, aññātikāya bhikkhuniyā purāṇacīvaraṃ dhovāpessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၅၀၄. ‘‘ယော ပန ဘိက္ခု အညာတိကာယ ဘိက္ခုနိယာ ပုရာဏစီဝရံ ဓောဝာပေယ္ယ ဝာ ရဇာပေယ္ယ ဝာ အာကောဋာပေယ္ယ ဝာ, နိသ္သဂ္ဂိယံ ပာစိတ္တိယ’’န္တိ။
504.‘‘Yopana bhikkhu aññātikāya bhikkhuniyā purāṇacīvaraṃ dhovāpeyya vā rajāpeyya vā ākoṭāpeyya vā, nissaggiyaṃ pācittiya’’nti.
၅၀၅. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။
505.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
အညာတိကာ နာမ မာတိတော ဝာ ပိတိတော ဝာ ယာဝ သတ္တမာ ပိတာမဟယုဂာ အသမ္ဗဒ္ဓာ။
Aññātikā nāma mātito vā pitito vā yāva sattamā pitāmahayugā asambaddhā.
ဘိက္ခုနီ နာမ ဥဘတောသင္ဃေ ဥပသမ္ပန္နာ။
Bhikkhunī nāma ubhatosaṅghe upasampannā.
ပုရာဏစီဝရံ နာမ သကိံ နိဝတ္ထမ္ပိ သကိံ ပာရုတမ္ပိ။
Purāṇacīvaraṃ nāma sakiṃ nivatthampi sakiṃ pārutampi.
ဓောဝာတိ အာဏာပေတိ, အာပတ္တိ ဒုက္ကဋသ္သ။ ဓောတံ နိသ္သဂ္ဂိယံ ဟောတိ။ ရဇာတိ အာဏာပေတိ, အာပတ္တိ ဒုက္ကဋသ္သ။ ရတ္တံ နိသ္သဂ္ဂိယံ ဟောတိ။ အာကောဋေဟီတိ အာဏာပေတိ, အာပတ္တိ ဒုက္ကဋသ္သ။ သကိံ ပာဏိပ္ပဟာရံ ဝာ မုဂ္ဂရပ္ပဟာရံ ဝာ ဒိန္နေ နိသ္သဂ္ဂိယံ ဟောတိ။ နိသ္သဇ္ဇိတဗ္ဗံ သင္ဃသ္သ ဝာ ဂဏသ္သ ဝာ ပုဂ္ဂလသ္သ ဝာ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗံ။ပေ.။ ဣဒံ မေ, ဘန္တေ, ပုရာဏစီဝရံ အညာတိကာယ ဘိက္ခုနိယာ ဓောဝာပိတံ နိသ္သဂ္ဂိယံ။ ဣမာဟံ သင္ဃသ္သ နိသ္သဇ္ဇာမီတိ။ပေ.။ ဒဒေယ္ယာတိ။ပေ.။ ဒဒေယ္ယုန္တိ။ပေ.။ အာယသ္မတော ဒမ္မီတိ။
Dhovāti āṇāpeti, āpatti dukkaṭassa. Dhotaṃ nissaggiyaṃ hoti. Rajāti āṇāpeti, āpatti dukkaṭassa. Rattaṃ nissaggiyaṃ hoti. Ākoṭehīti āṇāpeti, āpatti dukkaṭassa. Sakiṃ pāṇippahāraṃ vā muggarappahāraṃ vā dinne nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, purāṇacīvaraṃ aññātikāya bhikkhuniyā dhovāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
၅၀၆. အညာတိကာယ အညာတိကသညီ ပုရာဏစီဝရံ ဓောဝာပေတိ, နိသ္သဂ္ဂိယံ ပာစိတ္တိယံ။ အညာတိကာယ အညာတိကသညီ ပုရာဏစီဝရံ ဓောဝာပေတိ ရဇာပေတိ, နိသ္သဂ္ဂိယေန အာပတ္တိ ဒုက္ကဋသ္သ။ အညာတိကာယ အညာတိကသညီ ပုရာဏစီဝရံ ဓောဝာပေတိ အာကောဋာပေတိ, နိသ္သဂ္ဂိယေန အာပတ္တိ ဒုက္ကဋသ္သ။ အညာတိကာယ အညာတိကသညီ ပုရာဏစီဝရံ ဓောဝာပေတိ ရဇာပေတိ အာကောဋာပေတိ, နိသ္သဂ္ဂိယေန အာပတ္တိ ဒ္ဝိန္နံ ဒုက္ကဋာနံ။
506. Aññātikāya aññātikasaññī purāṇacīvaraṃ dhovāpeti, nissaggiyaṃ pācittiyaṃ. Aññātikāya aññātikasaññī purāṇacīvaraṃ dhovāpeti rajāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ dhovāpeti ākoṭāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ dhovāpeti rajāpeti ākoṭāpeti, nissaggiyena āpatti dvinnaṃ dukkaṭānaṃ.
အညာတိကာယ အညာတိကသညီ ပုရာဏစီဝရံ ရဇာပေတိ, နိသ္သဂ္ဂိယံ ပာစိတ္တိယံ။ အညာတိကာယ အညာတိကသညီ ပုရာဏစီဝရံ ရဇာပေတိ အာကောဋာပေတိ, နိသ္သဂ္ဂိယေန အာပတ္တိ ဒုက္ကဋသ္သ။ အညာတိကာယ အညာတိကသညီ ပုရာဏစီဝရံ ရဇာပေတိ ဓောဝာပေတိ, နိသ္သဂ္ဂိယေန အာပတ္တိ ဒုက္ကဋသ္သ။ အညာတိကာယ အညာတိကသညီ ပုရာဏစီဝရံ ရဇာပေတိ အာကောဋာပေတိ ဓောဝာပေတိ, နိသ္သဂ္ဂိယေန အာပတ္တိ ဒ္ဝိန္နံ ဒုက္ကဋာနံ။
Aññātikāya aññātikasaññī purāṇacīvaraṃ rajāpeti, nissaggiyaṃ pācittiyaṃ. Aññātikāya aññātikasaññī purāṇacīvaraṃ rajāpeti ākoṭāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ rajāpeti dhovāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ rajāpeti ākoṭāpeti dhovāpeti, nissaggiyena āpatti dvinnaṃ dukkaṭānaṃ.
အညာတိကာယ အညာတိကသညီ ပုရာဏစီဝရံ အာကောဋာပေတိ, နိသ္သဂ္ဂိယံ ပာစိတ္တိယံ။ အညာတိကာယ အညာတိကသညီ ပုရာဏစီဝရံ အာကောဋာပေတိ ဓောဝာပေတိ, နိသ္သဂ္ဂိယေန အာပတ္တိ ဒုက္ကဋသ္သ။ အညာတိကာယ အညာတိကသညီ ပုရာဏစီဝရံ အာကောဋာပေတိ ရဇာပေတိ, နိသ္သဂ္ဂိယေန အာပတ္တိ ဒုက္ကဋသ္သ။ အညာတိကာယ အညာတိကသညီ ပုရာဏစီဝရံ အာကောဋာပေတိ ဓောဝာပေတိ ရဇာပေတိ, နိသ္သဂ္ဂိယေန အာပတ္တိ ဒ္ဝိန္နံ ဒုက္ကဋာနံ။
Aññātikāya aññātikasaññī purāṇacīvaraṃ ākoṭāpeti, nissaggiyaṃ pācittiyaṃ. Aññātikāya aññātikasaññī purāṇacīvaraṃ ākoṭāpeti dhovāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ ākoṭāpeti rajāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ ākoṭāpeti dhovāpeti rajāpeti, nissaggiyena āpatti dvinnaṃ dukkaṭānaṃ.
အညာတိကာယ ဝေမတိကော။ပေ.။ အညာတိကာယ ဉာတိကသညီ။ပေ.။ အညသ္သ ပုရာဏစီဝရံ ဓောဝာပေတိ, အာပတ္တိ ဒုက္ကဋသ္သ။ နိသီဒနပစ္စတ္ထရဏံ ဓောဝာပေတိ, အာပတ္တိ ဒုက္ကဋသ္သ။ ဧကတောဥပသမ္ပန္နာယ ဓောဝာပေတိ, အာပတ္တိ ဒုက္ကဋသ္သ။ ဉာတိကာယ အညာတိကသညီ, အာပတ္တိ ဒုက္ကဋသ္သ ။ ဉာတိကာယ ဝေမတိကော, အာပတ္တိ ဒုက္ကဋသ္သ။ ဉာတိကာယ ဉာတိကသညီ, အနာပတ္တိ။
Aññātikāya vematiko…pe… aññātikāya ñātikasaññī…pe… aññassa purāṇacīvaraṃ dhovāpeti, āpatti dukkaṭassa. Nisīdanapaccattharaṇaṃ dhovāpeti, āpatti dukkaṭassa. Ekatoupasampannāya dhovāpeti, āpatti dukkaṭassa. Ñātikāya aññātikasaññī, āpatti dukkaṭassa . Ñātikāya vematiko, āpatti dukkaṭassa. Ñātikāya ñātikasaññī, anāpatti.
၅၀၇. အနာပတ္တိ ဉာတိကာယ ဓောဝန္တိယာ အညာတိကာ ဒုတိယာ ဟောတိ, အဝုတ္တာ ဓောဝတိ, အပရိဘုတ္တံ ဓောဝာပေတိ, စီဝရံ ဌပေတ္ဝာ အညံ ပရိက္ခာရံ ဓောဝာပေတိ, သိက္ခမာနာယ, သာမဏေရိယာ, ဥမ္မတ္တကသ္သ, အာဒိကမ္မိကသ္သာတိ။
507. Anāpatti ñātikāya dhovantiyā aññātikā dutiyā hoti, avuttā dhovati, aparibhuttaṃ dhovāpeti, cīvaraṃ ṭhapetvā aññaṃ parikkhāraṃ dhovāpeti, sikkhamānāya, sāmaṇeriyā, ummattakassa, ādikammikassāti.
ပုရာဏစီဝရသိက္ခာပဒံ နိဋ္ဌိတံ စတုတ္ထံ။
Purāṇacīvarasikkhāpadaṃ niṭṭhitaṃ catutthaṃ.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā