| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. புத்தஸுத்தவண்ணனா
7. Puttasuttavaṇṇanā
87. ஸத்தமே ஸமணமசலோதி ஸமணஅசலோ, மகாரோ பத³ஸந்தி⁴கரோ, நிச்சலஸமணோதி அத்தோ². இமினா ஸத்தவித⁴ம்பி ஸேக²ங் த³ஸ்ஸேதி. ஸோ ஹி ஸாஸனே மூலஜாதாய ஸத்³தா⁴ய பதிட்டி²தத்தா அசலோ நாம. ஸமணபுண்ட³ரீகோதி புண்ட³ரீகஸதி³ஸோ ஸமணோ. புண்ட³ரீகங் நாம ஊனஸதபத்தங் ஸரோருஹங். இமினா ஸுக்க²விபஸ்ஸககீ²ணாஸவங் த³ஸ்ஸேதி. ஸோ ஹி ஜா²னாபி⁴ஞ்ஞானங் அபா⁴வேன அபரிபுண்ணகு³ணத்தா ஸமணபுண்ட³ரீகோ நாம ஹோதி. ஸமணபது³மோதி பது³மஸதி³ஸோ ஸமணோ. பது³மங் நாம பரிபுண்ணஸதபத்தங் ஸரோருஹங். இமினா உப⁴தோபா⁴க³விமுத்தங் கீ²ணாஸவங் த³ஸ்ஸேதி. ஸோ ஹி ஜா²னாபி⁴ஞ்ஞானங் பா⁴வேன பரிபுண்ணகு³ணத்தா ஸமணபது³மோ நாம ஹோதி . ஸமணேஸு ஸமணஸுகு²மாலோதி ஸப்³பே³ஸுபி ஏதேஸு ஸமணேஸு ஸுகு²மாலஸமணோ முது³சித்தஸரீரோ காயிகசேதஸிகது³க்க²ரஹிதோ ஏகந்தஸுகீ². ஏதேன அத்தானஞ்சேவ அத்தஸதி³ஸே ச த³ஸ்ஸேதி.
87. Sattame samaṇamacaloti samaṇaacalo, makāro padasandhikaro, niccalasamaṇoti attho. Iminā sattavidhampi sekhaṃ dasseti. So hi sāsane mūlajātāya saddhāya patiṭṭhitattā acalo nāma. Samaṇapuṇḍarīkoti puṇḍarīkasadiso samaṇo. Puṇḍarīkaṃ nāma ūnasatapattaṃ saroruhaṃ. Iminā sukkhavipassakakhīṇāsavaṃ dasseti. So hi jhānābhiññānaṃ abhāvena aparipuṇṇaguṇattā samaṇapuṇḍarīko nāma hoti. Samaṇapadumoti padumasadiso samaṇo. Padumaṃ nāma paripuṇṇasatapattaṃ saroruhaṃ. Iminā ubhatobhāgavimuttaṃ khīṇāsavaṃ dasseti. So hi jhānābhiññānaṃ bhāvena paripuṇṇaguṇattā samaṇapadumo nāma hoti . Samaṇesu samaṇasukhumāloti sabbesupi etesu samaṇesu sukhumālasamaṇo muducittasarīro kāyikacetasikadukkharahito ekantasukhī. Etena attānañceva attasadise ca dasseti.
ஏவங் மாதிகங் நிக்கி²பித்வா இதா³னி படிபாடியா விப⁴ஜந்தோ கத²ஞ்ச, பி⁴க்க²வேதிஆதி³மாஹ. தத்த² ஸேகோ²தி ஸத்தவிதோ⁴பி ஸேகோ². பாடிபதோ³தி படிபன்னகோ. அனுத்தரங் யோக³க்கே²மங் பத்த²யமானோ விஹரதீதி அரஹத்தங் பத்த²யந்தோ விஹரதி. முத்³தா⁴வஸித்தஸ்ஸாதி முத்³த⁴னி அவஸித்தஸ்ஸ, கதாபி⁴ஸேகஸ்ஸாதி அத்தோ². ஆபி⁴ஸேகோதி அபி⁴ஸேகங் காதுங் யுத்தோ. அனபி⁴ஸித்தோதி ந தாவ அபி⁴ஸித்தோ. மசலப்பத்தோதி ரஞ்ஞோ க²த்தியஸ்ஸ முத்³தா⁴வஸித்தஸ்ஸ புத்தபா⁴வேன சேவ புத்தேஸு ஜெட்ட²கபா⁴வேன ச ந தாவ அபி⁴ஸித்தபா⁴வேன ச அபி⁴ஸேகப்பத்திஅத்தா²ய அசலப்பத்தோ நிச்சலபத்தோ. மகாரோ நிபாதமத்தங். காயேன பு²ஸித்வாதி நாமகாயேன பு²ஸித்வா.
Evaṃ mātikaṃ nikkhipitvā idāni paṭipāṭiyā vibhajanto kathañca, bhikkhavetiādimāha. Tattha sekhoti sattavidhopi sekho. Pāṭipadoti paṭipannako. Anuttaraṃ yogakkhemaṃ patthayamāno viharatīti arahattaṃ patthayanto viharati. Muddhāvasittassāti muddhani avasittassa, katābhisekassāti attho. Ābhisekoti abhisekaṃ kātuṃ yutto. Anabhisittoti na tāva abhisitto. Macalappattoti rañño khattiyassa muddhāvasittassa puttabhāvena ceva puttesu jeṭṭhakabhāvena ca na tāva abhisittabhāvena ca abhisekappattiatthāya acalappatto niccalapatto. Makāro nipātamattaṃ. Kāyena phusitvāti nāmakāyena phusitvā.
யாசிதோவ ப³ஹுலங் சீவரங் பரிபு⁴ஞ்ஜதீதி ‘‘இத³ங், ப⁴ந்தே, பரிபு⁴ஞ்ஜதா²’’தி ஏவங் தா³யகேஹி யாசமானேஹேவ உபனீதங் சீவரங் ப³ஹுங் பரிபு⁴ஞ்ஜதி, கிஞ்சிதே³வ அயாசிதங், பா³குலத்தே²ரோ விய. பிண்ட³பாதங் க²தி³ரவனமக்³கே³ ஸீவலித்தே²ரோ விய. ஸேனாஸனங் அட்ட²கனாக³ரஸுத்தே (ம॰ நி॰ 2.17 ஆத³யோ; அ॰ நி॰ 11.16 ஆத³யோ) ஆனந்த³த்தே²ரோ விய. கி³லானபச்சயங் பிலிந்த³வச்ச²தே²ரோ விய. த்யஸ்ஸாதி தே அஸ்ஸ. மனாபேனேவாதி மனங் அல்லீயனகேன. ஸமுதா³சரந்தீதி கத்தப்³ப³கிச்சானி கரொந்தி பவத்தந்தி வா. உபஹாரங் உபஹரந்தீதி காயிகசேதஸிகஉபஹாரங் உபஹரந்தி உபனீயந்தி. ஸன்னிபாதிகானீதி திண்ணம்பி ஸன்னிபாதேன நிப்³ப³த்தானி. உதுபரிணாமஜானீதி உதுபரிணாமதோ அதிஸீதஅதிஉண்ஹஉதுதோ ஜாதானி. விஸமபரிஹாரஜானீதி அச்சாஸனஅதிட்டா²னாதி³கா விஸமபரிஹாரதோ ஜாதானி. ஓபக்கமிகானீதி வத⁴ப³ந்த⁴னாதி³உபக்கமேன நிப்³ப³த்தானி. கம்மவிபாகஜானீதி வினாபி இமேஹி காரணேஹி கேவலங் புப்³பே³ கதகம்மவிபாகவஸேனேவ ஜாதானி. சதுன்னங் ஜா²னானந்தி எத்த² கீ²ணாஸவானம்பி பு³த்³தா⁴னம்பி கிரியஜ்ஜா²னானேவ அதி⁴ப்பேதானி. ஸேஸங் உத்தானத்த²மேவாதி.
Yācitova bahulaṃ cīvaraṃ paribhuñjatīti ‘‘idaṃ, bhante, paribhuñjathā’’ti evaṃ dāyakehi yācamāneheva upanītaṃ cīvaraṃ bahuṃ paribhuñjati, kiñcideva ayācitaṃ, bākulatthero viya. Piṇḍapātaṃ khadiravanamagge sīvalitthero viya. Senāsanaṃ aṭṭhakanāgarasutte (ma. ni. 2.17 ādayo; a. ni. 11.16 ādayo) ānandatthero viya. Gilānapaccayaṃ pilindavacchathero viya. Tyassāti te assa. Manāpenevāti manaṃ allīyanakena. Samudācarantīti kattabbakiccāni karonti pavattanti vā. Upahāraṃ upaharantīti kāyikacetasikaupahāraṃ upaharanti upanīyanti. Sannipātikānīti tiṇṇampi sannipātena nibbattāni. Utupariṇāmajānīti utupariṇāmato atisītaatiuṇhaututo jātāni. Visamaparihārajānīti accāsanaatiṭṭhānādikā visamaparihārato jātāni. Opakkamikānīti vadhabandhanādiupakkamena nibbattāni. Kammavipākajānīti vināpi imehi kāraṇehi kevalaṃ pubbe katakammavipākavaseneva jātāni. Catunnaṃ jhānānanti ettha khīṇāsavānampi buddhānampi kiriyajjhānāneva adhippetāni. Sesaṃ uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. புத்தஸுத்தங் • 7. Puttasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. புத்தஸுத்தவண்ணனா • 7. Puttasuttavaṇṇanā
