| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. ရာဓအနိစ္စသုတ္တံ
3. Rādhaaniccasuttaṃ
၇၆. အထ ခော အာယသ္မာ ရာဓော။ပေ.။ ဧကမန္တံ နိသိန္နော ခော အာယသ္မာ ရာဓော ဘဂဝန္တံ ဧတဒဝောစ – ‘‘သာဓု မေ, ဘန္တေ, ဘဂဝာ သံခိတ္တေန ဓမ္မံ ဒေသေတု , ယမဟံ ဘဂဝတော ဓမ္မံ သုတ္ဝာ ဧကော ဝူပကဋ္ဌော အပ္ပမတ္တော အာတာပီ ပဟိတတ္တော ဝိဟရေယ္ယ’’န္တိ။ ‘‘ယံ ခော, ရာဓ, အနိစ္စံ တတ္ရ တေ ဆန္ဒော ပဟာတဗ္ဗော။ ကိဉ္စ, ရာဓ, အနိစ္စံ တတ္ရ တေ ဆန္ဒော ပဟာတဗ္ဗော? စက္ခု အနိစ္စံ , ရူပာ အနိစ္စာ, စက္ခုဝိညာဏံ။ စက္ခုသမ္ဖသ္သော။ ယမ္ပိဒံ စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနိစ္စံ။ တတ္ရ တေ ဆန္ဒော ပဟာတဗ္ဗော။ပေ.။ ဇိဝ္ဟာ။ ကာယော။ မနော အနိစ္စော။ တတ္ရ တေ ဆန္ဒော ပဟာတဗ္ဗော။ ဓမ္မာ။ မနောဝိညာဏံ။ မနောသမ္ဖသ္သော။ ယမ္ပိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနိစ္စံ။ တတ္ရ တေ ဆန္ဒော ပဟာတဗ္ဗော။ ယံ ခော, ရာဓ, အနိစ္စံ တတ္ရ တေ ဆန္ဒော ပဟာတဗ္ဗော’’တိ။ တတိယံ။
76. Atha kho āyasmā rādho…pe… ekamantaṃ nisinno kho āyasmā rādho bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu , yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti. ‘‘Yaṃ kho, rādha, aniccaṃ tatra te chando pahātabbo. Kiñca, rādha, aniccaṃ tatra te chando pahātabbo? Cakkhu aniccaṃ , rūpā aniccā, cakkhuviññāṇaṃ… cakkhusamphasso… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ. Tatra te chando pahātabbo…pe… jivhā… kāyo… mano anicco. Tatra te chando pahātabbo. Dhammā… manoviññāṇaṃ… manosamphasso… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ. Tatra te chando pahātabbo. Yaṃ kho, rādha, aniccaṃ tatra te chando pahātabbo’’ti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၅. ပဌမဂိလာနသုတ္တာဒိဝဏ္ဏနာ • 1-5. Paṭhamagilānasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၅. ပဌမဂိလာနသုတ္တာဒိဝဏ္ဏနာ • 1-5. Paṭhamagilānasuttādivaṇṇanā
